كنت بحب الشاهين

[Khellooo]

السلام عليكم ورحمة الله وبركاته

أولا مش عارف هو ده المكان المناسب للموضوع ولا لأ ؟
لأن طبعا الشاهين ملهاش مكان فى أى منتدى سيارات
فلو مكانه مش هنا يبقى الإدارة تنقله مشكورة

نيجى بقى للموضوع

الموضوع بدايته فى شهر 9 / 2009 وطبعا قبله كانت المناقشات والبحث عن حالات جيدة

المهم إِشتريت عربية شاهين 99 فاضية وكان معايا سمكرى صاحبى قاللى العربية 10/10 وبص تحتها وكل الكلام دا وبما أنى دى أول عربية ليا فأنا ماكنتش أعرف ان التجار كتير كدا كان العربية فيها توكيل واحد

وكل اللى يشوفها يقوللى العربية ماشاء الله جميلة سواء الميكانيكى أو أى حد تانى كانت ب36000 ومارضيش ينزل غير 500 جنيه على أساس إنها لقطة يعنى

مشكلتى بقى :

أول لما إشتريت العربية صاحبى السمكرى (دماغه تعبانة فى رأيى) قاللى إغسل العربية علشان تشوف حلاوتها المهم غسلتها راحت العربية حلفت ماهى دايرة يمين شمال وكهربائى وبتنجان طلعت البطارية بالسلامة طبعا جبت بطارية جديدة جافة ب 320 وأخد القديمة السمكرى اللى جابلى العربية طبعا خليته يكلم الراجل الراجل قاله فيما معناه انت عبيط ولا ايه انت كنت نايم وانت بتشترى

جيت بعد كدا لقيت العربية مش مظبطة ( تقريبا كنت فولت 80 )
رحت للميكانيكى صديقى برضو - أصل أنا بقيت صديق الصنايعية - لقى العربية ماشية بموبينة وإسبلاتير 128 وحالتهم كرب أنا حسيت إنه جايبهم إستيراد
طبعا بما إنى فييس ومابحبش أبخل على حاجتى والعربية الشاهين الإسبلاتير بتاعها إلكترونى قمت جيبت إسبلاتير وموبينة جداد لانج أصليين عملوا حوال 1000 جنيه

تمر الأيام وألاقى العربية بتاكل زيت روحت للميكانيكى صاحبى المذكور آنفا ( مع العلم إنه بيشتغل فى مركز خدمة معتمد سكودا وهيونداى ) قاللى العربية عايزة طقم شنبر وأنا طبعا مش فاهم بس فهمت بسيط إن دى معناها نص عمرة كدا المهم أنا قولتله ماتسترخصش وهات أنضف حاجة العربية قعدت من 4 أيام لأسبوع فى طقم الشنبر دا وكل يوم او اتنين أعدى عليه يقوللى عايزين 300 جنيه أديله المهم العملية دى بالمصنعية صفصفت على 1000 جنيه وشوية دا غير إنه كان قاللى إن فى حاجات تانية غير طقم الشنبر مش فاكرها بالظبط تقريبا ( هو الميكانيكى أمين بس هو مصنعيته غالية شوية حوالى 400 جنيه )

والدبرياج كان ناشف جدا روحت غيرت طقم الدبرياج عند ميكانيكى تانى بالمصنعية عمل 500 جنيه

وبعد كدا لقيت الريدياتير بايظ خليت بتاع الريدياتير عمللى واحد نحاس ب 300 جنيه ( لأن تقريبا مفيش جديد مش عارف )

وغيرت غطا التنك ب 75 جنيه الأصلى وغيرت الكونتاكت بحوالى 145 وغيرت المارش بواحد استيراد ب 150 طبعا شغل الكهربا دا كمان الله أعلم بيه لأن أنا غيرت الكهربائى لأنى لقيته بيفتى

ودلوقتى غيرت مفتاح الإشارات ب 85 و جبت علبة فيوسات ب 245 جنيه لسه ماركبتش بس الكهربائية قالولى ان القديمة عايزة تتغير فعلشان كدا جبتها قلت لما القديمة تموت ابقى أغيرها

