استغاثة الى اصحاب ال 131

[momo100010]

السلام عليكم ورحمة الله وبركاته
الاخوة الكرام اصحاب او خبراء ال 131
انا عربيتي فيها كام مشكلة كده
واغلبهم مش عارف اعمل فيهم ايه
انا المفروض انى كنت عامل حسابي انى هبيعها ان شاء الله قريب
ولكن هضطر انى اخليها معايا لمدة مش قليلة لظروف خاصة
المهم هدخل ف الموضوع على طول
انا خبرتي بالعربيات القديمة ( ميكانيكا وكهربا والكلام دا والتعامل مع الميكانيكية صفر )
ولو فى اقل من الصفر يبقى كده
والميكانيكي اللي بتعامل معاه بيقلعني ملط كل ماروح له علشان حاجة هايفة
يعني رحت له ف مرة علشان يركب لي عوامة بنزين
الموضوع كلفني حوالي 150 : 200 جنيه
وللاسف المشكلة ماتحلتش حتى
فالمهم قلت اسال الخبراء هنا ف المنتدى عن الحاجات اللي ف العربية
ويريت اللي يعرف اى حاجة منها يقول لى
مبدئيا انا مش عارف بخاف من عربيتي جدا جدا جداااا ليه لدرجة انى بخاف امشي بيها لوحدى لحسن تعمل معايا موقف كده ولا كده
الحقيقة انها عمرها ماعملت معايا اى موقف والله
بس بخاف نظرا لان عمرها تعدى ال 35 سنه
المهم هبدأ اهه :
1- مش بحس ان العربية بتسحب كويس خااااااالص ( انا ماغيرتش اى حاجة فيها من ساعة ماجبتها الا فلتر الهوا والزيت والبنزين )
2- عداد الحرارة دافع فيه لحد دلوقتى يجي 200 جنيه ولسه مفيش حد عارف يشغله لانه معمول له كباري )
3- عداد السرعة دافع فيه حوالى 35 جنيه واشتغل يومين وحلف ماهو عادد بعد كده
4-الريدياتير حاسس ان فيه كلاب ميته متوسخ جدا جدا جدا بطريقة رهيبة وطبعا العربية بتسخن ولكن انا مبعرفش انها سخنت واديها ماشية
5- زيت الموتور بينقص (مش اول مابحط زيت للعربية ) ولكن بعد حوالى شهر من وضعه زيت تعاون 3000 كيلو (للاسف ممكن اعد لحد 7000 ماغيرش ازود وبس) والموتور كله زيت .رحت للميكانيكي قال لى جوان كرتيرة الزيت ودخلنى ف حوارات خارج من عنده دافع 320 جنيه وبرده الزيت بينقص ( مع العلم انى مغير جوان وش التاكيهات )
6- العفشة مش راضي عنها فمش عارف اغيرها ولا اربطها واظبطها .
انا عارف ان الحاجات دى كتير
مش عايز اقول لكم انى بعمل بيها ف اليوم حوالى 120 كيلو
شيلاني شيلاني شيلاني
ايه اولوياتي
ويريت بالله عليكم اسعار كل الحاجات دى علشان احس انى راكب عربية وماخفش من اللى ممكن تعمله معايا
منتظر رد حضراتكم واعتذر عن الاطالة

[michohat]

السلام عليكم
اتفضل حضرتك اطلع على الموضوع ده وان شاء الله يكون فيه الافاده
رابطه الاعضاء من مالكى 131

http://www.nilemotors.net/Nile/67592-131.html

[ahmedbasto]

بص يا باشا موضوع السحب على ما اعتقد ياما البكات عايزة تتسلك او تنظف يعنى يا اما البوجيهات عايزة تتغير .
موضوع العدادت دة انا مقدرش افيدك فيه علشان ما اكونش بأفتى.
الرداياتير محتاج يتفك ويتنظف ويتغسل وكدة عند حد بيفهم فى المجال دة.
موضوع الزيت برضو مقدرش افيدك فيه .
والعفشة انت مش موضح فيها ايه بالضبط.

[momo100010]

بص يا باشا موضوع السحب على ما اعتقد ياما البكات عايزة تتسلك او تنظف يعنى يا اما البوجيهات عايزة تتغير .
موضوع العدادت دة انا مقدرش افيدك فيه علشان ما اكونش بأفتى.
الرداياتير محتاج يتفك ويتنظف ويتغسل وكدة عند حد بيفهم فى المجال دة.
موضوع الزيت برضو مقدرش افيدك فيه .
والعفشة انت مش موضح فيها ايه بالضبط.

مشكور عالرد يا باشا
طيب ايه البكات دى اساسا ؟
ودى محتاجة كهربائي ولا ميكانيكي
واديله مبلغ اد ايه علشان ميقلعنيش