حملة لمقاطعة توكيل فيات

[lolo2884]

ا لاخوة الاعزاء ملاكى سيارات فيات بجميع موديلاتها الحديثة هذا الموضوع نقاشى فقط

السؤال الاول (هل انت بحاجة للضمان الوهمى للسيارة)
السؤال الثانى(هل برنامج الصيانة المحدد من قبل التوكيل مطابق للكتالوج المرفق مع السيارة)
السؤال الثالث(هل تستطيع ان تقوم باعمال الصيانة التقليدية خارج التوكيل)
السؤال الرابع (هل يوجد سمكرة ودهان افضل من التوكيل)
السؤال الخامس (كم توفر اذا قمت بالصيانة خارج التوكيل)


اخوانى واحبائى فى الله

انا من اول ملاكى اللينيا فى المنتدى
موديل 2009
77حصان
وقت شرائها 109000 جنية مصرى
قمت بعمل صيانة 5000 و10000 فقط
حتى الان عداد الكيلومترات 40000 كم وذلك نظرا لظروف شغلى
السيارة الحمد لله حتى الان كأنها جديدة

حاليا انا بعمل الصيانة برة التوكيل
اشترى قطع الغيار من عندهم واركبها زى مامكتوب فى الكتالوج مش التوكيل
التوكيل لو يطول تعمل صيانة كل الف كم كان قال صيانة كل الف عشان تحافظ على العربية
بس اخوانى انت لازم تعرف انك بترمى فلوس فى الارض يعنى لما يبقى فلتر يقعد معاك 30000 ويغيرهولك كل 10000 حرام
وفى صيانة 10000 روحت عشان سمكرة السقف كلفت 1000 جنية وكاتبين فك الفرش الداخلى وخبطة فى الرفرف كاتبين ضبط انوار ولما سألت المهندس قالى اى خدمة والله مافكنالك الفرش ولا ظبط انوار كل دا عشان التامين هو اللى شايل
ومرة كنت قاعد هناك فى المركز اللى فى جسر السويس لقيت مدام داخلة وشايلة فانوس فى ايديها وقالت بالحرف (عيب لما ابقى فى توكيل والفانوس بتاعى يتغير بواحد مكسور )
وانا والله بعد صيانة 10000 سيبت العربية عشان يعملو فيها سمكرة قعدت حوالى 21 يوم
وانا بستلمها سمعت فنى بيقول لصاحبة (ايه هو ماخدش باله)شككونى فى نفسى قعدت ادور على حاجة وقلت بعد كدا توبة

(لا توكيل بعد اليوم)
رجاء اخوانى انظر للموضوع من الناحية الفنية والعائد المادى العائد عليك والخساير اللى هنسببهلهم
ومعذرة ان كنت اطلت عليكم

[Dr. Halawa]

المشكلة فى اوماترا انك تحس انه مال سايب بجد كأنها قطاع عام او حاجة حكومية

[EgyptianTune]

أنا معايا جراند بونتو تى جيت 2010 عاملة 9000 كم وما روحتش التوكيل حتى أستلم الضمان وغيرت زيت بره التوكيل ومش ناوى اروح التوكيل لأن دي سياستى اللى بأتبعها فى أى عربية بشتريها ومعايا عربية تانيه بيجو rc تربو بقالها سنتين وعمرى ما روحت التوكيل وكل اللى بغيرة فلاتر وزيت وبوجيهات (بغيرها بنفسى) وبعض حساسات التربو وكويل البوجيهات لأن مبدأى من يجى 20 سنة إن كل الصنايعية اللى فى التوكيلات فاشلين أخر فشل لأنهم لو فالحين كانوا فتحوا ورش ملكهم .

[Dr. Halawa]

بص هو اللى انا متأكد منه ان لو حد حب يشترى عربية و راح التوكيل الأل عمره ما ها يشترى مهما كان نوع العربية لأن كدة كدة اللى بيروحوا التوكيل بيبقوا رايحين بمشاكل و كل التوكيلات الصنايعية اللى فيها ما بيعرفوش غير انهم يغيروا قطع و حتى مش بضمير قوى يعنى مثلا حركة تزويد المية من غير تشييك عليها حتى بس الكلام ده فى كل التوكيلات اللى بيكسبوا من الصيانات اكتر من العربيات نفسها من الأخر التوكيلات للناس اللى ما عندهاش مانع تصرف شوية عشان تريح دماغها (و للاسف كمان ده ما بيحصلش)

[Moe86]

كل الصنايعية اللى فى التوكيلات فاشلين أخر فشل لأنهم لو فالحين كانوا فتحوا ورش ملكهم .

