عايز اشترى سيارة فى حدود 18000 ... رأيكم مهم جدا لو سمحتم

[husseinoo]

انا جديد وعمرى ما اشتريت سيارة ... وامكانياتى عادية "مستورة والحمد لله"
المشكلة انى تابعت البيتل بشكل جامد جدا
ووجدت انها سيارة رائعة لاكثر من سبب

اكثر السيارات مبيعا فى العالم
اكثر السيارات شعبية
اكثر السيارات انتشارا حتى وقتنا هذا "مازالت مطلوبة فى اغلب دول العالم"

بالنسبة لمزايا السيارة نفسها
وجدت انها من غير راديتير
ليس بها مروحة للراديتير
لا يوجد بها طرمبة مياه
لا يوجد بها "كارونة"
لا يوجد بها كبالن متحركة
لا يوجد بها غير الاساسيات "ولذلك السيارة قوية متماسكة شعبية" ... ومن خلال مشاركات القراء تتحمل جدا
حتى قطع الغيار ... ابسط حاجة توافر المواتير استيراد بأسعار معقولة لكى تسترد السيارة عفيتها فى اى وقت ولاى موديل

وبرغم اقتناعى بها إلا انى اواجه بعض الاعتراضات
مثلا البعض يقول "يا عم حد يشترى سيارة عمرها اكثر من 40 سنة"

والآخر يقول " بصراحة شكلها موش حلو" وده كلام ام العيال

وناس تانية تقول "دى بابين فقط وضيقة من الخلف" يعنى سيارة موش عائلية

المهم انا من وجهة نظرى كالتالى:
ما دام امكانياتك فى حدود 14000 لن تجد افضل من البيتل

المهم الحمد لله انا ربنى كرمنى "ما شاء الله ولا حول ولا قوة إلا بالله" .. اكثر مما توقعت وفكرت ابحث عن سيارة فى حدود 18000
ممكن ارفع السعر الى 20000

وجدت نفسى فى حيرة كبيرة جدا
الكلام حلو
لكن الفعل صعب

البعض يرشح سيارة مازدا 323 موديل 1982
برغم جمال العربية وشهادة الجميع بكفاءتها ولكن عمرها حوالى 30 عام

كذلك السيارة فيات 131 موديل 82
والكثيرين من اصحابها يطلبوا فيها مبالغ كبيرة تتحطى الـ 20000

اما السيارة "لادا" ... اعتقد والله اعلم انها صعب انك تركبها غير "زيرو" خلاف كده سوف تكون صديق للميكانيكى خصوصا بعد مرور 10 سنوات عليها
ده غير انها خشنة وناشفة برغم قوتها

خلاف كده انا احترت اى سيارة خلاف كده نفس المشكلة
لا تجد غير سيارات صغيرة "عاملة زى اللعبة" وسعرها يبدأ من 20000
مثل سوزوكى ماروتى موديل 1992

ارجوا النصحية من الطيور المهاجرة بخصوص شراء سيارة فى حدود 18000

على فكرة انا لا احب الـ 128 "المعروفة بصديقة الميكانيكى"

سمعت ان استاذ هاشم سوف يتحول الى "الطيور المهاجرة" ويبيع البيتل ويبحث عن سيارة عائلية
عايز نصيحته ...

عايز اعرف آرائكم القيمة ... ونصائحكم الغالية ... خصوصا انى مبتدأ ,لا يوجد عندى استعداد لأى اعباء صيانة وزيارات للميكانيكية عمال على بطال .. "البيت اولا بأى قرش" موش كده ولا إيه

الموضوع مفتوح لكل اصحاب الرأى والفكر

فى انتظار ردودكم

مع اطيب التمنيات
اخوكم حسين غزالة
[caution]
اللون الأحمر مخصص للمشاركات الإدارية فقط

http://www.nilemotors.net/Nile/78489-a.html

مشرف الأوروبى 2[/caution]

[ابوهاشم]

