سيينا بتسخن عايز حل ضروري ارجوكم ولا ابيعها

[mohdfma]

عندي فيات سيينا 2003 بتسخن كتير لدرجة انها جابت وش سلندر قبل كدة هل دة عيب مزمن او في حلول :(

[bimmeraddict]

بتزودلها مياة حنفية ولا مياة راديتير؟لو مياة حنفية معنتش تحطها وحط مياة راديتير
الموتور وراة من فوق خراطيم فيها مسامير بلاستيك ممكن تكون بتسرب مياة أو حاجة.
وهي بتسخن فجأة ولا الحرارة بتعلى تدريجيا؟كمان لما بتسخن بتلاقي فية مياة في قربة الراديتير ولا بتبقى فاضية؟

[tutankhamoun]

أنا كان معايا فيات قبل كدا بس مش سيينا و كنت لما بأروح التوكيل بأقابل أصحاب السينا و كلهم كلنوا بيشتكوا من موضوع السخونة ده
و فيما يبدوا أن هذا العيب شائع في السيينا
و لكن أذهب لميكانيكي و أغسل دورة التبريد و أكشف عليها و زي ما قال الأخ bimmeraddict غير مياه الحنفية بمياه رادياتر و ربنا يسهل و المشكلة تروح

[Mostafa]

اولا يا باشا العربيه دى 1400 ولا 1600 ؟ وهل السخونه دى بتكون لغايه فين على امبير الحراره ؟ والسخونه داخل المدينه بس ولا على الطريق كمان ؟ ومع التكييف ولا من غير ما تشغل التكييف ؟

[Mostafa]

انا معايا سيينا ودى تالت عربيه سيينا اجيبها والحاجات اللى بسألك عليها دى بتفرق جدا فى تحديد سبب السخونه فحاول ترد عليا بدقه

[mohdfma]

انا اسف يا جماعة انا كنت يإست ان حد يرد
العربية 1400cc
بتسخن في الزحمة اكتر لكن مش شرط كمان مفيش تسريب مياة
بحط مية حنفية شكرا و هاغيرها
اغلب الوقت لما بتسخن بلاقي المية نقصت لكن انا باكون حاطط مية من يومين مثلا يعني ما بتلحقش تنقص هي موديل 2003 و في اوقات مابتكونش ناقصة مية و بتسخن برضة
انا مش فاهم
و شكرا جدا للجاوبوني و ارجوا ان حد يجاوبنى تاني:)

[sonybony]

انا كانت عربيتي كده برده لكن انا غيرت الردياتير بواحد تاني اصلي برده بتاعها وبقت زي الفل

[kouriem]

اولا سلام عليكم:
شوف يا باشا انا معايا سيينا 1600 و كانت بتعمل كده ولا بتنقص ميه ولا حاجه و علي طول الاقي امبير الحراره قرب علي اخره و افتح القربه الاقي فيها ميه لفيت كتير و لاقيت حاجتين في حاجه اسمها صباع الحراره ده كان بايظ و لاقيت الموبينا عاوزه تتغير و فعلا غيرتهم و العربيه رجعت زي الفل
انا طبعا مش خبير بس ده تجربه و يمكن تنفعك

[m7md_hany2]

في ( كوع ) راجع من المتور للرداتيير ... و بيكون فيه ترموستات و ساعات بتعلق ..... أتأكد منها ... ممكن تمسك الخرطوم اللي راجع من التور للريداتيير و شوف لو سخن ... يبقي مش هوا المشكلة .... لو ساقع ... يبقي دورة التبريد مش ماشية أصلا و ده سبب طبيعي للسخونية .... و خلي بالاك أن في ميكانيكية كتيير بتسقط الموضوع ده .. و ان شاء الله خير

[motoxp]

انا والله العظيم معايا سيينا 1400 cc مو 2001 وبقالها شهر واكثر ولا يوجد اى سخونة العيب من عندك انت وديها التوكيل وشكراااا واى خدمة انا موجود

[Sameh]

mohdfmaسيينا بتسخن عايز حل ضروري ارجوكم ولا ابيعها
عندي فيات سيينا 2003 بتسخن كتير لدرجة انها جابت وش سلندر قبل كدة هل دة عيب مزمن او في حلول :(

أستاذى الفاضل أنا كان معايا نفس حالتك ، سيينا 2003 1400 سى سى وبتسخن وجابت وش سلندر وغيرته بوش داتشيا !!!! وبعدين لسة بايعها من كام شهر ، يا خوفى لا تكون العربية وصلتك !!!!!!!!!! :)

