اسوأ صنايعيه للبيتلز

[ابوهاشم]

السلام عليكم ورحمة الله وبركاته
حبيت افتح الموضوع ده لعشاق وملاك البيتلز
واتمنى ان اى واحد مننا يتعرض لموقف سخيف من اى ميكانيكى بيتلز او يكتشف انه مش متمكن فى مهنته يكتب عنه هنا وذلك للتنبيه والحرص من التعامل معاه تانى
بالنسبه ليا انا هحكيلكم على موقف حصل معايا عند جمال عبده فرج ميكانيكى البيتلز
اللى خلف حديقة الفسطاط ونبدأ القصه
من حوالى اسبوع تقريبا وكنت ماشى فى امان الله لقيت العجله اللى خلفى بتصفر
وكانى دايس فرامل وبعد شويه راحت صوت الصفاره ركنت على جنب ونزلت اشوف ايه الحكايه حطيت ايدى على الجنط ده لقيته سخن قولت اكيد الفرامل قافشه عليه تانى يوم ماكدبتش خبر وجريت على جمال وحكيتله الحكايه قاللى بسيطه رفع العربيه بالكوريك وقعد يلف العجله بايده وقاللى كده هى كويسه ومافيش حاجه ومش هتسخن تانى ومشيت من عنده ولما روحت لقيت العجله سخنت تانى
تانى يوم وانا مروح من شغلى لقيت الدبرياجى وطى خالص والغيارات بتزعق معايا
قولت اروحله يظبط الدبرياج ويشوفلى العجله اللى بتسخن تانى
ولما روحتله نزل يعلى الدبرياج وبقوله على العجله انها برضه بتسخن قاللى مش ممكن
قولتله شوفها بنفسك هى لسه سخنه قاللى لا مش دى اللى انا عملتها دى التانيه
قولتله لا هى دى وانا ادرى بعربيتى المهم راح رافع العربيه تانى وقعد يلف فى العجله وقاللى خلاص بقت كويسه جيت ادور وامشى اتفاجئت انه رفع الدبرياج على الاخر لدرجة ان الغيار مش بيبدأ يتحرك غير لما ترفع الدبرياج فوق خالص قولتله ايه ده ياعم جمال الدبرياج كده عالى جدا قاللى لا هو كده مظبوط وده الصح
بصراحه انا كدبت نفسى ومشيت على كده وتانى يوم رايح شغلى لقيت العجله سخنت تانى برضهوقولت بقى وانا مروح اعدى عليه يشوفلى حل وجيت وانا مروح لقيت العربيه بطلت لوحدها على الدائرى وحاولت ادورها تانى مافيش فايده روحت راكن على جنب واستنيت شويه وحاولت ادور تانى دارت والحمد لله وقولت كويس انا كده كده رايحله ويشوف فيها ايه
وعلى كده بطلت حوالى 3 مرات وانا فى طريقى وكل مره ماترضاش تدور تانى غير بعد خمس دقائق تقريبا والحمد لله وصلت عنده بسلامه وحكيتله الموضوع ووريته العجله برضه سخنه قاللى كده العجله دى عاوزه يتغير لها خرطوم الباكم بتاعها هو اللى عامل كده ماكدبتش خبر وروحت اشتريتله خرطوم الباكم ب20 جنيه وغيره طيب ياعم والعربيه بتقطع من ايع شوفها قاللى لا دى بسيطه انا هظبطلك الهوا بتاع الكاربراتير بس وظبطه وقاللى كده تمام والعربيه زى الفل
ومشيت من عنده وقولت اجرب فى الطريق لقيت العربيه مافيش سحب خالص وراحت مبطله تانى واجى ادور تقعد تنط منى وفهمت ان فى حاجه فى دورة البنزين مش مظبوطهركنت ونزلت ابص على العجله اياها فوجئت انها سخنه مولعه لدرجة ان ممكن اعمل عليها كوباية شاى روحت مدور وواخد بعضى وراجعله قولتله بسرعه تعالى حط ايدك كده على الجنط وشوفه حط ايده واتلسع منها وقولتله كمان العربيه مافيش سحب نهائى وبتبطل برضه راح فاتح الموتور وقاللى طرمبة البنزين دى بايظه وعاوزه تتغير بصراحه انا شاكك فى كلامه وقولتله انت متاكد انها بايظه
