استفسارات:تحسين اداء 128 ؟

[noble911]

السلام عليكم
عندي 128 موديل 80 المعدله 1100
واخدها من ابويا و الصراحة ماليش قلب اسوق دايو لانوس بتاعته و لا حتي تويوتا ياريس اللي بيفكر فيها
نظرا لانه راجل صداع و بيعمل من الحبة قبه لو العربية اتخبط و انتوا عارفين السواقة في مصر
و128 لو اتعجنت و اتسمكرت ماتجيش حاجة جنب الفانوس ابو الف و الاكصدام ابو الف اللي في العربيات الجديدة

المهم عايز احسن من اداء موتور 128

الموتور خفيف - الشكمان دخان خفيف ابيض و اسود ما يظهرش غير لما تقرص علي الموتور و تعلي صوته انما في العادي مفيش دخان غير خفيف اسود
اعلي سرعة 90-85 و بعد كده بالبركة علي حسب ظروف الهوا
التسارع سئ جدا
و لما اتنزنق ورا عربية بطيئة بطلع منها بطلوع الروح لان العربية بتفقد طاقتها و لازم استني الشارع يفضي خالص علشان تطلع بمزاجها

وابويا عملها نص عمره و بلا فائدة و اتعملت عند ميكاتيكي تعبان و هي عند السمكري - كسلا لانها تروح عندي الميكانيكي الشاطر بتاعنا لانه حياخد شهور لانه زحمه جدا و حبفضل راكنها جنبه

عايز نصايحكم لتحسين اداء العربية
علشان مش عايز اسقط الموتور لانه ده صداع و مكلف
الكرابراتير جديد يوغسلافي
طرمبة بنزين جديدة - بنزين دايما 90

الدبرياش و البلية و الاسطوانة غالبا وقتهم جيه و محتاجين تغير
و اكيد بيشركوا في موضوع ضعف السحب ده
و العربيه بقالها فترة كل ما عامل فيها طقم الكهربا و لا كأني عملت حاجة لا سحب بيتغير و مكنتش الاول كده كانت اول ما تغير طقم الكهربا تفوق و تبقي فل الفل دلوقتي بقي كل محصل بعضه بالرغم من ان البوجيهات ياباني من اللي في ورقه بلاستيك مقفوله

- فايه الحل في رايكم ؟ و انا المهم عندي التسارع يفوق شوية مش مهم السرعة القصوي

في ناس اقترحت تركيب اسبراتير الالكتروني -ياريت لو فيه معلومات

- و غي ناس اقترحت الفلتر الهوا الرياضي
بس عندي سؤال هو ضروري يعمل صوت
اصل العربية صداع اصلا و مش ناقصة فيبرشن :)))
فهل هناك طريقة علشان يكون صوته معقول و مقبول و لو علي سرعة الموتور القليلة حتي 3000-2500 لفة
و الميزانية 2000-3000 شامله تغير كراسي و دوكو و شوية كماليات من بره

و جزاكم الله خير

[sab3aawy]

Re: استفسارات:تحسين اداء 128 ؟

واخدها من ابويا و الصراحة ماليش قلب اسوق دايو لانوس بتاعته و لا حتي تويوتا ياريس اللي بيفكر فيها
نظرا لانه راجل صداع و بيعمل من الحبة قبه لو العربية اتخبط و انتوا عارفين السواقة في مصر

يا راجل يا طيب حد يقول على ابوه كدة؟ انا مش بحاول اكون واعظ ، لكن انا ابويا الله يرحمه عمره ما ادانى عربية 128 استعملها لوحدى ولا حتى كان بيسمحلى اسوق عربيته، مع كدة فانا اكبر خسارة خسرتها فى الدنيا هى ابويا يوم ما مات، ورغم ان الكلام ده بقاله 10 سنوات تقريبا لكن مفيش حاجة زعلتنى فى حياتى ولا اثرت فيا قدر خسارتى له ولحد النهاردة الحياه فى نظرى مش بجمال الحياه ايام ابويا ما كان موجود ، مع اننا كنا بنختلف ونتخانق وكل حاجة زى اى اب وابنه

، ربنا يبارك لك فى ابوك ويطول لك فى عمره ، حطه جوه عينيك ودايما ادعيله

المهم خلينا فى ال128،

اول حاجة تعملها تكشف على كبس الموتور ولو محتاج عمرة اعمل له عمرة

لو مش محتاج عمرة اكشف على البوجيهات وطقم الكهرباء، واستهلاك البنزين مع الكاربراتير الجديد

وفيه اختراع تانى ممكن تعمله فى ال128 بيحسن التسارع بتاعها جدا، تركب لها فتيس ريجاتا 5 غيار،، بس فى هذة الحالة لازم تغير ميزان العربية بالميزان بتاع ال128 جراند لوكس علشان ميكسرش الفتيس وكذلك عصاية الفتيس لازم تتغير بعصاية الجراند لوكس

