اعطال البيتلز واسبابها

[ابوهاشم]

السلام عليكم ورحمة الله وبركاته
اخوانى وحبايبى ملاك وعشاق البيتلز
حبيت افتح الموضوع ده لينا جميعا علشان يكون مرجع للاعطال واسبابها فى البيتلز
بمعنى ان اى حد مننا حصل معاه مشكله معينه فى العربيه يحكى عنها هنا ويقول كانت ايه هى المشكله وبعد كده عرف ايه السبب وكان ايه العلاج واتكلفت كام
علشان لما حد مننا يصادفه مشكله مشابهة يعرف مبكرا السبب منين
وارجو ان يلاقى الموضوع اهتمام منكم لتعم الفايده علينا جميعا

[ابوهاشم]

انا هبدأ بنفسى واحكى عن مشكله اللى حصلت معايا من اسبوع
كنت مروح من شغلى ومشيت على الدائرى حوالى 8ك تقريبا وفوجئت ان العربيه بطلت لوحدها
ومش عاوزه تدور ركنت على جنب ونزلت اشوف فى ايه وحاولت انظف مسمار اليك بنفسى
واستنيت شويه والعربيه دارت وبعد شويه بطلت تانى وروحت لميكانيكى مش متمكن وقعد يفتى كتير وغلبنى معاه يومين ومافيش فايده وبرضه بتبطل وكمان مش عاوزه تدور وبصيت على الموتور
لقيت الكاربراتير بيشر بنزين لكن بعد ماجبت ميكانيكى بيفهم فاللى ان ابرة الكاربراتير عاوزه تتغير وكمان جوان الكاربراتير عاوز يتغير لانه متاكل وبيدخل هوا للكاربراتير وفعلا بعد التغيير الحمد لله
كده العربيه بقت كويسه

[ابوهاشم]

كمان افتكر من سنه فاتت كانت العربيه تبطل منى وهى ماشيه وبعد مااستنى شويه تدور شويه وتبطل تانى وهى ماشيه واكتشفت ان العيب كان من موبينة الكهربا هى اللى كانت بتسخن وتبطل العربيه
وبعد مااتغيرت بقت تمام وفاكر انى اشتريتها استيراد ب35 جنيه

[أحمد سالم]

فى حاجه مهمة برده ممكن تخلى العربيه تبطل بالذات فى البيتلز
وهى لو الماتور سخن زياده عن المعدلات الطبيعيه يبطل على طول
طبعا من الاساباب الرئيسيه للموضوع ده
ممكن يكون سير الدينامو اتقطع فيبقى مافيش تبريد وكمان مافيش شحن فأكيد لمبة البطاريه هتنور
وبعد شويه البطاريه هتفضى
2- لو رحت عند ميكانيكى لسه متخرج جديد من تحت ايد صنايعى وراح لاعب فى التاكيهات لو قفلها برده الماتور هيسخن و يبطل
لذالك لو الماتور بطل ماتحاولش تدوره كتير من غير ماتحاول تعرف ايه السبب اللى بيخليه يبطل

[Ahmed Mubarak]

والله ياجماعة انا حصل معايا عطل ممكن يكون للبعض بسيط او معروف لكن بالنسبة لى عطل جديد ومكنتش عارف اتصرف اذاى غير انى اركن العربية واكلم الميكانيكى
العربية بعد 5 ساعات من تغير طقم سيرفيس وبعد حوالى اقل من 4 ك بطلت وانا ماشى وفى ريحه غريبة تكاد تكون رائحة شياط ومبتدورش خالص وفى لخبطة فى الكهرباء مثل ان الانتظار شويه يشتغل وشويه لا وبعد كدة اتصلت بالميكانيكى اللى بدورة لم يجد اى شى وبالتالى كلم الكهربائى اللى قال لى ان فى ماس حصل (والله السيارة مكنش فيها اى حاجة قبل كدة ) والحمد لله عمل وصلة وغير حبة سلك فى الموتور والحمد للة السيارة دارت وذى الفل والحمد لله وافضل شى فى حدوث حاجة ذى دى انك تركن العربية وتكلم ميكانيكى او كهربائى اذا كنت ذيى لسة جديد , لانه ممكن تعمل حاجة لا قدر الله تطير الضفيرة.
شكرا وجزاكم الله خيرا

