مشاكل فى عربيتى البيتلز

[semam]

السلام عليكم ورحمة الله وبركاتة

انا عندى شوية مشاكل فى عربيتى البيتلز 1302

المشكلة ان من فترة كدة بوجيهه قطع وغيرت طقم البوجيهات بالكامل ولكن بعد فترة بوجيهه قطع

تانى وغيرتة وبعدين قطع من فترة قريبة

وعايز اعرف يا ترى السبب يكون من اية هل هو طقم شمبر ؟؟

ولو فعلا كدة يتكلف كام تقريبا


المشكلة التانية ان العربية بتاخد وقت على ما بتدور

وللأسف سمعت العجب فى الموضوع دة

واحد يقولى دى بطارية وواحد يقولى دة الدينمو مش بيشحن ولازم تكون على سرعة عالية علشان

الدينمو يشحنلك البطارية وواحد يقولى الأبلاتين


المشكلة الثالثة بقة ان العربية سحبها مش مظبوط واحيانا بحس انها بتنتش كدة

هل دة يكون بسبب موضوع البوجيهه دة ولا دى مشكلة جديدة


المشكلة الرابعة بقة عوامة البنزين وديتها ل 3 كهربائية ومحدش عارف يظبطها وعايز اشترى

عوامة جديدة ياترى منين وبكام لان القديمة تقريبا مش هينفع تتصلح

انا حبيت اسأل فى المنتدى لان كل صنايعى بكلمة شكل وانا محتار بصراحة وعايز اعرف

العربية فيها اية علشان لو كدة ابدأ اغيرة واظبط العربية

[ahmed2y]

المشكله الاول
لو البوجيهات نوعها كويس ماتقطعش بالسرعه اللى انت بتحكيها ديه يبئا ممكن البوجيهات عندك بتقطع لسببين
الاول ان البوجيهات بيجى عليها بنزين زياده وكدا يبئا الكربراتير عاوز يتظبط
التانى لو البوجيهات بيجى عليها زيت وكدا يبئا الموتور مجتاج طقم شمبر لان الشمبر كدا بيسرب زيت

وفى الحالاتين اللى قولتهم سواء الزيت او البنزين لما يجى عالبوجيه بيمنع عمليه اشعال الشراره واتمام عمليه الحرق
=============================
المشكله التانيه
احد اسببها جزء من المشكله الاوله بالاضافه ان الابلاتين والكونديسر مش مظبوطين على وقت الاشعال وده يسبب بطئ فى تدوير العربيه لكن موضوع الشحن والدينمو ملهمش علاقه ببديه التشغيل
================================
المشكله التالته
الخاصه بسحب العربيه شئ طبيعى بسبب المشكله الاوله والتانيه
================================
المشكله الرابعه
الخاصه بالعوامه لزم تروح للكهربائى متخصص فولكس اما بالنسبه لسعر العوامه معنديش فكره عنه
================================
وحل المشكله الاوله والتانيه والتالته انك تروح لميكانيكى فولكس وعمل طقم سرفيس عباره عن فك الكربراتير وتنظيفه والمراجعه عليه
وفك الاسبراتير وتنظيفه والمراجعه عليه وتغير الابلاتين والكوندينسر والاهم من تغيرهم تظبيتهم بالاضافه لتغير البوجيهات بنوع ngk
بالاضافه ضبط التاكيهات
وارشحلك الحج محمد على عن تجربه شخصيه وربنا يوفقك
واى خدمه

[ahit]

السلام عليكم ورحمة الله وبركاته
صبرى باشا و أحمد الدغيدى باشا
مساء الفل عليكم

كلام أحمد باشا الدغيدى سليم و مظبوط - الله ينور يابو حميد يا كبير

و كان نفسى نتقابل النهارده يا صبرى عند عاطف لكن قدر الله و ما شاء فعل و إن شاء الله تتعوض قريب و نشوف كمان أخونا أحمد الدغيدى

[semam]

بأذن الله يا احمد باشا تتعوض عن قريب ان شاء الله

ومشكور يا ahmed2y على الرد الوافى وجعلة الله فى ميزان حسناتك يا جميل

وحاليا انا عرفت بعض المشاكل اللى عندى اولهم موضوع ان الماتور خفيف بس اكتر من ميكانيكى قالى سيبة شوية

الموضوع الأهم بقة ان العربية بتستهلك بنزين جامد اوى واعتقد ان دة ممكين يكون كاربراتير بس لسة مش اتأكدت اوى بس عموما الاسطى عاطف كان غيرلى بيك وقالى عايزين نجرب على كاربراتير تانى علشان نتأكد ان العيب منة

وعموما انا سألت على سعرة عند واحد فى فيصل اسمة سعيد اوفة

كان الاسطى عاطف قالى علية لقيت سعرة 300 جنية
بس اللى سمعتة تقريبا من الاخ العزيز هاشم ان كانت عندة مشكلة سحب البنزين دى وراح صلح الكاربراتير او عمل اكس وباب على ما اتذكر فى شبرا

