عفشة الريجاتا

[mtageldeen]

أنا غير راضي تماماً عن عفشة عربيتي الريجاتا نظراً للأصوات التي أسمعها وقررت أصلحها وذهبت للعفشجي وقال الآتي:
العربية محتاجة 2 مساعدين وبطاحات وصدادات ومقصات
ونصحني أجيبهم إستيراد وبالمرة سوست المساعد وهذا بحجة إن الجديد سيء في الصناعة عدا المساعدين المونرو
وسيقوم هو بضمان البضاعة المشتراة إستيراد (أظن مجرد كلام)
وقال إن البطاحات والصدادات ستكون غالية الثمن لو بدون المساعدين وهذا لو وجدتهم.

وأنا عندي تحفظ شديد علي موضوع العفشة الإستيراد

فأرجو النصيحة
وأتمني المساعدة بالأسعار أو حتي أرقام تليفونات للمحلات إن أمكن.

ملحوظة:
هناك عدد 2 ميكانيكية مختلفين شافوا المساعدين حالياً وقالوا المساعدين جيدين
هناك 2 بتوع زوايا مختلفين شافوا المساعدين منذ عدة أشهر واحد نصحني بالتغير والأخر قال المساعدين جيدين

وشكراً

[amro1965]

من رأى انا تسأل على عفشجى مشهود له بالكفأءه والامانه فى منطقتك طبعا من خلال اصدقائك فى المنطقة الذين يمتلكون سيارات
انا شايف ان العفشجى عايز يعمل عليك شغل مرتين
مره من خلال شراء الاشياء بنفسه اللى بيأكد لك انه هيضمنهملك
مره ثانيا هيشتغلك كمان فى المصنعية
ادعو الله الكريم ان يهديك الى صنايعى يعرف ربنا

[mahmoodallam]

بص يا أ/تاج الدين
انا معايا ريجاتا
كنت بسمع صوت طقطقه من قدام في المطبات روحت لحوالي خمس او 6 عفشجيةكل واحد كان بيقولي كلمة شكل ؟
وواحد منهم عمل زي ما صاحبك عمل
طلع العفشة كلها عايزة تتغير(مساعدين وبطاحات ومقص واحشو اسكاترة و ................)!!!!!!!!!!
اه والله قلتله طيب ما انا اريح انفسي بقى واشتريلك نص قدام وخلاص !!!!!!!!!!!!!!
بص احيانا الصنايعي لما مايبقاش عارف العيب فين يتوهك ويغير كل حاجة علشان لو غير حاجة وما ضبطتش الناس هتقول عليه ما بيفهمش. المهم في نهاية المطاف الناس وصفولي عفشجي في طنطا وانا من شبين روحتله مخصوص قالي لا مساعدين ولا بطاحات ولا مقص دي علبة دركسيون (اسكاترة) ؟
وفي ناس بتقولك هاتلها حشو هو قالي لأ ده هيتقل الدركسيون وممكن يخليه ما يرجعش لوحده الافضل انك تشتري علبة استيراد او جديدة اللي يريحك وقالي الاستيراد قليلة شوية ’لفيت لقيت علبة الدركسيون علطول الحمد لله وكانت ب 225ج ركبهالي ومشيت العربية زي الفل بقالي بيها دلوقتي 4 شهور والحمد لله ما اشتكيتش من العفشة.
من بعدها وانا كل ما واحد يقولي عايز عفشجي اقوله روح لفلان .
وفعلا محدش رحلو واشتكى .
خد مصنعية في اليوم ده 120 ج بس علشان بصراحة تعبو العفشة كلها اتفكت وركبت تاني
وكان في ميزة ان عنده حوالي 5 شغالين تحت ايده نطو عالعربية فكوها في اقل من نص ساعة وركبوها في نص تاني المشكلة بس كانت اني اخدت ساعتين بجيب الاسكاترة
نسيت اقولك اني بحترمك لانك مشارك فعال في المنتدى انا فاكر اني استفدت منك قبل كده بس مش فاكر الموضوع

[amro1965]

شكرا لكل الريجاتوية اللى بيفيدوا زملائهم فى كار الريجاتا

[mtageldeen]

amro1965
mahmoodallam

أشكركما علي الرد

وأود أن أوضح أن سؤالي ليس عن شك في كلام العفشجي ولا عدم ثقة فيه فأنا مستريح له جداً

وأنا علي يقين تام بعدم وجود وجه مقارنة بين المساعدين الجديد والإستيراد

وأميل لكون المقصات الجديدة أفضل من الإستيراد

ولكن سؤالي بالأخص عن البطاحات والصدادات الجديدة أفضل أم الإستيراد؟






.

