الاشعال الالكترونى للبيتل

[ابوهاشم]

توقيت الاشعال بيكون مظبوط فيه
هو بس بيحتاج لظبط الكهرباء الاسبراتير
تقديم او تأخير حسب نوع البنزين المستخدم
طريقة تركيبه بالنسبه للبيتل غايه فى السهوله
لانه بيركب داخل الاسبراتير مكان الابلاتين
وخارج منه طرفين سلك
سالب وموجب وبيتم تركيبهم فى الموبينه

[mohamed777]

جزاك الله خيرا على نقلك لهذة التجربة

[ahit]

الف مبروك وربا يبارك فية

هل ممكن يتركب على انواع تانى مثلاً زى المازدا 323 مو 82

وهل ده بيعيش على طول ومالوش اعطال ولا لية عمر افتراضى ولازم يتغير كلة؟

وهل بيركب على نفس الاسبيراتير ولا بنغير الاسبيراتير كلة؟

واخبار استلاك البنزين بعده اية؟

وجزاكم الله خيرا

ممكن حضرتك تراجع الرابط ده و تشوف هل يتناسب معاك ولا لأ

و ده الموقع بتاعه فيه كل التفاصيل بتاعته.
http://www.hot-spark.com/

[ahit]

عمره الافتراضى 175000ك

تصحيح بسيط يا هاشم باشا

العمر الإفتراضى المتوقع 75000 كيلو فقط

[mohamed777]

سؤال ساذج شوية
لية سعرهم غالى بالنسبة لحجمهم وحاسس ببساطه فى تركيبهم؟

[ابوهاشم]

تصحيح بسيط يا هاشم باشا

العمر الإفتراضى المتوقع 75000 كيلو فقط

كلامك مظبوط يااحمد باشا
فعلا 75000 ك

[ابوهاشم]

سؤال ساذج شوية
لية سعرهم غالى بالنسبة لحجمهم وحاسس ببساطه فى تركيبهم؟

الموضوع مش موضوع حجم
بس دى سلعه جديده وليها اثر فعال فى اداء السياره
ده كمان غير الاستغناء التام عن الابلتين والكوندنسر اللى كل شويه
يتم تغيرهم ومشاكلهم كتير

[sakr84]

معلش يا جماعه ياريت حد يفيدنى هو النظام ده بيتجاب من عند مين بالظبط ؟؟؟ وأسعاره بكام ؟؟؟ ومصنعية تركيبه كام ؟؟؟ والحاج محمد على بيركبه بكام وبيبيعه ولا ايه النظام بالظبط ؟؟؟؟ انا لسه جديد خالص فى البيتلز والعربيات أصلا وبجد مجهود فوق الرائع ومواضيعكم كلها مفيده جدا وليكم الف شكر

[gomangy]

متابع باهتمام جدا

[ahit]

السلام عليكم ورحمة الله وبركاته

أعتقد ممكن تلاقيه عند الحاج محمد على الميكانيكى
الأسعار من 150 إلى 200 جنيه حسب اللى بيبيعه
التركيب سهل جداً و بالكتير ممكن الميكانيكى ياخد 10 جنيه تركيب لأنه بيركب مكان الأبلتين القديم فقط و ليه سلكين واحد أحمر كهرباء موجب و الثانى إسود سالب و بيركبو فى الموبينه 12v.

و لو مش لاقيه قولى و إن شاء الله هاحاول أجيبهولك و لما نتقابل أركبهولك.

[sakr84]

استاذ احمد حسن انا بجد مش عارف اشكرك ازاى انت بجد بتبذل مجهود جبار ومتميز فى خدمة الاعضاء وبجد انا متابع كل مشاركاتك ونفسى فعلا اتعرف عليك وياربت لو بتتقبلوا تعلنوا عن مكان وميعاد المقابله ومتشكر جدا على زوقك واهتمامك

[tejani]

ينفع يركب في عربيتي انا عربيتي سكودا 85 بيركبلها ابلاتين زي اللي في البيجو 504 rt handed one piece ويا ترى مبيتبعش في حته اقرب شوية من جسر السويس اصل انا من امبابة يا ريت توصفولي مكان اقرب وشكرا

[sakr84]

يا جماعه انا كنت عند الحاج محمد على يوم الجمعه بعمل سرفيس لعربيتى بس الحاج محمد مكانش موجود وسألت أبنه عمرو عن موضوع الاشعال الالكترونى فرجهونى وقالى انا بطلت اركبه والاحسن الابلتين والكوندنسر علشان النظام ده بيعمل مشاكل كتير فى العربيه والكلام ده انا كنت سمعته من واحد ميكانيكى بس مش بتاع بيتلز بس مصدقتوش بالرغم من انه كان سائل واحد ميكاينكى بيتلز زميله وياريت يا جماعه اللى عنده معلومات اكتر ومجرب يفيدنا بتجاربه ويقولى ايه رائيه فى الكلام ده ؟؟؟؟

[ابوهاشم]

يااستاذ تامر انا جربته بنفسى
وهو ممتاز فعلا
وماشوفتش منه اى مشاكل بالعكس هو وفر عليا مشاكل كتير
سحب واداء العربيه اتغير تماما للافضل طبعا
توكل على الله وركبه وهتحس بقيمته بعد التركيب

[ahit]

السلام عليكم ورحمة الله وبركاته

بفضل الله تعالى كنت ركبت الإشعال الإلكترونى أنا و أخويا هاشم فى يوم واحد و كنا مركبينه على سبيل التجربة , لكن الحمد لله طلع ممتاز و بيفرق كتير فى السحب و الآداء و بيريح من قرف الأبلتين و الكوندينسر اللى 75% منهم مضروبين .
يعنى توفير فلوس و راحة بال
و زى ما قالك الأستاذ هاشم توكل على الله و ركبه.

و أحب أقولك إن كل الميكانيكية هاتقولك بلاش تركبه لأنه بيحتاج صبر و حرفنه لظبط كهرباء الإسبراتير و وقت الإشعال بعد تركيبه.

و بصراحة ربنا الميكانيكى الوحيد اللى عنده صبر و حرفنه فى ظبط الكهربا و الكربراتير هو عاطف عبده فرج الميكانيكى. على الرغم من إنه مش بيحب يركب الإشعال الإلكترونى زى باقى الميكانيكية.