دا غير إن الكاسيت كان صينى وبايظ وماكانش فيه غير سماعة واحدة شغالة
طبعا غيرت الكاسيت وجبت 4 سماعات عملوا 1000 جنيه

دا غير إن غيرت البلى اللى فى العجل كله والبلية الصغيرة اللى فى الكارونة ( البلية الكبيرة سليمة ) لأنى كل شوية اسمع ونة وطبعا أنا مابسكوتش

وغيرت الاكصدام الخلفى ( واحد ريح عليه ) وقريبا الامامى كمان الواحد ب 100 جنيه - المصرى -

وغيرت طرمبة مية ب 100 جنيه

وغيرت سير الكاتينة والبلية وطبعا سير الدينامو

وأخيرًا غيرت المقصات وكاوتش الميزان بالمصنعية عملوا 360 جنيه

ملحوظة : أنا لحد دلوقتى ماغيرتش زيت الماتور ولكن بزود ( مرة بعد طقم الشنبر ومرة بعد الفلتر لما باظ وهكذا )فهل دا طبيعى بالنسبة للشاهين ولا لأ ( دا غير ان الماتور فى الحر بيسرب زيت بسيط جدا )

أنا عارف إن الموضوع طويل بس أنا تعبان وحاسس إنى إستريحت لما فضفضت

دلوقتى أنا عايز أعرف هل كدا خلاص آخر الأحزان ؟ ولا أنا غلطان والمصاريف دى عادية ؟ ولا ايه ؟

لأن أنا حاسس إنى صرفت 20000 جنيه (طبعا بالبنزين )

ياريت تفيدونى لأنى بفكر جديًا إنى أبيعها علشان زهقت وأرجع تانى لميكروباصات التصادم أو أشترى فيسبا جديدة

[essamenen]

انتى غيرت فيها حاجات كتير حرام عليك لو بعتها امشى بيها شويه واستهلك الى صرفته عليها

[ahmedsamir5edr]

انتى غيرت فيها حاجات كتير حرام عليك لو بعتها امشى بيها شويه واستهلك الى صرفته عليها

+111111111111111111111

انتا كده مش ناقص حاجه تتغير

[Khellooo]

هههههههههههههههههه يعنى اللى أنا فيه دا عين وصابتنى ولا ايه ؟

وبعدين جايين يحسدونى على عربية مستعملة أمال لو زيرو كانت ولعت

ولا العيب فى العربية نفسها ؟ أنا عايز أفهم

أنا بشوف شاهين كتير بس ماشوفتش كدا يعنى ياإما أشوف شاهين قطة ماشية ياإما أشوف واحدة تعبانة جدا وبرضو ماشية

ياريت تفهمونى قبل مايجرالى حاجة

أنا فعلا اللى مانعنى إنى أبيعها إنى ظبطتها على الآخر بس كدا حرااااااااااااااااااام

[ahmedsrs]

العربية مستهلكة وواضح انه مكانش بيتعملها اى صيانة مشى بيها شوية ولو قرفتك بيع احسن

[keko]

انا اسف فى اللفظ بس فيه ناس معفنة طالما العربية ماشية خلاص وده زى اللى كان بيستعملها قبلك انا لما اشتريت العربية صاحبها كان بقاله 12 سنة ماغيرش فلتر زيت وفلتر الهوا مطلع الفابريكة بتاع سنة 1981
نصيحة طالما انت اتورطت وصرفت كتير وعارف ان اللى راكبها كان مهمل يبقى ماتستناش لما يظهرلك عيوب فى العربية علشان كدا هاتكلفك اكتر انت من نفسك روح اعمل الاتى :
الموتور انت كدا كدا عملته بس راجع طقم كهربا (بوجيهات وابلاتين وكوندينسر ) وطرمبة الزيت والمية والبنزين للتاكيد وتثبت نفسك على زيت نضيف ومواعيد تغيير منتظمة
روح لبتاع فرامل يبص على الطناببير وتيل الفرامل و خراطيم الفرامل
روح لواحد بتاع كاربراتير خليه يظبطلك العربية على بنزين 80 لان بتكون ايده احسن من الميكانيكى فى ظبط الكهربا وال هوا والبنزين
انزل برة القاهرة (اعتقد اقرب مكان طنطا ) لعفشجى كويس خليه ينزل العفشة كلها ويشيك عليها وبالمرة يغيرلك كل المسامير السليم والبايظ
خلى الكهربائى يراجع كل الضفيرة لو فيه اى سلك قريب من بعضه ولو فيه طرف ملحوم يغيره كله وخليه يغير كل الكلبسات والعراوى النحاس

