فيات بونتو ايفو "البطه"

[ahmedmohamed7]

انت تأمر و الله
ان شاء الله علي 1000 كم
بس اكون اديت انطباع عام عليها و ربنا يسهل

ربنا يخليك يا باشا :)
عامتا كلام حضرتك ده عن العربيه فرحنى جدا و خصوصا موضوع الموتور ده اخيرا حدقال حاجه كويسه عن موتورها :)

[ahmedmohamed7]

أنا خايف من الجين 2 وشايف إن البونتو ايفو أحسن منها في الشكل والتكنولوجيا وهتوفر أكتر في البنزين، بس كل الناس بتقول علي الجين 2 إنها عربيه جامده جدا وموتورها قوي أوي بس مشكلتي فيها قطع غيارها وصيانتها، لأن مش أي ميكانيكي بيفهم فيها وتوكيلها بعييد أوي عليا مش هعرف أورح كل ما يحصل عطل، وبرضو بقول إن الأوروبي لا يعلي عليه حتي ولو كان أقل في الأرقام (سعة الموتور وقوة الموتور والعزم)

زى ماقال semsem_uno الحاجه الوحيده الى ممكن تتفوق فيها الجين هو وسعها النسبى عى الايفو و زود كمان فرق قوة الموتور :) و كمان بسمع ان ثباتها هايل ما شاء الله
اى حاجه غير كده تبقى فى صالح الايفو و ده راى__حاجه كمان حضرتك شوفت ايفو ماشيه فى الشارع قبل كده؟
او عربيه من عربيات فيات الجديده سواء لينيا او برافو؟ هتحس انك عينك سابت كل حاجه و راحتلها انا بتجنن اصلا :d

[onz]

ربنا يخليك يا باشا :)
عامتا كلام حضرتك ده عن العربيه فرحنى جدا و خصوصا موضوع الموتور ده اخيرا حدقال حاجه كويسه عن موتورها :)

الكلام عن مواتير العربيات عموما
هي عملية نسبيا
مثلا يعني
لو واحد بيسوق فولكس جولف GTI
و رايح يسوق بونتو ايفو
هيكره نفسة و اليوم اللي سايق فيه العربية
و مثلا
و احد كان بيسوق مثلا (من غير حد ما يزعل) اكسنت 1.4 او لانسر 1.3 او ساعات frv
, , و راح يسوق ايفو
ياااااااااااه
ها يحس بالفرق
فهي عملية نسبيا ليست الا
فشوف اللي ينسبك مقارنة باللي كنت بتسوقه قبل كده

[sody]

زى ماقال semsem_uno الحاجه الوحيده الى ممكن تتفوق فيها الجين هو وسعها النسبى عى الايفو و زود كمان فرق قوة الموتور :) و كمان بسمع ان ثباتها هايل ما شاء الله
اى حاجه غير كده تبقى فى صالح الايفو و ده راى__حاجه كمان حضرتك شوفت ايفو ماشيه فى الشارع قبل كده؟
او عربيه من عربيات فيات الجديده سواء لينيا او برافو؟ هتحس انك عينك سابت كل حاجه و راحتلها انا بتجنن اصلا :d

فعلا كل الناس اتكلموا عن ثبات الجين 2 بيقولوا خرافه، بس منظر العربيه ما بيشدنيش مع احترامي طبعا لأصحاب العربيه وأصحابي أنا شخصيا اللي شايفين إن شكلها تحفه.
أنا ما شوفتش بصراحه الإيفو علي الطبيعه بس شوفت البرافو واللينيا، بصراحه فعلا شكلهم جذاب أوي ويخطف العين، أنا خايف بس من الإيفو أحسن يكون شكلها صغير أو فيها حاجه في شكلها مستفز دي هتخلي والدي مايرضاش يدفع فيها مليم "أنا عارف بويا، عايز عربيه كبيره تملي العين"
هي في حجم البونتو العاديه ولا أكبر منها؟؟

[onz]

هتخلي والدي مايرضاش يدفع فيها مليم "أنا عارف بويا، عايز عربيه كبيره تملي العين"
هي في حجم البونتو العاديه ولا أكبر منها؟؟

علي فكرة نفس تفكير والدي برده
اول ما شاف العربية
قال ايه يابني العربية ده دي صغير ماتمليش العين ( اصل كانت نسيان صني عجباه و حاسس ان فلوسه مش هاتروح علي حاجه صغيره )
و بعد كده بيركب معايا و راضي عنها و زي العسل

[onz]

ايوووووووووووووه
نفس حجم الجراند بونتو بالمللي

[slim_shika]

في وجهة نظري المتواضعة العربية ديه محترمة جدا, حوار إنها بطة ولا لأ أنا لسة ماجربتهاش بصراحة بس هقولك على حاجة "الشد سواق" وبرده جرب العربية قبل ماتجيبها.

