محتاج مشاركة الخبراء في حادثة لعربية سيينا

[mindvision]

السلام عليكم ورحمة الله وبركاته...
كنت اريد الاستفسار عن وضع وحالة سيارة سيينا اخي عمل حادثة بها وهي بتتصلح دلوقتي...
الاستفسار بتاعي خاص عن المدة الزمنية عشان العربية (اللي موجودة في الصور دي) تقوم تقف علي حيلها تاني ؟؟
العربية زي مانتوا شايفين:
1- النص الامامي بتاعها رايح خالص.
2- الابواب والشنطة والسقف متطبقين.
3- زجاج العربية كله متكسر.
4- العفشة فيها الدونجول الخلفي عايز يتغير.

لو بالنظر كده ومن خبرتكم العربية دي تاخد وقت اد ايه عشان تقف تاني؟
علما ان الحادثة كانت علي طريق مصر السويس والعربية اتقلبت مرتين نتيجة اصطدامها بحجر كبير علي سرعة عالية مما ادي الي دخولها وانقلابها في الجزيرة.

الصور:

[ahmadmidop]

اهم حاجة يكون اخوك بخير .... والحمد لله على كل شئ

[yoko]

حوالي ٣ شهور
أنا مش خبير قوي بس غالبا هتاخد الوقت ده

[tareket]

على حسب هيصلح فان

بس انا شايف انها هتكلف جامد

فشوف لو بعتها خردة و اشتريت واحدة تانية هتكلف كام

اولا العرابية هتفقد من قيمتها جامد لو اتصلحت وكمان هتاخد وقت وفلوس كتير و مش ضامن انها ترجع زى الاول

[Ghamrawy]

الحمد لله على سلامة اخوك
انا مع راى أ/طارق فى تقييم تمنها خردة و بسم الله ما شاء الله على السيينا انا كان معايا واحدة و كنت بسميها العربية النقل
الحالة اللى العربية فيها دى زى حالة اى عربية اسيوى خابطة واحد على البحر
و لو عايز سيينا تانى حاتلاقى و اسعارهم فى المعقول جدا و اعتقد انك خبير فيها علشان تعرف الحالة الكويسة من الحالة الضايعة
بخصوص المدة
لو سمكرى من بتوع الحوادث اللى بياخدو العربية كوم حديد مش معروف له ماركة
ممكن يرجع العربية جديدة فى شهر شهر ونص لو ايده فيها

[mohamedmmm2]

انا كان معايا سيينا وبرضه عملت حادثه الجنب اليمين كله راح فى داهيه بعفشته والرفرف والباب والدنجل والشاسيه..
بجد بعد الحادثه حسيت معنى انى راكب فيات او اى عربيه اوروبى بصفه عامه بسم الله ماشاء الله فى الحوادث بتستر
بس نيجى للتصليح.. كل قطع الغيار هاتلاقيها فى الوكاله بلا استثناء بس نصيحه.. بيعها لانك هاتصرف عليها كتير جدا على ماترجعها وهاتاخد منك وقت وجهد رهيب
وكمان المشكله الاكبر بقى انك بعد ماترجعها هاتلاقى حاجات فى الميكانيكا ماكانش ليها علاقه بالحادثه اساسا بتبوظ من اثر الرجه الجامده وقت الحادثه زى طقم الدبرياج وخلافه..
العربيه اكتر من ممتازة بس نصيحه لو لقيت حد يشتريها على 20 الف توكل على الله لانك هاتصرف مش اقل من 10000 على ماترجعها تانى واحسب وقتك وجهدك وتعبك وقله راحتك هاتلاقيك انت الكسبان
وخد بالك انك بتاخد نصيحه من واحد كان فى موقفك انا كنت عاوز ارفع الصور بس ماعرفتش.. وعلى فكرة انا استعدلت الدنجل
ولو عاوز حد كويس يرجعلك العربيه زى ماكانت انا اعرف ورشه متكامله واسعارها مهاودة فى حلوان والعربيه مش هاتطلع من الورشه وكمان ليها باب حديد كبير جدا وحارس يعنى هاتسيب العربيه وانت مطمن.. هابعت لك رقمى على الخاص لو حبيت تستفسر عن اى حاجه انا تحت امرك

[ahmedhossam86]

حمد لله علي سلامة اخوك.. قدر و لطف... كده كده انت حاتجيب كل القطع استيراد.. لو جبت معاك سمكري شاطر و نزلت جسر السويس او الحرفيين في يوم تقدر تجيب الكبوت بالرفارف بالنص الامامي... انا عملت حادثة مشابهة بالبيجو 405 و قعدت شهر بس كنت واقف علي ايد الصنايعية... الحاج صلاح مشمش ده موجود في جسر السويس.. سمكري شاطر اوي و بقاله سنين.. حايرجعلك العربية جديدة.. لو عايز نمرته قوللي... التكلفة فوق العشرة... بتاعتي اتكلفت 7 و شوية و كانت اقل من كده...

