اسعار الزيوت للبيتلز

[gomangy]

و إنت بألف صحة و سلامه

بصراحه مش عارف موضوع زيت فيسكو إيه بالظبط

لكن أنا من كام يوم جربت زيت التعاون البرتقالى سوبريكس 10000 و حاسس إنه ممتاز لأن صوت الماتور هادى و ناعم و هايبان أكتر مع الإستخدام و الكيلو مترات الزياده.
الجركن 4 لتر ب 36 جنيه

انا غيرته امبارح يا ابو حميد وحاسس انو افضل اداء من الشل وهيبان بعد الكيلو مترات الزياده وعلي فكره يا ريس هو انا جبته من بنزينه التعاون ب33 جنيه بس

[ابوهاشم]

كل سنة وانتم طيبين جميعا ً

واحد قال لي ممكن احط زيت اسمه فيسكو ده اصلا ً بتاع العربيات الغاز الطبيعي هي علبه فسفوري ولها رائحة معطرة وقال لي أن الزيت ده معمول مخصوص لأن عربيات الغاز الموتور بيسخن فيها جدا هل الكلام ده صحيح ارجو ان يفيدني احد؟؟

معلومة ان الموتور بيسخن مع الغاز ده صحيح لانك لازم تقرص على الموتور
كثير خصوصا ان الغاز بيقلل عزم الموتور
بس اللى قالك على الزيت ده هو جربه فى البيتل ولا نوع تانى
ودرجة لزوجة الزيت كام
اتمنى انك ماتغامرش بحاجه غير مجربه لسلامة موتورك
وعلى فكره ياجماعه زيوت التعاون من افضل الزيوت المصريه

[sakr84]

يا جماعه بناء على كلامكم جبت زيت التعاون البرتقالى سوبريكس 10000 وغيرته ولاقيت صوت الماتور الحمد لله احسن مليون مره وبقى ناعم ومعلومه ليكم انا جربت زيت كالتكس الرصاصى وناس كتير قالولى لا بلاش منه وبعدين جربت التعاون الاسود كوب فاكت ودى كانت غلطت عمرى لان صوت الماتور كان عالى جدا لدرجه تخوف بس الحمد لله انا مشيت بالتعاون البرتقالى ده لغاية دلوقتى حوالى 60 كيلو والحمد لله تمام وربنا يخليكو لينا
عايز اقولكم ان التعاون البرتقالى من يوم 5/5/2010 غلى وبقى ب 39 جنيه بعد ما كان ب 36 جنيه وده علشان محدش يظلم حد فى البنزينه لما يقولوه انه غلى

[ahit]

التعاون الأسود كوب فاكت غير مناسب تماماً مع البيتل لأنه مخصص لسيارات الجاز يعنى تقيل جداً على ماتور البيتل

[sakr84]

التعاون الأسود كوب فاكت غير مناسب تماماً مع البيتل لأنه مخصص لسيارات الجاز يعنى تقيل جداً على ماتور البيتل

ده كان عامل عمايل مهببه فى الموتور والله انا خفت منه وكان متبقى فى الجركن وقلت مش هستعمله وجيبت البرتقالى وفعلا فوق الممتاز

[ramremo]

انا جربت زيت كالتكس الرصاصى وناس كتير قالولى لا بلاش منه

تامر باشا ازى حضرتك....
انا ماشى على كالتكس من ساعة ما جبت العربيه وبصراحه صوت الموتور كويس مش عالى وده كمان بنصيحة الميكانيكى بتاعى وهو جركن 5 لتر ب 45 جندى

[sakr84]

تامر باشا ازى حضرتك....
انا ماشى على كالتكس من ساعة ما جبت العربيه وبصراحه صوت الموتور كويس مش عالى وده كمان بنصيحة الميكانيكى بتاعى وهو جركن 5 لتر ب 45 جندى

