Tweet
الــــسلام عليكم .
بعد طول انتظار , استلمت اخت المدام اخيرا ... اللايفو .. بعد و اصلنا لمرحلة ان احنا رايحين نسحب الفلوس و نجيب سيارة من ماركة اخرى .. على الاقل توكيلها محترم في كلامه .. ما علينا .
البنت كانت حاجزة باكدج 1 اوتو بس لون اسود او نبيتي تقريبا .
مفيش طبعا باكدح 1 اوتو غير احمر فاقع و هو لون في راي الشخصي زبالة الى ابعد الحدود و مش ميتالك و شكله يقرف !
المهم لقينا نبيتي لكن باكدج 2 , و دي اغلى 10 الاف جنيه و في راي الشخصي الكماليات الي فارقة بين الاتنين رهيبة جدا ! بس في ناس شايفة انها مش اوبا ولا حاجة .. اراء شخصية .. المهم :)
الفرق تقريبا هو :
- Paddle Shifters تغيير سرعات الفتيس من الدركسيون ( + \ - )
- شبكة مختلفة
- الفوانيس الامامية سوداء
- زجاج خلفي فيميه
- Blue & Me
- جنط مختلف
-الفرش فيه تطعيمات من لون السيارة في الخارج
- التابلوه مطعم بحاجة زي الجلد كدة و لونه احمر ( بصراحة شيك جدا )
---
تم الاستلام من فرع نادي الزهور , و دي 7 عربية استلمها مع حد عامة و نسيت اهم حاجة افتركتها و انا بكتب دلوقتي .. نسيت اشوفها عاملة كام كيلو :)
نيجي لاختبار القيادة , طبعا الراجل تفضل شاكرا ( ياسر عزت ) شرحلنا العربية كاملة و كل حاجة فيها و شغلنا التكيف و و جربنا تقريبا كل حاجة فيها و كله كان سليم و شغال .
ركبت العربية:
- الشكل الخارجي طبعا ممتاز لو اني شايف ان مقدمة الجراند بونتو مازالت احلى بكتير بس الفوانيس الخلفية و الشكل الداخلي عوض الموضوع ده تماما .
- الكراسي مريحة جدا و بتتظبط في كل الاتجاهات ,
- الدركسيون معجبنيش خالص وضعيته بصراحة , مهما ظبطته ( 4 اتجاهات ) دايما مغطي جزء من شاشة المعلومات و انا طولي عادي يعني 173 سم .
- التكييف كنا باليل بصراحة مقدرتش احكم عليه هو عادي مش كليمات ببكر , باليل شغلناه شوية على 2 و بقى بارد جدا فقللناه ل 1 . و صوته هادئي جدا جدا .
- تدوير المحرك , صوته المحرك لو قالفل الزجاج مريح جدا يكاد يكون مسموع و مفيش اي زنة او صوت جاي من برة نهائي دليل على جودة مواد العزل الي كانت دايما بتعيب بعلى فيات .. بصراحة احساس و انت راكب و واقف تحس انك راكب عربية راقية غالية مش عربية سوبر ميني من ماركة اقتصادية خصوصا ان التابلوه بصراحة ششششششششششششيييييييييييك جدا . يعني الجراند بونتو و اللينيا شكلهم عربيات كوري جنبها .
- انا جربت الاوتوماتيك الاول , الفتيس ده بالنسبة لي جديد شوية بس 5 دقائق سواقة تتعود عليه عادي جدا .
العربية كاتبالك في شاشة المعلومات اذا كنت مانوال ولا اوتو و النقلة الحالية كام .
- العربية ناعمة جدا جدا و مريحة جدا جدا وبصراحة المطبات و الحفر اداء لم اتخيله نهائي ... مش مرسديس طبعا بس على الاقل مفيش صوت ترزيع او حاجة اتدبت او اي حاجة من هذا القبيل ,
مثال البونتو العادية في عيون القط بتتنطط و تتنفض و تعمل اصوات غاية في السوق ... الايفو ولا كاني دوست على حاجة و مفيش صوت اصلا الي واطي جدا .
- دواسة الفرامل حساسة جدا جدا و ممتازة بصراحة , سيارة ممتعة بصراحة في الحركة و في التحكم .
