ثرموثتات كوعة المياه

[medo980]

السلام عليكم ورحمه الله وبركاته
انا روحت امبارح لبتاع الرادياتيرات عشان كان عندى خرم ناحية زور الرادياتير وغسلى دورة المياه وهو بيغسلها لقيته بيقولى انت عندك الثرموثتات بتاعت كوعة المياه شغاله لازم نشيلها وسألته ايه السبب قالى دى معموله للبلاد البارده مش لمصر ولازم نشيلها وساعتها هتلاقى العربيه بتبرد احسن من دلوقتى غير انها لو باظت العربيه هتسخن معاك جامد قولتلو خليها يوم تانى وقولت لما اسأل اخوانى فى الموضوع ده هل هو صح ومفيد للعربيه ولا هيضرها وايه الرأى العلمى للموضوع.

تانى حاجه انا كنت جايب معايا جركن مياه خضراء موبيل لقيته بيقولى المياه دى وحشه وبتاكل الرادياتير والمواسير عشان تركيزها عالى وحطلى نصف الجركن فقط وكمل مياه من الحنفيه وقالى خلص الجركن وماتجيبوش تانى هات السعودى ايه رأيكو فى الكلام ده مع انى بشوف توكيلات بتنصح بالمياه بتاعة موبيل مستنى اراء وردود زملائى الخبراء

العربيه 128 موديل 2006

[yoko]

أنا رأي فكك من الراجل ده لإن الثرموستات لو معمول للبلاد البارده فعلا مش هيأثر معاك وتاني حاجة ميه الحنفيه بترسب أملاح جوه الردرياتير وده الي بيبوظ الرادرياتير والميه الخضرة بتسرب الحرارة أسرع فبالتالي الدورة تشتغل أحسن!!!!

[u3mbkp]

المياه الخضراء بتاعة موبيل كويسة طبعا .. بس بشرط تكون بتحط منها علطول .. يعنى متكونش بتحط مياه حنفية وبعدين تروح فجأه مغير لمياه خضراء او حمراء .. لان الكيماويات الموجودة فى المياه الملونة بتتفاعل مع الاملاح المترسبة فى الرادياتير ودورة التبريد كمان وفعلا بتؤدى لتآكل الرادياتير ... يعنى لو عاوز تغير لمياه ملونة بعد استخدامك لمياه عادية .. يبقى الاول تنزل المياه كلها وتنضف دورة التبريد بالكامل علشان تشيل الترسبات وبعد كده ممكن تحط مياه خضراء او حمراء او حتى فحلوقى .. غير كده مينفعش.
اما موضوع الثرموستات . فالمفترض ان اى ثرموستات بيبقى مكتوب عليه بيشتغل من درجة حرارة كام الى كام ... قارن اللى مكتوب عندك على اللى بيتباع بره وشوف ..
ده غير انه المفترض ان كل العربيات اللى بيجيبها التوكيل بتبقى تجهيزاتها تروبيكال لان احنا معندناش تلج زى اوروبا ولكن عندنا رمل وبلاوى تانية

[Tito_Gabry]

فكك من الراجل ده ده بيحور

[ZALABANY]

فكك طبعا من الراجل ده بيفتي

[medo980]

يعنى يا جماعه الثرموثتات الى فى كوعة المياه دى مش هتضر فى شىء حتى على المدى البعيد ولو حد يعرف رلأى علمى ليها ياريت يفيدنا كلنا عشان من ساعة ما قالى انها ممكن تسخن العربيه جامد وانا خايف

[Khaled_Nowaihy]

السوستة اللى فى كوعة الثرموستات فى ال 128 بتبوظ وتحجر بعد فترة قصيرة وخصوصا لو كنت بتحط للردياتير مياه عادية ... الصدأ بيبوظها بسرعة.
انا عندى موديل 1998 وشلتها بعد فترة، وانصح تراقب أمبير الحرارة ... لما تلاقيه فى الظروف العادية يعدى منتصف المسافة يبقى لازم تشيل الكوعة فعلاً. وكمان تغير الثرموستات الى نوع 60-80 علشان المروحة تشتغل بسرعة.

أما بالنسبة للمياه الخضراء ما ينفعش تخلطها بالمياه العادية .... تزود مياه مقطرة اللى بنزود بيها البطارية.
وطبعاً دى مكلفة عشان ال 128 بتستهلك مياه تبريد كتير نسبياً
الحل : فيه مياه خضراء مركزة (مش فاكر نوعها) مكتوب عليها يمكن تخفيفها بالمياه العادية
علبة (كان) صغيرة بحوالى 10 جنيه من موبيل تفرغها فى الردياتير وتزود مياه عادية ، وكل ما تنقص تزود ميا من القربة عادى.
دى ممكن تقعد معاك سنتين

[macdiv]

في عربيتك شيله و انت مغمض متخفشي هو فعلا معمول عشان يسخن العربيه في الاجواء البارده جدا و اول ما المتور بيوصل درجه حراره فوق 60 بيفصل او بالاصح ميكانيكيا بيفتح ،،بس ذي ما الشباب قلولك هو بيصدي و بيعلق و ده بيحجز او بيعطل مرور الميه في دوره التبريد و ده اللي بيسخن العربيه ...شيله متخفشي

[medo980]

الف شكر ليكم يا شباب انا هاروحلو تانى عشان يشيلوا