الحاجات دى على الرغم من انها تبان كتير ومكلفة لكن التكلفة لا تذكر مقارنة بما صرفته يعنى بتاع الكاربراتير 15 جنيه والعفشجى 70 جنيه وكدا واللى هاتغيره اكيد هايكون مسامير الواحد ب 3 جنيه وكلبسات الواحد ب 10 قروش اللى انت فعلا محتاجه يومين اجازة ورا بعض بس تريح دماغك خااااااااااالص

[dondark]

هقولك كلام يمكن يكون غريب
الى انت صرفته فى كام شهر
ممكن غيرك يصرفة فى سنه او سنه ونص...
بس فى الحالتين احنا بنشترى عربية مستعمله
يعنى هنصلح فيها العيوب لانها هتبقة بتاعتنا(مشترى عربية اقتنيها-مش تاجر هشترى وابيع)
وفكر معايا كدا
انت غريت كذا وكذا وكذا..مش هتلاقى حاجة تانية تتغير وهتلاقى المصاريف قلت بأذن الله
انما ممكن تغير بعد شهر بطارية وشهرين طقم كهربا و6 شهور كاست وسماعات
هتلاقى فى الاخر انت غيرت الحاجة هى هى بس فى فترة اكبر
...........


المهم ودى نصيحة لوجه الله
أياك أياك تشيل من العربية
انت بتدفع لان قيمتك تركب حاجة متظبطة.....
لو زهقت منها اركنها اسبوع كام يوم انما مش تفكر تبيعها...او تشيل منها

[Khellooo]

أعذرنى أنا مش فاهم وجهة نظر حضرتك خالص

بس 3/4 الحاجات اللى حضرتك بتقول عليها أنا مغيرها ( زى تيل الفرامل الأمامى والخلفى مثلا ) ومش طايق أدفع مليم تانى على العربية أو حتة أبص فى خلقة صنايعى أنا حتى كرهت العربية بعد ماكنت بقول مفيش غير الشاهين

العفشة عندى تعتبر من أحسن الحاجات اللى عندى ( بالنسبة للحالة اللى استلمت عليها العربية ) ولسه مغير طقم مقصات وأصحابى نصحونى بالعفشجى دا وفعلا طلع محترم وبيفهم

انا اسف فى اللفظ بس فيه ناس معفنة طالما العربية ماشية خلاص

ولا آسف ولا حاجة دول مايستاهلوش الأسف حتى بس أنا ماكنتش مخون بقول العربية ماشاء الله لاقوة إلا بالله حاجتها رخيصة ومنتشرة جدا وهاتبقى أرخص كمان لو جابها إستيراد وأدينى والحمد لله إتدبست مع واحد مركب إسبلاتير وموبينة 128 دا صباح الإختراع يعنى

وأنا أحب أحذر أى حد عايز يشترى عربية مستعملة لو مابيعرفش يشترى مستعمل لوحده ماتشتريش غير عربية بتاع حد انت عارف إستخدامه ولامؤاخذة نضافته

هى كل حاجة ليها متخصص ولا ايه!!!