[noble911]

يا راجل يا طيب انا مقلتش عليه حاجة
انا كل اللي قلته صداع لانه بيديني محاضرة مدتها من ساعة لساعتين في اي موضوع
بدون مبالغة يوقفني ساعة ساعتين يكرر في الكلام و يرجع ينده عليا و يكرر تاني :shock:
هو عنده مرض الشك و يحب التكرار و التكيد و ده حتي ممكن بعد ماينزل يرجع يطلع تاني يتاكد اذا كان باب الشقة اتقفل و لا لا
غير كده هو مش مديهاني لوحدي انا حاخدها غصب كده علشان حرام بتعذب في الموصلات و هو مقتدر و معذبني معاه
لانها شركة مع باقي اهل البيت كلهم

فانا بفكر في خطة التجديد علشان اعرضها عليه
و زي ماقلت انه عمل نص عمره ما سمعش كلامي و راح دفع 3000 في نص عمره و مساعدين و رشة دوكو و كلها طلعت بايظة و الدهان قشر بعدها بكام شهر

الموضوع اتقلب اجتماعي :D

خلينا في الموتور
طب ايه رايك في الفلتر و اسبراتير الكتروني علشان تدور و تلقط اسرع

و جزاك الله خير

[sab3aawy]

خلينا في الموتور
طب ايه رايك في الفلتر و اسبراتير الكتروني علشان تدور و تلقط اسرع

و جزاك الله خير

انا لما يكون عندى مريض بالقلب مش هفكر اديله حبوب منشطة علشان ينزل سباق جرى، هيموت بالسكتة فى نص السباق

موتورك بيدخن دخنة بيضاء ودخنة سودا ودخنة سينما سكوب بالالوان، يبقى نعمره الاول وبعدين نتكلم على المنشطات، فلتر رياضى يعنى هتعلى الضغط على موتور مفوت اصلا يبقى هتقصف ما بقى من عمره، طب ما انا عندى فكرة، ما بدل الفلتر الرياضى متشيل الفلتر خالص، هى كدة كدة مش فارقة، كدة مفوت وكدة مفوت

لو عايز تشد صح ابدأ بالعمرة وضبط الكاربراتير لحد مايكونش عندك ذرة دخنة وبعدين فكر فى الإضافات

[noble911]

كلام سليم استاذي العزيز

لا انا كنت باخد راي بس علشان اشوف الحسب كام و هل الحاجات دي ليها فايدة و لا
طبعا الدكتور الميكانيكي حياخد راحته في الشغل و بعدين الاضافات حتيجي بعدين
الله يجزيك خير و يرحم والدك و يسكنه فسيح جناته و يلحقنا به باذن الله علي خير

[ahmed1981]

Re: استفسارات:تحسين اداء 128 ؟

وفيه اختراع تانى ممكن تعمله فى ال128 بيحسن التسارع بتاعها جدا، تركب لها فتيس ريجاتا 5 غيار

واحد أعرفه عمل الإختراع ده في 128 موتورها 1100 cc
النتيجة:
العربية زي الفل على كل النقلات لغاية لما تجيب الخامس وتجد التسارع صفر بل بالعكس السرعة تتدهور ولا يجد بد من أن يرجع على الرابع ويجيب آخره وبعدين يجيب الخامس يلاقي السرعة بتثبت لحظة وبعدين تبتدي تقل
وفي النهاية ندم على هذا التغيير الذي لم يفده سوى الغرامة المالية

ولذلك الفتيس الريجاتا الخمسة غيار لا أنصح بتركيبه سوى على الموتور ال 1300 cc وهو ما يكون معه فتيس 5 غيار أساساً
وهذا موضوع مشابه لنفس المسألة الفتيسية:

http://www.nilemotors.net/Forum/viewtopic.php?t=4441

وطبعا يا بشمهندس سبعاوي لو فيه تجربة مخالفة لما قلته يا ريت تفيدنا بيها

[noble911]

الصراحة انا مش بفكر اركب فيها حاجة مش بتاعتها
غير الاشعال الاكتروني لتحسين الشرارة و الدوارة صباحا و في الاشارات الطويلة
انما غير كده ابويا و الميكانيكي حيعارضوا و يرفضوا و احتمال يضربوني :D

بشكل عام حكشف علي الموتور زي اخونا سبعاوي قال و زي ما يطلب الموتور حعمل له
و حخغير حاجة الدبرياش اسطوانية و بلية و الكلام ده
الكربراتير مش حلعب فيه انما ممكن ظبط او غير بك البنزين
و قلنا اسبراتير الكتروني
و فلتر رياضي مطرح عمه الهوا العادية
مش حلعب في الفرن و لا الشكمان

و اهلا باي اقتراحات يا رجاله

[sab3aawy]