[sab3aawy]

طالما العربية بتخبط يبقى فيه حاجة غير المساعدين بايظة، لأن المساعدين لما بتبوظ مش بتخبط لكن بتبوظ وراها حاجة تانية تقوم تخبط، اختبار المساعدين يكون عن طريق هز العربية وملاحظة مقاومتها للهز فاذا اكنت السيارة تهتز ببساطة وبدون مقاومة يبقى المساعد اللى بنهز من عنده الله يرحمه، ولو كانت العربية مش بتتهز خالص وترفض الحركة لسنتيمتر واحد لأسفل أو لأعلى يبقى برضه المساعد الله يرحمه، نقول المساعد كويس لما تكون العربية بتتهز بصعوبة وبنفس درجة المقاومة فى كل مرة، ولذلك انت ممكن تغير المساعدين وتلاقى التخبيط لسة موجود لأن الحاجة اللى باظت بعد ما المساعدين باظت وبوظتها لسة ما اتغيرتش

بالنسبة للتخبيط فده ممكن يكون من علبه الديريكسيون او من المقصات او كلاهما،

نصيحة مشتريش عفشة استيراد، عملتها 100 مرة وكل مرة اعملها اندم

بالنسبة للمساعدين فعليك بالمونرو، هم اضمن حاجة فى السوق، سعر الجوز حوالى 450 جنيه
المقصات هات الأوكاب الايطالى، فى حدود 130 جنيه، او المايلى الألمانى لو موجودين
علبة الديريكسيون اظن فيه منها اوكاب ايطالى ومايلى المانى فى حدود 600 جنيه، وفيه سيزماك تركى ب 250 تقريبا، بس لو هتجيب السيزماك خد بالك انه فيه تقليد ليها اسمه سيزماكو، اوعى تجيبه، السيزماك انا جربتها فى الشاهين ممتازة، اما السيزماكو دى جربتها فى الريجاتا كانت زبالة
البطاحات والصدادات موجودة جديدة وفيه منها اوكاب ايطالى، اوعى تجيب الصينى تمن الطقم حوالى 75 جنيه
لو انت من سكان القاهرة الكبرى الحاجات دى كلها هتلاقيها عند هشام لهيطة فى شارع زكى او الكيلانى فى شارع معروف

[mtageldeen]

طالما العربية بتخبط يبقى فيه حاجة غير المساعدين بايظة، لأن المساعدين لما بتبوظ مش بتخبط لكن بتبوظ وراها حاجة تانية تقوم تخبط، اختبار المساعدين يكون عن طريق هز العربية وملاحظة مقاومتها للهز فاذا اكنت السيارة تهتز ببساطة وبدون مقاومة يبقى المساعد اللى بنهز من عنده الله يرحمه، ولو كانت العربية مش بتتهز خالص وترفض الحركة لسنتيمتر واحد لأسفل أو لأعلى يبقى برضه المساعد الله يرحمه، نقول المساعد كويس لما تكون العربية بتتهز بصعوبة وبنفس درجة المقاومة فى كل مرة، ولذلك انت ممكن تغير المساعدين وتلاقى التخبيط لسة موجود لأن الحاجة اللى باظت بعد ما المساعدين باظت وبوظتها لسة ما اتغيرتش