حضرتك ذكرت متخصص فرامل ومتخصص كربيراتير

ياريت لو تعرف واحد بتاع كربيراتير متخصص تقوللى ويفضل يكون قريب من المعادى وهو بيبقى كربيراتير فقط ولا بيكشف على دورة البنزين؟

[Khellooo]

المشاركة السابقة كانت تعليقا على كلام الأخ Keko

أما الأستاذ dondark فجزاك الله خيرًا على النصيحة الجميلة دى

وبشكر بقية المشاركين فى الموضوع ومستنى مشاركات تانية

أياك أياك تشيل من العربية

تصدق بقى إنى فى الأيام الأخيرة دى بقيت بحس إن العربية متعبة فى قعدتها وظهرى بيوجعنى من ركوبها مع إنى عمرى ماإشتكيت من الحكاية دى فى الشاهين

[keko]

أعذرنى أنا مش فاهم وجهة نظر حضرتك خالص

بس 3/4 الحاجات اللى حضرتك بتقول عليها أنا مغيرها ( زى تيل الفرامل الأمامى والخلفى مثلا ) ومش طايق أدفع مليم تانى على العربية أو حتة أبص فى خلقة صنايعى أنا حتى كرهت العربية بعد ماكنت بقول مفيش غير الشاهين

العفشة عندى تعتبر من أحسن الحاجات اللى عندى ( بالنسبة للحالة اللى استلمت عليها العربية ) ولسه مغير طقم مقصات وأصحابى نصحونى بالعفشجى دا وفعلا طلع محترم وبيفهم

ولا آسف ولا حاجة دول مايستاهلوش الأسف حتى بس أنا ماكنتش مخون بقول العربية ماشاء الله لاقوة إلا بالله حاجتها رخيصة ومنتشرة جدا وهاتبقى أرخص كمان لو جابها إستيراد وأدينى والحمد لله إتدبست مع واحد مركب إسبلاتير وموبينة 128 دا صباح الإختراع يعنى

وأنا أحب أحذر أى حد عايز يشترى عربية مستعملة لو مابيعرفش يشترى مستعمل لوحده ماتشتريش غير عربية بتاع حد انت عارف إستخدامه ولامؤاخذة نضافته

هى كل حاجة ليها متخصص ولا ايه!!!

حضرتك ذكرت متخصص فرامل ومتخصص كربيراتير

انا الاول كنت بتعامل مع ميكانيكى بيعملى كل حاجة حتى العفشة لكن لقيت (مع انك هاتستغرب) ان الشغل لما بعمله كل حاجة عند المتخصص بيوفر وقت وفلوس يعنى الميكانيكى ممكن يديك الفرامل مرة 90% ومرة 80% انما بتاع الفرامل خلاص حافظ وبتاع الكاربراتير هاتدعيلى بعدها ومش شرط تعمل كل اللى انا قلته لكن اعمل اللى فاضل علشان ماتجيش فى يوم مسمار ب 2 جنيه يبوظلك الزوايا ولا عروة نحاس ب 25 قرش تفصلك الكهرباء وحاول تعمل الموضوع ده كل شهرين ولا حاجة بالاضافة للكشف على حامض البطارية وكمان ركب 4 كفرات بلاستيك لحماية الكارتيرات من البارومة وادهن الارضية انتركوت تمنع البارومة من الارضية ولو حسيت صوت الموتور عالى او بيسخن راجع واحد بتاع تاكيهات
يعنى من الاخر يوم اجازة كل شهرين بنظام الوقاية خير من العلاج

وموضوع الاماكن انا من اسكندرية ممكن اعضاء تانيين يفيدوك

ياريت لو تعرف واحد بتاع كربيراتير متخصص تقوللى ويفضل يكون قريب من المعادى وهو بيبقى كربيراتير فقط ولا بيكشف على دورة البنزين؟

[kar!m]

بص ده الفرق بين نظرة الصنايعى للعربيه و نظرة الراكب .. أنا لما كنت أحب اشترى عربية مستعملة و اخد صنايعى معايا عشان يبص على العربيه .. هو كل اللى يهمه ان العربيه معملتش حادثه .. يقول لى العربيه ممتازه .. اجى أنا أبص الاقى مثلا الفرش متبهدل .. والصاج من بره فى حتت كتير معدوله على الباره .. و التابلوه واخد كمية ملمعات فظيعه .. أقول لأ شكرا.