المهم ، بالإضافة للكشف اللى قالك عليه محمد هانى ، ممكن تغير الترموستات وتجيب واحد أصلى أبو سرعتين بحوالى 75 جنيه من عفيفى اللى فى الدقى ، أنا لجأت للحل التقليدى بتاع ال 128 والتاكسى وهو الزرار الشهير اللى بيدور المروحة من التابلوه وخلانى أحس إنى راكب إلترامكو !!! :(

الطبيعى بتاع السيينا مؤشر الحرارة تحت النص ، أنصحك لو الترموستات ماظبطش روح التوكيل ، لأن فيها سنسور جوة الكوع وأغلبية الميكانيكية مش عارفينه أصلاً غير اللى إشتغلوا فيها

لو المياه مش بتنقص وبتسخن ، جرب إسحب منها الهوا ، فى حنفية بلاستيك صغيرة على الخرطوم فى الكابوت من الداخل أقرب نقطة للبربريز ، إفتح الحنفية شويا هتخرج هوا الأول وبعدين بخار مياه وبعدين مياه ، خرج شوية مياه لحد ما تتأكد إن مافيش هوا وإقفل الحنفية أوى ، وطبعاً خد بالك إن المياه والبخار سخنين جداً

حذارى تفتح القربة والعربية سخنة لأنها كدة بتاخد هوا تانى ، ولو حاصل لازم تسحب هوا تانى ، إستنى لما تبرد وإفتح وزود بين العلامتين وماتفتكرش إن المياه الأكتر = تبريد أحسن ، فى فراغ لازم تحافظ عليه ، زود حسب العلامة

طبعاً ممكن تغسل الرادياتير ، وممكن تغيره خالص لأن هو ألومنيوم مش نحاس ومش بيعمل تبادل حرارى بكفاءة النحاس ، عشان كدة العربية بتسخن خصوصاً وهى واقفة سلانسيه وبتبرد مع الحركة

[فادى]

بص على الزيت, و لو ناقص زوده و شوف التسريب منين, غالبا هيبقى جوان.
بص كمان على حالة الزيت, يعنى لو الزيت لزج بدرجة أكبر من لزوجته الطبيعية, يعنى عامل زى الطحينة و لونه مائل الى الأبيض, يبقى فيه تسريب من دورة المياه الى دورة الزيت و ديه خطيرة جدا, و ممكن ديه تكون السبب.
و تصحيح للاخوة الزملاء, مفيش حاجة اسمها عربية بتسخن بطبيعتها, مفيش عربية تسخن منها لنفسها, أكيد فيها مشكلة.
اتأكد برضه من المروحة شغاله و لا لأ, و لو مش شغالة يبقى غالبا ثرموستات أو المقاومة بتاعة المروحة أو موتور المروحة.
و طبيعى أنو المياه تنقص لما العربية تسخن لأن الفيات دورة مياه مفتوحة (غطاء رادياتير بسوسته) و بتسرب البخار.

[mohdfma]

متشكريين جدا جدا على الردود المفيدة دي يا جماعة انا عارف اني علطول باسال و بعدين بختفي بس و الله ظروفي كدة معلش
انا بس اطمع في حد يجاوبني على مكان ميكانيكي او مركز خدمة محترم يصلحلي العيب ال انتوا بتقولوا علية و خصوصا موضوع الكوع هو اكتر حاجة انا شاكك فيها
و مرة تانية انا شاكر ليكو جدا ولو عندي اي معلومة لاي حد مش هابخل بيها ان شاء الله

[tutankhamoun]

متشكريين جدا جدا على الردود المفيدة دي يا جماعة انا عارف اني علطول باسال و بعدين بختفي بس و الله ظروفي كدة معلش
انا بس اطمع في حد يجاوبني على مكان ميكانيكي او مركز خدمة محترم يصلحلي العيب ال انتوا بتقولوا علية و خصوصا موضوع الكوع هو اكتر حاجة انا شاكك فيها
و مرة تانية انا شاكر ليكو جدا ولو عندي اي معلومة لاي حد مش هابخل بيها ان شاء الله

ممكن حضرتك تروح النيل الهندسية خلف كارفور داندي مول الطريق الصحراوي
ده مركز خدمة معتمد و كان التوكيل السابق لفيات قبل أواماترا
و أسعار الصنايعية هناك معقولة في حدود 40 جنيه في الساعة
و هما بيحددوا الوقت اللي هايشتغلوه الأول يعني ممكن يقولك الموضوع هايتكلف نصف ساعة وقت و منها عشرون جنيها و هكذا

و لو معجبكش السعر خد العربية و أمشي
بس أنا شايف إنهم كويسين قوي في الكشف على مشاكل العربيات الفيات و على فكرة هما باين عليهم خبرة جامد في السيينا و البونتو
لأن دول العربيتين اللي دايما ألاقيهم هناك كل لما أروح

و ربنا يحللك مشكلتك إن شاء الله