انا اتنصب عليا يا جماعة وخلي بالكو

[zizo151]

السلام عليم ورحمة الله وبركاتة
الاخوة الاعضاء الافاضل
اولاً: حسبي الله ونعم الوكيل في كل واحد فاتح ورشة او مركز صيانة ومش بيتقي ربنا في شغلة

ثانياُ : احب احذر الاخوة الافاضل من التعامل مع مركز صيانةاسمو Fixit كان فاتح خلف بنزينة وطنية على الدائري اللى عند كارفور المعادي وقفل المركز وفتح مكانو مركز جديد بتاع متسوبيشي (معرفش عنو حاجة) بس المركز النصاب اللي نصب عليا فتح في نفس المنطقة ونفس الشارع بس قدام شوية

الموضوع اللي حصل معايا :
من فترة اشتريت جولف فايف وكانت محتاجة شورت بلوك وعلشان انا ساكن في المقطم قولت اما اروح اسأل الناس دي على المواتير ، فقابلت واحد شغال في المركز اسمو امير وهوه الدراع اليمين بتاع صاحب المركز وسألته على الماتور ال2000 cc بتاع العربي دي وكان ردة " عندي واحد لسة جيلي في نص ومتاخد منو الفتيس بس " فقلت اتوكل على الله واشترية واتفقنا على السعر وكل حاجة وجبتلهم العربية وبصراحة الناس كان شكلها محترم اوي
سبت العربية عندهم بتاع اسبوع او 10 ايام علشان يسقطو الماتور وبعدها قالولي احنا حنخلص ونقفل الماتور انهاردة تعالى علشان تشوفو
المهم روحت وعلى بليل كدة ادوني العربية علشان اجربها ولقتها وحشة ومبتسحبش خالص المهم رجعتلهم وقولتلهم هو الماتور دة 2000 cc قالولي اه بس هوه محتاج شوية تظبيط بسيط وعلشان انتا مستعجل بس خد العربية اركبها وهتهلنا في اي وقت حنعملك الحاجات البسيطة دي فقولتلم ماشي
لقيت احمد وصفي صاحب المركز بيقولي بس انا محتاج ثمن الماتور علشان انا لسة مدفعتش فلوسة للمستورد فقولتلو بس الماتور لسة مخلصش وانا معرفش حالتة ايه " قالي الماتور يعتبر زيرو ومتخفش لو فية اي حاجة بتاعي "
فا انا قولت دة مركز كبير والناس شكلها كويس ومش حينصبو عليا " واديتو الفلوس"
قالي اركب العربية يومين واكتب كل الحاجات اللي فيها وانا تحت امرك ...
وروحتلو بعدها بيومين بالحاجات اللي في العربية وكانت النتيجة كالتالي:-
1- اولا ركني بتاع ساعة عندو في المركز بحجة انو مش فاضي وعندو شغل كتير ولما بدأت اقفش بدء يسألني ايه اللي عندك
2 - لما شاف الورقة اللي فيها الملاحظات بدء يقولي اصل انتا عندك مشكلة في (الكنترول - طلمبة البنزين - حساس الحرارة - ............. الخ) ماعدا الماتور وطبعا علشان يعجزني في صيانة الحاجات دي علشان تكلفتها عالية مع اني عارف انها سليمة ومع ذلك انا قولتلو انا حصلحها او حغيرها ومعنديش مشكلة
3- بدء يديني ارقام لكنترولات وحساسات مش موجدة تماماً في مصر علشان لما ملقيهاش يقولي هيا دي اللى عاملة مشكلة في الماتور وبعدها انا اسكت ومطلبش منو حاجة
4- المهم جبتلو لبن العصفور اللي هوه طالبو بصعوبة جدا وبسعر غالي جدا وادتهولو "طبعاً هو استغرب"
5- دخلني في قصص تانية وهيه ان طلمبة البنزين مش ماشية مع الماتور وخراطيم البنزين لازم تتعدل علشان الماتور فية راجع بنزين وانا عندي العربية مفيهاش خرطو للراجع " وطبعا قالي دي قصة كبيرة وحتاخد وقت كتير " قولتلو مش مشكلة بس اخلص
6- كل ما ارحلو المركز يقولي انا مش فاضي انهاردة والكلام دة مافتش علية شهر
7- لحد ما قولتلو الماتور دة مش حلو وصوتو مش حلو وتعبان جدا معايا
وكان الرد " [OVERLINE]الراجل (المستورد) خلاص خد فلوس الماتنور ومش حيرجعو[/OVERLINE]"
والماتور اللي معاك كويس ومفيهوش حاجة بس انتا زبط الكهرباء وطلمبة البنزين
وبدأ يوصلي ان دة اخرو في العربية ومش حيعرف بعمل حاجة تاني فيها ( فقلت اروح لحد تاني يبوصلي عليها )
قولتلو طيب انا عايز ورق العربية علشان ارخصها قالي اديني اسبوعين وحهزهملك .
وقعدت اسبوعين في اسبوعين في شهر ......
لحد ما لقيت ان المركز دة قفل فسألت الكشك اللي فاتح قدامو قالي هو قفل بس انا سامع انو فتح في نص الشارع اللي قدامة
فروحت المركز وفعلا لقيت الناس اللي شغاله هناك هيه هيه بس الجوز اللي كانو معاه اللي هما احمد حفني وامير بيقولولي انهم فتحو المركز دة لوحدهم واحمد وصفي صاحب المركز مش عارفين نوصلو واننا ملناش علاقة بماتورك دة (على فكرة امير هوه اللي استقبلني في الاول خالص وقالي انو عندو الماتور) وبعد كام مشكلة وسبت العربية كتير عندهم فوجئت باخر مرة كنت عندهم انهم بيكلمو واحد مستورد في الحرفيين علشان يضربو ورق للماتور والماتور دي ملوش ورق عندهم (وانا لقت النمرة منهم وهما بيكلموة) وكلمت الراجل وعرفت ان الماتور ملوش ورق والراجل كان حيدخل رقم الماتور من ضمن الحاوبة اللي بيدخلها ويضربلو ورق ويدفعولو جورك وكخلافة ........ ومعايا المكالمة المسجلة ما بيني وبين الراجل دة
اللي عايز اوصلو من القصة دي :
1- متشتريش عربية محتاجة ماتور
2- لو حصل وقررت تشتري ماتور اعمل عقد مع اللي حتشتري منو الماتور برقم الماتور علشان تضمن حقك
3- اتفق مع اللي حتشتري منو الماتور انو لما يركب حتكشف علية وحتكبسو ولو طلع مش حلو او خفيف حتغيرو او حيرجعلك فلوسك
4- اخر حاجة والاهم احذرو التعامل مع المركز دة او الناس دي (احمد وصفي - احمد حفني - امير ) عندهم مركز على الدائري في الهضبة الوسطى في المقطم
ويا جماعة لو سمحتو انا بحكي القصة دي علشان لو حد ناوي يغير ماتور او يشتري عربية محتاجة ماتور ياخد بالو ...... مش اكتر ..... لذا وجب التحذير