السلام عليكم ورحمة الله وبركاته
استاذ حسين
كل عام وانت بخير
فعلا انا نويت اهاجر واغير البيتل بس والله على عينى
لان السياره حجمها اصبح صغير على عدد اسرتى
والاولاد مش بياخدو راحتهم فيها
مع تمسكى الشديد انى مش هلاقى فى كفائتها تانى
وده مش رأيى فى عربيتى بالتحديد لكن فى البيتل عموما
عربيه جباره عبرت القارات واعطالها قليله بالنسبه لكل فئاتها
وان شاء الله ناوى اجيب دوجان او شاهين
ومع الاسف مش حب فى الشاهين ولا اعجاب بيها
ولكن لكثرة انتشارها اولا وتحملها للطرق المصريه
وتوافر قطع الغيار والميكانيكيه وتكيفها مع كل انواع البنزين والزيوت
ده طبعا بجانب حجمها الواسع اللى يتحمل الاسره وظروف السفر
وانها عربيه عاليه ومافيش احتكاك بالمطبات
لكن اللى كان نفسى اشتريها وتراجعت عن التفكير فيها
هى العربيه (فورد سكورت) وهى فى نفس الفئه السعريه
يعنى تقريبا 28000جنيه
عربيه جباره بمعنى الكلمه وهى اللى كانت تعتبر التطور الحقيقى
بعد البيتل كركوبه
يكفى انها بتعدى فى التسارع 180ك وهى ثابته تماما
وتقدر تاخد بيها ملفات على سرعة 100ك بدون قلق
تقفيل اوروبى يفوق الوصف والخيال
الصالون بتاعها تحفه بجد وناعمه جدا
بس بعد السؤال والتشاور لقيت انها مغامره كبيره
قطع غيارها غاليه جدا جدا لدرجة مثلا ان المساعد الواحد ب450جنيه
مع العلم ان مساعد الفولكس ب120جنيه وده مجرد مثل لحاجه واحده
بدون الدخول فى باقى الاسعار
وغير كمان ان الاهم من كده ان ميكانيكية الفورد معدودين على الصوابع
يعنى مشكله كبيره برضه
وفى الاخر الفورد كان مجرد حلم وصحيت منه خلاص
نرجع بقى لباقى السيارات اللى من نفس الفئه مش هنلاقى غير الشاهين افضلهم قدره وتكلفه مع انها فيها شوية عيوب بس احسن الوحشين
ومسيرنا نتعود عليها
ــــــــــــــــــــــــــــــــــــــــــــــــــ ــــــــــــــــــــــــــــ
نرجع بقى لموضوعنا الاساسى وهو ترشيح عربيه فى رنج السعر اللى معاك
وتمشيا مع الكلام اللى قولته
يبقى انصحك بال131
على قد نفس السعر اللى ذكرته
والشاهين بالفعل هى التطور لل131
وال131 هى اول مايقارن بالبيتل من الفيات
بس البيتل اللى تكسب فيما عدا الصالون والشنطه
وانا لو عندى مكان للركنه كنت احتفظت بالبيتل لمشاويرى الخاصه
ارجو ان اكون افادتك وربنا يوفقك

[original]

كلام معقول
فعلا فيه عربيات مش هتخليك صديق للميكانيكى وهتخليك صديق لكل الميكانيكيا فى مصر مش واحد بس..
ماروتى 800 سى سى إقتصادية فى البنزين
128 قطع غيارها ببلاش
131 موتورها 1600 أو 2000
لادا ناشفة وروسى (موديلات قديمة) وقطع غيارها ببلاش
شاهين قطع غيارها متوفرة وفعلا أنسب عربية للطرق المصرية
بيتلز عربية تحفة تحب تقتنيها لأنها ممتازة بس ماتفكرش إنها مش هتحتاج ميكانيكى (الدنيا مش وردى)

ربنا يوفأك وتلاقى اللى يناسبك..

[husseinoo]

والله يا جماعة انا كده موش عارف افكر
الحاجة اللى انا متأكد منها "إن الفلوس لم يعد بها بركة"
وإن الواحد فاكر إن "20000" الف جنيه فلوس
طلعت ولا حاجة ... خصوصا لو فكرت تشترى حاجة فى التسعينات عشان ترتاح
واللى انا متأكد منه وعايزكم تكلمونى فيه
ان لو الواحد اشترى بيتل فى حدود 16 او 17 الف ... تفتكروا ان السيارة دى هاتريحنى
من موضوع المكيانيكية خصوصا انى لم اركب سيارة فى حياتى ومعدوم الدخل هههههههه او تقدر تقول "محدود الدخل" عشان الحكومة ما تزعلش
طيب وبعدين .... فين كلامكم عن موضوع السيارة "حالة"
النهارده سواق التاكسى بيقول لى "لأ السيارة موديل"
ولو اتعرض على سيارة 131 موديل 79 لن ادفع فيها اكثر من 16 الف جنيه حتى ولو كانت فابريكة زى ما بيقولوا

وبعدين اى حاجة بقولها هاشم انا اثق فيها على طول
لكن موضوع الشاهين ده بعيد عنى قوى
ربنا ييسر الاحوال

انصحونى

مع اطيب التمنيات
اخوكم حسين غزالة

[Youssef.Awad]

