افيدونى سريعا فى ريجاتا نوفا 88

[ahmed1127k]

معروض عليا ريجاتا نوفا 88 عامله 169000 كيلوا وفيها تكييف وسنتر

الراجل طالب 23 نهائى

بس لما سئلته على قطع الغيار

قالى ان الريجاتا عموما قطع غيارها استيراد فقلقت من نبره كلامه

كده معناها انها مش متوفره وهتغلبنى؟

ياريت حد يفيدنى فى الريجاتا عموما وخصوصا النوفا وكمان موضوع الغيار

هى 1600 سىسى

[ahmed1127k]

ايه يا شباب

مفيش اى حد يساعدنى

[semsem_uno]

بص يا مان
الريجاتا قطع غيارها موجودة اكيد و في حاجات كتير مشتركة مع الشاهين فيها
يقصد بالأستيراد الكبوت و الرفارف و الصاج و كده و اكيد في قطع تانية استيراد بس طبعا الجديد جديد و تنسي العربية لأن الأستيراد مهما كان استعمال
و بالنسبة للسعر حلو قوي بس اكشف عليها كويس و التكييف عادتا هيكون تعبان و لو قاللك محتاج شحن فقط يبقي بيحور

[Ahmed_Ramadan]

هوا السعر عالى على السعر اللى فى السوق دلوقتى بس لو الحالة نضيفة و أقصد بنضيفة
1- تابلوه نضيف مش مكسر و الكمبيوتر شغال مش نصو منور
2- مفيش بارومة أو حتى بسيطة و علاجها بسيط
3-حالة الموتور و التكييف شغال و لا لأه علشان لو قالك عاوز شحن يبقى غالبا بايظ و الا كان شحنه هوا
4-حالة العربية من الخارج و الفرش من الداخل

و أخيرا حاول تنزل 2000 و لا حاجة انت أولى بيهم لو هترش أو هتعمل سيرفيس للعربية بعد أما تجيبها و ربنا يوفقك

[ahmed1127k]

متشكر اوى يا شباب معندكوش اقتراح سياره فى حدود من 20000 الى 25000

[Lord of the flies]

بلاش الريجاتا الموتور 1600 لان قطع الغيار الداخلية(الموتور) غير متوافرة على عكس ال1500

بالنسبة لقطع الغيار الخارجية فهى لا تختلف بين النوفا ال1500 و ال1600

و بالتوفيق

[amro1965]

مع تحياتى وتعليقات الاخوة الاعضاء
اتمنى من كل من يعطى رأيه فى شىء يكون جربه لا يكون سمع عنه اتمنى لا احد يضايق منى
بالنسبه للاخ صاحب الموضوع
باين على حضرتك جديد فى المنتدى علشان كده انا هخبرك بشىء واحد
اولا انا مالك ريجاتا والحمد لله مريحانى كتير جدا وشايفها مناسبه لى وبالنسبه لقطع الغيار رخيصه وفى متناول الجميع
ثانيا انسى رأى تماما اللى قلته
ثالثا والمفيد فى المنتدى كلمه بحث فى شريط ادوات المنتدى ماعليك الا ان تكتب ريجاتا نوفا فقط لا غير
النتيجه
سوف تجد جميع المداخلات التى تبين ميزات وعيوب الريجاتا نوفا وهتجد كل شىء بيتكلم عنها بايجاز شديد
لعلم الجميع انا قبل ماشترى سيارتى علمت بحث عن كل شىء عن السيارة التى كنت ناوى اشتريها والحمد لله اشتريتها
نصيحه اخرى لاخى العزيز ولكل شخص ناوى يشترى سيارة اى كانت نوعا يسأل هذه الاسئلة
مدى سحب السيارة
مدى ثبات السيارة على السرعات العالية
مدى تداولها فى السوق لو حبيت ابيعها
اسعار قطع الغيار الخاصه بالسيارة المراد شرائها
هل توجد لها صيانه فى الورش المصرية ولا لا
هل تستحمل الطرق المصرية المقرفه ام لا
واشياء اخرى
يعنى من الاخر تعمل لها بحث حاله قبل الشراء ثم تستخير ربك فى الشراء
والسلام عليكم ورحمه الله وبركاته