1300 جنيه ضاعو مني في بلاعة

[Ahmosality]

السلام عليكم
حسبي الله ونعم الوكيل
عربيتي عاملة 5000 كيلو جيتا 2009
خدت مطب (بلاعه) من يومين تقريبا و اليوم وانا بعمل الصيانة والعربية مرفوعه اكتشفت كوارث المطبات عملاها فيا
1 - في تقفيل صاج من تحت العربية لاقيتو مكبوس جامد ومقطوع من مطب تاني غير البلاعة
2- تقفيل فايبر من تحت الاكصدام مقطوع بردو من مطب
3- فانوس الشبورة اليمين مكسور ( اعتقد من القرف الي موجود على الدائري من زلط ورمل وغيرو )
4- و دي بسبب البلاعة المذكورة لاقيت بالونة في جنب العجلة الشمال قدام و سألت على نفس نوع الكاوتش ونفس المقاس لاقيتها ب 1300 جنيه http://1.1.1.5/bmi/www.nilemotors.ne...653%5B1%5D.gif
انا بصراحة مش عارف اعمل ايه في موضوع المطبات ده .. الموضوع فعلا زيادة عن اللزوم
و البلونة دي ملهاش حل تاني يا جماعة غير تغيير الكاوتش

[ابوهاشم]

ربنا يعوض عليك هنعمل ايه بس والله الواحد خلاص مبقاش لاى طريق سليم فى القاهره كلها دلوقتى تلاقى طريقك شمال بلاعات ويمين حفر ومطبات

[معتز]

اعتقد انك محتاج تراجع نفسك شوية...السرعات اللى بتتحرك بيها ... اسلوب الحركة على الطرقات الغير ممهده...يعنى... انا معاك طبعا الطرق سيئة بس ده لازم يجعلنا ناخد احتياط اكثر.............ربنا يستر

[Hossam_Zaky]

مساء الخير
بالنسبة لموضوع البالونة . للأسف مفيش غير أنك تشتري فردة جديدة لأن دي خلاص مبقتش أمنة
و أهلا بك في مشاكل الجنوط ال17 / 45
أولا : حتلاقي سعر فردة الكاوتش بداية من الكوري 500 جنيه لحد بريدجستون 1200 لـ 1400 جنيه تقريبا و فيه كمان الكونتيننتال اللي راكبة عندك بتوصل لحد 2000 جنيه
متجيبش حاجة من دول لأنها حتبوظ تاني
لازم تجيب كاوتش يكون جنبه اللي هو في مقاس العجلة ( 45 ) جامد صلب أكتر من العادي و ده غالي لأن الجنب الواطي علي الجنط الكبير بيبوظ لو حتي أخدت مطب هوا علي سرعة عالية و ده عن تجربة جيتا برضه بتاعة صاحبي و أخيرا بعد أستعمال 4 شهور لموديل 2009 خليجي و تغيير 4 فرد كاوتش ( مش مع بعض ) كل فردة بقت نوع مختلف عن التاني
اللي كان كويس نوع أندونيسي بـ500 جنيه جنبه ناشف يستحمل و له شفة بتبقي قافلة علي شفة الجنط و بتستحمل بس مش فاكر أسمه لما أشوف صاحبي بكرة حعرفهولك
أوعي تجيب الكونتيننتال لأنه جنبه طري مينفعش شوارع و مطبات مصر
أبقي روح الحي السادس مدينة نصر عند محل الجنوط و الكاوتش ( بركة ) محمد بركة ده صديق و راجل محترم حيشرحلك اللي أنت محتاجه و ممكن يجيبلك الكاوتش اللي أنت عاوزه

[Hossam_Zaky]

و علي فكرة ده مش عيب سواقة المشكلة أن الجنوط الكبيرة بيركب عليها كاوتش جنب واطي عشان الثبات في السرعات العالية و مش معمول حساب أنها حتمشي في شوارعنا اللي كلها مطبات و حفر
يعني لما تاخد بالك من الكاوتش مش حتعرف تسوق العربية و حتخاف عند كل مطب لأنك لازم تاخده بالهادي جدا
و علي فكرة ده في رأيي العيب الوحيد للجيتا مع أرتفاعها المنخفض عن الأرض

[ahit]

لا حول و لا قوة إلا بالله العلى العظيم

ربنا يعوض عليك و يكفيك شرها إن شاء الله

هى دى بلدنا و لازم نتماشى مع جميع الأوضاع عشان نعيش ( مطبات هوا - حفر - مطبات - مطب صناعى زى السد العالى - عربيات رمل و زلط من غير غطا - و بلاعات عالية أو واطية أو مكشوفة و مفتوحة - مفاصل كبارى متخصصة فى قطع الكاوتش و غيره و غيره )

و الحمد لله رب العالمين على كل شىء و قدر الله و ما شاء فعل

[zizophone]

دي بلد زبااااااااااااااااااله

[احمد عبدالله]

ربنا يعوض عليك

[zeyad1810]

كويس انها جت على كدة
المهم انك كويس وبسيطة

[Hesham_91]

لا حول ولا قوة الا بالله ربنا يعوض عليك بلد .............