[ahmad--ezzat]

عالم متعرفش ربنا وكل همهم الفلوس
الحمد لل على كل شيء فداك ومحدش بيتعلم ببلاش

[zizo151]

شكرا لحضرتك

[Mohamed Desoky]

ربنا معاك وربنا ينتقم من الظلمه النصابين ويخلف عليك بلحلال ؟

[Colin Chapman]

ربنا معاك وربنا ينتقم من الظلمه النصابين ويخلف عليك بلحلال ؟

[DESIGNER105]

الحل دلوقتى تروح لمكانيكى يكون ثقه يشوفلك ايه مشكلة الموتور ويزبطلك الماكنه ..ومن الناحيه التانيه تفضل ورا الناصبين الى بعولك الموتور وتاخد منهم وورق...وممكن تعمل محضر اثبات حاله الاول عشان لو ورق الموتور اتكتشف انو مضروب فى المورور او حاجه متدخلش انت فى مشكله ...وربنا يعوض عليك

[msa142]

المركز دا سقطلك مكنه كانت مستعمله واتفكت بعد ماتعملها عمره واتهلكت وانتا مش عارف وهوا اخد الفلوس فى جيبه على اساس انه اتفق مع مستورد, والدليل انه مش معاه ورق وهوا ضامن انك مش هتعرف تثبت اى حاجه عشان مكنتش متابع معاه من الاول واديتله الامان غلطك انك مشتريتش الموتور بنفسك من مستورد وربطت معاه عشان بيضمنلك المكنه على الاقل 10 ايام لو فيها حاجه ترجعهاله وتاخد فلوسك ودا المعروف عند اى حد بتاع استيراد.
عوضك على الله ياباشا عشان كدا انتا دخلت فى حوارات صعب حلها غير بالبلطجه.

