أيه رأيكم فى الفيات بونتو كلاسيك يا رجاااله

[black_hawk]

ازاى بس انتشرت انتشار فظيع الفيات مبيعاته قليلة بالمقارنة بالماركات التانية

البونتو نازلة من قبل اللانوس وانتشار اللانوس هو اللى يتقال عليه فظيع

السيراتو برضه يتقال عليها انتشار فظيع

التيوتا واللوجان برضه نفس الكلام

على فكرة انا ميال جدا للبونتو كلاسيك وعجبانى جدا ونفسى اشتريها

بس لما الاقى ان توكيل اوماترا سئ كده ومش موفر قطع الغيار دا غير انه مستخسر يعمل اعلانات على عربياته يبقى الناس حتعرفها ازاى من اساسه

وفى اخبار السيارات من فترة كانوا جايبين نسب المبيعات طبعا كيا وبعدين الهيونداى

ولو قولنا ان الناس مبتفهمش وكورى ايه اللى يتقارن بالاوروبى

حنلاقى برضه ان الاوكتافيا منتشرة وكانت واخدة ترتيب متقدم من المبيعات لكن فيات كانت فى ذيل القائمة

والموضوع دا كان فيه الكلام عن ان قطع الغيار غالية

http://www.nilemotors.net/nile/188642-a.html

ممكن الواحد ميكونش نزل السوق وسال عن قطع الغيار

بس اللى بقراه هنا من المواضيع بيقول كده

يعنى كل كلامى دا مبنى على كلام الاعضاء هنا

واكترهم بيقول نفس الكلام

فى عضو معانا مشكور قدم رأيه فى البونتو 2011 الصربى وعلى حد كلامه انه مواجهش منها اى مشكله والعربيه ماشيه معاه تمام ( ربنا يكفيه شرها ويديله خيرها )
لما تروح لاى حد بتاع قطع غيار هتلاقى ان الفيات رخيصه مش غاليه والبونتو نزل منها موديلات قديمه يعنى حاجتها موجوده بره التوكيل
والاخ صاحب البونتو 2011 تفضل مشكورا بتقييم توكيلها فى الاسكندريه وبرضو على حسب كلامه انه كويس
على الاقل احسن من توكيلات كتير حرام فيها كلمه توكيل
انا فى كلامى اشرت للبونتو 2011 ودى فعلا انا شوفت منها كتير جدا برغم ان انا كان مشوارى مش طويل

معظم الناس اللى بتحاول تشترى عربيه فى الفئه السعريه مابين 60 ل 70 الف جنيه اغلبهم بيدور ان العربيه دى فيها موتور قوى وده اولا فى الترتيب وبعدين بيبص على كمالياتها
وده سبب انتشار الفيرنا مثلا .. بس بيغفلو عن ان الصاج ورق والموتور اكبر من العربيه والفرامل بتزحف لان الموتور اقوى ولو حاولت تجنط زى ما بيقولو هتلاقى العربيه تقلت على حساب انك بتهلك الموتور

اللانوس انا شوفتها وكانت من ضمن اختياراتى ورأيى الشخصى - لانووووس ايام داايو مش ايام شيفروليه وفعلا عن تجربه ناس كتير وناس اعرفها معرفه وثيقه فرق شااااااااااااااااسع بين دايو وشيفروليه

وحضرتك نسب المبيعات مبتعبرش عن العربيه لان انت لو خيرت اى حد بين الاوكتافيا وفيات مثلا هيقولك لا الاوكتافيا طبعا والسبب ( الماااااااااااااااانى ) بس تعالى بقى للالمانى روح التوكيل واصرف دم قلبك انا بتكلم عن الاوكتافيا عشان انا عانيت من اوكتافيا موديل 99 والله والله والله مصاريف عربيه تانيه والتوكيل غاااااااااااااااالى جدااااااااا وده ليه ؟ عشان المانى

احنا كده بندور على الصيت تقول سكودا الدماغ تروح لاوكتافيا تقول فيات تروح لل 128
فيات شركه محترمه ومبيعاتها فى اوروبا لا يستهان بها ومتنساش ان فيات اللى عملت الفا روميو وفيرارى

وحضرتك ممكن تنزل عند محلات قطع الغيار وأسأل على قطع غيارها وأسأل ناس اتعاملت مع التوكيل
وعلى فكره مع احترامى للجميع فى المنتدى وده مش تجريح بس نقد فى ناس ممكن تقولك معلومات عن عربيه لمجرد انها سمعت عنها بس حتى مسألتش ولا نزلت ولا دورت وده لاحظته لما كنت محتار بين اللوجان والبروتون ساجا و الهيونداى الفيرنا بس عن تجربه لف وكعب داير زى ما بنقول الفياااااااات احسنهم

[Moe86]

عايز أصحح كلام الأفندى الضايع اللى فى المعرض, العربية 60 حصان و عزم 102 نيوتن, الموتور مش قوى ولكن مناسب جدا لوزن العربية و كمان موفر جدا فى البنزين
بالنسبة لقطع الغيار لو قارناها بالفيرنا مش هاتبقى أغلى ب50 جنية!! لأ هاتبقى الضعف فى أغلب الأحيان لو برة التوكيل و لو فى التوكيل بتبقى 3 أضعاف السعر, بس الفكرة ان القطع الايطالى طبيعى تبقى أغلى علشان أنظف و كمان الواحد مش بيعمل حادثة كل يوم يعنى

