شوية اسئلة عن البيتلز ويا ريت يجاوبنى الخبراء

[hanymah]

السلام عليكم .. يا شباب البيتلز

انا كان عندى كدا شوية استفسارات عن كزا حاجة عايز اعملها فى عربيتى البيتلز .. هيا موديل 63 المانى 1200 سىسى وكنت عايز اطور فيها لانى باحب العربية دية جدا وقولت بدل ما اشترى عربية جديدة قولت اطور عربيتى احسن وكان عندى كزا استفسار يا ريت تجاوبونى عالية وبالزات الاخ هاشم لانو واضح انو عندو خبرة عشان بيشارك فى كل المواضيع الخاصة بالبيتلز ودا طبعا مع احترامى لبقية الاعضاء ..

1- عايز احول الموتور الى 1600 cc هل اشترى احسن واحد جديد ولا اية بالظبت .. وهل لو اشتراتة هيكون المانى ولا لاء
2- انا عربيتى اعتقد انها عفشتها دونجل وعايز اقلبها عفشة بسوست .. هل دا افضل ولا الدونجل
3- عايز اجيبلها طابلو عشان هيا مافهاش .. اجيبو منين وبكام


دية مابدئيا التغييرات الية فى دماغى .. ومعلش طولت عليكم استحملونى بقا دا احنا فلوكسيا زى بعض ..

[djhaggar]

عملية تحويل الموتور من 1200 الي 1600 مكلفة بالاضافة انة مابيكونش زي الموتور 1600 الاصلي
اما بقي عملية تركيب تابلوة دي انساها خالص هي وتغير الذنجل

[hanymah]

لية بس كدا يا اخ djhaggar سدتها فى وشى ... هاهاهاهاها .. .. طيب اية رايك اعمل اية فى الموتور عشان احدثة يعنى مثلا اعملوة عمرة ولا طقم شمبر مثلا ....

[ابوهاشم]

اهلا بيك استاذ هانى
ومبروك عليك البيتلز
بالنسبه لاسئلتك انا عاوز اسئلك سؤال
انت ليه عاوز تعمل التغييرات دى
هو الموتور ممكن تغيره عادى بسى ماتعدلش فيه
مع الاحتفاظ بأن ال1200 كويس واقتصادى
ده غير ان بلدنا مافيش فيها جرى
وال1200 ده بيجيب سرعه لحد 120ك كمان
اما عن تغيير الدنجل لسوست متهيألى ده امر مستحيل
الطابلوه ممكن يتكسى بس لكن مش هيكون بارز زى اللى فى تخيلك
واحنا مش بنسدها فى وشك ولاحاجه بس هو ده الواقع
هى البيتلز كده حسب تصميمها
الدنجل ماديا اريح من السوست
لكن طبعا السوست ترفيه اكتر وراحه فى القياده
وانت ليك الاختيار ممكن تبدل السياره لبيتلز 1303
هتلاقى فيها كل اللى طلبته واكيد احمد حسن هيفيدك اكتر
عن عفشة السوست علشان هو معاه 1302
انا بالنسبه عن استفسارك تعمل عمره ولا طقم شنبر
الكلام ده لو الموتور عندك فى مشاكل ومحتاج عمره
واللى يحكم عليه هو الميكانيكى
ويارب اكون وضحتلك الصوره

[hanymah]

السلام عليكم ..
ازى حضرتك يا استاز هشام
هوا انا بس عايز اقولك معلومة انا عندى العربية بقالها حوالى سنة ونص بس ما باقتش اخش على قسم البيتلز الا من قريب شوية .. بالنسبا للموتور انا اصلا كنت شارية نص عمر ومن ساعتها الموتور كل شوية اغيرلوة بوجيهات ودايما الكربيرتير مش نضيف وكمان العربية بتجيب زيت ولما رحت للميكانيكى ..هوا فى شبرا بس مش عارف اسمو اية والله ..قالى دى محتاجة نص عمرة وكمان طقم شمبر وداه الية خلانى اسئل عن التطوير .. اما الدنجل كنت عايز اعرف رايك الاول هوا اقوى ولا العفشة العادية بالزات فى البلد كلها زى ما حضرتك معايا مليانة مطبات وبلاوى .. وانا مش موهم انو يكون خشن او ناعم المهم انو يستحمل طرقنا ..وععلش يا استاز هشام انا طولت على حضرتك وباقى الاعضاء ..

