افضل بنزين للبيتل ؟

[El.Hossieny]

يا جماعة انا حبيت افتح الموضوع ده عشان نناقش فيه تجارب الاعضاء في موضوع نوع البنزين المستخدم سواء كان 80 او 90 او 92 حتي ...

يا ريت الناس اللي استخدمت كل نوع تقولنا علي مميزاته و عيوبة ... يعني كل واحد ممكن يقولنا ملاحظتة علي تجربته في النقطة دي

انا بالنسبالي من ساعة ما اشتريت العربية و انا بستخدم بنزين 90 و هو كويس معايا ... بس بيني و بينكم مكلف طبعا ....

بس انا بخاف صراحة احط 80 في العربية .... و كمان موضوع الطوابير اللي علي البنزين ال 80 ده مرهق اكيييد

مستني ردودكم !!!!!!!!!

[amo400]

انا عمرى ما حطيت 80 طبعا طوابير و من ايام الفيات الى كانت معايا ال80 مش نظيف و بيوسخ الفلتر و الكاربراتير انا بحط 90 و ال 92 زيادة بريزة بس يعنى فى ال 30 لتر زيادة 3 جنيه فابحط 92 اكيد انظف

[أحمد سالم]

انا جربت ال80 وال90
ال80 موفر جدا جدا ومش بيخلص بسرعه بس بيخلى عزم العربيه اقل شويه
ال90 مشوار والتانى الاقى المؤشر بينزل انا لاحظت ان ال90 بيطير بسرعه بيخلى العزم رائع
بس العزم مش بيبان الا فى المطالع بس
مش بيبان على السرعات
وسمعت ان فى ناس بتحط 15 لتر 80 وعليهم 5 لتر 90
وبيبقى البنزين كله فى التانك 90 وده من تجارب ناس مش تجاربى انا
بس لازم نعرف معلومه مهمه جدا
ان شركة فولكس لما صممت مواتير البيتلز ماكانش فى بنزين عالى الاوكتين زى دلوقتى
ولا كان فى زيت تخليقى
علشان كده انا رأى ان العربيه الافضل ليها البنزين 80
والافضل ليها ايضا الزيوت المعدنيه
يعنى اعتقد ان البيتلز مش صحيح ان نحط فيها زيت موبيل وان بتاع ال10000 كيلو لانه زيت تخليقى
الافضل ليها الزيوت العاديه ( المعدنيه )
ده مجرد رأى ومالوش علاقه بهندسة المحركات

ومستنيين رأى الاستاذ الكبير احمد حسن

[ابوهاشم]

[ابوهاشم]

السلام عليكم ورحمة الله وبركاته
اولا احب اشكر اخونا الحسينى على طرح الموضوع الجميل ده
بالنسبه للسؤال افضل بنزين يبقى طبعا ال90 مافيش كلام
لكن لما نحسبها بالتكلفه يبقى 80 افضل لانه نص التكلفه تقريبا
ده غير ان ال90 بيطير بسرعه مع الموتور يبقى كده تكلفه تانيه
والسؤال هنا ال80 ينفع مع البيتلز ولالا
عن تجربه شخصيه وسؤالى لكل الميكانيكيه اللى اتعاملت معاهم
ال80 يشتغل كويس جدا مع البيتلز ومافيش مشاكل منه
كل اللى هيفرق معانا هو العزم وبس اما بالنسبه للسرعه مافيش فرق
وبعدين فين الطريق دلوقتى اللى ينفع فيه تسارع من اساسه
ومره والله الميكانيكى قاللى ان ال92 غلط على البيتلز لانه بيعلى حرارة
الصبابات وبالتالى بياثر على الموتور
وبالنسبه للشوائب دى بتكون نابعه من البنزينه نفسها مش من البنزين
يعنى مش بينظفو التانكات بتاعتهم وبالتالى بيكون اى نوع بنزين عندهم فى شوائب مش ال80 بس
لكن الفرق الحقيقى فى نوع البنزين هو الضغط الاوكتانى بتاعه وبس
وان جت على تغيير فلترين كل ستة اشهر ب10 جنيه بسيطه واحنا كده ولا كده بنعمل صيانه للعربيات دوريه وبننظف الكاربراتير
فاذا كان متاح ليك انك تحط 80 اطمئن واتوكل على الله
وفعلا زى ماذكر اخونا احمد سالم المواتير دى لما اتصممت ماكنش فى بنزين 90 ولا 80 كمان كان اقل من كده
وفعلا فى ناس بتخلط البنزين حاليا فى سيارتهم 80 على 90 لكن صدقنى لو استعملت 80 بس فى البيتلز وعودت الموتور عليه على طول
هتلاقى العربيه معاك مظبوطه ومافيش مشاكل ان شاء الله
ارجو انى اكون افادتكم