وتقريبا اتكلف 80 جنية

[ابوهاشم]

السلام عليكم
استاذ صبرى اولا انا سعدت جدا بمكالمتك النهارده واستفسارك
واسف جدا على تأخرى فى الرد على الموضوع
وفعلا انا كنت عملت الاكس وباب ب80جنيه عند واحد
فى دار السلام لكن اغلب ميكانيكية الكاربراتير موجودين
فى شبرا ومشهورين هناك
ولو نزلت دار السلام بالعربيه كلمنى وانا اوديك للميكانيكى
هو اسمه عماد فى شارع متفرع من شارع حسنين دسوقى
وزى ماقولتلك اكشف على تانك البنزين ربما يكون مخروم
وكمان المواسير والخراطيم بتاعت البنزين
وان شاء الله خير

[semam]

شكرا جزيلا على اهتمامك ودعمك الدائم يا استاذ هاشم انت والاخ الغالى احمد باشا حسن وكل الاعضاء الافاضل فى المنتدى وبأذن الله هجرب كاربراتير من عند واحد معرفة وهشوف المشكلة اتحلت ولا لسة

[ابوهاشم]

بأذن الله خير
وابقى طمنا ايه الاخبار

[gomangy]

انا كان عندي مشكله ان في زيت بينقط من العربيه من تحت

المهم سالت طبعا اهل الخبره في المنتدي الاستاذ هاشم واستاذنا احمد حسن بارك الله لهم
انا بعد ما اتصلت بالاستاذ احمد حسن وربطلي مع الميكانيكي عاطف عبده فرج وكنت ناوي انزل القاهره لكن للاسف محصلش نصيب
المهم عرفت من كذا بتلزاوي في اسيوط ان في واحد محترم علي كلامهم محترف بيتلز
المهم ظبط نفسي ورحتلوا يوم الخميس
المهم قبل ما اروحلوا غسلت الموتور بالجاز والهواء عشان يبقي واضح مكان التسريب بتاع الزيت ونزلتله من سوهاج لاسيوط
المهم بس علي العربيه وقالي ده الجوانات كلها والاولسيهات عايزه تتغير المهم قالي العربيه هتاخدها تاني يوم وانما هفتحلك مخصوص انا سمعت كده وقلت بس يبقي انا كده هترفع طالما مخصوص
المهم قالي الطلبات حسبه 200 جندي اديتوا وقالي خلاص يا باشا انت كده لو وراك مشوار اعتمد علي الله
وعليها فضلت معاه لحد ما سقط الموتور وفك وش التاكيهات وتمام ومشيت وانا معاه علي تليفون
ونزلت تاني يوم قبل صلاه الظهر لاقيت مقفل المتور
تمام وركبلي طقم كهربا كامل (كوندنسر - وابلاتين - وطقم بوجيهات ياباني ) وقالي ميه ميه وركب الموتور ولحم الشكمان لان كان مخرم من الكوع النيكل وتمام وحط زيت جديد وظبط المكنه وطلع جرب الحمد لله تمام
وبص علي الفرامل راح مرجلش عليها وخدلها هوا بقت علي الشعره وبص علي كاوتش الكبالن والتيل وقالي 100 100 لاني كنت مغيرهم من شهرين هما والطنابير اللي ورا
وتمام وزي الفل
جينا بقي للحساب
حاسيت ان انا
قالي باقي طلبات 50 جندي
والمصنعيه 350 بس عشان انت اول مره وتابع فلان وفلان خليها 300
وقلتله انت بتهزر
بصلي وقالي يا بيه الشغل ده انا مش بعملوا اقل من 500 جنيه فبقلوا اومال لو عمره كنت اخدت كام خلاص يا باشا خلي والبؤين دول طبعا
انا رحت اتصلت وانا واقف باخويا الله يصبره احمد حسن قالي لا كتير اوي اوي وصعق طبعا وقالي هي 100 150 بالكتير اوي المهم كاني ماني انا لحد ما رسيت علي 200 جنيه و بقشيش 10 للصبي عشان ركب الكنبه اللي ورا ونضف العربيه واي خدمه يا باشا
يعني طلبات ب250 جندي وتشمل طقم كهربا وشويه جوانات واولسيهات وملء اسطوانه الدبرياج ب50 ولحام الشكمان وغيار زيت
و210 مصنعيه
و230 بطاريه بالمره لان كان فيها ربع ضارب واخد القديمه طبعا وملقتش 55 امبير جبت ال 70 امبير طبعا الموضوع ده كله باسيوط
انا عارف انو لو في قاهره المعز مكنتش هدفع ده كله
وعلي راي اخويا احمد حسن محدش بيتعلم ببلاش
واسف بجد علي الاطاله والملل اللي سببته