[ahmedmohamed7]

علي فكرة نفس تفكير والدي برده:_alshmokh08[1]:
اول ما شاف العربية
قال ايه يابني العربية ده دي صغير ماتمليش العين ( اصل كانت نسيان صني عجباه و حاسس ان فلوسه مش هاتروح علي حاجه صغيره )
و بعد كده بيركب معايا و راضي عنها و زي العسل

واضح ان كل الابهات بيفكرو بنفس الطريقه:) انا والدى اسه مش شافها بس متوقع نفس الرد :)
انا والدتى شافتها كان ده ردها"ده صغيره اوى" لما ركبتها و شفتها من جوه اقتتعت بيها جدا و اكتر حاجه انبسطت منها ابواب العربيه بتقولى حديد ما شاء اله :) و برضو العربيه من برا تحسها ضيقه لكن على الحقيقه غير كده مش عارف ليه :)

[damasry]

بسم الله الرحمن الرحيم

دخلت معرض سيارات وسألت الموظف اللي جوه عن العربيات الفيات وبالأخص بونتو ايفو، فقالي أنه لسه بايع عربيه مانويل ب 90 ألف جنيه، وقعد يشكرلي في العربيه وفي شكلها من بره ومن جوه وإنها 77 حصان، وقالي حاجه أنا مستغربها ومش مقتنع بيها بصراحه، قالي إن العربيه 77 حصان بس الحصان ده محسوب بالطريقه الأوروبيه مش الأسيويه يعني 77 حصان دول يعادلو 105 حصان أسيوي وقعد شرحلي إزاي بيقيسوا قوة الماتور في أوروبا وإزاي بيحسبوه في آسيا بس بصراحه أنا نفضت وما ركزتش.

الموضوع ده قتل بحثا فى المنتدى هنا واستقرينا ان المصنعين الاوربيين بيدوا قدرة الموتور وهو راكب على العربية من على الحدافة وفيه اتهامات للكوريين واليابانيين انهم بيذكروا قدرة المواتير برة العربية.

المهم أنا عن نفسي إقتنعت بالعربيه أوي خاصة إن فيها ABS & EBD وكمان فيات شركه عريقه وأكيد التكنولوجيا فيها أعلي بكتير من العربيات الكوري والياباني وبعدين 1400 سي سي هتوفر معايا في البنزين جامد.

العربية فعلا حلوة جدا وعوامل الامان فيه عالية والتكنولوجيا اللى فيها زى ما فيه عضو هنا قال مش موجودة فى عربيات تانية اغلى منها بكتير اما عن استهلاك البنزين فحدث ولا حرج، اللينيا التربو فى السفر بتعمل 5.1 ليتر لكل 100 كيلو

المهم دخلت علي النت وقعدت أدور علي العربيه دي ورأي الناس فيها فلقيت إن معظم الناس بتشتكي من سحبها وبيقولوا عليها "بطه"، وكمان التكيف بتاعها تعبان أوي، من الآخر موتورها ضعيف، وناس تقول دي عربية للبنات فقط وحاجات كده.

نقطة السحب دى انا معاك فيها بسبب واحد بس، انا كنت على طول بركب الفيات التربو ولما جيت اركب الجراند بونتو ال77 حصان حسيت ان العربية سحبها مش حلو وكنت بستغرب ان كل الناس اللى معانا اللى يجربوا العربية يقولوا على سحبها حلو وده ناتج ان فعلا حسب انت كنت راكب ايه قبل كده، عايز اقولك ان صاحب العربية نفسه كان معاه النيو اكسنت قبل الجراند وكان بيقول ان الجراند افضل من ناحية الموتور.

التكييف بقى بصراحة جامد ومش ها تحس ان فيه مشاكل معاه، وانا مجرب تكييف الجراند والايفو واقولك ان تكييف الايفو افضل والمروحة بتاعته قوية ما شاء الله.

أنا بعد ما قريت الحاجات دي اتلخبطت ، العربيه سعرها حلو أوي وكمان عربيه أوروبي وتقيله في السوق، بس موضوع السحب ده مشكله والمشكله الأكبر هي التكييف، أنا أصلا مابحبش الشد والجري والحاجات دي بس عايز أبقي في عربيه مريحه وتكيفها يريحني وسحبها لما أحتاجه ألاقيه.

