برافا 98 و برافا 2001

[ELWAA]

السلام عليكم مشرفين و أعضاء منتدى الفيات

عندى إستفسار مهم جدا بالنسبه لى ,, أنا بفكر فى الفيات برافا عشان تكون أول عربيه أشتريها

و انا محتاج عربيه متكونش أعطالها كتير و تستحمل مشاوير طول اليوم ( طبيعه شغلى )

البرافا عموما أدائها ايه ؟ و أخبار صيانتها و قطع غيارها ؟
ومعلش ليه ال 98 أغلى من ال 2001 فى السعر و سعر 2001 تقريبا اول الـ 30 رخيصه ليه ؟

متشكر مقدما و أتمنى مكونش أزعجتكم بأسئلتى :)

[yoko]

للأسف معنديش معلومات كافيه عنها بس هي كعربيه وهميه

[ELWAA]

yoko
شكرا يا باشا ,, أنا عاجبنى شكلها جدا بس عابز أعرف معلومات عن أدائها و صيانتها و قطع غيارها

لوحد معاه العربيه دى أو يعرف عنها اى معلومات باربت بقوللى :)

[yoko]

yoko
شكرا يا باشا ,, أنا عاجبنى شكلها جدا بس عابز أعرف معلومات عن أدائها و صيانتها و قطع غيارها

لوحد معاه العربيه دى أو يعرف عنها اى معلومات باربت بقوللى :)

للأسف معنديش معلومات كفايه بس هي 1300 سي سي بس متحسش انه صغير خالص وركبتها من جوه وهم تحس إنك راكب مرسيدس

[amr_lamor]

بص يا باشا انا كمان عايز اجيبها و عمال اسأل عليها هيا كعربيه عربيه كويسه وشكلها كويس وحجمها حلو اوي.....انا سألت الناس اللي راكبينها واحد قاللي متجبيهاش وناس تانيه قالتلي عربه ممتازه ...رحت سألت عند الكيلاني على قطع غيارها قاللي موجوده و في ورشه جمبيه بتشتغل فيها اسمها الكيلاني برضه تبعهم......و قطع غيارها لما سألت على اسعار حاجات اسعارها عاديه جداااااا يعني طقم دبرياج كان في واحد ب 600 وواحد ب 400 يعني الطبيعي جدا بس العربيه على حسب ما اسمع فيها سنسورس كتير وده مش عارف ايه ظروفه.......العربيه في اعاده بيعها بطيئه جدااااااا لأن كل الناس بتفكر الف مره قبل ما تشتريها زي وزي حضرتك كده :) انا كنت بفكر فيها و بعدين جبت عربيه تانيهو بعتهاو بفكر فيها دلوقت ياريت لو حد معاه العربيه يسيبلنا رقمه نكلمه نستفسر منه اكتر وشكراااا

[heshamzaky]

بص يا باشا أنا ليا صديق معاة البرافا و ال 98 او 99 أغلب الظن حا تبقى 1600 سى سى و أنجيكشن دى زى الى مع صاحبى و موديل 2001 بتبقى 1300 سى سى المقصات هية هية بتاعت التمبرا المساعدين الامامية فى ال 1600 فى الشكل واحد بالظبط بس الاختلاف عن بتاع التمبرا ان واحد اقصر شوية ممكن تركب و لو عاوز الاصلين بيبقو غالين شوية ال 1600 سى سى فيها كمبيوتر و حساسات حساس الشكمان ب 400 جنية تقريبا أحنا فى رابطة التمبرا بنروح عزبة شلبى و الوكالة نجيب قطع غيار أستيراد ببلاش تقريبا و بالنسبة للبرافا ليها قطع غيار أستيراد بس مش كتير قوى زى التمبرا و الانشيا بس المواتير موجودة بكثرة الفوانيس موجودة برضو و الكيلانى عندة حاجات ليها العربية كشكل حلوة جدا و الصالون جميل جدا جدا و الكاسيت الى راكب فيها لة شكل معين كدة لو جيت تغيرة ما تقلقش كلاريون الى فى ميدان الحجاز عندة وش بلاستيك بيركب و تقدر تغير الكاسيت الموتور بتاع ال 1600 تقريبا هوة هوة نفس قدرة موتور التمبرا حجم الشنطة كويس مش وحش ابدا و خصوصا ان العربية هاتش باك و لو فية حاجة تانية افتكرتها حا اقولك بص من الاخر عربية حلوة جدا بس بعض قطع الغيار مش موجودة الا عند كام محل زى الكيلانى و ال 1600 سى سى بتتظبط كومبيوتر مش يدوى و الى عندة السوفت وير بتاعها زى مركز خدمة كدة فى بنزينة التعاون الى عند مدخل المطار

[heshamzaky]

بالنسبة لقطع غيارها لو روحت بورسعيد أسأل هناك على الاسعار على ما أظن لينا زميل فى رابطة التمبرا أشترى نص عربية برافا الامامى كامل موتور 2000 سى سى 20 صباب بكل مشتملاتة و غير الفرامل الى abs بالتابلوة أعتقد كانو الله أعلم كانو ب 5000 جنية و العفشة الخلفية لو جبت دشم كاملة يعنى دنجل بمساعدين ب طنابير و ديسكات اعتقد ب 500 جنية تقريبا

[heshamzaky]

و دى صور للبرافا

[mr_hamed_s]