رد عليا وقاللى ده شغلى وانا ادرى بيه قولتله طبعا انت ادرى بعت الصبى بتاعه يشتريها لقيته جايبلى طرمبه صينى وب90 جنيه كمان قولتله ياعم دى صينى قاللى احسن طرمبات هى الصينى طيب ياعم ركب لما نشوف اخرتها
ركب الطرمبه الجديده الصينى وبصيت لقيت الطرمبه مش شغاله ههههههههههه
قولتله على فكره يااسطى العيب مش من الطرمبه ولو سمحت بقى رجعها وانا مش عاوزها وبصراحه هو اتكسف فعلا لما لقى العيب ماكنش منها وبعت الصبى بتاعه يرجعها وقعد يكشف على البنزين وقاللى هنفك التانك وننزله قولتله ليه تفك التانك قاللى فى حاجه فى دماغى وعاوز ابص عليها قولتله اتفضل فكه ونشوف قعد يكشف على التانك وماسورة البنزين ولقيته بيقوللى ماسورة البنزين هى اللى مسدوده وعاوزه تتغير وهنجيب بدلها خرطوم قولتله ماشى غيره وطبعا بصراحه انا كنت قاعد بشد فى شعرى خلاص واتجننت منه وانا قاعد كان جمبى زبون تانى مستنى عربيته وحكالى انهم اشتغلوه فى الكاربراتير بتاعه وغيروه بواحد تانى بايظ وعمل مشكله معاهم وانا قلقت جدا واتصلت بحبيبى احمد حسن علشان احكيله لقيته هو كمان حصل معاه موقف زى الزفت مع جمال بس انا مش هاحكيه وهسيبه هو اللى يحكيلنا عنه
المهم البيه غير الخرطوم ودور العربيه وقاللى كده تمام قولتله بقى شوف العجله اللى بتسخن قاللى دى مافيهاش حاجه وانا صممت انه لازم يفك الطنبوره ويشوفها وبعد جدال حاد بينى وبينه فعلا فك الطنبوره واكتشف ان الكاوتش بتاع الفرامل ضائر وهو اللى بيسخن العجله والجنط وعمله وخد 45 جنيه غير حوالى 50 جنيه فى المرات السابقه ومشيت من عنده وطبعا كنت قضيت اليوم كله جنبه
وركنت العربيه وجيت الصبح ادور علشان اروح شغلى والعربيه راسها والف سيف
ماتدورش وفضلت جمبها حوالى ساعه مافيش فايده روحت سايبها وطالع تانى على البيت لان ميعاد الشغل فات خلاص وقعدت اتصل بيه علشان يجيلى يشوفلى حل لقيته قافل تليفونه طول اليوم روحت نازل وعديت على الميكانيكى اللى جمبى فى الشارع قولتله تعالى بصلى على العربيه مش عاوزه تدور ولو دارت بتبطل تانى على طول اول مابص فيها قاللى الابره بتاعت الكاربراتير عاوزه تتغير وهى اللى بتخلى العربيه شرقانه وفعلا غيرناها والحمد لله بقت تمام
معلش انا طولت جدا عليكم بس حبيت احكيلكم اللى حصل بالظبط
علشان انبهكم من الشخص ده اللى بالكتير اوى ممكن يكون عجلاتى مش ميكانيكى
وكمان كلمت اخونا احمد الحسينى لقيته قالى برضه عى موقفه معاه وهو اكيد هيحكلنا
وطبعا انا مش هعدى من الشارع اللى هو فيه تانى وياريت ماحدش يتعامل معاه من حبايبنا فى المنتدى