[ابوهاشم]

اولا مافيش داعى لكلمة معلش او طولت
احنا كلنا اخوات وبنفيد ونستفيد من تجارب بعض
انا بس عاوز اعرف منك الميكانيكى اللى بتتعامل معاه فى شبرا
هل هو ميكانيكى بيتلز ولا غير متخصص
وانت نفسك حاسس ان الموتور خفيف
او بيجيب دخان كتير مثلا وهى دايره
ولو فى دخان من العادم لونه ايه
اذا كان لون الدخان اسود يبقى مشكله فى دورة البنزين
اما اذا كان ازرق يبقى طقم شنبر
وهل بتسمع صوت خبط فى الموتور
استهلاك البنزين اخباره ايه معاك
واستهلاك الزيت وانت بتستخدم زيت نوعه ايه
والبوجيهات دى بتتغير كل كام ك تقريبا
اما عن الدنجل فهو ممتاز فى تحمل المطبات
واحسن من السوست بكتير فى تحمل الرزع والمطبات فى البلد
لكن بيخلى العربيه ناشفه شويه عن السوست
وبق وقولتلك ماينفعش التعديل من دنجل لسوست

[hanymah]

ماشى يا استاز هاشم مش هاقول تانى انا طولت احنا فعلا اخوات كلنا فى المنتدة الجميل داة ..
بالنسبة للميكانيكى فهوا بتاع فولكس بس وامين جدا وانا افتكرتلك اسمو (حامد) الميكانيكى وهوا موجود فى مسرة وهوا قالية عن طقم الشمبر ..
اما العربية هقولك معاية اية الية بيحصل بالضبط
1--اول ما بافتح العربية الصبح الشكمان بيفرقع
2-وكمان باسمع صوت خروشة ورا بس مش عارف مكانها بالضبت بس اول العربية مابتسخن كويس بيروح الصوت مش عارف لية؟؟
3-وبردو الدخان بيكون كتير بس مش عارف لونة بيكون اية بالضبت
4-البنزين كويس وبيقعد مدة طويلة
5- العربية بتسحب كويس وكمان باجيب بيها 100 عادى مافيش مشاكل
6-اما الزيت باستعمل التعاون وبيخلص بسرعة مش عارف لية .. دايمن لمبة الزيت مابتقعدش اسبوعين على بعضهم ..
7-اما البوجيهات مش عارف كل كام كيلو بس هيا بتقعد حوالى 4 شهور معاية لغايت ما العربية تقطع معاية فاغيرها
8- وعن العفشة حضرتك طمنتنة انو احسن حاجة الدنجل بس زى ما بتقول ناشفة اوى على الارض

[ابوهاشم]

طيب الزيت فى الاسبوعين دول بيكون عمل كام ك تقريبا
وانت بتستعمل اى نوع من التعاون
بالنسبه للفرقعه اللى فى الشكمان ممكن يكون مخروم
او الافيز بتاعه مش مربوط كويس
الدخان ضرورى تعرف لونه لان ده مهم جدا

[hanymah]

السلام عليكم ..

بالنسبة للزيت فهوا التعاون ولونو احمر وسعره بيكون حوالى 12 جنية .. وبعد كدا بيركبو بتاع الزيت
اما بتعمل كام كيلو مش عارف بس انا ساكن فى مدينة نصر وبروح بيها العباسية كل يوم وبارجع بس
اما الدخان اعتقد انو لونة اسود بس دا مش بيطلع علطول دا بيطلع اول 5 دقايق بعد ما بافتح العربية وبيروح بعد كدا
والفرقعة انا كان فية ميكانيكى قالى انها بوجيهات ..ولما باغيرها فعلا بتروح
وكنت عايز اقول لحضرتك ان العربية مليانة زيت من عند الموتور ..حتا لما الزيت بينقص بتكون كدا بردة

وكنت عايز راى حضرتك فى حاجة .. هوا اية الفارق بين موتور 1200 و1300 و 1600 هل الموترو كل ما يعلا كل ما يستحمل اكتر او بيكون مثلا العربية اسرع ولا اية
اصلى بصراحة لما جبت العربية دية فى الاول كنت باقرص عليها فى الجرى والنقلات لغاية ما حصل الكلام دة كلوة ..