فعلا الكالتكس كان صوته كويس لكن المشكله مش فى صوت الموتور بس المهم كمان لزوجة الزيت علشان احنا مواتيرنا مواتير قديمه بتبقى عايزه زيت احادى اللزوجه علشان كده بتبقى مش قصة صوت الموتور وبس لكن ده بيأثر على أداء العربيه والعمر الافتراضى للموتور وناس كتير قالتلى الكالتكس بالفعل احسن من التعاون لكن ده مش لمواتيرنا احنا ده للعربيات الجديده

[hosamsief]

اولا احب ان اكون اخ جديد لكم فى الموسوعه المدهشه للبيتلو ، انا لسه شاري واحدة موديل 1980 من 10 ايام بس و بما نى بلاطه فى موضوع البيتلز دة احب انى اتعلم منكم الكتير و انا غيرت زيت عند جمال المكيكانيى و نسيت اخد قراية العداد ممكن احسبها ازاى بالايام مش بالقراية

[sakr84]

اولا احب ان اكون اخ جديد لكم فى الموسوعه المدهشه للبيتلو ، انا لسه شاري واحدة موديل 1980 من 10 ايام بس و بما نى بلاطه فى موضوع البيتلز دة احب انى اتعلم منكم الكتير و انا غيرت زيت عند جمال المكيكانيى و نسيت اخد قراية العداد ممكن احسبها ازاى بالايام مش بالقراية

اولا الف مبروك يا باشا على البيتلز الجديده وربنا يباركلك فيها وكل ما هتقرى فى مواضيع البيتل هتفهم فيها اكتر وعايز اعرفك اننا بنتقابل من فتره للتانيه وياريت نشوفك معانا انا نمرة تليفونى 0100800303 ولو فى اى حاجه كلمنى واذا عرفت افيدك فى حدود خبرتى المحدوده هفيدك لو مكنش يبقى هرجع للمرجع بتاع البيتلز احمد حسن باشا اللى بقرفه دايما وبوجع دماغه وهتلاقى نمرة تليفونه برده على المنتدى
اما بالنسبه لموضوع الزيت ده لازم تهتم بيه جدا جدا جدا وياريت تحط السوبريكس 10000 بتاع التعاون اللى هو الجركن البرتقالى وتغيره كل 1000 كيلو ويفضل انك تغيره 800 او 900 فى الصيف ده من وجهة نظرى علشان تحافظ اكتر على موتورك اما الشتا ممكن 1000 او اكتر كمان مفيش مشكله بس لازم تغير الزيت مش بالمده بقراية العداد وكمان لازم تهتم بالكهربا طقم البوجيهات والابلتين والكوندنسر

[sakr84]

ونسيت اقولك ياباشا ان فى موضوع كان عمله اخونا احمد حسن فوق الممتاز مجمع فيه كل المواضيع بتاعت البيتلز اللى على المنتدى وهتلاقيها فى الرابط ده وبجد حاجه فوق الوصف ولا يمكن تلاقى الكلام ده على اى منتدى تانى خالص
http://www.nilemotors.net/Nile/53757-a.html

[hosamsief]

ربنا يكرمك على ردك الجميل ده و الله الواحد بيستمتع بوجودكم معاه على المنتدي الجميل ده و نفسه يشوفكم بجد فى اقرب فرصه ان شاء المولى

[dobiues]

ممكن اعرف يا جماعه هي العربية بتاخد اد ايه زيت لو سمحتم عشان انا انا حطيت فيها 3 ونص وببص علي مقياس الزيت ليقته معدي الماكس بكتير

[hosamsief]

2.5 كيلو بالظبط اوعى تزود عن كده علشان فى زميل زود الزيت فطرطش على البوجيهات و العربية قطعت منه و تعب لغايه ما حل المشكلة ده ، المهم ما يزيدش الزيت عن 2.5 كيلو بالتمام مها قالك بتاع الزيت او اى حد بيفتى خلى بالك .................

[ايمن محمود محمد ابراهيم]

زيت موبيل سوبر xhb اقوى انواع الزيوت وانسبها للبيتلز
4 لتر = 110 جنيه
يعمل 5000ك

[ابوهاشم]

ايمن باشا
البيتل افضل ليها تغيير الزيت على فترات قصيره