هى ال 128 بتستحمل للى جرب

[bakkoor]

ياجماعه انا معايا عربيه 128 مو 91 والحمد لله ايدى فيها على طول زى مابيقولو وباجبلها قطع غيارها الاصليه بس انا مشوارى من البيت للشغل 130 كم رايح جاى فى الاول انا كنت جايبها اتعلم عليها السواقه ولو فى يوم ورايا مشوار اروح بيها الشغل بس لقيت انى بقيت باستسهل العربيه وباروح بيها الشغل على طول فهل العربيه ممكن تستحمل المشوار ده كل يوم او حتى 5 ايام فى الاسبوع لمده سنه مع الصيانات الدوريه والمحافظع عليها ولا لا وانا قولت سنه لان انا كنت ناوى ابيعها بعد ما اتعلم عليها بس لقيت انى صرفت عليها كتير فاستخسرت بصراحه ابيعها .

ياريت حد يجاوبنى والف شكر لهذا المنتدى الجميل

[bondokk]

متابع معك باهتمام

[ali.mahmoud]

مهو طبيعى ما دام انت محافظ عليها وبتعمل الصيانة فى ميعادها وهى كمان موديلها مش قديم اوى وطول مانت ماشى بيها كويس وايدك فيها على طووول يبقى عمرها ماهتعملها معاك ان شاء الله واكييد هتستحملك

[Abdo_Eldesokey]

يا باشا عربية فيه منها موديلات 77 وماشية لحد دلوقتي .. يبقى أكيد حمالة أسية

المهم بس الصيانة الدورية عشان متعملش حركة نقص معاك

لأن معظم الناس بيعاملوا الـ 128 معاملة عربية درجة عاشرة ، كأن مش من حقها كل 20 ألف تغير بوجيهات وطقم كهرباء

ولما ترجع تعطل منه يقلك دي عربية متعبة وأعطالها كتير ؟؟!!

حضرتك بس كل شهرين اكشف كشف كامل على العربية
- العفشة : كاوتش الكوبلن ، الفرامل ، جلب المقصات ، المساعدين
- الميكانيكا : البوجيهات ، طقم الكهرباء ، متابعة زيت الموتور بصفة دورية

وربنا يباركلك فيها

[megaman]

كان معايه 128 مو75 اسبوعيا كنت بمشى بيها 500-600ك بطلع بيها اسكندريه على مره واحده من غير ريست بس الشهاده لله كل حاجه فيها كانت جديده الكاوتش الردياتير المساعدين ال4 الطبابير ال4 الكبالن وش الاسبراتير مياه خضرا للتبريد 2 مقص امامى +كاوتش الميزان علبة دركسيون جديده العفشه كان فيها دعامات لمنع فتح الشاسيه شكمان كامل جديد تيل فرامل خلفى جديد +مساتر للعجل الخلفى بلى العجل+جلب المقصات الخلفى طرمبة مياه العربيه مشيت بيها70000 فى سنتين كانت دايما بتحتاج طقم كهربا وبوجيهات كل 20000 المقصات وكاوتش الميزان وعلبة الدركسيون هو ده كان استهلاكها طول ال70000 اه كمان بطاريه وشغل فى المارش وبلية دينامو وكتاوت للدينامو والزيت والفلتر كل 4000 وكان زيت سوبر الصفر بتاع شل ارجو انى اكون افدتك

[bahaaothman]

انا كان معايا 128 موديل 1998 وفضلت معايا سنة ونص كنت باروح بيها الشغل كل يوم ده غير انى باخرج بيها بالليل كمان واروح مشواير يوم السبت وكانت بتمشى فى اليوم حوالى 120-150 كيلو وكنت باجيب بيها 140 وكان ممكن اجيب اكتر لو الطريق يسمح

كنت بحبها جدا وعينى دمعت لما بعتها:: نــايــل مــوتــورز:: - :: NileMotors.net ::[1].gif

مع العلم انى كنت باحطلها بنزين 90 واغير الزيت والفلتر كل 3000 كم mobil xhp بس

[Piowood]

يا باشا انا معايا 128 موديل 78 وبصراحه فارمها وبروح بيها الشغل كل يوم على الله دة غير مشاويري الخاصه . ومابتقلش لا بس ايدي فيها على طول وكمان حالتها العامه حوالي 70 % يعني عربيتك احسن في الحاله والموديل . فعادي يعني موضوع انك تخرج بيها كل يوم دة

بس تخلي ايدك فيها على طول ... اشطه ؟

[amrnagy]

اعتقد ان ميزتها ان قطع غيارها رخيصة ومتوفرة

[semsem_uno]

والله ناقص الاقي واحد عامل موضوع و بيقول "ال131 تستحمل او اللينيا تستحمل !!!!"
في ايه يا جدعان هي موتوسيكل !!
زيتك تمام و حرارتك تمام و رجلك مش تقيلة ولا خفيفة قوي عالبنزين و بتعمل صيانة دورية يبقي قلقان ليه ؟؟؟؟!!