[ابوهاشم]

الدخان الاسود نتيجة خلل فى دورة البنزين مالوش علاقه بالموتور
يعنى ممكن الكاربراتير مش مظبوط او البوجيهات
انصحك بلاش الزيت السايب هات زيت التعاون (سوبريكس10000)
ده ب37 جنيه جركن برتقالى
او التعاون (كوب فاكت )لونه اسود
والزيت للبيتلز 2.5 ك بالظبط لا يزيد ولا يقل
لانك لو بتزود زيت عن كده يبقى ده سبب يخلى الموتور يجيب زيت
بعد ماتغير زيت خلى بتاع الزيوت يغسلك الموتور بجاز وهواء بس
واعمل مشوار وبعدين اركن وانزل بص على الموتور وشوف
هل لسه فى تسريب زيت
ولو لسه فى تسريب زيت حاول تعرف مكانه بالتحديد
هل هو من تحت الطبه ولا من تحت التاكيهات وممكن يكون
زيت فتيس مش موتور
انا كما ساعات لما بروح اغير زيت العامل ممكن يزود عن 2.5
والاقى الموتور يجيب زيت من تحت لحد ماينقص شويه
بالنسبه للفرق فى المواتير من 1200 ل1600
اكيد فى فرق طبعا بس مش هنقول فى زيادة السرعه لان ده مالوش لازمه هنا فى مصر
لكن طبعا بيكون فى فرق فى عزم السياره والتحميل الزائد بيبان
والسحب بس صدقنى ال1200 كويس جدا مش وحش واقتصادى كمان

[hanymah]

انا مش عارف اشكرك يا استاز هاشم على المعلومات دية والاهتمام ..

وانا هاجرب الزيت الي حضرتك قوات علية سوبري 10000

اما عن الموتور هاظبتة على الاخر وكفاية 1200cc مدام مفيش فارق كبير وكمان واقتصادى ..

[WAEL_WAHBA]

السلام عليكم اخى العزيز
بعد كلام استاذ هاشم مفيش حاجة تانية خالصة
بس ياريت لو أقدر اساعد ك تقو لى انا بتعامل مع محمد الاسمر فى جسر السويس راجل اكتر من محترم وزى العسل
وعلى فكرة انا ساكن فى الحى السابع مدينة نصر
و معاى بيتلز زرقاء
و رقم
0100990386
اخوك وائل

[ahit]

السلام عليكم ورحمة الله وبركاته

متابع و مستمتع و مستفيد من الردود الجميلة بتاعة أخويا و أستاذنا الكبير هاشم

انا بتعامل مع محمد الاسمر فى جسر السويس راجل اكتر من محترم وزى العسل

فعلاً كلامك سليم
أنا كمان بتعامل معاه من فترة

[hanymah]

شكرا يا استاز وائل على المداخلة الطيبة دية
وعايز اقولك انا ساكن كمان فى الحى السابع و معاى بيتلز سماوى ...ولو احتجت اى حاجة انا تحت امرك ..

اما بالنسبا للاستاز هاشم طبعا مافيش كلام يعلا علية ..

[mynameh]

طبعا استاذ هاشم و استاذ احمد حسن و استاذ احمد سالم و .... و ..... و ....

هما اكتر ناس فاهمين البيتلز و ربنا يباركلهم لانهم مبيبخلوش بحاجة

اما عن رأي اول حاجة بلاش تعدل الماتور ل 1600 الأفضل تسقط يا اما 1600 يا 1500
و لو انت عايز انا ادامي ماتور 1500 بالفتيس استيراد اوارقة كلها خالصة ممكن يخلص علي 3500 جنية
و نصيحة بلاش احسن لاننا في بلد مش عارفين اية الي ممكن يحصل كمان 5 دقائق

و طبعا ماينفعش تحولها من دنجل لسوست و لا تركب تابلوة بس ممكن تكسي بسمك كبير شوية بلون غامق ممكن يأضي الغرض