تم تغيير العنوان كما طلبت
(إ.م.2)

[ihab]

معلش يا استاذ هاشم الواحد ما بيتعلمش ببلاش
بس هى فعلا بقت مشكلة انك تلاقى ميكانيكى كويس و امين و مفيش ما يمنع انه فى حاجات ما يعرفهاش او ما يعرفش يعملها و مش عيب انه يقول ما عرفش بدل ما يفتى و يبوظ فى العربية اكثر
و الحمد لله انها طلعت الابرة بتاعت العوامة و دى بسيطة الحمد لله
بس يا ريت تقولنا جبتها نوعها ايه و منين و بكام

[RAAFAT10]

الأستاذ هاشم . الحمد للة أنك عرفت العيب , بس دة مش جمال الميكانيكى اللى كان فية ناس بتشكر فية واللى عمل عندة العمرة الأستاذ أحمد حسن لعربيتة ولا دة واحد تانى ؟ طيب أذا كان هو أية أخبار العمرة اللى عملها لأخونا أحمد حسن . والحقيقة دى حاجة متعبة ما فيش حد ممكن تثق فية وفى شغلة وخصوصا أنا لسة طالع من تجربة مريرة فى شد العربية مع السمكرى والبوهيجى أستمرت شهر ومصاريف ومشاكل والحاجة برضة ما تطلعش صح بالرغم من أن الواحد مش بيبخل فى المصاريف .والناس دول ما بيهمهمش حد طالما الزبون وقع ما فيش حد منة يرحمة وبيبالغوا فى الأسعار بدرجة كبيرة ربنا يرحمنا يعنى فاكرين أن صاحب العربية دة عندة ماكينة طبع فلوس.
المهم الحمد للة

[El.Hossieny]

الله يجازيك خير يا هاشم باشا علي افادة كل ملاك البيتل بنقل صورة واضحة و حيادية للتعامل مع جمال .. و احنا كلنا كنا حاطين امل كبير اننا نلاقي في جمال الميكانيكي بس للاسف ... اثبت العكس تماما

انا لما حبيت اجرب جمال الميكانيكي قولت اعمل عنده الفرامل ... لان الفرامل كانت ضعيفة اوي عندي و كمان كان في صوت غريب لما اجي ادوس فرامل

و كان اللي حصل اني روحت ل جمال .. و فك الاربع فرد و فك التيل بتاعهم كمان .... و وداهم لواحد بيتعامل معاه عشان يخرطهم و يظبط التيل ... المهم وداهم و بعد ساعتين تقريبا جابهم منه و اخد مني 110 جنيه .... و ركب يا عم الحاجة و ظبط يا عم الفرامل و اطلع جرب .... و المفاجاة ... و لا اكني عملت اي حاجة .... الصوت لسة موجود و الرفامل ضعيفة و زاد كمان ان دواسة الفرامل بقت تقيلة ...... خير يا عم جمال في اه ؟؟؟ قالي : لا لا هي كدة مظبوطة . التيل يومين تلاتة كدة و هيطبع و كل حاجة هتبقي تمام .... ماشي يا عم جمال ... عايز كام .... 40 جنيه .... ماشيي اتفضل ... يعني كدة 150جنيه


و قعدت بعديها 10 ايام .. ان التيل يطبع .. مفيش فايدة ... الصوت موجود و الفرامل ضعيفة ... روحت رايح ل عم جمال يوم اجازتي الجمعة ... يا عم شوف الفرامل ... قعد يلف العجل و يسمع الصوت ... و يقولي الصوت جاي من الفردتين اللي ادام ... اذاي و انا بسمع الصوت من ورا .. لا لا الصوت من ادام ... ماشي يا عم انت اكيد ادري مني .. و راح حل الطنبورتين اللي ادام بالتيل بتاعهم و وداهم ل نفس الراجل الاولاني ... و ظبطهم وركبهم .. انا قولت بقي كدة اكيد اتكسفوا كلهم بقي و اكيد هستلم شغل زي الفل ... و كانت الصدمة .... و لا اكن في حاجة ... يا عم جمال في ايه ؟؟ تخيلو يقولي ايه ....