نيجي لخوفي الاكبر و الي فعلا اثبتلي اي على حق ...
العربية " بطة "!
بطة بطة بطة بطة من هنا لبكرة .. مانوال - اوتوماتيك اي حاجة ... لم تقنعني نهائيا !
نــــــــــــــــهـــــــــــــــــــــــــــــائي ا !
تسارع بطيء جدا جدا حتى لو هي لسة جديدة ... مش كدة ... من صفر الي 100 كم في حوالي 14 ثانية بالمانوال و 17 ثانية بالاوتو !
قلت برده استنى عليها اجربها تاني بعد ماتمشي ...بس بصراحة الانطباع المبدئي انها بطة !
سيبكم حتى من السرعات العالية .. يعني فرضا عايز تطلع من حد قدامك !
سقطت نقلة من الشفتر و دست بنزين متوقع بقى اطير من جنبه ... ولا الهواء ! يادوباك سحبة بسيطة كدة ... يعني لو كان في عربية جاي في وشي بالشفاء !
لأ و لازادة الطين بلة ... حطنلك زرار ECO مود و ده بيخلي العربية تنقل عن 2500 لفة علشان توفير البنزين .. و هي مش نقصة اصلا بطئ !
نرجع تاني ..
- ال Blue & Me بصراحة ظريف جدا جدا و ممتع
- ال Start & Stop بتحس بيه ... و بتحس بيه جامد كمان ! علشان في ناس فتت و قالت انه مش محسوس او ملوش تاثير .. لما بتقف في اشارة او تقاطع صوت المحرك باين جدا انه قفل و فتح تاني كانك قفلتها و فتحتها بس بدون رجة او هزة في السيارة بس انا شايف انه " اضمن " انك تقفله ( ليه زرار لغلقه ) علشان الدنيا مش ناقصة تعقيد .
- فتح التانك بالمفتاح ,... و دي حاجة رخمة جدا جدا .. و طبعا حجة بتوع اوماترا زي حجة الزجاج المنافلة الي ورا ... علشان " الحماية و الامان " و مش عايز افطر طبعا و انا بتكلم دلوقتي :)
- المفتاح بيفتح الشنطة و فتح الشنطة شيك جدا بتدوس على زرار فيات :)
- الشنطة واسعة جدا لسيارة في هذه الفئة و كالعادة على حساب الركابين الخلفيين .
ممكن تاخد 2 وراء بالظبط من غير ماتضايقو حتى لو مرجع الكرسي .. انما لو 3 او 2 طوال شوية .. رجليهم حتبقى في ضهر الكرسي .
- الكاسيت صوته ممتاز جدا و نقي جدا و فيه BASS حلو جدا على سماعات الفابريكة يعني .
- الباب تقيل جدا بس قفلته مش مقنعة ... لازم تقفله كويس والا مش حيقفل .
--
حاسس اني ناسي حاجة ...
بس عامة انا شايف انها عربية ممتازة جدا جدا جدا على سعرها ( ارخص سوبر ميني اوروبي بالكماليات دي تقريبا في مصر ) بس طبعا فرق السعر ده كله ميعوضش بالنسبة لي المحرك الضايع ده !
لو اني حجربه تاني بعد صيانة ال 5000 برده علشان نبقى " عادلين "
بس بنظرة سريعة لموقع فيات الانجليزي حتلاقي ان ال 1400 8 صمامات في المانوال عامل 13.2 ثانية من صفر الي مائي و ده رقم " وحش " جدا لسياة في هذا الحجم .
انا شايف انه الي مش فارق معاه موضوع السحب او المحرك .. حيستمع باداء عربية ممتاز جدا مريحة جدا شيك جدا حتحسسك انك راكب AUDI او سيارة تمنها على الاقل 200 الف جنيه مش كاسرة ال 100 .
و الي عايزها بس مش مقتنع بالمحرك زي .. ينتظر ال MultiAir حتكون 105 حصان بس بتوع المبيعات بيقولوا انها مش حتقل عن 115 - 120 و ميعرفوش لسة موضوع بنزين 95 ولا لأ .
للاسف مصورتش مكانش معايا كاميرا و كنا باليل , بس العربية نفس اللون و الشكل و الجنط الي في الصورة الي فوق بالبظبط .
Comment