هى البولونيز مافيش غيرها
تقدر تجيب عربية حالتها كويسة جدا بالسعر ده وقطع غيارها رخيصة ومتوافرة وثبات وقوة وصاج متين خصوصا للى بيتعلموا السواقة وكبيرة وواسعة ودفع خلفى للخدمة الشاقة
بس أهم حاجة تقع على واحدة بحالة جامدة موديلات 88 وانت طالع لحد 91
واحسن من البيتلز من وجهة نظرى لو قارنتهم ببعض وانشف من الفيات 131 على الطريق والمطبات

[original]

131 فيه ناس كتير بتجيبها ب 13 دلوأت

[zico900]

نصيحه:

في رأي الشخصي....كان في واحد صاحبي عمال يدور على عربيه لحد ما رسي على احسن حاجه ممكن تجبها بحدود 20 هي ستروين ax فرنساوي و موديلتها حديثه بالنسبه للعربيات الانت بتكلم عليها (1996)

و فيها كماليات من المصنع مش متركبه زي:
1-ريموت و سنتر اصلي
2-شبابيك كهرباء امامي اصلي
3-تكييف اصلي
4-اشيك من بره و جوه من جميع العربيات اعلاه (في رأي)
5-فرنساوي
6-واخده رقم قياسي سنه 1994 على انها اوفر عربيه في العالم

عيبها كالاتي: قطع الغيار بس

[husseinoo]

بسم الله الرحمن الرحيم

ما هو اساس اى مشكلة هو قطع الغيار
من حيث السعر ... كذلك توفرها

بعد كده فى ناس تقولك لازم يكون معاك فلوس بعد الشراء علشان لو ظهر اى حاجة تعملها والسيارة لا تتوقف

يعنى لو السيارة فى حدود 18000 الف يبقى معاك مثلا 2000 على الاقل من باب الاحتياط لاى حاجة

اما لو وضعت فلوسك كلها فى موديل معين وظهر اى حاجة لا قدر الله كل اللى هاتعمله "هاتركنها جنب الرصيف لحد لما ربنا يفرجها"

فى انتظار افكاركم ... يا ريت تشاركونى

مع اطيب التمنيات
اخوكم حسين غزالة

[ابوهاشم]

انا مازلت مصمم على ال131
لان انا عندى 3زملائى من المقربين ليا معاهم 131
والحقيقه هى قليلة الاعطال عن معظم الفيات
وحكاية انه ب13 ده رقم خرافى
الا اذا كانت محتاجه حوالى 10000مصاريف
فى واحد صاحبى اشترى من شهر 131 موديل 79 ب17000
وكانت حالتها كويسه جدا ولو بالمقارنه مع البولونيز يبقى ال131 تكسب
لان البلونيز مع انها محترمه جدا وتعتبر عفشتها عفشة نص نقل
لكن ال131 انعم منها وشكلها اظرف مع اختلاف الموديل الاعلى للبلونيز
والستروين مالهاش قطع غيار وميكانيكيه قليلين يبقى طظ فى الموديل
وعلى فكره مافيش 131 2000سى سى
اللى موجود 1300-1500-1600
بس اهم حاجه وانت بتشترى لازم طبعا الحاله علشان تريحك
والله الموفق

[husseinoo]

السلام عليكم ورحمة الله وبركاته

موش قادر انسى حبى للتصوير الفوتوغرافى ... وماكانش معى الكاميرا الديجيتال ... كان معى الموبايل ... وكنت اقول عليه "قبقاب" نوكيا 6630 ... لكن سبحان الله الوحيد اللى جبر خاطرى فى الرحلة دى ... ماكنتش اعرف ان صوره حلوه كده خصوصا الخارجية ههههههههههههه

المهم نبدأ الحكاية

برغم ان ساكن فى مصر الجديدة لكن عمرى ما روحت سوق السيارات
اليوم قلت لنفسى روحى صلى الجمعة هناك وشوف الحكاية ايه

وجدت التالى

سيارات قليلة قوى مثل مازدا 323


وقليل قوى اللى حالته كويسة
يمكن انا اللى موش فاهم والله اعلم

وطبعا كل الكلام بيدور حوالين 22000 الف او 23000 ونبدأ مشوار الفصال




طبعا دى كانت احسن الحالات اللى شفتها
فى حالات اسوأ من كده كثيير

ووجدت ان السيارة فيات 131 برده قليلة قوى
واحد فقط واضح انه شاب ومكانش تاجر وكان فى زبون بيخلص معاه بسرعة قبل ما يرجع فى كلامه والسيارة كانت عادية موش بنظافة السيارة التالية:


