أخيرًا جبت بولو

[elshrpeny]

الف شكر يا michael lanos

طيب يا عماد متعرفش سعر الدراع دا كام ؟
وكمان هل فى منه انواع اقصد يعنى هل فى اشكال مثلا سبور او معدنيه مثلا يكون شكله احدث واحسن من بتوعها العاديين ولا اجيب العادى بتاعها اضمن و أحسن ؟

اه ولما بتيجى ترجع مارشيدير بالعربيه فانوس واحد من الاتنين هو الى بينور ابيض ولا الاتنين لان انا عندى واحد بس الى بينور؟

وكمان الاستبن الى بيجى معاها بيبقى ارفع وأصغر فى الحجم من الى بيبقى راكب فيها طيب هل لما أجى استخدمه إن شاء الله يشتغل عادى زى الكبار بتوعها ولا مثلا اشترى واحد كبير زى ال4 بتوعها ويبقى كدا اضمن واحسن وفى نفس الوقت يحافظلى على العربيه ؟

بالنسبه للكريك الى بيجى معاها برده حاجه كدا بحس انها منظر وخلاص مهيش ذات فاعليه يعنى فبيتهيقلى انه لازم اشتريلها كريك محترم أحسن من كدا, ايه هو بقى احسن نوع ويكون تمنه معقول برده اقدر اشتريه ؟

وكمان كنت عايز استفسر عن فرامل العربيه هل فراملها ABS او EBD زى الى موجوده فى العربيات الحديثه ولا فراملها عاديه ؟

وبالنسبه للشبكه الموجوده فى الأكصدام الامامى دى لما اجى احب اركبلها فوانيش شبوره هل بتتفك و تتغير ولا بيتفحر على أد الفوانيس ولا إيه ؟


ولما أكون عايز أجيب رقم شاسيه العربيه الطويل ده الى بيتعرف منه بلد الصنع والموديل و سنة الصنع أجيبه منين فى العربيه ؟ و هل فى موقع مثلا اقدر اكتب فيه رقم الشاسيه او رقم الماتور الى فى الرخصه بتاعتها يجبلى رقم الشاسيه الطويل بتاعها ولا مفيش غير أنى أجيبه من العربيه نفسها ؟

والسلام عليكم وحمة الله وبركاته

[iBiZa]

طيب يا عماد متعرفش سعر الدراع دا كام ؟

لا بصراحة لانى محتجتش اجيب واحد, بس انا عارف انة موجود جديد و استيراد.

وكمان هل فى منه انواع اقصد يعنى هل فى اشكال مثلا سبور او معدنيه مثلا يكون شكله احدث واحسن من بتوعها العاديين ولا اجيب العادى بتاعها اضمن و أحسن ؟

هو النوع اللى عند كل الناس واحد, بس انت ممكن تروح لبتوع الكماليات تشوف لو عندهم حاجة تركب مكانة. و الافضل انك تفكة معاك عشان تتاكد ان اللى هتجيبة يبقى نفس القلب عشان يركب علاطول.

اه ولما بتيجى ترجع مارشيدير بالعربيه فانوس واحد من الاتنين هو الى بينور ابيض ولا الاتنين لان انا عندى واحد بس الى بينور؟

اللى بينور فى المارشدير هو الفانوس اليمين بس, لان التانى مكان المارشدير فية VW حاطة الFog Light و دة موجود فى عربيات اوروبى كتيرة اوى.

ممكن تجرب الFog Light الخلفى بانك تولع النور و تشد زرار النور لبرة تكة واحدة, هتلاقى كمان علامة صفرة فى الابلوة عشان تقولك انة شغال.

وكمان الاستبن الى بيجى معاها بيبقى ارفع وأصغر فى الحجم من الى بيبقى راكب فيها طيب هل لما أجى استخدمه إن شاء الله يشتغل عادى زى الكبار بتوعها ولا مثلا اشترى واحد كبير زى ال4 بتوعها ويبقى كدا اضمن واحسن وفى نفس الوقت يحافظلى على العربيه ؟

الاستبن دة هم عاملينة كدة عشان Save Space فى الشنطة و بيشتغل عادى بس متزودش عن 80كم/ساعة, انا جايب جنط كبير عشان انا بسافر كتير و مينفعش اتحط فى الموقف دة لان البنزينة ممكن تكون بعد 100 او 150 كيلو بس مشكلتة ان ارضية الشنطة هتبقى عالية و مش مستوية عشان هو اعلى من الاصلى بتاعها الصغير.

