افيدوني في 128 ارجوكم...

[eslamspirit]

السلام عليكم

انا معايا 128 نصر 88 1300CC

و فية بعض المشاكل و يا ريت لو حد يفيدني

اولا : مشكلة البوجيهات و المشكلة اني بغير بوجيهات كتير مرة يكون محروق و مرة يكون مليان بنزين و مرة جايب زيت مع العلم ان البوجيهات اللي بجيبها بتكون من عند الميكانيكي و مش انا اللي شاريها

ثانيا : بشم رائحة بنزين و مش عارف اية السبب بصراحة

ثالثا : الغيار الثالث في الفتيس مش بيجي اساسا و الميكانيكي قاللي لازم ينزل و نشوف التروس و الغوايش و الكلام اللي انا مش فاهمة و لو حد يعرف ميكانيكي تخصص جير بوكس بالاسكندرية و الاسعار يا ريت يفيدني

و شكرا....

[eslamspirit]

صحيح و كمان نسيت اقولكم ان مع المارشيدير بسمع صوت دردرة و خبط يا تري ده برضة من الجير بوكس

[bogyman123]

السلام عليكم
ان يكون البوجية محروق دة كدة الكاربيراتير مش مظبوط ولما يكون بيجيب زيت كدة عايز طقم شنبر بس ريحة البنزين دى انا كمان بشمها بس مش عارف لية لغاية دلوقتى مع ان معايا 128 من اكتر من سنة بس
مشكلة الجيربوكس من الواضع انة فية مشكلة عندك انا اعرف ميكانيكى كويس فى الابراهيمية بس بجد شاطر
لو بجد عايز تروح قولى وانا واوصفلك عنوانة

[eslamspirit]

طيب انا فية ناس قالتلي اركب بوجيهات سن قصير و انا مش عارف هل دة حياثر علي اداء العربية

و ناس قالتلي اركب كرسي للبوجيهات

و يا ريت لو تقوللي عنوان الميكانيكي فين في الابراهيمية بالضبط

و شكرا علي اهتمامك

[SEATLOVER]

بص يا اسلام ..البنزين اللى بتشمة بيكون محترق ولا لآ
يعنى بتشمة مثلاً لما تمون بنزين او بيظهر مع المطبات ...و لا بتشمة اثناء المشى بالعربية و جاى من ناحية الموتور .

بالنسبة للجير بوكس ..لو ممكن تنزل مصر فية و احد كويس اوى فى شبرا ..هايحلة و يظبطهولك كلة ..و بياخد يوم كامل تقريباً ممكن تظبط معاة قبليها .لو ناوى تنزل مصر قولى .

[hesham_tawfiq]

السلام عليكم
انا كان معايا 128 وتقريبا نفس المشاكل حصلت معايا ماعدا مشكلة البوجيهات.
اعتقد ان حضرتك محتاج عمرة فتيس عشان الاصوات دى كللها تروح والغيارات تتظبط بس هى للاسف بتاخد يوم كامل وانا عملتها غاليه شويه بس عند واحد انا بثق فيه فى القاهره.
بالنسبه لريحة البنزين ممكن تخللى حد يشيكلك على كل الخراطيم من اول خرطوم الفايظ اللى عند فتحة التنك لحد الكاربراتير.
انا عملت كده وطلع المشكله عندى فى خرطوم الفايظ كان مقطوع وعشان كده كنت بحس ان البنزين بيخلص بسرعه مالعربيه

[bogyman123]

السلام عليكم
لا البوجية سنن قصير مبأثرش على العربية عادى وحتى لو ركبتلة كرسى مش حتلاحظ الفرق

عنوان المكانيكى بعد كبرى الابراهيمية وانت رايح على مسجد على ابن ابى طالب اول ما تعدى الصنية بعد الكوبرى على ايدك اليمين على طول متمشيش كتير جنبة كافية صغير خالص هوة اسمة احمد لما ترحلة قلة جايلك من طرف حمادة بتاع 128 البيضة
وانا وانا معدى حرسى على الحوار وقلة واحد من طرفى جيلك

[thegoodhacker]

اولا : مشكلة البوجيهات و المشكلة اني بغير بوجيهات كتير مرة يكون محروق و مرة يكون مليان بنزين و مرة جايب زيت مع العلم ان البوجيهات اللي بجيبها بتكون من عند الميكانيكي و مش انا اللي شاريها

جيب بوجيهات سن قصير و هي تعيش معاك فترة اطول ان شاء الله و دي ضرورية لغاية ما تعمل عمرة الموتور ......... و نصيحة غير طقم البوجيهات باخري جديدة مرة واحدة و ما تشتريش من الميكانيكي ابدا لانهم بيبقوا مستعملين ( غير في الضرورة القصوي طبعا )