بالنسبة للتخبيط فده ممكن يكون من علبه الديريكسيون او من المقصات او كلاهما،

نصيحة مشتريش عفشة استيراد، عملتها 100 مرة وكل مرة اعملها اندم

بالنسبة للمساعدين فعليك بالمونرو، هم اضمن حاجة فى السوق، سعر الجوز حوالى 450 جنيه
المقصات هات الأوكاب الايطالى، فى حدود 130 جنيه، او المايلى الألمانى لو موجودين
علبة الديريكسيون اظن فيه منها اوكاب ايطالى ومايلى المانى فى حدود 600 جنيه، وفيه سيزماك تركى ب 250 تقريبا، بس لو هتجيب السيزماك خد بالك انه فيه تقليد ليها اسمه سيزماكو، اوعى تجيبه، السيزماك انا جربتها فى الشاهين ممتازة، اما السيزماكو دى جربتها فى الريجاتا كانت زبالة
البطاحات والصدادات موجودة جديدة وفيه منها اوكاب ايطالى، اوعى تجيب الصينى تمن الطقم حوالى 75 جنيه
لو انت من سكان القاهرة الكبرى الحاجات دى كلها هتلاقيها عند هشام لهيطة فى شارع زكى او الكيلانى فى شارع معروف

أنا شاكر جداً ردك الوافي ومساعدتك

بالنسبة لعلبة الدريكسيون أنا لا أشعر بأي مشاكل معها
والحمد لله العفشجي قال علبة الدريكسيون عندي سليمة ولله الحمد.

بالنسبة للمساعد عند فتح الكبوت وهز العربية لا أشعر أنه خفيف أو محجر مع قلة خبرتي في هذا المضمار ولكن أجد البطاحة تتحرك وكأنها مشطورة شطرين (مثل الساندوتش) شطر فيه جلد البطاحة لأسفل وشطر فيه ما يشبه الوردة الحديد ولكن كبيرة إلي جانب الصامولة أعلي الكارتيرة
وهذا في كلا البطاحات

والعفشجي قال إن أحد المساعدين ضرب زيت بسبب بوش في المقص أسفله والمساعد الأخر محجر

أنا سوف أجرب عفشجي أخر للكشف علي السيارة.

[mahmoodallam]

نورتنا يا سبعاوي
والله بفرح لما أشوف مشاركاتك .

[مواطن مصرى]

اسمع كلام المهندس سبعاوى فلا رأى بعده ...

احب اضيفلك حته من عندى على السريع :

1- لا تثق فى كلام اى ميكانيكى او عفشجى الا لو كان مجرب قبل كده مع كذا حد فى كذا مشكله و لو لم يعجبك كلامه خذ رأى اكثر من واحد و لو اتفقوا على حاجه خير و بركه و لو اختلفوا شوف تفسيرك انت مايل ناحيه انهى رأى لانك انت اللى سايق العربيه و عايش معاها مش هما

2- اى حد يقولك على اى قطعه غيار جديدة بتاعت فيات قديم (دى ايطالى اصليه) اعرف انه نصاب لان شركه فيات الايطاليه بطلت تنتج قطع غيار للموديلات القديمة زى الـ 128 و 132 و الريجاتا كلها حاجات هما ضاربينها فى مصانع بير السلم و اسهل حاجه عندهم لزق التيكيت و حفر السيريال على المكونات و التغليف .. البديل بيكون اما تركى او بولندى و ما الى ذلك

3- لو مستغلى المساعدين المونرو ممكن تجيب مساعدين اسبانى (الجوز حوالى 350) او بولندى (الجوز حوالى من 250 و اقل من 300) كويسين جداً لكن المونرو ميزته انه ناشف فى المطبات و بيدى العربيه ثبات + معاه ضمان سنه استبدال من الوكيل + صناعه اتحاد اوروبى

4- علبة الدركسيون التركى هتلاقيها فى ش مجلس الامه فى السيده زينب او فى ش شامبليون فى وسط البلد

[محمد محى]

انا سسمعت ان فى ناس بتغيير حاجات فى العفشه بقطع غيار من تويوتا وبيجو بس دا كاه مجرد سمع فقط
ياريت حد يفيدنا فى الموضوع ده
وياريت لو حد يعرف مكان اجيب منه كشافات النوا والشبكة بسعر كويس يبقى الله يباركله