[أحمد سالم]

ربنا يعوض عليك
والله تذكرت المقوله الشهيره لسيدنا عمر بن الخطاب رحمه الله:
[[لو عثرت دابة بشاطئ الفرات لظننت أني مسئول عنها لم لم أعبد لها الطريق ] هذا في تعبيد الطريق للدواب فما بالك بحقوق البشر!
فأين انتم ايها المسؤلين عن شعب مصر من هذه المقوله
(( من لا يرحم لا يُرحم ))

[Ahmosality]

السلام عليكم
ربنا يبارك فيكم جميعا
اشكركم يا جماعة على احساسكم بيا وربنا يحفظكو ويحفظنا جميعا من شر الطرق
والحمد لله رب العالمين على كل شئ
والله انا بحاول دايما اني اخد بالي من المطبات و البلاعات بس الموضوع زيادة فعلا العربية كمان فعلا واطية و بتحك في معظم المطبات بالرغم من ان انا دايما باخد المطبات بعرض العربية وبالراحة جدا لدرجة ان الناس الي بتكون ورايا بتزهق مني
حسام زكي : اشكرك جدا على تعاونك وربنا يكرمك
انا عاوز اشوف المحل ده علشان انا مكنتش اعرف ان العجل ده ضعيف للدرجة دي
انا تحركاتي كتيير على الدائري و بعاني معاناه شديدة من الزلط والرمل الرهيب من العربيات النقل هو ازاي الموضوع ده سايب كده بدون رقابة انا خدت زلطة قبل كده في السقف عملت كدمة رخمة اوي وجرحت الدهان
ووش العربية والكبوت عليه خطوط من الرمل
البلد فعلا بقة في حالة يرثى لها
مع خالص شكري وتقديري لكم جميعا

[Hossam_Zaky]

لا شكر علي واجب يا باشا كلنا أخوة و بنفيد بعض , ربنا معاك

[umoussa]

حاجة بجد تقهر. بس اسمع يا عم القصة الجميلة دي.

أخوك اشترى 7 فرد كاوتش في سنة واحدة
4 في الأول و3 عملوا بلاليين نوع الكاوتش فولدا وإوعى تشتري فولدا أبداً

الكونتيننتال الموجود في السوق برتغالي ودا جودته مش أد كده. نصيحة بجد وبمنتهى الأمانة.

إطلع على بريدجستون، اشتري بوتينزا أدرينالين ياباني مش ماليزي أو إندونيسي بس المشكلة بقى أنك حتحتاج تغيير فردتين لأن اتجاه دوران العجلة دي Inside - Outside بس بجد فردة كوتش معجزة هايلة عمرك محتحس بيها في العربية أنا مركبها من سنة لحد دلوقتي ومكشفتش على النيتروجين غير مرة واحدة وعامل أكتر من 25 ألف وحالة الكاوتش وهمية وصبة طرية وقوية في نفس الوقت. لو عندك وقت روح الفرع الموجود في تقاطع عباس العقاد مع مصطفى النحاس، روح الصبح حتلاقي مهندس وهمي هناك أظن اسمه نجاد ابيضاني كده وشكله سمح ودقنه وشعره بيض وهو حيديك المفيد وخليه يفرجك على اختبار القيادة على عجل بوتينزا أدرينالين. بص انتك كدا كدا حتكع فلما تكع كع في الصح.

بالنسبة للمصفحة الفبر روح عند أي حد في الحرفيين وخليه يلحمها علشان متدمرش

بالنصبة للصاج المطبق، شوف لو عاصر على اي حاجة تحتيه استعدله فوراً لو مش عاصر سيبه لأنه حيطبق تاني.

وملحوظة أخيرة، لو لقيت أدامك مطب جامد أو بلاعة وحسيت انك لابس لابس أوعى تعمل حاجتين:

- إوعى تاخد المطب بزاوية وده = بالونة في الكاوتش يعيني سلك في الكاوتش اتقطع

- أوعى تدوس فرامل وانت بتاخده، ومش حقدر أقولك دا ممكن يعمل ايه لأنه الأضرار كتير ومتنوعة من تيل فرامل لبواظان بلية بطاحة لمقص وممكن حظك يضرب ويفتك إيرباجات كمان

لو لاقيت نفسك لابس لابس إلبس المطب بشياكة وامسك الدريكسيون كويس.

مطبين ولاد لازينة: في الشارع الفاصل بين مقابر المسحيين والمسلمين في مدينة نصر

والملف الموجود على الطريق الي بيطلع على الدائري من مدينة نصر من ناحية المقطم

مطبين بالشفا