موضوع 1998 اغلى من 2001 بناء على ايه ؟؟

بص ياباشا انا معايا برافا 1300 2001 اسمها الشائع Brava 80 sx
البرافا عموما عربية ممتازة امتداد الفيات التيبو بدا انتاجها تقريبا ف 1997.
نزل منها تقريبا 3 موديلات وموديل رياضى اللى هيه البرافو الشكل واحد تقريبا مع اختلاف الفوج لايت وسع اللتريه للمواتير الخاصه بيها
الموديلات المنتشرة فمصر هيه 1300 وديه 81 حصان وانتجت تقريبا من اول سنه 2000
1600 وديه 101 حصان وديه برده تم انتاجها تقريبا فنفس السنه
موديلات ماقبل 2000 كانت بتنزل بمواتير 1400 بس موتور ضعيف جدا لانه بيكون 8 صباب SPI ف اداءة ضعيف جدا تقريبا بيديلك 70 حصان مع استهلاك بنزيك اعلى من المواتير اللى ذكرتها
فى اوربا كان بينزلها مواتير خرافيه
كان بينزل ل 1800 16v ده بيدى 115 حصان
2000 20v بيدى 130 حصان ده كان بينزل فالبرافو الموديل الرياضى من البرافا
بيسقط بقى فيها مواتير انا اتجننت لما عرفتها مثلا
موتور الفيات كوبيه وده 2000cc 24v بيدى 250 حصان
الفا روميو 2000cc 20v بيدى 200 حصان
يعنى العربية ديه من العربيات الفريدة ولو بصيت على الشاسيه وحوض الموتور تقريبا نفس تصميم الافا روميو ونفس الطابع العربية ديه بجد يجماعه طفرة من فييات بكل المقاييس ومش بقول كده علشان اان راكبها
علشان كده انا مستغرب ان 1998 سعرها اغلى لانها اضعف موديلات البرافا .
انا هتكلم على العربية اللى انا راكبها اللى هياه 1300CC 80hp
بص العربية حتى الان مريحانى جدا استهلاك بنزين معقول بتستحمل جدا جدا وقطع الغيار متوفر بس ف اماكن معينه يعنى الكيلانى مثلا تقريبا كل القطع عندة
الرفاهيه العربية ممتازه جدا كل الناس اللى ركبتها معايا مستغربين فيات بالاناقه والرفاهيه ديه
الكراسى الاماميه بالذات لما تتعود عليها هتركب اى عربية هتحس انك مش مرتاح لان تصميم الكراسى رياضى جدا قريب قووى من الريكارو
هيه واسعه وحجمها الخارجى كويس ملمومه يعنى زى ما بيقولو :D
ممكن يكون الرخم فيها شويه الشنطه لانها صاجها ضعيف وعاليه نوعا ما ف وانت بتركن هتعانى شويه :D
اداء العربية ممتاز جدا صوت الموتور ناعم الثبات ممتاز جدا جدا
العربية بصراحه اثبتتلى انن السوق المصرى غريب وعشوائى لان بجد العربية ديه قيمتها اكبر بكتيير من السعر اللى بتتباع بيه فبلدنا
ديه المعلومات اللى ف دماخى لو افتكرت حاجه جديده اكيد هقوللك بس متترددش العربية ممتازه جدا جدا

[amr_lamor]

mr hamed انا عايز رقمك اذا سمحت كنت عايز اسألك على حاجات

[mr_hamed_s]

mr hamed انا عايز رقمك اذا سمحت كنت عايز اسألك على حاجات

انا بعتهوللك فى رساله على فكره بس هوه 0166690122

[ELWAA]

amr_lamor
ربنا يسهل يا باشا ,, أدينا بنحاول نعرف أكبر قدر من المعلومات و ربنا يسهل ,, وأنت لو عرفت حاجه ياربت ماتبخلش علينا بيها هنا :)

بس اللى قالولك بلاش منها .. ليه ؟!

[ELWAA]

heshamzaky

متشكر جدا يا باشا على معلوماتك عنها ,, أنا كده أفهم أن الـ 1300 كزديل 2001 مفيهاش كومبيوتر و حساسات و ان الـ 1600موديل 98 هى اللى فيها كمبيوتر وحساسات ؟ فعشان كده موديل 98 هى الأغلى ولا ايه ؟
وسعرها عموما قليل شويه عشان موضوع قله قطع الغيار ؟

متشكرا جدا مره تانيه يا باشا و أسفين على الدوشه :)

[heshamzaky]

heshamzaky

متشكر جدا يا باشا على معلوماتك عنها ,, أنا كده أفهم أن الـ 1300 كزديل 2001 مفيهاش كومبيوتر و حساسات و ان الـ 1600موديل 98 هى اللى فيها كمبيوتر وحساسات ؟ فعشان كده موديل 98 هى الأغلى ولا ايه ؟
وسعرها عموما قليل شويه عشان موضوع قله قطع الغيار ؟

متشكرا جدا مره تانيه يا باشا و أسفين على الدوشه :)

العفو يا باشا و انا ركبت العربية طبعا و سوقتها كتير بتاعت صديقى و روحت معاة كذا مرة و هو بيصلحها ال 1600 سى سى معقدة شوية بصراحة يعنى مش عاوزة حد يلعب فيها لو مش فاهم فيها و ال 1300 سى سى معنديش اى معلومة عنها بصراحة بس ال 1600 تسارعها و سجبها كويس جدا زى التمبرا بالظبط

[ELWAA]

mr_hamed_s

متشكر جدا يا باشا ,, و اعتقد الـ 98 أغلى لأنها 1600 و لسه بحاول افهم الباقى

ياريت لو تفوللى فيه عيوب شائعه حسيتها فى العربيه و هى معاك لأنى وانا بسأل سمعت ان فيه مشكله فى عداد الحراره ؟

وكان فيه أخ تانى بيشتكى من حساس السلانسيه عامله مشكله ,, أنا مش عارف الحاجات دى تعتبر عيوب جامده ولا عاديه ؟ و حضرتك قابلتها ولا لأ و عملت معاها ايه ؟

وشكرا مره تانيه يا باشا :)