اصل يا باشا كل انواع التيل اللي موجودة في السوق وحشة .. تخيلو بجد

انا صدمت ... و حسيت اني مش عايز اكمل في المهزلة دي اكتر من كدة ... قولتلو شكرا علي كدة .. يعني اعمل ايه ... قاليامشي بيها يومين و لو مظبطتش تعالالي ... ( قولت في بالي ابقي عيل لو جيتلك تاني ) و ربنا يعوض عليا في الفلوس

معلش انا طولت عليكم . .... بس هاشم باشا هو اللي شجعني اني لنقل الصور للناس

و ربنا يعينا و نلاقي حد كويس يا رب

و انا في اعتقادي الشخصي بعد تجربة جمال ( ان الحاج محمد علي امييين و محترم عن اي حد تاني ) ل غاية دلوقتي

و ربنا يوفقنا يا رب

[ابوهاشم]

السلام عليكم ورحمة الله وبركاته
استاذ ايهاب ازيك عامل ايه
الحمد لله على كده وطبعا انا عمرى ماهروح لجمال تانى
الابره جبتها برازيلى ب25 جنيه من عند واحد اسمه توفيق فى شارع احمد ذكى فى المعادى
واشكرك جدا على اهتمامك وطبعا حضرتك برضه انا لما كلمتك وحكيتلك استنتجت على طول انها الابره بتاعت الكاربراتير
والحمد لله اول ماروحت للميكانيكى اللى عندى قاللى على طول انها الابره وكان الكاربراتير عاوز جوان جديد لان القديم كان دايب وبيدخل هواء للكاربراتير والحمد لله العربيه دلوقتى كويسه
استاذ رأفت ازى حضرتك عامل ايه
فعلا زى ماحضرتك بتقول هو ده جمال اللى اخونا احمد حسن عمل العمره عنده
لكن انا مش هتكلم عن لسان احمد حسن وان شاء الله هو اكيد لما يدخل المنتدى هيحكيلنا تجربته مع جمال والموقف السخيف اللى عمله معاه وحكالى عليه
ازيك ياحسينى باشا واحشنى والله
طبعا اولا واخيرا قدر الله وماشاء فعل
وزى ماقال اخونا الاستاذ ايهاب ماحدش بيتعلم ببلاش
وان شاء الله تروح للحاج محمد على ويظبطلك الفرامل وربنا يعوض عليك وعليا فى اللى راح

[أحمد سالم]

السلام عليكم
اولا سلام لاخونا الاستاذ هاشم والاخ احمد الحسينى والاخ عرفات والاستاذ ايهاب
موضوعك يا استاذ هاشم هيكون مفيد جدا لملاك حبيبتنا البيتلز
انا عن نفسى لم اجد احد حتى الان افضل من الحاج محمد على بتاع جسر السويس فعلا راجل محترم وامين وفاهم كل حاجه فى البيتلز كفايه انى عمرى مارحت لميكانيكى وعملى شغل ولما جيت اقوله عايز كام قالى ولا حاجه انا ماعملتش حاجه ( والله ده حصل عند الحاج محمد ) مع العلم انه ممكن يطلع لى اى حجه وياخد فلوس زى ناس كثير
انا مستنى رئى استاذنا احمد حسن
مع العلم انه هو الوحيد اللى مكانش مقتنع بالحاج محمد على وكان بيقولى ان جمال ده استاذ

[ahmed2y]

والله دة موضوع حلو جدا للمناقشة واوعدكم انى اجكيلكم حكايات عنة بداية من اسماعيل
عبد المنعم الميكانيكى مرورا بعصام الى فى شارع الشرفا السكاكينى مرورا بسمير ذكى الكهربائى فى عبود وعاطف عبدة فرج اثر النبى واشرف فولكس شارع ترعة الجبل واخيرا وليس اخرا واحد اسمة بلية خلف حديقة بدر وايمن الى فى مدينة نصر وواحد تانى بدرو فى مدينة نصر فى اخر مصطفى النحاس وعاليكم انتو تختارو وانا احكيلكم طبعا دا غير بتوع قطع الغيار من بيت الدبرياج التوفقية لمحل كدة عند ابو طارق فى شمبليون للمركز الالمانى امتداد رمسيس يعنى تشكيلة حلوة من ناس كتير معندهاش ضمير وانا هحاول احكيهلكو فى حلقات مجمعة والى عاوز يعرف حكاية معينة عن حد معين انا تحت امرة احكيهالو بس دة هيكلفو 150 قرش للدقيقة لانة هيتصل غلى 099999999999 ههههههههههههههههه وشكرا طولت عاليكو يا شباب

[El.Hossieny]