اخيرا وجدت ان السيارة بيجو 504 هى الوحيدة اللى منتشرة ومتواجدة بشكل ملحوظ
لكن اصحابها اعتقد فى الغالب تجار حتى من الاقاليم خصوصا الزقازيق
والصورة توضح صاحب احد السيارات موديل اعتقد 1978 وكان عايز 28000

واحد صاحبى قال لى ممكن تلاقى بيجو واقفة على حيلها فى حدود 25000


لكن بصراحة كل البيجو اللى انا شفته من الخارج شكله جميل مثل الصورة السابقة والسيارة واقفة على حيلها ولكن اول ما انظر الى الماتور "طبعا انا موش فاهم حاجة" اخاف واحس ان الماتور ده قديم قوى وتعبان والله اعلم ممكن اكون انا اللى موش فاهم

واكثر حاجة تقلق ان البيجو تقريبا اغلبه 2000 سى سى يعنى ما اعرفش استهلاكه ايه فى البنزين ... لكن سبحان الله عمرك ما كنت تحلم انك تلاقى بيجو فى حدود 25000 الف سبحان مغير الاحوال .. لكن السيارة بصراحة واقفة على حيلها واغلبهم شكلهم حلو موش وحش

طبعا وجدت السوق عبارة عن ماسورة "بنى آدمين " وانفجرت هناك


لكن الملاحظة السيئة فعلا ان اغلبهم احساسى بيقول انهم تجار ... ونايمين على الرصيف "واكلين شاربين" عاملين خيمة هناك ... واسعارهم مبالغ فيها جدا ... ولا يوجد عندهم مانع انهم يناموا بجوار السيارة مافيش مشاكل ... لدرجة شاهدت "ستات" جالسين فى السيارة وشكلها زوجة التاجر ... اكثر من ست كانت جالسة داخل السيارة



اما عن السيارة شاهين ... نادر لما تلاقيها ... واول لما تظهر تلاقى زحمة عليها وتلاقى ناس كثير شكلهم موش وش عربيات ... شكلهم تجار ... كل اللى بيعملوه "شوية غلاسة" على صاحب اى سيارة ملاكى

طبعا ممكن تلاقى ناس كثيير موش تجار ... لكن الاسعار هى مولعة

يعنى الشاهين من 27000 وانت طالع وحسب شطارتك

المازدا التعبانة قوى كانت عاملة 18000 الف
اما الفيات 128 ... دى السيارة الوحيدة اللى تلاقيها بكثرة جدا ... لكن انا قرفان منها واتسخسر انى ادفع فيها مليم برغم ان ممكن تلاقى موديلات حديثة وحالة جيدة جدا بالمبلغ اللى معايا وكمان موديل تسعينات

موش عارف بصراحة حاجة تحير


بصراحة انطباعى عن السوق كان سىء جدا ... واغلب السيارات هناك كانت حديثة والمطلوب فيها جامد جدا بشكل مبالغ فيه .... واللى فهمته ان الاحسن انك تبعد عن السوق ... وتصبر يمكن تلاقى حاجة كويسة عند حد معرفة

اما موضوع الاحلال اللى عاملين له اشاعة ده .... بعد زيارة السوق ... استحالة الحكومة تقرب من عربيات الناس الملاكى ... ده لو كانت الحكومة موش عايزة حد يولع فى البلد ... لان طبعا نسبة كثيير جدا عندها سيارات قديمة وهى اللى حيلتهم زيى ما بيقولوا ... يعنى العملية موش ناقصة

موش عارف ليه لما الواحد بينظر الى موتور اى سيارة قديمة بيخاف ... بخاف كده واحس انى هاشترى التورماى .... برغم انى موش فاهم حاجة ههههههه

منتظر تفاعلكم
وآرائكم

مع اطيب التمنيات
اخوكم حسين غزالة

[ابوهاشم]

طيب وايه اخبار البيتل هناك يااستاذ حسين

[ahit]

متابع بإهتمام

[husseinoo]

اللهم صل على محمد وعلى آله وصحبه أجمعين

حبيب قلبى هاشم
البيتل ... والله وانا بتفرج عليها كنت فى بالى انت واحمد حسن واحمد سالم