[sniperfox]

اولا حمد الله على سلامت اخوك
ثانيا الحدسه مش جمده اوى زى مهو واضح فى الصوره يعنى الشسيه سليم وده اساس العربيه اى حاجه تانى مش مهمه طلامه فيها فك وتركيب زى الكبوت والرفارف والدنجل
ثالثا التكلفه حتبقا فى قطع الغيار والمصنعيه بتاعت السمكرى لان الفيت بصفه عامه قطع غياره رخيصه الى حد كبير
رابعا التكلفه على حسب اسعار قطع الغيار مضاف اليها المصنعيه
خامسا الوقت على حسسب السمكرى فاضى ول عنده عربيات تنيه شغال فيها

[Formulator]

أولا الحمد لله على سلامة السواق...

والسيينا ماشاء الله عليها.. دبابة... ياجماعة الراجل بيقول خبطت فـ حجر وأتقلبت مرتين..!!!
شوفوا حوض الموتور (ما دخلش عـ الركاب جوه العربية) من صدمة الحجر.
وكمان الكابينة سليمة (ماتطبقتش على اللى جواها زى الـCan)...! من الأنقلاب.
عشان الناس تعرف يعنى أيه "أمااااااااااااااااااااااان" وعربية أوروبى وعربية FIAT..!!
رأيى أن العربية أصلا تقيلة وهيكلها صلب.. فيه صنايعية بيرجعوا العربية زى الأول... خصوصا لو الصاج والشاسيه يساعد..

[mindvision]

اولا انا متشكر جدا لكل مساهمتكم وردكم علي الموضوع...
ثانيا احب اوضح كام نقطة تحديث في الموضوع...
1- العربية انا وديتها فعلا لواحد في ورشة بيتعامل فيها سواء ميكانيكا او سمكرة
2- العربية بقالها شهر عنده دلوقتي وده كان سبب سؤالي عشان اعرف هو كده بيطول وبيحوّر عليا ولا هو العربية كده فعلا بتاخد وقت في تصليحها ؟
3- اخر تحديث منه عن اللي حصل في العربية انه جاب لها الابواب والرفارف والمساعدين والمقصات كله استيراد لان حجم الدمار فيهم كان كتير...
4- اخر تحديث برده ان العربية النص القدماني فيها محتاج يتغير وهو جاب لها نص قدماني استيراد ، والعربية واقفة دلوقتي علي دونجل خلفي في نفس الوقت اللي الحمد لله ان الموتور طلع من العركة دي كلها سليم .
5- هو بيتكلم دلوقتي في انه ناقص له تركيب الدونجل وبعدين العربية تخش سمكرة ودوكو ويتعمل لها شوية حاجات بسيطة زي الكاوتش علي شوية حاجات صغيرة تانية.... والموال ده كله محتاج اسبوعين...
فهل ده مناسب ؟

ملحوظة اخيرة: بعد ماسبق السيف العزل في اني ابيعها خردة علي حالتها اللي كانت، ايه هو حجم الخسارة في بيعها بعد تصليح كل اللي حكيت لكم عليه فيها ؟؟

[sniperfox]

هو اطع النص الادمانى وجاب نص استيراد لو عمل كدا يبقا مبيفهمش حاجه فى شغلته او عاوز يعلى الفتوره علشان النص الادمانى سليم سيبك من الرفرف والكبوت والكلام ده ده كله حجات عبيطه المهم الاساس الشسيه وحوض المتور طلامه دول سلام او حتا لو اتعوجو من الخبطه بيتعدلو عادى جدا والعربيه مبتحتجش تغير نص الا لو النص ده ملهوش ملامح

[DONYO]

اولا حمدالله على سلامة اخوك واهم حاجة انه طلع سليم .
ثانيا خلاص سيبك من اللي حصل وان السمكري بيعلي الفاتورة ولا هي محتاجة تغيير نص امامي وركز على انه يخلص الشغل بأدق ما يكون . ونصيحة ما تحاولش تبيعها بعد ما تصلحها لان موضوع تغيير النص دة هيخسرك من تمنها كتير دة غير اللي انت صرفتة .
وربنا يسترها معانا ومع الجميع.