سؤال فى ال 128

[tarreq]

السلام عليكم ورحمة الله

أولا انا سعيد بتواجدى فى هذا التجمع الضخم للسيارت - بجد فى معلومات مفيدة جدا .

أنا مبتدىء فى السيارت ومعايا 128 موديل 86
الحمد لله العربية حالتها تمام .

سؤالى : عشان لسه بأتعلم مش بأسوق العربية كتير وساعات بأسيبها يومين مثلا من غير ما تدور.

ساعات لما اجى ادور ما تدورش من اول مرة - اقعد احاول معاها و( أكارك ) بنزين كام مرة كده وتدور - يا ترى ده عيب ؟ ولا ليه علاقة بالبطارية ( البطارية جديدة ) ولا عشان ما بتدورش كتير

شكرا لكم

[bassem.naguib]

عادي يا باشا .. هي دي ال28

[HATEMHANY]

عادى و ده علشان هى مش بتدور كتير

عادى

[sobhysm]

عادي يا باشا .. هي دي ال28

عادى

[misoalex]

العربيات القديمه كلها كده بس متكاركش كتير عشان متشرقش وتتاخر فى الدواره
وهو تفسير انك تديها بنزين ده لان عند الركنه لفتره طويله البنزين الى فى الكربراتير والخراطيم وبيطير طبعا ده من خواص البنزين فلازم تعوض ده بأنك تدوس مره او اتنين عشان البنزين يوصل للكربراتير

[Karim_Mohy]

عادي .....بس قبل ما تدور كارك وسيبها تسخن

[tarreq]

ألف شكرا لكم على الردود - يا ترى لو عايز أغير تابلوه ال 28 منين احسن تابلوه وارخص سعر ؟

[Karim_Mohy]

اللي اعرفه تابلوه الكورسا وده اخر سعر سمعته من 400 الي 500

[aliabutaleb]

كان معايا الـ 128 لمدة سنة كاملة
ونصيحتي متسيبهاش أكتر من يوم من غير ما تدورها
يعني حتى لو مسافر خللي حد يدورها كام دقيقة وهي واقفة في مكانها.

[tarreq]

شكرا يا جماعة للردود - فعلا اول ما جبتها كنت بادورها كتير كل يوم - كانت بتدور من أول سنة مارش زى الحلاوة .

لما بقيت اسيبها يوم او يومين بقيت لازم احاول كذا مرة عشان تدور .
سؤال تانى معلش فى حاجة حصلت معايا امبارح ( وأهو كله افادة للمبتدئين برضه )

وانا ماشى بالعربية - هديت وبأجيب الأول عشان مطب - اول ما الفتيس لمس مكان الأول سمعت صوت تزييق وتخبيط فى التروس جامد اوى ( طبعا الناس عارفة الصوت ده ) مع انى كنت دايس دبرياج عالاخر ومعملتش حاجة غلط !!!

يا ترى ده ممكن يكون عيب ايه ؟؟!!!!

[aymansaad]

العيب فى البوجيهات غير البوجيهات وشوف الفرق

[مواطن مصرى]

وانا ماشى بالعربية - هديت وبأجيب الأول عشان مطب - اول ما الفتيس لمس مكان الأول سمعت صوت تزييق وتخبيط فى التروس جامد اوى ( طبعا الناس عارفة الصوت ده ) مع انى كنت دايس دبرياج عالاخر ومعملتش حاجة غلط !!!
يا ترى ده ممكن يكون عيب ايه ؟؟!!!! :u_thin1[1]:

هقول لحضرتك على كذا احتمال
الاول فيه ترس داخل الفتيس بينقل بين السرعات بيكون فيه مشكله
البتاع ده مش فاكر اسمه الميكانيكى بالضبط ايه لكن الصنايعيه بيسموه (معلقة الفتيس) و بيتغير بحوالى 20 جنيه فقط لا غير و اى صبى ميكانيكى يقدر يظبطه

