ماذا افعل للحفاظ وتقويه شاسيه 128

[misoalex]

يا جماعه الموضوع ده مش طالع من دماغى وتقريبا تفكيرى كله فيه من كتر خوفى من شاسيه ال128 والكلام الى سمعته عنه
انا الى خلانى اشترى العربيه دى هو انتشارها الرهيب واسعار قطع غيارها تقريبا زى عربيتى القديمه ويمكن ارخص منها كمان
لكن المشكله دلوقتى انا بحب الجرى و السرعه شويه والطرق هنا فى مصر زفت ومش عارف اعمل ايه
هل فى حل لتقويه او الحفاظ على الشاسيه بدون شروخ وكتر لحامات ووجع دماغ

[misoalex]

ايه يا جماعه هو الموضوع صعب اوىىىى كده فين اصحاب الخبره والناس القديمه فى 128

[ahmdmagdy]

هو اكيد في حل بس في رأي هيتكلف كتيير يبقي بلاش منه و ممكن تجيب عربيه تانيه تستحمل الجري

[sobhysm]

شاسية ال128 مش ضعيف قوى للدرجة دية لإنه لو كان ضعيف كدة ما كنتش تشوف عربيات 128 من السبعينات ولسة عايشة لحد دلوقتى ومماتتش وعلى فكرة الشوارع دلوقتى أحسن من السبعينات والتمنينات كل ما فى العملية انك كل سنة أوسنتين تروح عند سمكرى نظيف يضبطلك الشاسية لو مفتوح

[misoalex]

شاسية ال128 مش ضعيف قوى للدرجة دية لإنه لو كان ضعيف كدة ما كنتش تشوف عربيات 128 من السبعينات ولسة عايشة لحد دلوقتى ومماتتش وعلى فكرة الشوارع دلوقتى أحسن من السبعينات والتمنينات كل ما فى العملية انك كل سنة أوسنتين تروح عند سمكرى نظيف يضبطلك الشاسية لو مفتوح

شكرا على الرد المطمئن بس انا بحب ان الوقايه خير من العلاج على الاقل عشان المطبات وخلافه

هو اكيد في حل بس في رأي هيتكلف كتيير يبقي بلاش منه و ممكن تجيب عربيه تانيه تستحمل الجري

مهو ال 128 عجبانى بصراحه وعلى قد فلوسى وصعب جدا اغيرها دلوقتى ده انا لسه جايبها
وبعدين المشكله مش فى الجرى المشكله فى الحفر والبلاعات الى بناكلها واحنا بنجرى والمصيبه اننا بنجرى فى طريق مفتوح زى البحر عندنا تلاقى نفسك اكلت 50 حفره وبلاعه فى طريقك والعربيات كلها بتاكلها وعادى الحياه ماشيه لكن 128 ناس خوفتنى ان الشاسيه بيتشرخ ويفتح من المطبات دى

[ِAhmed n]

انا عربيتي هتجنني والشاسيه عندي مشروخ والقايم بيطقطق في الفرامل والمطبات وصرفت عليها كتير وزهقت منها ومش قادر اخد قرار البيع علشان العربية نفضتني ومعرفتش احوش علشان اغير فبطر اصرف عليها وكل مشوار بحوار ومش عارف اعمل فيها ايه لو حد عنده خبرة يقولنا اعمل ايه واروح فين ؟

[م أحمد]

الحل بسيط و مجرب و شائع فى عربيات زى الريتمو
شداد حديد (شوفته نازل فابﻻيكة فى بى ام ) بين راسى المساعد وقبل ذلك لازم يكون شداد على نظافة يعنى مفيش كسر فى القائم تحت الرفرفاو فوقه

[ابو لؤى]

عايز نصيحتى تركنها افضل طلامه عايز تحافظ على الشاسيه :)

[misoalex]

يااااااااااااااه ده انا نسيت الموضوع ده :)

ده من 2009 انا نسيت ان انا عملته اساسا

الله يرحمك يا تفاحه :))))

[azeemov]

إحنا لسه تفاحتنا معانا

إحنا بقى - أقصد كل من دخل على الموضوع وصحاه تاني - لسه عندنا التفاحه بتاعتنا اللي مغلبانا..

ماهانش علينا نرميها عشان إحنا ممعاناش فلوس نجيب غيرها..

لو بعناها دلوقتي ماتجيبش عشر تلاف على بعض..

ومفيش اللي نزوده على تمنها علشان نجيب غيرها..

وبصراحة دا عمل عندنا نوع من الالفة الاجبارية للموديل ده خصوصا دونا عما سبقه أو تلاه من موديلات..

من الآخر عشان محدش يصدع من اللي أنا كاتبه وأصعب عليه وتلموا لي فلوس

مطلوب واحد سمكري حنين في أسعاره وأمين في شغله في نفس الوقت ويتقي الله فينا وفي سياراتنا..

مهمته إزالة البارومة من الصاج وعزله من أي بارومة مستقبلية وعمل تقويات للحوض بشكل يمنع فتح الشاسيه..

ماعتقدش حد من ملاك سيارة عدى على تاريخ صنعها أكتر من عشرين تلاتين سنة حيخليها زي ما هي عشان كلمة مش راشة دواخل مثلا لما يحب يبيعها..

المهم لما يكون معانا فلوس تظبطها مانبخلش عليها عشان زي ما تديها حيبان عليها..

جرب الذل لما يحصل فيها حاجة وانت في مشوار مهم مع الاسرة على الطريق على باب الله..

دي ممكن تكون قناعتي عن 128 عموما كسيارة تستاهل تعيش..

حتى لو ربنا فتح عليك وبعتها عشان تعلي.. خلي اللي يشتريها بعدك يدعيلك مش يدعي عليك..

دوروا أيها الاعزاء على مقالات سابقة للباشمهندس سبعاوي اللي أحترمه جل الاحترام وأقدره كل التقدير..

وأعضاء آخرون كان ملهمهم في إفادة الناس على منتدانا الغالي هو سبعاوي..

دور في المنتدى حتلاقي:
جدول صيانات الـ 128 الدورية
الاعطال الشهيرة للسيارة 128 والوقاية منها
كتالوج الـ128 النسخة العربي (كتالوج المالك)
وغيرها الكثير من الموضوعات الشيقة


منتظر توصياتكم على أماكن سمكرية كويسين عن تجربة وبرضه تحذيرات عن سمكرية بتستهبل في السعر أو شغلها أي كلام

[new_man]

فيه سمكرى كويس فى شبرا مصر وشاطر اوى وفى الحنين
مكانه قدام خير زمان فى شارع الترعة هتدخل تسأل على الكنيسه الانجيليه اللى هناك وهى مكانها لما تدخل من شارع الترعة تانى شارع شمال فى اول يمين هتلاقى الكنيسه وقدامها علطول طارق السمكرى ده