العربية مش ها تريحك بس دى ها تدلعك اووووووى بس ياريت تجيب الفئة التانية ها تنبسط منها اووووووووووووووووووى.

قريت ناس بتقول إن الموتور بيلين بعد 10000 كيلو وبعد كده بيبقي سحبها كويس، بس كويس ده يعني إيه؟؟ كويس لما أقارنه مع العربيات التانيه؟؟؟ ولا كويس بالنسبه لحالة العربيه في الأول؟؟

فعلا حالة العربية والموتور بالخصوص بيختلف للاحسن بعد اول 10 الاف كيلو.

بجد الموضوع محير يا ريت لو حد عنده العربيه دي يفيدني في القصه دي
وعايز أسأل برضو عن الشنطه بتاعتها إيه ظروفها كبيره ولا صغيره "كام ليتر"

شنطها واسعة لعربية هاتش باك يعنى ها تكفيك، حجم الشنطة 235 ليتر ولو منزل الكنبة ها تبقى 1030 ليتر
ولو حابب تنزل تشوف العربية على الطبيعة تحت امرك نتفق على ميعاد وننزل فرع يوسف عباس تتفرج عليها وتركبها وتقولى ايه رأيك بعد كده.

آســــــــــــــــــــــف علي الإطــــــــــــــــــــــــــــــــــــــــــــــ ـــــــــــــــــــــــــــــاله
تحياتي

[moh.aboelkheir]

فعلا كل الناس اتكلموا عن ثبات الجين 2 بيقولوا خرافه، بس منظر العربيه ما بيشدنيش مع احترامي طبعا لأصحاب العربيه وأصحابي أنا شخصيا اللي شايفين إن شكلها تحفه.
أنا ما شوفتش بصراحه الإيفو علي الطبيعه بس شوفت البرافو واللينيا، بصراحه فعلا شكلهم جذاب أوي ويخطف العين، أنا خايف بس من الإيفو أحسن يكون شكلها صغير أو فيها حاجه في شكلها مستفز دي هتخلي والدي مايرضاش يدفع فيها مليم "أنا عارف بويا، عايز عربيه كبيره تملي العين"
هي في حجم البونتو العاديه ولا أكبر منها؟؟

على فكرة السيارة واسعة من جوة و اللي ورى بيكون مستريح و انا قعدت فيها و رجعت الكرسي للاخر و اصحابي قعدوا ورا و كانوا مستريجين
و موضوع الاهل دة نفس الحوار عندي .... و بدأو الحمد لله يقتنعو بعد محاولات مزرية

[damasry]

انا لسه مستلم العربية دي الشهر اللي فات لأختي وهي اصلاً مش بتسوف ف انا اللي كنت بسوقها

1- العربية على السرعات مريحة وبتجري وماسكة في الأرض... وانا مسكت بيها واحد صاحبي معاه بونتو برضه وبهدلته على المحور مع انه كان ناقص يولع في موتور عربيته.... بس الطلعة من الثبات بتعوز حرق شوية لو التكييف شغال.. وده كان بيزهقني ويخليني اطفي التكييف
1.5- الفتيس الدوال لوجيك ممل جداً جداً جداً للصبح في السواقة... العربية بتريح ع المطالع كأنها مانوال... لو وقفت ع الفرامل وشلت رجلك العربية بتفضل مكانها ولازم تديها بنزين عشان تمشي... الفتيس كله التحكم فيه الكتروني وانا مش واثق انه اوماترا هيعرفوا يعملوله ضيانة لو لاقدر الله فيه مشاكل.
2- التكييف ضعيف لو الشمس ضاربة في العربية انما غير كده تبريده جامد وبعد شوية بضطر اطفيه... بعني مش يخلى ودانك توجعك زي العربيات ال1600 الجديده بس حلو جداً والله واكييييد اهون من ال43 اللي بتشوفها بره
3- الشنطة جميلة وتنفع حتى لو عيلة او مجموعة صحاب مسافرين والعربية ليها شبكة شيك للرحلات
4- العربية فيها تكنولوجيا مش موجودة في عربيتي الكروز اللي مفروض انها اكبر واشد وأغلى وعشان كده انا شايف انه بصراحة البونتو غالية على فئتها
5- لو استعمالك محترم (مش بتهين المكنة.. وعايز عربية تصونها وتصونك ومش فارق معاك الحجم....) نفذ في البونتو وش.. انا كنت عايز عربية كبيرة ف خدت البونتو لأن البرافو كانت غالية عليا اوي

الفتيس مش ممل ولا حاجة بس محتاج شوية تعود، الفتيس مصمم انه يفصل اول ما تشيل رجلك من على البنزين والعربية تقف خالص ولازم فعلا تدوس بنزين عشان تتحرك وانا فى رأيى ان النظام ده افضل عشان حاجتين، اولا توفير البنزين المستهلك فى الاوتو العادى وتوفير تيل الفرامل المستخدم لايقاف السيارة من الحركة.