[aymanmaly]

انا كان معاية موديل 98 و بعتها سنة 2007
طبعا العربية هايلة من ناحية التوفير
يعنى مثال انا كنت بجيب تيل الفرامل ب 35 ج اسبانى احسن حاجة و يقعد بال 5 سنين و كان يعتبر غالى دلوقتى فى الاوبترا ب 245 ج
طول ما انت بتعملها صيانة دورية و مهتم بيها يبقى العربية هايلة
و ال 128 من العربيات القليلة جدا لو حطيت اي حاجة اكسسوار بتغير منظرها كانك جبتلها حجات ب 1000 ج
و الموضوع كلة يرجع ليك
فارق معاك تكيف و شكل
طبعا شوف حاجة من الحاجات الجديدة
عايز عربية عملية و حمالة اسية و رخيصة قطع غيار و مصنعية و اي حد بيفهم فيها
يبقى طبعا 128 واحدة من احسن الاختيارات
على العموم ربنا يديلك خيرها و يكفيك شرها
و موفق فى القرار

[momen100100]

انا عندى سؤال لااخ megaman بيقول تقويه للشسيه بتاع ال128 ممكن اعرف ده بيتعمل ازى

وشكرا

[semsem_uno]

انا عندى سؤال لااخ megaman بيقول تقويه للشسيه بتاع ال128 ممكن اعرف ده بيتعمل ازى

وشكرا

تظبط زوايا كويس و زراجين و بعد كده تفك الموتور و تصب رصاص سايح علي العلب اللي قدام و تركب بارات اللي بتمسك عالبطاحات من فوق (عمود كده بيبقي واصل من ديه ل ديه )

[bakkoor]

جميل قوى الكلام ده كله وطبعا معلومات مهمه بس انا ليا اقتراح ماتيجو نحط هنا تجارب الاعضاء فى 128 يعنى لو عيب او مشكله او معلومه او حاجه عن 128 يحطها بيتهيالى ان هايكون افيد كتير جدا اننا نعرف مشاكل كل فرد فينا والمشكله سببها ايه واتغلب عليها ازاى

ايه رايكو يامعشر 28 ؟؟؟؟؟؟؟؟

[Piowood]

جميل قوى الكلام ده كله وطبعا معلومات مهمه بس انا ليا اقتراح ماتيجو نحط هنا تجارب الاعضاء فى 128 يعنى لو عيب او مشكله او معلومه او حاجه عن 128 يحطها بيتهيالى ان هايكون افيد كتير جدا اننا نعرف مشاكل كل فرد فينا والمشكله سببها ايه واتغلب عليها ازاى

ايه رايكو يامعشر 28 ؟؟؟؟؟؟؟؟

انا معايا 28 بقالها سنتين العربيه نقول تعتبر كويس معايا مع اني هاملها برضو بس دلوقتي لاحظت البرومه بتبدي تاكل فيها . . رحت للسمكري كانت الركبه عايزة لحام وبعدين بعد لما روحت لاقيت بارومة تانيه عند العضمه اليمين ورة المكان بتاع الكاوتش .. ربنا يسهل واعملها دي كمان .. نفسي بجد ؟؟


أشدها .. يا رب

[bondokk]

جميل قوى الكلام ده كله وطبعا معلومات مهمه بس انا ليا اقتراح ماتيجو نحط هنا تجارب الاعضاء فى 128 يعنى لو عيب او مشكله او معلومه او حاجه عن 128 يحطها بيتهيالى ان هايكون افيد كتير جدا اننا نعرف مشاكل كل فرد فينا والمشكله سببها ايه واتغلب عليها ازاى

ايه رايكو يامعشر 28 ؟؟؟؟؟؟؟؟

فكره جامده جدا
اؤيدك بقوه

على العموم انا معايا 128 موديل 2006
كنت شاريها زيرو
الحمد لله العربيه موفره جدا وحماله أسيه فعلا بس لازم تكون ايدك فيها باستمرار علشان تفضل بحالتها

وربنا يباركلك في عربيتك ويكفيك شرها