مساعده من اهل الخبره

[mahmoudseleim]

السلام عليكم ورحمه الله معروض علي سياره ريجاتا موديل 85 1500 ccللشراء حالتها كويسه جدا الرجاء من الاخوه المختصيين مساعدتي بامدادي عن هذه السياره كويسه ولا لا والسعر ال نهائي مع الشكر مع توضيح مميزات وعيوب الريجاتا

[mahmoodallam]

السعر بيتحدد بناء على حاجات كتير :
حالة الدواخل رشة ولا لأ ؟
حالة الخوارج ودي غالبا رشة بس ممكن تلاقي حاجات مش رشة ؟
لو كانت دواخلها فبريكة يبقى اتأكد من العيب الشهير جدا للريجاتا (البروووووووووووووووووووووووووووومة)
العربية دي انا معايا اختها :
وعايز أقولك على شوية أخطاء انا وقعت فيها لما جيت اشتري :
الاكصدامات لازم تكون سليمة لان الاكصدامات بتاعتها غالية 400 للواحد تقريبا
تاني عيب مشهور للريجاتا بعد الروووووووووووووومة هو الطبلوة : طبلوة الريجاتا ضعيف جدا اتأكد انه مش متكسر وغالبا الكسر اللي في ما بيبنش الا لو دققت النظر لانه مكسي بطبقة شبيهة بالجلد ، واتأكد ان العدادات راكبة صح بالمسامير مش ملزوقة بأمير !
طبلوة الريجاتا غالي جدا سعره حوالي 1500 جنيه ده اذا لقيته .
بس دول اهم عيوب الريجاتا ماعدا ذلك الحاجات العامة اللي انت بتتأكد منها عند شراء أي سيارة زي الكشف على حالة الموتور ومفيش مانع تروح تقيس كبسة في أي بنزينة وما تبخلش على العربية في مصاريف فحصها علشان ما تدبسش ، خد معاك سمكري وميكانيكي.
والعربية دي قطع غيارها الخارجية زي الفوانيس والاكصدامات والطبلوة غالية شوية لكن قطع غيار الموتور او العفشة او الكهرباء أي حاجة تاني موجوة عند البقالين ورخيصة جدا زي ال 128 والشاهين .
ولف هنا في المنتدى هتلاقي كلام حلو عالعربية والله وهي تستاهلو .
هي بتجمع بين القديم في رخص قطع غياره والجديد في نعومة سواقته .
وعن تجربة العربية دي ثباتها اكتر من ثبات الفيرنا وبتجري .
صالونها وشنطنها مساحتهم جميلة جدا .
أخيرا السعر بيتراوح من 17000 الى 25000 حسب الحالة بس ال 25000 دي المكيفة اللي مش هتصرف جنيه اللي ما فيهاش غلطة .
وعلى فكرة انا اعرف واحد كان معاه واحدة فبريكة برا وجوة موديل 89 باعها على 29000 ومرضيش ينزل جنيه .
ومن وجهة نظري ادفع الفين او تلاتة زيادة وابعد عن أي عربية تشك ولو مجرد شك في أي حاجة فيها .
وخد بالك ان النضيف من الريجاتا قليل فهتتعب على ما تلاقي حاجة نظيفة
وربنا يرزقك بعربية حلوة وحالتها كويسة ويديك خيرها ويكفيك شرها .