اما بالنسبة لاوماترا لو الفتيس نفسه حصل فيه حاجة جامدة واستعصى عليهم تصليحه ها يغيروه من فيات ايطاليا، مع ان مفيش اى شكوى بخصوص الفتيس حتى الان.

انا هرد علي كام نقطة بس
1.5-العربية بتريح في المطلع علشان انتا مش دايس بنزين كافي انه يدي عزم ليها انها تطلعة انما حضرتك بتفضل مخفف رجلك كأنك علي طريق مستوي فا مش بتسحب
تقل رجلك هتلاقيها سقطت غيار و سحبت (الديوال لوجيك كمان بيسقط لحد غيارين علشان لو جريت فجأة)
و الفرامل اللي لو متقل رجلك و شلتها تفضل ثانية او اتنين ماسكة برده ديه حاجة نازلة في الفيات علشات في المطالع العربية متريحش علي اللي وراها و ديه ميزة اسمها hill holder

و اوماترا مش توكيل سيء للدرجة و بيتعاملو متخفش

يا سمسم الراجل بيتكلم فى نقطة تانية، ان العربية مش بتفضل دايسة بنزين حتى وانت شايل رجلك من على الدواسة

موضوع الفرامل ده يا سمسم بقى العربية لو فضلت 10 دقايق مش ها تتحرك من الثبات الا لما تدوس بنزين مش موضوع حاجة نازلة فى فيات وكده، اللي بتقول عليه ده فى الHill Holder وده مش موجود فى الايفو.

1.5- انا بتكلم انه العربية مش زي الاوتوماتيك العادي بتطلع لوحدها لأ دي زي المانوال بتريح لورا لو مش ماسك فرامل

وموضوع الhill holder ده انا قريت عنه في الكتالوج بس الحقيقة انك لو على مطلع كوبري العربية بتريح على اللي وراك فعلاً مش بتمسك

انا شرحت لحضرتك وفعلا الكلام مظبوط.

انا مش فاهم بصراحة قصدك
بس علي فكرة فتيس العربية ديه نفسه (صندوق التروس) مانيوال و فيه اتنين ديسك كمان و دبرياش بس مش انتا اللي بتتحكم فيه

يا سمسم الفتيس اللى بتقول عليه ده لسه منزلش فى عربيات فيات، الفتيس اسمه DCT وده زى الDSG ونزل فقط فى الالفا روميو، لكن الديوالوجيك ده ديسك واسطوانة عاديين بس دبرياج كهرباء وكومبيوتر بيتحكم في الدبرياج ده.

[dodger111]

1.5- انا بتكلم انه العربية مش زي الاوتوماتيك العادي بتطلع لوحدها لأ دي زي المانوال بتريح لورا لو مش ماسك فرامل

وموضوع الhill holder ده انا قريت عنه في الكتالوج بس الحقيقة انك لو على مطلع كوبري العربية بتريح على اللي وراك فعلاً مش بتمسك

حضرتك لازم تفضل ماسك فرامل حتى لو على طريق عادى لانها هترجع ل ورا او تمشى ادام..ف لازم تفضل دايس فرامل طول الوقت او تشد الهاند وتجيب n ....ازاى زى المانيوال امل هيا اية! ما هى جير بوكس مانيوال وكمان هتحس بالنقلات وانت ماشى بس دة شوفتو فى البرافو يمكن مش باين عندك لان سحبها مش زى البرافو

[sody]

damasry
تسلم يا غالي علي التوضيح الممتاز ده ما شاء الله عليك.:D:D:D:D:

[sody]

أنا أصلا معايا دلوقتي شاهين ، إنتو عارفين إن موتورها فيات، بس بصراحه موتور الشاهين مقرف أوي والعربيه بتسخن عشان نظام التبريد زباله، أنا خايف تكون الفيات لسه معتمده علي نظام التبريد ده لغاية دلوقتي دي تبقي كارثه

[Moe86]

لأ طبعا, حضرتك بتتكلم على عربية التكنولوجيا بتاعتها من أوائل التمانينات, مافيش عربية جديدة بتسخن أصلا

عربيتى البونتو كلاسيك (اللى هى أقدم من الايفو) لما بتسخن فى الزحمة و كدة المروحة بتشتغل على السرعة التانية و صوتها بيعلى شوية, بس كدة