بالنسبه للكريك الى بيجى معاها برده حاجه كدا بحس انها منظر وخلاص مهيش ذات فاعليه يعنى فبيتهيقلى انه لازم اشتريلها كريك محترم أحسن من كدا, ايه هو بقى احسن نوع ويكون تمنه معقول برده اقدر اشتريه ؟

بالعكس انا مجربة كتير و اثبت فاعلية و معملش حركات نقص خالص + ان استعمالة مش متعب, انا برفع بية عربيات اصحابى كمان.

وكمان كنت عايز استفسر عن فرامل العربيه هل فراملها ABS او EBD زى الى موجوده فى العربيات الحديثه ولا فراملها عاديه ؟

عندك فرامل عادية خالص, الABS بينزل فى ال1400 و ال1600 بس.
معندناش اصلا EBD
الESP نزل فى عربيات نادرة اوى و اعتقد كانت Diesel و لانجلترا.

وبالنسبه للشبكه الموجوده فى الأكصدام الامامى دى لما اجى احب اركبلها فوانيش شبوره هل بتتفك و تتغير ولا بيتفحر على أد الفوانيس ولا إيه ؟

المفروض تتغير بس غالبا مش هتلاقى منها جديد و نادرة شوية استيراد, فا لو قفلت اوى قص على اد الفانوس لحد لما تجيب الوش الجديد.

ولما أكون عايز أجيب رقم شاسيه العربيه الطويل ده الى بيتعرف منه بلد الصنع والموديل و سنة الصنع أجيبه منين فى العربيه ؟ و هل فى موقع مثلا اقدر اكتب فيه رقم الشاسيه او رقم الماتور الى فى الرخصه بتاعتها يجبلى رقم الشاسيه الطويل بتاعها ولا مفيش غير أنى أجيبه من العربيه نفسها ؟

لما تفتح الكبوت, و انت واقف ادام العربية, هتلاقى فى الناحية الشمال قرب التابلوة بلاستيكة شفافة تحتيها الرقم دة.

http://igorweb.org/vindec/Default.aspx

[elshrpeny]

يكون قصدك على ال EPC او ال EPS تقريبا مش فاكر بالظبط الى بتنور أصفر فى عداد الكيلوات إلى على اليمين يكون دا بيعنى إن ال fog light دا شغال ولا إيه؟
طيب وهو ايه معنى ال fog light اساسا وايه استخدامه اصلا وبعدين انت تقصد ايه بإنى اولع النور يعنى تقصد اجيب مفتاح النور على العالى يعنى على اليمين واشده شده واحده لبره وبكدا يشتغل ولا ايه ؟


وبالنسبه للكريك يا عماد الكريك دا خفيف خالص هل مخفش منه لما اجى ارفع بيه العربيه يعنى يشيل العربيه كويس ولا ممكن يتكسر ؟


طيب ولو الشبكه دى توافرت الى هيه بتاعة فوانيس الشبوره دى سواء جديد او إستيراد هتبقى فى حدود كام ؟

وبالنسبه للموقع الى انت جبته دا اكتب فيه ايه بالظبط لانى جيت اكتب رقم الشاسيه أو رقم الماتور الى فى الرخصه دول بيقوم كاتبلى الرساله دى
The length of VIN has to be exactly 17 characters!


وكنت عايز أعرف يا عماد هو ايه الفرق بين البولو ال2000 وال 2001 غير الكماليات وازاى اعرفهم من بعض من غير طبعا ما اجيب رقم الشاسيه الخاص بيهم وهل ال 2001 اوسع فى الهيكل او فى الصالون ولا الاتنين واحد ؟


واخيرا كنت عايز اعرف برده ال MPI الى مكتوبه على الماتور تعنى إيه ؟


معلش بتعبك معايه عماد والف شكر على مجهودك معايه

[iBiZa]

يكون قصدك على ال EPC او ال EPS تقريبا مش فاكر بالظبط الى بتنور أصفر فى عداد الكيلوات إلى على اليمين يكون دا بيعنى إن ال fog light دا شغال ولا إيه؟

الEPC دية لمبة الElectronic Pedal Control و دية بتاعة الدواسة الكهرباء.