Re: استفسارات:تحسين اداء 128 ؟

وفيه اختراع تانى ممكن تعمله فى ال128 بيحسن التسارع بتاعها جدا، تركب لها فتيس ريجاتا 5 غيار

واحد أعرفه عمل الإختراع ده في 128 موتورها 1100 cc
النتيجة:
العربية زي الفل على كل النقلات لغاية لما تجيب الخامس وتجد التسارع صفر بل بالعكس السرعة تتدهور ولا يجد بد من أن يرجع على الرابع ويجيب آخره وبعدين يجيب الخامس يلاقي السرعة بتثبت لحظة وبعدين تبتدي تقل
وفي النهاية ندم على هذا التغيير الذي لم يفده سوى الغرامة المالية

ولذلك الفتيس الريجاتا الخمسة غيار لا أنصح بتركيبه سوى على الموتور ال 1300 cc وهو ما يكون معه فتيس 5 غيار أساساً
وهذا موضوع مشابه لنفس المسألة الفتيسية:

http://www.nilemotors.net/Forum/viewtopic.php?t=4441

وطبعا يا بشمهندس سبعاوي لو فيه تجربة مخالفة لما قلته يا ريت تفيدنا بيها

انا ركبت الفتيس الريجاتا على الموتور ال1100، بس للامانة الموتور كان لسة خارج من عمرة وكنت عاملهاله على مزاجى، قطع اصلية كلها ، وش سلندر جديد، كاربراتير ويبر جديد، يعنى الموتور كان بنفس حالة الفابريكة،
مكنتش بديها الخامس غير بعد 100 كم، وكانت ممتازة جد وبتعدى ال140ا، لكن فعلا لو اديتها الخامس قبل ال100 مكانتش بتسحب كويس
لكن عموما ال128 فيه حاجات كتير جدا بتخنق ادائها ، ولول حاجة واحدة فيهم مش على ما يرام العبية سحبها بيموت، منها الكاربراتير، وطقم اكلهرباء وطقم سلك البوجيهات وضبط الأدفانس وحتى دورة التبريد والشكمان، كل الحاجات دى لو مش 100% بتخنق العربية،

وعلى ذلك احتمال كبير جدا ان عربية صديقك كانت مخنوقة لسبب او لآخر، لان انا مكانش حد بيعرف يظبلى ال128 زى ما انا عايز غير لما اظبطها انا، وبالتالى انا متوقع ان ممكن ان كانت فيه حاجة مش مظبوطة وكاتمة عربيه صاحبك

[noble911]

يا باشمهندس سبعاوي
تقصد ايه بسلك البوجيهات في ماركة معينة بتنصح بيها
و كام سؤال كمان الله يكرمك
-عندكش ميكانيكي ثقة لو الراجل بتاع ابويا طلع زحمة و حيعطل العربية معاه
- عايز اغير الكراسي اللي قدام اصلهم بيوجعوا الضهر قوي
اعمل ايه او اجيب ايه و ياسلام لو تقولي اعملهم فيين

شاكر ليك تعبك معايا
جزاك الله خير

[ahmed1981]

تقصد ايه بسلك البوجيهات في ماركة معينة بتنصح بيها
و كام سؤال كمان الله يكرمك

في نوع أسلاك بوجيهات كربون إنجليزي تقريباً سعره من 40 إلى 60 جنيه لطقم الأسلاك وإوعى تجيب التركي أو المصري أو الصيني

- عايز اغير الكراسي اللي قدام اصلهم بيوجعوا الضهر قوي
اعمل ايه او اجيب ايه و ياسلام لو تقولي اعملهم فيين

في واحد على الكورنيش بعد لما تعدي وكالة البلح على يمينك وإنت ماشي على الكورنيش
على اليمين بعدها بحوالي 200 متر هتلاقي واحد بتاع كراسي إستيراد إسمه تقريبا الأطرش
المهم شوف عنده كراسي مريحة وجربهم الأول ومتتسرعش إلا لما تتأكد إنهم كويسين

[سمير يونس]

المهم شوف عنده كراسي مريحة وجربهم الأول ومتتسرعش إلا لما تتأكد إنهم كويسين

طيب حضرتك عندك فكرة الكرسي ممكن يعمل كام ؟

و شكراً

[ahmed1981]

طيب حضرتك عندك فكرة الكرسي ممكن يعمل كام ؟

في حدود من 150 إلى 200 جنيه حسب الحالة والإمكانيات

[سمير يونس]

شكراً لك يا أخ أحمد
جزاك الله كل خير

[noble911]

الله يبارك لك يا استاذ احمد علي المعلومات دي

[driftracer11]

هو فيه فلتر يركب لمكن كربراتير؟ارجو الافاده .وبكام ونوعه ايه وهل لكل الكربراتير القديم؟وشكرا