[ابوهاشم]

والله ياجماعة انا حصل معايا عطل ممكن يكون للبعض بسيط او معروف لكن بالنسبة لى عطل جديد ومكنتش عارف اتصرف اذاى غير انى اركن العربية واكلم الميكانيكى
العربية بعد 5 ساعات من تغير طقم سيرفيس وبعد حوالى اقل من 4 ك بطلت وانا ماشى وفى ريحه غريبة تكاد تكون رائحة شياط ومبتدورش خالص وفى لخبطة فى الكهرباء مثل ان الانتظار شويه يشتغل وشويه لا وبعد كدة اتصلت بالميكانيكى اللى بدورة لم يجد اى شى وبالتالى كلم الكهربائى اللى قال لى ان فى ماس حصل (والله السيارة مكنش فيها اى حاجة قبل كدة ) والحمد لله عمل وصلة وغير حبة سلك فى الموتور والحمد للة السيارة دارت وذى الفل والحمد لله وافضل شى فى حدوث حاجة ذى دى انك تركن العربية وتكلم ميكانيكى او كهربائى اذا كنت ذيى لسة جديد , لانه ممكن تعمل حاجة لا قدر الله تطير الضفيرة.
شكرا وجزاكم الله خيرا

كويس انك اتصرفت كده وكويس انه جالك وحل المشكله وحمدالله على السلامه

[ihab]

من الاعطال الخطيرة و اللى لازم تركن على طول و تعملها هو سير الدينامو لما يتقطع منك و ده بتعرفه لما بتلاقى لمبة الدينامو الحمراء نورت عندك فى التابلوه و ده مالوش غير انك تركن على طول و تنزل تغير السير لان توربينة التبريد بتلف مع طنبورة الدينامو و اللى بمجرد ما السير اتقطع يبقى مفيش تبريد
و ده تغييره سهل لو ماعك مفتاح 22 و مفك عادة كبير و طبعا سير احتياطى و مش حاياخذ معاك اكثر من 10 دقائق

[ابوهاشم]

من الاعطال الخطيرة و اللى لازم تركن على طول و تعملها هو سير الدينامو لما يتقطع منك و ده بتعرفه لما بتلاقى لمبة الدينامو الحمراء نورت عندك فى التابلوه و ده مالوش غير انك تركن على طول و تنزل تغير السير لان توربينة التبريد بتلف مع طنبورة الدينامو و اللى بمجرد ما السير اتقطع يبقى مفيش تبريد
و ده تغييره سهل لو ماعك مفتاح 22 و مفك عادة كبير و طبعا سير احتياطى و مش حاياخذ معاك اكثر من 10 دقائق

شكرا ياايهاب باشا على مرورك والمعلومه الفيده لينا وربنا يباركلك
ومايحرمناش من نصايحك لينا

[Ahmed Mubarak]

انا عندى عيب غريب شويه تسريب بنزين من تحت الكربراتير
تحت الكربراتير فى مسمار بالعرض وفى فالاخر صاموله كل ما ازود بنزين او تدوس على البنزين سواء العربية دايرة او لا تسرب بنزين من الجانبين
الغريب فى الامر ان الحاج محمد على لما روحتله قالى عادى مفهاش حاجة وقالى ماتحاولش انك تدوس وتشيل رجليك من على البنزين كتير :k17::k17:
بصراحة انا ما قتنعتش بالكلام دا وشكرتة ومشيت بس معظم الناس قالتلى ان التسريب دا لا قدر الله ممكن يولع فى الموتور لو سخن
حتى الان لم اجد حل للمشكلة دى
يا ريت اللى يعرف حل يرد علينا