يا ريت فعلا يا استاذ احمد لو تقدر تحكيلنا عن تجاربك مع كل الناس دي .... عشان يبقي الافادة لجميع الاعضاء ... و تقولنا من خلال تجربتك علي الحلو و الوحش

و جزاك الله خير

[ihab]

عصام اللى فى الشرفا عمل ايه معاك يا احمد

[ابوهاشم]

منورنا يااستاذ ahmed2y واحنا مستنيين تحكيلنا عن كل الناس اللى ذكرتهم علشان نستفاد من تجاربك
معاهم لتعم الفايده علينا كلنا
وكمان انا مبسوط جدا لمرور اخونا الكريم احمد السلام اللى مفتقدينه اليومين دول فى المنتدى
طبعا الحاج محمد على فعلا راجل امين وشاطر فى المهنه
بس مشكلته انه بعيد عنى وانا ساكن فى المعادى واوقات بروحله المشوار ده بلاقيه مش فاضى وشغال لواحده لان ابنه عمرو مش دايما معاه

[ahmed2y]

السلام عاليكم
اولا تحياتى للجميع
بالنسبة بقى لعصام الى فى الشرفا كنت كل ما اسئلة على حاجة فى قطع الغيار يدينى اسعار وهمية كوبلن مثلا يقولى 600 جنية واروح اسال بعدها بعد ما بطلت اروحلة بعدها بفترة الاقى الكوبلن ب80 جنية واية كوم على بعضة ونقى واختار النت عاوزة وعلى التجربة وكمان بعد ما ركبتهم معجبونيش رجعتهم وخدت الفلوس تانى وكان قبلها الفرامل مش تمام قال للحج ولان العربية بتاعى والدى فى الاصل لا دى عاوزة طنابير ولان الحج عندى لارج فى تعاملاتة وبيبقى عارف انة بيتسرق بس بيقول النعرفة احسن من المانعرفوش غيرهم 2*2 واصبح الطنابير كلها جديدة استيراد من عند يحيى كمال ووبردو الفرامل وحشة ويقولى لا لا هتبقى كويسة بعدها انت بس الى موسوس لاحد مرة قولت لا بقى كدة مش هينفع روحتلة وفى واحد معاة مش فاكر اسمة اية طلع معايا وجرب قالى لا كدة ما دام الدواسة تدوس مرة تلاقيها ومرة لا يبقى مستر عمرمى قالى نعملى طقم اصلاح وانا ابدا اصلاح اية غير المستر كلة هو انا فاضى يا عم ولا بتاع اصلاح الغالى تمنة فية نغير المستر ونجرب ونمشى كام يوم وبردو الى فيها فيها اكشف تانى مستر خلفى بيسرب عاوز كاوتش ماشى بردو مفيش فرامل فك تانى نفس المستر بيجيب زيت غير المستر كلة لحد ما عرفت انة مفيش فايدة مع الراجل دة حصل بقى بعد كدة حاجتين قرر بعدهم انة خلاص الراجل دة لام يتعمل عالية Delete سلك الدبرياج فك منى مرة وانا راجع من الشغل كنا فى رمضان اظن المهم جبت واحد من على الطريق شبك مكان العصفورة الى بتمسك بصامولة ورحتلة تانى يوم يعمل الازم نزل بص قالى تمام قولتة يعنى اية قالى العاملها عاملها كويس يا عم طب فك ولا ركب حسسنى انك عملت حاجة قالى لا تمام مفهاش حاجة اعملها المهم قطع بيا السلك نفس اليوم باليل روتلة بتاكسى خد واحد من عندة وربطهالى تانى وروحت عندة قالى السلك بايظ قولتة غير المهم غير وتمام التمام قولت بينى وبين نفسى امال كنت عمالى تقولى كويسة وزى الفل المهم جت بقى القشة الى قسمت ظهر البعير بينى وبينة متور العربة عندى كنت عاملة عمرة محترة ومحولة من 1600 الى 1300 وكان المتور تقريبا جديد ناعم جدا وسريع مقدرش اقولكم بس العيب الوحيد الكربراتير بتاع 1600 وهى اصبحت 1300 وكمان كان مش كويس وكان بينزل بنزين زيادة على البوجيهات يخليها تكربن والعربية تقطع وكنت فعلا واثق من كلامى بعد تجارب كتير وهو كمان قالى نفس الكلام وقالى لو كدة ممكن تروح لواحد بتعا كربراتير بس فى شبرا قالى هو هيظبطلك الموضوع تمام لحد كدة اروحلة مرة بقى بعد الشغل بتقطع العربية يفك بوجية ويقولى اية البوجية عالية زيت لازم نعمل طقم شنبر يا عم دا انا عامل عمرة مكملتش 8 شهور منهم 6 شهور العربية مركونة قالى لا اصل العمرة الى عملها عملها مش مظبوطة وللعلم الى عمل العمرة دى واحد دكتور فى الفلوكس بس قلة الاصل بتاعتة الى خالتنا نبطل نتعمل معاة وبعد الموقف دة مبقاش فى عصام وبطلت اروحلة طبعا الى جانب الى كنت بشوفة بيعملة فى عربيات الناس دا مرة لقيتة بيقطع دونجل عربية وبيلحم فسالتة مردش عاليا سالتة تانى وتالت مردش وعامل نفسة مش سامعنى قولتلة انت مبترودش لية قالى لا ابدا فقالى انا بقطع الدونجل ولحمة تانى من فوق شوية عشان صاحب العربية عاوز يعليها طبعا كلام ميدخلش العقل
وارجو مكنت طولت عاليكو يا شباب
وسلامى للجميع استاذ هاشم والاستاذ الحسينى والاستاذ ايهاب