لما تشغل الFog هتلاقى لمبة تانية صفراء نورت على الشمال تقريبا (مش فاكر عشان الفيوز عندى اتحرق من شهر و مكسل اغيرة)

طيب وهو ايه معنى ال fog light اساسا وايه استخدامه اصلا

دية عربيات اوروبى فا عندهم ضباب كتير فا بيستخدة عشان يبين ضهر العربية عشان نورة اشد من اللمبات الخلفية بتاعة النور الصغير.

وبعدين انت تقصد ايه بإنى اولع النور يعنى تقصد اجيب مفتاح النور على العالى يعنى على اليمين واشده شده واحده لبره وبكدا يشتغل ولا ايه ؟

بالظبط كدة. جربها قولى.

وبالنسبه للكريك يا عماد الكريك دا خفيف خالص هل مخفش منه لما اجى ارفع بيه العربيه يعنى يشيل العربيه كويس ولا ممكن يتكسر ؟

صدقنى بيستحمل و ثابت و معملش اى مشاكل معايا خالص. هو انت غاوى مصاريف و خلاص ؟؟:k49:

طيب ولو الشبكه دى توافرت الى هيه بتاعة فوانيس الشبوره دى سواء جديد او إستيراد هتبقى فى حدود كام ؟

مفيش جديد, اما استيراد فا بيبيعلك الطقم كلة على بعض, فانوسين الشبورة + الشبكتين الصغيرين + مفتاح النور (لان اللى عندك تكة واحدة بيشغل اللى ورا بس و النى لازم تكتيين عشان ورا و قدام). الطقم عامل فى حدود 1000 جنية.

وبالنسبه للموقع الى انت جبته دا اكتب فيه ايه بالظبط لانى جيت اكتب رقم الشاسيه أو رقم الماتور الى فى الرخصه دول بيقوم كاتبلى الرساله دى
The length of VIN has to be exactly 17 characters!

لازم رقم الشاسية اللى على العربية و هتلاقية فى المكان اللى قلتلك علية و هو رقم طويل.

وكنت عايز أعرف يا عماد هو ايه الفرق بين البولو ال2000 وال 2001 غير الكماليات وازاى اعرفهم من بعض من غير طبعا ما اجيب رقم الشاسيه الخاص بيهم وهل ال 2001 اوسع فى الهيكل او فى الصالون ولا الاتنين واحد ؟

مفيش فرق.

واخيرا كنت عايز اعرف برده ال MPI الى مكتوبه على الماتور تعنى إيه ؟

Multi-Point Injection و دة نظام حقن الوقود جوة الموتور.

[elshrpeny]

الف شكر يا عماد بس انت تعرف إن انا شكلى عشان اخلى العربيه شكلها زى ما انا عايز وامكانياتها زى ما انا عايز يبقى هصرف عليها كتير فعلا وهيتخرب بيتى دا انا لسه مفوقتش من تمنها هروح اصرفلى بتاع 5 او 6 الااف جنيه عليها فشكلها كدا منيش جايب اى حاجه خالص الاا المهم الى من غيره اعطل وخلاص والى ابقى احتاجه ابقى اجيبه وخلاص واحده واحده بقى .

ولا انت إيه رأيك عماد ؟
وعايزك تقولى كمان انت اما أشتريت بتاعتك ايه الضرورى إالى جبتهولها وأيه الى مع الوقت لاقيته ضرورى وجيبتهولها ؟

وكنت عايز اعرف الطاسات بتوع الفرد الأصليين دول فى بيتباع زيهم سواء جديد او أستيراد ولو فى بكام يا عماد ؟

وألف شكر وجزاك الله كل خير ويا ريت مكونش دايقتك .

[elshrpeny]

ونسيت أسالك عماد , انا عربيتى نمر قاهره و الرخصه تبع مرور المعادى فإيه بقى الموقع الى أقدر من خلاله اعرف اذا كان على العربيه مخالفات ولاء فى المرور لان انا كنت جربت ابحث عن الموقع دا فلى وصلتله مبيجبليش الاا منطقتين القاهره ومصر الجديده أجى اختار مصر الجديده واقول المعادى هتبقى من ضمنها برده مبلاقهاش فى اللسته الى تبع مصر الجديده برده فا يا ريت تقدر تفيدنى فى الموضوع دا .

[iBiZa]

ولا انت إيه رأيك عماد ؟

لا انا فى الموضوع دة ماليش رأى, دية حاجة راجعالك انت و امكانياتك و اولوياتك.