[Abo_Mazen]

أولا حسبي الله ونعم الوكيل في كل واحد بيستحل فلوس الناس كده بمنتهى السهولة ..مع إن أي مجرم فيهم ديته إن النفس اللي داخله ما يطعلش تاني ..
ثانيا ..أنا طبعا مش هقول إنك غلطان من ساسك لراسك ..لكن في غلطة كبيييييييييره قوي انا أخدت بالي منها من أول ما بدأت أقرا المشاركة بتاعتك ..إنك إتعاملت مع ناس من خلال تقييمك الشخصي ..بص ..في تعاملك مع تجار الإستعمال سواء قطع غيار أو محركات ..لازم تتعامل مع تاجر يكون حد جربه ويكون حسن السمعة ويكون بيخاف على سمعته ..أنا لسه مسقط موتور من حوالي تلات شهور على فكره ..ورغم إني عارف إن اللي أنا أخدت منه الموتور مديهولي أغلى 1500 جنيه عن بورسعيد مثلا ..بس أخدته منه برضه وخصوصا إن الشغل كله إتعمل عنده ..يعني شغل تسقيط الموتور وتقفيل المكنه ..الراجل اللي انا أخدت منه الموتور سألت عليه بدل المره عشرين ..سألت عليه في المنتدى هنا وسألت عليه على صفحات الفيس بوك وسألت عليه ناس إتعاملت معاه من على صفحات الفيس بوك وأنا نفسي إتعاملت معاه في قطع غيار إستيراد قبل كده ..وكان إنطباعي عنه إنك تموته ومتبوظش سمعته ..سمعته دي هي اللي مخلياه يبقى معروف على صفحات الفيس بوك وعلى مستوى إسكندرية كلها ..
طبعا ..لله الأمر من قبل ومن بعد ..ولقد قضى الله أمرا كان مقضيا ..لكن مش طبيعي أبدا إني مجبش موتور لعربية محتاجه موتور ..لكن كل القصة هي التحري وخصوصا إني هدفع فلوس

[أمين سرحان]

كله نصب فى نصب مفيش حته فيكى يامصر إلا والنصب فيها ، حسبى الله ونعم الوكيل .

[م/أحمد عبد الفتاح]

الموتور القديم فين لو لسه عندك يبقى تعمره وهو برة العربية عند حد كويس وتسأل عليه بدل المرة الف مرة - وتتابعه كويس جدا ولما يخلص عمرته ان شاء الله تروح تسقطه لان الموتور اللى راكب عندك لو ليه ورق كان ظهر وبان وومش حاتعرف ترخص العربية كده علشان الموتور مخالف فى الرقم ومالهوش عقد - اللى تقدر تعمله انك تعملهم محضر فى القسم اللى فيه الورشة وتتهم اللى انت لقيته فى الورشة مش الراجل المستخبى وهما حايجيبوه ويحققوا معاه وممكن ساعتها يقدر يجيبلك صاحب الموتور ويعملك عقد لو كان الموتور مفكوك من عربية ماشية فى مصر

[AHMEDJUDDY]

حسبي الله و نعم الوكيل ،، ان شاء الله هتأكد حقك في الاخره من الناس دول ،،

[محمد محمد مدين]

شكرا لحضرتك على النصيحة المهمة جدا والمفروض أن حضرتك بتتعامل مع ناس لاشئ عندهم الا النصب والتدليس وأهم شئ الآن تتخذ آى اجراء يحقظ حقك ومتكونش محل مسائلة بسبب الموتور بدون أوراق

[sherif010]

حبسى الله ونعمة الوكيل ربنا انشالله هيعوضك متزعلش فداك