الاحتمال الثانى ان تروس الفتيس الداخلية بتاعت السرعات (بيسموها الميكانيكيه غوايش الفتيس) متاكله او مش مضبوطه بس دى اعراضها الواضحه جدا بخلاف صوت التخبيط ان يبقى فيه عضة او ثقل فى الغيارات (يعنى و انت بتنقل من الاول للثانى مثلا بتحس ان العصاية جمدت فى ايدك و مش بتتحرك)
و الحكايه دى برضو حلها سهل : تخلى ميكانيكى يحل الفتيس و يراجع على الغوايش دى و فى حاله لو احتاجت التغيير فيه حاجه اسمها طاقم اصلاح بحوالى 150 جنيه بيخلى الفتيس يرجع جديد و بيسموا الحركه دى (عمره فتيس)

الاحتمال الثالث ان اسطوانه الدبرياج مش مظبوطه او متآكلة و دى مش هتعرفها الا لو اتفكت
و دى من اعراضها الواضحه الرجرجة فى العربيه عند النقل بين السرعات
و لو لقيت المشكله فى الدبرياج غير الطاقم كله مره واحده و ريح دماغك (الديسك و الاسطوانه و البلية) و ثمنهم من 200 الى 250 جنيه و لا تشترى الطاقم اللى بيقولوا عليه ايطالى لانه مضروب و بيعمل مشاكل كثيره

بالتوفيق ان شاء الله

[misoalex]

و لو لقيت المشكله فى الدبرياج غير الطاقم كله مره واحده و ريح دماغك (الديسك و الاسطوانه و البلية) و ثمنهم من 200 الى 250 جنيه و لا تشترى الطاقم اللى بيقولوا عليه ايطالى لانه مضروب و بيعمل مشاكل كثيره

طب ممكن سؤال هو مشاكله ايه للعلم فقط
وهل الصينى احسن
مع انى عارف ان مفيش حاجه ايطالى وكله صينى وبيضحكوا علينا منهم لله

[أبو إياد]

مع احترامى لكل الاعضاء اللى قالت ان العربيه لما تركن يومين تلاته وماتدورش من اول مره يبقى عادى
اسف لو هاقول انه مش عادى كده فى حاجه مش مظبوطه

الكلام ده طبعا مالوش دعوه بالبطاريه لان البطاريه مقومه المارش

انما تدويرها فى اكتر من مره ليه كذا سبب
1- عدم ظبط الكاربراتير
2- تلف طرمبه البنزين
3- عدم ظبط الاسبراتير

طيب لو الكلام ده سليم 100% العربيه تدور من اول لقطه ؟

ايوه

لكن فى حالتين هانتكلم عليهم
1 وجود شفاط للبنزين
2 عدم وجود شفاط

طبعا علشان العربيه مش انجيكشن يبقى تحضير البنزين بيكون بطريقه بدائيه وهى تحضيره عن طريق الضغط المتكرر على دواسه البنزين عده مرات (كارك) وبعد كده تدور العربيه وانت دايس نص دوسه هاتدور علاطول (فى حاله عدم وجود شفاط)

اما لو عندك شفاط انت هاترفع الشفاط وبعد 5 ثوانى بالكتير دور العربيه هاتلقط فى ثانيه حتى لو مركونه اسبوع (شرط سلامه البطاريه)

[tarreq]

الاخ mohamedezat شكرا لردك - هاجرب الكلام ده - انا فعلا عندى شفاط . وبصراحة فعلا ما كانتش راكبة معايا ان الكلام ده طبيعى .

طلب تانى لو سمحت - ممكن تعمل موضوع بسيط ( او بمشاركة الناس القدام ) تشرح لنا وظيفة الاجزاء الأساسية ووظيفتها - يعنى مثلا عايز اعرف مكان ووظيفة كل من : الاسبراتير - طربمة البنزين - الابلاتين - الكوندنسر - وهكذا - ويا ريت يكون الكلام بالنسبة لل 128 عشان اعرف ابص عالحاجات دى بعينى

وشكرا جدا لأهتمامكم .