[M_wahba]

انشاء الله حعل قريب تقرير مصور عن العربية

و بالنسبة لتوكيل الطارق موجود فى شارع السكة الجديدة دة فى المنشية
وانا عرفت برضة من المنتدى ان اوماترا حتفتح توكيل على الصحرواى و عرفت انة بوم 9/1
انشاء الله
و لو فى اى استفسارات انا تحت امركم

[foffos]

وانا فى انتظار الاخ foffos عشان يقولى المفيد بما انه جابها وجربها بس يا ريت يشوف الموضوع ويدينى رأيه

أولاً: شكرًا جدًا على الاهتمام بأراء الأعضاء
ثانيًا: شكر خاص للأعضاء أنفسهم وأمانتهم في آرائهم
ثالثًا: آسف جدًا لأنى مقل في الدخول على المنتدى لانشغالي الشديد الفترة السابقة
رابعًا: أما بخصوص السيارة بونتو كلاسيك 2011 الصربي فيمكن وصفها بمجموعة صفات "على قدر التجربة الشخصية لحوالي 1500 كم" مع مراعاة أنها أول سيارة زيرو بالنسبة لي وليس لي تجارب بسيارات كثيرة،

السيارة جميلة جدًا، ناعمة بالقدر الكافي، مساحتها الداخلية معقولة جدًا "أحيانًا استقل السيارة مع أربعة آخرين، في راحة تامة"، شنظة السيارة كبيرة بالنسبة للسيارات الهاتشباك الأخرى، نظام السيتي باور فوق الممتاز وخاصة في ركنات الأماكن الضيقة، ارتفاع وانخفاض كرسي السائق، وكذلك ارتفاع وانخفاض عجلة القيادة شيء ممتاز، وكذلك الأمان فيها ممتاز، 2 وسادة هوائية للسائق والراكب الأمامي، سحب السيارة جيد، هي سيارة مدينة بالدرجة الأولى، استهلاك جيد جيدًا "قليل" للبنزين. خامات جيدة جدًا، ومميزات أخرى كثيرة.

أما بالنسبة للتجربة الشخصية، السيارة تسير بأمان تام، وسلاسة، ولكن تم حدوث بعض الأشياء التي ربما تكون حوادث شخصية، ولكن ربما فيها إفادة كبيرة للبعض
عندما استلمت السيارة وبعدها بفترة قصيرة، سمعت صوت هواء يأتي من دواسة الفرامل، وبعد الكشف على السيارة في التوكيل "جسر السويس" تم التعرف على وجود عيب صناعة في سيرفو الفرامل، وتم تركيبه بعدها بعشرة أيام، بعدما تم الاتصال بالمشرف الممتاز Yoko هو شخص خدوم جدًا وبعض الأشخاص الذين أعرفهم، لهم علاقة بالتوكيل، حيث أن التوكيل ربما هو ليس بالسيء ولكننا يمكن أن نطلق عليه "نايم في العسل" وإذا لم يكن لك القدرة على الألحاح فإن ما تطلبه لن يتم عمله بسهولة.

وفي مرة أخرى تم سماع صوت تزييق في السيارة وعند الكشف عليها، وأن المساحة الخلفية لا تعمل، وبالكشف تم تربيط المساحة، وقد كان شيء بسيط "تربيط صامولة مفكوكة"، وبالنسبة لصوت التزييق فإنه وجد ترحيل في إحدى قواعد الموتور، فتم فك قواعد الموتور وترييحة وتربيطة من جديد، وجميع هذه العيوب اختفت، ولكن كل عيب كان له موال خاص.

ربما يتم استنباط بعض النقاط من هذه الأحداث

1. أن هذه الحوادث ربما تكون حالات فردية، وليس حالة عامة، حيث أننى تم التعامل معي باعتبار أن هذه الحالات لا تحدث مع البونتو كلاسيك، وخاصة أننى كنت في أول 1000 كيلو. "أميل قليلاص لهذا الرأي"
2. ربما هذه العيوب، بسبب أن السيارة تقفيل صربي "لا أميل لهذا الرأي - حيث أن السيارة تخرج من المصنع بمواصفات أوروبية"
3. ربما يكون هذا بسبب عدم وجود فحص جودة مصرية كما في أوروبا - فالسوق المصري يرتضي أي نوع من الجودة أو حتى بدون جودة أصلاً - أي أنه لا يتم اختبار السيارات بالقدر الكافي - أو أنه يتم استلام الفئات الأخيرة من السيارات - بمعنى آخر نأخذ الفرز العاشر من السيارات حتى ولو كانت أوروبية "أميل جدًا لهذا الرأي"

أرجو اعتبار هذا الراي يعتبر عن رأي الشخصي وليس رأيًا عامًا

مع التماس العذر إذا كنت قد أسالت للتوكيل بدون قصد - ولكن تم توضيح رأيي الشخصي بحيادية تامه

عذرًا للإطالة