[أحمد سالم]

السلام عليكم
كلام اكثر من رائع من استاذنا هاشم باشا

[drjadoire]

طبعا الشطر كله لهاشم باشا والحسيني باشا واحمد باشا سالم
ومستنيين رد الكينج بتاعنا احمد حسن
انا رايي البنزين 80 شغال كويس وانا بحطه دلوقتي وزي الفل معايا ومش بيطير وموفر جدا جدا
هو صحيح تحس ان العربيه مكتومه شويه ولازم تكبسلها
بس ده اول متفول بس التانك لان ده بيكون عمل ضغط وتقل واستاذنا احمد حسن قالي كده لكن بعد ممشي شيه العربيه بتخف وتبقي سريعه وزي الفل

[fahd_628]

يا جماعة لو سمحتو مفيش حاجة اسمها البنزين بيطير بسرعة دة كلام غير علمى

لو انت سواقتك هية هية يبقى الأستهلاك حيبقى هوة هوة

و بالنسبة لأفضل بنزين انا بصراحة معنديش فكرة

[أحمد سالم]

يا جماعة لو سمحتو مفيش حاجة اسمها البنزين بيطير بسرعة دة كلام غير علمى

لو انت سواقتك هية هية يبقى الأستهلاك حيبقى هوة هوة

و بالنسبة لأفضل بنزين انا بصراحة معنديش فكرة

احنا مانقصدش انه بيطير
لاكن البنزين 90 فعلا بيخلص بسرعه
وده مش كلامنا احنا بس ده كلام حتى اكثر من سائق تاكسى
البنزين 80 موفر فى السعر وبيقعد اكتر انا لما كنت بحط 90 بلاحظ انه مشوار والثانى مؤشر البنزين يبدء ينقص
اما فى بنزين 80 وهى هى نفس المشاوير المؤشر مش بيتحرك من مكانه الا بعد ضعف المشاوير تقريبا بال90
ده عن تجربه

[ahit]

السلام عليكم و رحمة الله و بركاته

أنا كنت بستخدم بنزين 90 قبل ما يغلى و لكن عشان بسافر كتير و مشاويرى كتير فغيرت لبنزين 80 لأنه موفر جداً بالنسبة لى.
البنزين90 أنظف طبعاً و السحب أفضل فى البيتل.
البنزين 80 أوفر و السحب أقل بصورة قليلة جداً بس فى الحرق أفضل.

* ملحوظة هامة خاصة بالبنزين:
كل ما زاد فراغ الهواء الموجود فى تنك البنزين كلما زاد تطاير البنزين و العكس صحيح , بمعنى كل لما التنك بيفضى كل ما كان تطاير البنزين أسرع .
و بالتالى من الأفضل جعل التانك مليان بصورة شبه مستمرة

[ابوهاشم]

السلام عليكم و رحمة الله و بركاته

أنا كنت بستخدم بنزين 90 قبل ما يغلى و لكن عشان بسافر كتير و مشاويرى كتير فغيرت لبنزين 80 لأنه موفر جداً بالنسبة لى.
البنزين90 أنظف طبعاً و السحب أفضل فى البيتل.
البنزين 80 أوفر و السحب أقل بصورة قليلة جداً بس فى الحرق أفضل.

* ملحوظة هامة خاصة بالبنزين:
كل ما زاد فراغ الهواء الموجود فى تنك البنزين كلما زاد تطاير البنزين و العكس صحيح , بمعنى كل لما التنك بيفضى كل ما كان تطاير البنزين أسرع .
و بالتالى من الأفضل جعل التانك مليان بصورة شبه مستمرة

اا معاك يااحمد باشا فى موضوع فراغ الهواء ده وفعلا انا لاحظت الموضوع ده كتير عندى