من الأخر التوكيلات للناس اللى ما عندهاش مانع تصرف شوية عشان تريح دماغها (و للاسف كمان ده ما بيحصلش)

أنا مع الكلمتين دول تماما

أخر مرة عملت صيانة كانت ال 20,000 و دفعت 950 جنية فى تيل و شوية فلاتر, قلت ساعتها أخر مرة
و كان عندى مشكلة فى التكيف و الدبرياج و رحت التوكيل 4 مرات ما اتحلتش كمان

عربيتى عاملة حاليا 38,000 و لما تكمل 40,000 هاعملها صيانة عند الميكانيكى اللى عارفه, أنا حتى سألته هايغيرلها ايه (مع انى كنت عارف) و قالى على القطع المطلوبة زى التوكيل بالظبط

المشكلة كلها ان الواحد بيبقى متردد شوية نفسيا يودى عربية جديدة عند ميكانيكى مش فى شياكة التوكيل و مش عنده كل الأجزة اللى فى التوكيل, و كمان فى بعض الميكانيكة مافيش عندهم ضمير و الواحد بيتعب فى الأول على ما يلاقى واحد بيفهم فعلا

[ahmadmidop]

بس الواحد بره التوكيل ويشوف العربية بتترزع قدااامه وتحس انه بيتعامل مع عربية بيشوفها لأول مرة في حياااته طبعا الواااحد بيقلق ويخاااف على العربية انا كنت متابع مع التوكيل والحمد لله بس طبعا انا في دمياط واضطريت مرة اني اصلح حتة جلللدة العفشجي دوخني السبع دوخااات لحد ما ركبها كذا مرة يركبها واغيرها
بردو التوكيل بيبقو فاهمين شوية ع بره
بس كأسعار مباااااااااااااااااااالغ فيها اوووووي

[Dr. Halawa]

ما هى دى المشكلة مانا لو لقيت حد بيفهم و مريح كنت رحتله بس الصراحة فى الأخر العربية لو جديدة احسن تروح التوكيل عشان الضمان مش اكتر و اعتبر ان فرق السعر تمن الضمان و اللى يغيظك فى الأخر ان التوكيلات عامة بتستموت عشان ما تغيرش حاجة فى الضمان
بصلها كدة ده قدرنا كمصريين مانتا بتتنحل طول مانتا ماشى و حقك ضايع على طول هو انت مش من حقك ان انت تمشى فى طريق مش مكسر يبوظلك العفشة؟
مش من حقك ان لما حد يخبطلك العربية تاخد حقك منه؟
مش من حقك من الاول انك تركب عربية بسعر مناسب ما فيش بلد عدل العربيات غالية فيه زينا و اردأ الموديلات و كمان من غير كماليات و يركبوها هنا صينى عشان ياخد الفرق؟!! ده الفولكس اللى هى ترجمتها سيارة الشعب بص بكام فى مصر (بهرج)

[Moe86]

فعلا , اللى يلاقى ميكانيكى و عفشجى فاهم و محترم يبقى محظوظ

الميكانيكى شخص مشكلتى مع الدبرياج على انها ماستر دبرياج علوى و اشترسته على حسابى و العربية اتظبطت الحمد لله, بعد ما رحت التوكيل 4 مرات و كل مرة يقولولى حاجة مختلفة (كاوتشة الدبرياج و حاجات غريبة كدة)

[ahmedmohamed7]

طيب يا جماعه مانحط هنا عناوين واسامى الميكانيميه و العفشجيه المحترمين الى بيفهموا فى فيات؟؟؟انا ان شاء الله مقبل على شراء بونتو ايفو و مستحرم فلوس صيانة التوكيل بصراحه :(

[bembodeniro]

طيب يا جماعه مانحط هنا عناوين واسامى الميكانيكيه و العفشجيه المحترمين الى بيفهموا فى فيات؟؟؟انا ان شاء الله مقبل على شراء بونتو ايفو و مستحرم فلوس صيانة التوكيل بصراحه :(

فعلا لو حد يعرف ميكانيكيه بيفهموا فى الفيات الحديث يقولوا امال نقاطع التوكيل والعربيات تبوظ وميتعملهاش صيانه وان كنت اشك ان فى حد مثلا بيفهم فى الينيا او البرافو علشان الكمبيوتر اللى راكب فى العربيات دى

[ahmedmohamed7]

فعلا لو حد يعرف ميكانيكيه بيفهموا فى الفيات الحديث يقولوا امال نقاطع التوكيل والعربيات تبوظ وميتعملهاش صيانه وان كنت اشك ان فى حد مثلا بيفهم فى الينيا او البرافو علشان الكمبيوتر اللى راكب فى العربيات دى

يا باشا عاى الاقل واحد يفهم فى تغير الزيت بمواعيدو و تربيط العفشة كده يعنى الحجات الى بيلهفو منينا فلوسها على الفاضى فى التوكيل :)
المهم اخبار اللينيا ايه مع حضرتك ؟:)

[maxayma]

يا باشا عاى الاقل واحد يفهم فى تغير الزيت بمواعيدو و تربيط العفشة كده يعنى الحجات الى بيلهفو منينا فلوسها على الفاضى فى التوكيل :)
المهم اخبار اللينيا ايه مع حضرتك ؟:)

طب يا جماعة بالنسبة لمراكز الخدمة اى نظامها اعتقد ممكن تكون ارخص من التوكيل

[ahmedmohamed7]

طب يا جماعة بالنسبة لمراكز الخدمة اى نظامها اعتقد ممكن تكون ارخص من التوكيل

فيه مركز اسمو البرقان فى الهرم باين بس مش عندى اى فاكره الحقيقة ممكن الناس الى جربتو تقول رايها

[Dr. Halawa]

البرقان و الأقصى ما بيفهموش خالص (أوحش من التوكيل) و نفس الأسعار

[hazemezzz]

يا جماعة انا بمناسبة الموضوع بدعوا اننا نفتح موضوع جديد ونحط فيه اسماء الميكانيكية اللى بيفهموا فى الفيات الحديث وعناوينهم وارقام تليفوناتهم حتى تعم الاستفاده على الكل لغاية ما التوكيل يفوق ويصلح نفسة