وجدت التالى
وجدت بيتل اصحابها "رشينها" من الخارج ولكن من الداخل موش تمام
وجدت سيارتين بيتل
الاولى سوداء موديل قديم اعتقد اوائل الستينات ... لان فانوسها الخلفى صغير قوى ... وكانت واخدة وش "دهان" اسود بس حكاية ... وكل الناس كانوا بيتفرجوا عليها باعجاب .. وكان بجوارها بيتل حمراء احدث شوية ... ولما بصيت على الموتور بتركيز ... وجدت آثار زيت "تعريق زيت" ... قلت لنفسى الله اعلم ده طبيعى فى العربيات القديمة ولا الموتور حالته موش تمام
الغريبة ان اللى كان بيركن العربية السوداء كان شكله "تاجر" وان العربيتين كانوا تبعه

لكنى لم اجد سيارة بيتل واحدة حديثة مثلا موديل 78 وانت طالع "او برازيلى" ... ووجدت ان اغلب السيارات البيتل معمول لها تعديل الكاوتش العريض

لكن مافيش واحد فيهم كان روش وعامل حاجة شاذه فى السيارة او اقصى حاجة شفتها ... شوية بونية معقولين من الخارج وكاوتش عريض ... خلاف كده مفيش

بس كان فيه بيتل الى حد ما حوالى 5 او 6 عربيات على الاقل فى "البارك" اللى بيدفعوا فيه فلوس موش فى الشارع الرئيسى من الخارج

انا شفت سيارتك ... "ما شاء الله ولا حول ولا قوة الا بالله" ... ربنا يبارك لك فيها "جميلة" وبالمقارنه باللى انا شفته .. بصراحة "لأ" تعتبر حالتها ونظافتها كويسة جدا

كمان ماتنساش انى نازل السوق اتفرج على حاجة معينة "131 ـ شاهين ـ مازدا 323 ـ سويفت ـ بيجو " عشان كده كنت اتفرج على البيتل من بعيد فقط

وشوفت سيارات "لقطة" ... مثل الداتسون القديم ... اول ما نزلت فاكرها ... والله كانت جميلة جدا ... لكن عايزه واحد فاهم فى العربيات وعارف هايعمل معاها ايه خصوصا لو احتاجت اى قطع غيار ... هى حجمها كان صغير لأن "اليابانين صغيرين" اساسا ههههههه لكن عربية رائعة



رأى انك لا تستعجل ... لان السوق مولع والناس لا يوجد عندها رحمة .. والافضل الشراء من المعارف لو فيه حاجة لقطة ... خلاف كده الانتظار افضل ... والله اعلم

مع اطيب التمنيات
اخوك حسين غزالة

[ابوهاشم]

الف شكر يااستاذ حسين على التعليق والوصف التفصيلى
بصراحه سردك للاحداث فى غايه الدقه
جزاك الله كل خير

[ahit]

السلام عليكم ورحمة الله وبركاته

أخى الكريم حسين
صدقنى أنا كنت زيك فى نفس الحيرة قبل شراء البيتل اللى إشترتها غاليه جداً جداً فى الوقت اللى كانت ال 128 بتتباع ب 25 ألف و لا 131 النضيفة من 32 ألف و الريجاتا النضيفة من 30 ألف و إنت طالع و الماذدا من 25 ألف و هكذا.
اللى كان يهمنى هى الحالة النضيفة و الإعتمادية و تكون قطع الغيار معمرة و متوفرة لغاية لما رسيت على البيتل بتاعتى لأن أسرتى مش كبيرة و بسافر كتير بالعربية فعاوز عربية أدور و أمشى على طول و ثابته و كمان شكلها روش و ظريف.

- الماذدا عربية ممتازة بس من النادر تلاقى عربية نضيفة و مش ملعوب فيها و من الصعب تلاقى عربية نضيفة إلا بسعر عالى
- 131 عربية قوية لكن للأسف الغالبية العظمى كانت تاكسى و متهانة و من الصعب بردو تلاقى عربية نضيفة إلا بسعر عالى
- الريجاتا ممتازة و تعديل 131 و قريبة و أفضل من الشاهين فى رأى لأنها أوسع و جر أمامى لكن نادر لما تلاقى عربية نضيفة بعيدة عن البارومة أو تابلوها حالته كويسه لأنه ضعيف جداً.
- اللادا ممتازة و مناسبة جداً ليك و خاصة إن منها موديلات فوق التسعينات و سعرها معقول بس المهم الحالة النضيفة طبعاً
- البيتل طبعاً ممتازة جداً جداً فى كل شىء لكن يعيبها إنها بابين فقط لو أسرتك كبيرة و موديلات قديمة لكن طبعاً لو مش بتفكر فى الموديل و 4 باب يبقى طبعاً البيتل النضيفة خير إختيار.

و ده من وجهه نظرى الخاصة و ليس تعميم

و ربنا يوفقك لما فيه الخير و الصالح إن شاء الله