مساعده فى فيات ريجاتا ارجوكم

[ahmedezzat666]

انا عندى Regata 70
1300 سى سى
المشكله ان الفتيس والعربيه واقفه بيعمل رجرجه بتختفى لما بدوس دبرياج
المهم انا وريتها لاكتر من ميكانيكى قالى الفتيس فيه مشكله و منصحكش ان احنا نفكه لانه مش هيتصلح
اشترى غيره و ريح دماغك
انا عاوز رايكم الكلام ده صح ولا اروح لواحد تانى و يفكه و يشوف فيه ايه

[heshamzaky]

انا عندى regata 70
1300 سى سى
المشكله ان الفتيس والعربيه واقفه بيعمل رجرجه بتختفى لما بدوس دبرياج
المهم انا وريتها لاكتر من ميكانيكى قالى الفتيس فيه مشكله و منصحكش ان احنا نفكه لانه مش هيتصلح
اشترى غيره و ريح دماغك
انا عاوز رايكم الكلام ده صح ولا اروح لواحد تانى و يفكه و يشوف فيه ايه

بص يا باشا انا ما عنديش ريجاتا بس النهاردة كنت فى عزبة شلبى و لقيت حاجات و انصاص عربيات و كان فية منها ريجاتا 70 بس ما اعرفش بكام و لا اى معلومة غير انى شفت ليها صاج و انصاص عربيات

[مواطن مصرى]

اول حاجه لازم تعملها انك تغير الميكانيكى ده لانه لا مؤاخذه .............

بالعقل كده ازاى يبقى فيه فى الفتيس و العربيه بتترجرج و هيه واقفه على المور من غير ما تديها غيار ؟!

لو فيه مشكله فى الفتيس هتحس بيها و انت بتدى غيارات (عضه او عدم سلاسه فى النقل مثلاً) او هتحس بيها لما العربيه تحس انها مش واخده الغيار رغم انك ناقل (مثلا تدى الثالث او الرابع و تيجى تزود السرعه تلاقى العربيه مبرجله بمعنى ان اجزاء الفتيس منقلتش السرعه)

هل حضرتك كشفت على مكونات مجموعه الدبرياج و لقيتها سليمه قبل ما تقول ان المشكله فى الفتيس ؟!

اكثر من 80% من حل المشكله هايكون فى اسطوانه و ديسك الدبرياج

[caysersosaih]

المشكلة فعلا في الفتيس غيره استيراد من عزبة شلبي
الصوت الي يبقي موجود ويختفي مع دوسة الدبرياج عيب فتيس
مافيش صوت من غير دبرياج ويظهر صوت مع الدوسة بلية دبرياج

[Ahmed_Ramadan]

معلش بس هوا يعنى ايه الفتيس مش بيتصلح!!!!!
هى دى مشميزة المانيوال برضه و لا أنا غلطان......نصيحة شوف ميكانيكى تانى و خد رأيه

[ahmedezzat666]

انا غيرت اسطوانه و ديسك و بليه و برضو مفيش فايده
العربيه و هى على المور بيبقى فيه رجرجه و بتختفى مع دوس الدبرياج
و كما فى عضه فى الغيار التالت
وكمان ساعات لما ابقى ماشى فى ارض مش مستويه احيانا الغيار التالت بيقع لوحده و العربيه ترجع للمور لوحدها

[Ahmed_Ramadan]

طيب ما تشوف ميكانيكى تانى يبوصلك عليها و ان شاء الله خير

[M.Al-Hefnawy]

شوف ميكانيكي تاني ممكن يكون الميكانيكي اللي انت ركبت عنده طقم الدبرياج مش ظابطهم عشان كده العصايه مش مظبوطة معاك.

[memononos]

نصيحه اخويه وكلام من دهب عن تجربه شخصيه
انا معايا عربيه 128 كان فيها مشاكل فى الفتيس روحت صلحته عند بتاع فتيسات وكلفنى حوالى 500 جنيه
تغير تروس وحورات ...
المهم بعد ده كله متصلحش برضو وكان قارفنى اخر قرف
وفى الاخر رميته وروحت اشتريت فتيس من عزبه شلبى ب 700 جنيه والحمد لله شغال تمام
اشترى واحد استيراد وهتلاقيه عامل 900 جنيه بالظبط ..

[zenger]

الفتيس فى الريجاتا لافيهات يا اخوانا مش معلقة زى ال128 و بعدين لو صوت تنقير خفيف بيروح لما بتدوس على الدبرياج العيب ده كان عندى هوة ميكانيكى عدل تقولة انا محتاج ايه لعلمك انا كنت فاكك الفتيس و غيرت اللافيهات و ركبته تانى و الحمد لله تمام انا كانت عندى المشكلة دى بس للاسف مش فاكر العيب بالتحديد بكرة هرد عليك ان شاء الله بس المشكلة من الفتيس دى ملهاش دعوة بغيار او لا مع الاعتذار للعضو المحترم طبعا كلامك مظبوط بس لو ملهاش علاقة بالفتيس الصوت هيروح ليه لما بندوس دبرياج !!!!!؟

[ahmedaliamer]

أخبار مشكلة رجرجة عصاية الفتيس إيه ؟؟؟؟؟؟