[ihab]

اومال انت بتتعامل مع مين دلوقتى يا استاذ احمد
انا برضه كنت بتعامل مع عصام لانه قريب من البيت بس اخيرا ما بقيتش اتعامل معاه

[ahmed2y]

السلامو عاليكم

والله يا استاذ ايهاب بعد الف والدوران انا مسبتش حد الا وبقيت اتعامل معاة عشان اعرف الحلو من الوحش وبجرب الاول فى حاجات بسيطة واشوف لانى وصلت ليقين ان مفيش صنايعى امين الا واحد بس خالد رباب بتاع العفشة اما بالنسبة للمكانيكى ففى 2 واحد اسمة اشرف فى ترعة الجبل الزيتون وواحد تانى عرفتة بالصدفة اسمة الاسطى مديح راجل محترم وبرضو الى ميعملوش اشرف اروح لمديح بقيت انا الى اصلح مش هما هما يفكو ويركبو بس وكمان الحج محمد على انا مرجتلوش بس اتفرجت عالية على ال youtube والناس هنا بتشكر فية وباين عالية من كلامة وسنة الكبير ربنا يديلة الصحة ان محترم وفهمان
وحضرتك بتتعامل مع مين

[ابوهاشم]

هو مديح ده اللى فى شارع احمد سعيد ولا فين

[ابوهاشم]

انت عارف يااستاذ احمد ان المشكله انك لما بتروح لاى ميكانيكى فى حاجه سهله وعبيطه
تلاقيه معاك زى الفل ومعامله مافيش بعد كده ويحسسك انه دكتور فعلا
لكن نيجى بقى لو فى عيب جوهرى ويكون فى الاصل حاجه بسيطه بس كل الحكايه انها محتاجه واحد بيفهم فعلا ويحدد المشكله منين على طول مش يقلبلك كيان العربيه كلها ويجيبلك عليها واطيها علشان يدور على العيب منين وفى الاخر وبعد تكاليف مضنيه من جيبك ودوخه وتوهان معاه وتكتشف فى الاخر
انك اساسا كنت عند مكوجى مش ميكانيكى
مع الاسف الشديد حتى الان مش لاقى ميكانيكى فى كل الصفات الكامله فى كل شئ فى العربيه
يعنى كل واحد وله مميزات وله عيوب
محمد على راجل امين ومحترم وفاهم بس سنه كبير وبيشتغل على قده وابنه عمرو مش دايما معاه
واحيانا كتير بروحله وبرغم المشوار اللى بعانيه لحد عنده من المعادى لعرب الجسر الاقيه اما مش فاضى او يريح دماغه ويقولك العربيه مافيهاش حاجه
وادينا بنجرب كل شويه واحد لحد ماربنا يكرمنا بواحد نثق فيه وندل بعض عليه