[eslamspirit]

شكرا جدا علي المعلومات الوافية

يا اهل الخبرة

و اصدقاء المنتدي العجميل

[hazem_khidr]

اولا : مشكلة البوجيهات و المشكلة اني بغير بوجيهات كتير مرة يكون محروق و مرة يكون مليان بنزين و مرة جايب زيت مع العلم ان البوجيهات اللي بجيبها بتكون من عند الميكانيكي و مش انا اللي شاريها

دا يبقي كده العربيه محتاجه طقم شنبر او عمره علي حسب و الحل بوجيهات سن قصير علشان لزيت ما يطلهاش اي نعم حتقلل في الاداء شويه بس حسن ما العربيه تتلت و تقرفك.و لما تغير زيت هات زيت شنبر معاه و حطه مع الغيار.

ثانيا : بشم رائحة بنزين و مش عارف اية السبب بصراحة

عربيت 128 كتير فيها الحكايه دي راجع الخراطيم و لو انت بتملي التانك لحد اخره لاحظ في تسريب و لا لاء و لو فيه تفك التانك و تلحمه لحام قصدير و ما تسمعش كلام اللي يقولك معجون حديداو اشتري واحد تاني الا لو حالته وحشه اوي هات تانك استعمال.

ثالثا : الغيار الثالث في الفتيس مش بيجي اساسا و الميكانيكي قاللي لازم ينزل و نشوف التروس و الغوايش و الكلام اللي انا مش فاهمة و لو حد يعرف ميكانيكي تخصص جير بوكس بالاسكندرية و الاسعار يا ريت يفيدني

ما تلعبش في الفتيس لانك مهما صرفت عليه حيبوظ تاني
حاجتين اوعي تصرف عليهم الفتيس و الكربيراتير دول لما بيتفكم انساهم حتي لو فاككهم عند مين حتي يبقي الاحسن انك تجيب واحد استعمال و تجربه اسبوع من عند تاجر استعمال ثقه و تريح دماغك.


لو عاوز رايي لو الموتور خفيف و ناوي تفتح شغل شيلها و ارميها و هات موتور بالفتيس استعمال خارج و ريح دماغك من وجع القلب دا كله

[negmelpahr]

السلام عليكم ورحمه الله انا جديد معاكم هنا
بص يا سيدي بالنسبه لحكايه البوجيهات دي
البوجيه يبوظ يجب زيت او بنزين او محروق
بص لو محروق يبقي العربيه زي الفل بس واخد رطوبه عليه زيت ممكن يكون الموتور خفيف بنزين ومحروق يبقي الكربراتير مش مظبوط وبيرمي بنزين كتير
علي فكره الكلام ده س و ج علي الاعراض
نيجي لل 128
بص في انت هتلاحظ ان البوجيهات بتغيرها كتير في الشتا صح ياريت ترد عليا ودا لان البوجيهات بتاخد رطوبه
وعلشان تتتاكد ان الموتور مش محتاج عمره ولا طقم شنبر بسيطه شوف الشكمان ورا بيطلع اي دخنه ولا لا بس بيضه او للامان اكتر ؤوح قيس قوه موتور ولو طلعت 75% الي اعلي فالموتور سليم وتبقي يارطوبة او كاربراتير بس انا بقولك رطوبه زياده
عارف كمان ممكن البوجيه يبوظ من ايه جرب تشد بالعربيه جامد او تقرص عليها كام يوم وهاتغير بوجيهات لانك لما بتقرص علي العربيه غصب عن عين الكاربراتير هايرمي بنزين كتير في الموتور لانك دايس ودي مش حقن فللازم ييوووظ

ريحه البنزين دي ممكن توضحها اكتر يعني بتشمها امتي ولو نزلت ولفيت حول العربيه بتكون ورا عند التانك ولا عند الموتور وهي ممكن تكون كاربراتين بيسرب بنزين ودي ممكن تبص علي الكاربراتير وتشوفه متغرق بنزين ولا لا او من وصلات البنزين والخراطيم

بالنسبه للغيار التالت بس دا موجود في ال 128 القديم انا عربيتي موديل 77
طيب هي من يا اما المعلقه مش مظبوطه علشان كدا بتعلق في التالت ودي ظبطها سهل او انت بتركب سلك دبرياج طويل فلاما بتدوس علي الاخر بيكون لسه فيه جرب تركب السلك القصير وشوف
وبالنسبه للصوت اللي بتسمعه في المارشدير دا بيكون من بليه الدبرياش جربه كدا وسمعه للميكانيكي بص انا بقولك بليه الدبرياش حصلت معايا كتير

وشكرا