[ihab]

خطر جدا طبعا و ما تمشيش بيها الا لما تضبطها

[ابوهاشم]

على فكره العيب ده كان عندى زمان
وفى الغالب انت محتاج تعمل حاجه اسمها (أكس وباب)
وده اللى هيعملو ميكانيكى متخصص فى الكاربراتير بس وهما منتشرين
فى منطقة شبرا مصر وعند شارع الساحل روح هناك واسأل اى حد
قولهم عاوز ميكانيكى كاربراتير
والتكلفه تقريبا 80 جنيه وهيبقى تمام ان شاء الله
مش عارف ليه محمد على مع انه راجل كويس لكن الكلمه دى دايما بيقولها
حتى لو فى مشكله وكبيره(مافيهاش حاجه ده عادى)

[ابوهاشم]

نسيت اقولك كمان ان العيب ده بيسبب ان العربيه تاكل بنزين بطريقه بشعه
ماتسكتش عليها

[El.Hossieny]

حتى لو فى مشكله وكبيره(مافيهاش حاجه ده عادى)

معاك حق يا هاشم باشا ... محمد علي دايما بيقول الكلمة دي .. مع اني عارف انه بيفهم في العربية دي اوي ..بس مش عارف ليه ساعات مبيخدش بالو اننا احنا صحاب العربية شايفين ان في مشكلة ؟؟

[Ahmed Mubarak]

الحمد لله يا جماعة انا ظبط المشكلة دى
واحد زميلى قالى ان فى صنايعى كويس عند شارع الاربعين - جسر السويس المهم روحت له وفك الكاربراتير وابتد يفحصه والمهم بعد ربع ساعه فك حاجة كدة فى وش الكاربراتير وحط جوان تانى على اللى موجود وربط تانى وركب الكاربراتير والحمد لله جربنا ومفيش حاجة بتنزل ولا فى تسريب وكمان ظبط فرامل اليد طبعا بعد مااشتريت سلك ب 40ج للفردة الشمال لانه كان شبه مقطوع وكمان غيرت الديول بديول مصرية ودى تمانها 60 جنيه والراجل صاحب محل قطع الغيار قالى ان الديول دى افضل من الديول البرازيلى اللى ب 55ج
وعلى فكرة خد مصناعية على الشغل دا 60 ج بعد الفصال مش عارف دا كدة كتير ولا مظبوط.
والحمد لله العربيه كدة مظبوطه وذى الفل
وجزاكم الله كل خير.

[El.Hossieny]

الحمد لله يا جماعة انا ظبط المشكلة دى
واحد زميلى قالى ان فى صنايعى كويس عند شارع الاربعين - جسر السويس المهم روحت له وفك الكاربراتير وابتد يفحصه والمهم بعد ربع ساعه فك حاجة كدة فى وش الكاربراتير وحط جوان تانى على اللى موجود وربط تانى وركب الكاربراتير والحمد لله جربنا ومفيش حاجة بتنزل ولا فى تسريب وكمان ظبط فرامل اليد طبعا بعد مااشتريت سلك ب 40ج للفردة الشمال لانه كان شبه مقطوع وكمان غيرت الديول بديول مصرية ودى تمانها 60 جنيه والراجل صاحب محل قطع الغيار قالى ان الديول دى افضل من الديول البرازيلى اللى ب 55ج
وعلى فكرة خد مصناعية على الشغل دا 60 ج بعد الفصال مش عارف دا كدة كتير ولا مظبوط.
والحمد لله العربيه كدة مظبوطه وذى الفل
وجزاكم الله كل خير.

الف مبروك يا ابو حميد ان العربية اتظبطت و الحمد لله ... يا ريت لو تقولنا الصنايعي اللي في شارع الاربعين ده متخصص في البيتل و لا شغال في اي حاجة