وعايزك تقولى كمان انت اما أشتريت بتاعتك ايه الضرورى إالى جبتهولها وأيه الى مع الوقت لاقيته ضرورى وجيبتهولها ؟

لا مافيش حاجة حسيت انها ضرورى, هى من ناحية ماشية فا هى ماشية و زى الفل, انت بقى لما تحس ان فية حاجة ناقصاك و معاك فلوس ابقى انزل نفذ.

وكنت عايز اعرف الطاسات بتوع الفرد الأصليين دول فى بيتباع زيهم سواء جديد او أستيراد ولو فى بكام يا عماد ؟

مفيش جديد, الموجود استيراد بس قليل و غالى, اعتقد الطقم يعمل 200 او 300

انا عربيتى نمر قاهره و الرخصه تبع مرور المعادى

المعادى خلاص مبقتش تبع القاهرة
هو site واحد بس اللى فية المخالفات و هو دة https://www.masr.gov.eg/arabic/servi...ction=Citizens لو ملقتش فية يبقى لازم تروح المرور بتاع المعادى عشان تعرف.

[elshrpeny]

الف شكر يا عماد
بس كنت عايز اعرف هو ايه الفرق بين الشبكه العاديه الى بتيجى مع العربيه والشبكه ال GTI الى انت جبتها دى يا عماد

ولو انا حبيت أحمى الكراسى من البهدله او انها تتعرض لأى حاجه تأثر عليها هل فى مثلا كوفر قماش او جلد او أكياس نايلون بتتباع اقدر اجيبهالها ؟ ولو انا حبيت اعمل الكراسى جلد فى يوم من الايام هل دا يبقى مفيد للكراسى ولا بالعكس بيبوظها ولا ملوش لازمه اسيبها كدا احسن ?

[iBiZa]

بس كنت عايز اعرف هو ايه الفرق بين الشبكه العاديه الى بتيجى مع العربيه والشبكه ال GTI

الفرق فى الشكل, شبكة الGTI احلى, و الاتنين بيركبوا على نفس المكان و علامة الVW بتاعتهم واحدة.

دة شكل الشبكة العادية:


و دة شكل الشبكة الGTI

ولو انا حبيت أحمى الكراسى من البهدله او انها تتعرض لأى حاجه تأثر عليها هل فى مثلا كوفر قماش او جلد او أكياس نايلون بتتباع اقدر اجيبهالها ؟ ولو انا حبيت اعمل الكراسى جلد فى يوم من الايام هل دا يبقى مفيد للكراسى ولا بالعكس بيبوظها ولا ملوش لازمه اسيبها كدا احسن

الخامة بتاعة الصالون نضيفة و بتستحمل فا لو عايز تسيبها كدة شغال.

انا عندى مبدا سخيف فى الموضوع دة: فرش الفابريكة طول عمرة احلى من اى فرش هتركبة علية فا انا سايبة كدة عشان استمتع بية. و اخرتها لو اتبهدل هبقى اجيبلة فرش.

[elshrpeny]

تمام يا عماد هو مش رأى سخيف ولا حاجه ودا كمان يعتبر رأيى انا كمان بس انا كان وجهة نظرى ان احاول احميه اكتر فتره ممكنه على اساس يعنى ان تبقى الكراسى بحالتها فتره كبيره فهمتنى ؟

وبالمناسبه انا جربت فعلا انى أجيب مفتاح النور على العالى على اليمين واشده شده وفعلا جيت اشده لاقيته طلع معايه وكمان فعلا رمز الكشاف باللون الاصفر نورلى فى العداد الى على الشمال وكله تمام .

وبقولك عماد مفيش موقع اقدر الااقى فيه صور لكماليات و أكسسوارات للعربيه وتكون اًصليه , ولو مفيش برده قولى على موقع لكماليات واكسسوارات عموما للعربيات بس يكون طبعا ينفع للبولو .

[iBiZa]

للاسف معرفش غير www.ebay.co.uk و دة الوحيد اللى بجيب منة, بس فية مشكلتين ان دة فى انجلترا فا دركسيون يمين و مش كل حاجة هتركب عندك + محتاج Paypal و دة مش شغال فى مصر + معندهمش حاجات كتير.

[momomania22]

yayeb law nawy 3la polo 2003 ....atekel 3la allah....7ad yeshga3ny w ye2olly akshef 3aleha fen wezay....plz replay...thanks

[algeneral]

الطاره Airbag عامله 400 جنيه من بورسعيد

[GAFFER]

اريد انسب فتيس للبولو 1300

[mido_919]

مبروك يا باشا ربنا يباركلك فيها