حضرتك المفروض يكون ليك نظره للعربيه تعرف بيها اللى كان بيستخدمها قبلك ده نظامه ايه .. و على الاساس ده تشترى أو لأ.

بس الحمد لله كل الحاجات اللى حصلت عند حضرتك الحمد لله بسيطه و الحمد لله انها مجتش فى حاجه من أساسيات العربيه و كده كده كنت هتغير الحاجات دى مع الوقت .. و ربنا يباركلك فيها و يحفظهالك.

[dondark]

المشاركة السابقة كانت تعليقا على كلام الأخ keko

أما الأستاذ dondark فجزاك الله خيرًا على النصيحة الجميلة دى

وبشكر بقية المشاركين فى الموضوع ومستنى مشاركات تانية

تصدق بقى إنى فى الأيام الأخيرة دى بقيت بحس إن العربية متعبة فى قعدتها وظهرى بيوجعنى من ركوبها مع إنى عمرى ماإشتكيت من الحكاية دى فى الشاهين

طالما انت الاول كنت مرتاح من قعدتها(لان ديما قعدتها بتوجع ضهرى يعنى) يبقة دا ايحاء
سيبها كدا شوية واستهدى بالله وروح خلى صاحب ليك يغسلها غسلة محترمة بلاش انت وظبط ليها دواسات او اى اكسسوارات للتابلوه (اى حاجة تغير شكلها بس من جواه فى نظرك) هتلاقى الدنيا فرقت
وأسال مجرب

تحياتى وربى معاك

[semsem_uno]

هههههههههههههههه يعني جاي تكرهها بعد ما غيرت كل ده !!!!!!!!
و بعدين ماهو ده الطبيعي في اي عربية استعمال

[تامر.محمد]

و الله انت بتفكرني بعربيتي اول ما جبتها
نفس النظرية , و برده كل المستهلكات ضايعة مع اني كنت واخد تاجر و كمان كشفت عليها في البنزينة

المهم طالما انت صرفت كتير كده و اتورطت خلاص , خدها لحد يعمل لك مقايسة و يقول هي محتاجة مصاريف تاني قد ايه , و بناء عليه حدد هاتخليها و تصرف المبلغ ده عليها ولا تبيعها

[Khellooo]

بص ده الفرق بين نظرة الصنايعى للعربيه و نظرة الراكب

أنا الحمد لله إتعلمت بس طبعا دفعت التمن غااااااااااااااالى

سيبها كدا شوية واستهدى بالله وروح خلى صاحب ليك يغسلها غسلة محترمة بلاش انت وظبط ليها دواسات او اى اكسسوارات للتابلوه (اى حاجة تغير شكلها بس من جواه فى نظرك) هتلاقى الدنيا فرقت
وأسال مجرب

تحياتى وربى معاك

شكرا على المشاركة أنا سايبها بالفعل اليومين دول ومن ناحية الإكسسوار أنا مظبطها ولسه هاكمل كمان لو ليا نفس بس المشكلة إنى كل شوية عند الميكانيكى والكهربائى الحمد لله زياراتى دلوقتى قلت للكهربائى بس لسه الميكانيكى

هههههههههههههههه يعني جاي تكرهها بعد ما غيرت كل ده !!!!!!!!

أنا كرهتها لأن فلوسى خلصت

و بعدين ماهو ده الطبيعي في اي عربية استعمال

دا مش طبيعى إطلاااااااااااااااااااااقا ... لو دا الطبيعى يبقى محدش يشترى عربية غير من حد قريبه ويكون أمين يعنى يقوله على اللى فيها

وأنا إتحسبنت كتييييييييييير على اللى باعلى العربية وبإذن الله هاقتص منه فى الآخرة ومش مسامحه

خدها لحد يعمل لك مقايسة و يقول هي محتاجة مصاريف تاني قد ايه , و بناء عليه حدد هاتخليها و تصرف المبلغ ده عليها ولا تبيعها

هو فى حاجة كدا ؟؟؟ ودى ألاقيها فين ؟؟ أنا أعرف الكلام دا فى التوكيل بس وطبعا دلوقتى مفيش توكيل