الشاهين ولا ايه؟؟؟؟

[MasterM]

انا يا اخواننا معايا فيات 125 موديل 73 حالة جيدة

المهم ابويا عايز يبيعها وهنكمل عليها ان شاء الله يعني ممكن يوصلوا ل 35000 انا بحس ان الشاهين كويسة مع ان مشاويرنا كلها في الخفيف وكنت بفكر في الاكسيل بس ابويا بقي(قديم شوية يحب العربية العصب)

فالمهم لو لقيت شاهين كويسة اجيبها ولا ايه؟؟وموديل كام؟؟؟



(ولو حد يحب يشتري 125 ممكن اصورها واحطها معمولها سمكرة ودوكو نضيف وفرش جديد )

شاكر لهذا المنتدي الرائع

[hazem_khidr]

اهلا ماستر و يا نتمني نشوف مشاركاتك دايما:)
بص يا سيدي حتنزل من 125 تركب شاهين مش حتحس بفرق كبير بالعكس حتحس انك ركبت عربيه اصغر و كمان موتور ال 125 انعم من الشاهين .
من رايي حال تقنعه و شوف حدمن صحابك معاه اكسيل او سويفت خليه يركبها و هو حيغير رايه و فهمه ان العربيات دي بقالها فتره في السوق و سعر قطع غيارها رخيصه و موفره في البنزين و و و و
الكلام دا يمشي مع الناس الكبار صدقني انا عملت كده من اربع خمس سنين:)
...................
بلنسبه لل125 ممكن تصورها و تحط الصور في القسم الخاص بعرض السيارات للبيع في المنتدي :)

[dr_3eshoo]

طب ما تشوف العربيات بتاعه المعوقين ممكن تجيب عربيه كويسه بالمبلغ ده دايو لانوس اتوماتك بس الموضوع ده هايخد وقت علشان الاجرات

[hazem_khidr]

طب ما تشوف العربيات بتاعه المعوقين ممكن تجيب عربيه كويسه بالمبلغ ده دايو لانوس اتوماتك بس الموضوع ده هايخد وقت علشان الاجرات

بلاش حكايه سيارات المعاقين دي لان فيها وجع دماغ و اجراءات كتيييييييييير.
دا غير الحرمانيه.
لما يجيب عربيه مستعمله نضيفه و يشتري دماغه احسن

[MasterM]

والله يا استاذ حازم معتقدش ان 125 انعم من الشاهين اصل برده عربية من 30 سنة مش هتبقي زي عربية من 10سنين

وانا بصراحة نفسي في عربية تكون بس علي الاقل سحبها سريع شوية وسواقتها بنت حلال

طبعا الاكسيل كدة..... بس هي الشاهين سيئة للدرجة دي؟؟؟؟؟

اصلي خايف ميقتنعش(حكم القوي:()

[yahyanaabil]

انا شايف انها مناسبه ولو لاقيت موديل 93 ال1600 cc يبقى فل اوى وممكن تجيب فليشيا برضه حتعمل فى نفس الرينج ده او بولو موديل 98 هيه ديه الحاجات اللى ممكن انا اشتريها بالمبلغ ده
ولو انته مشاويرك صغيره انصحك بالبولو

[hazem_khidr]

والله يا استاذ حازم معتقدش ان 125 انعم من الشاهين اصل برده عربية من 30 سنة مش هتبقي زي عربية من 10سنين

وانا بصراحة نفسي في عربية تكون بس علي الاقل سحبها سريع شوية وسواقتها بنت حلال

طبعا الاكسيل كدة..... بس هي الشاهين سيئة للدرجة دي؟؟؟؟؟

حقولك حاجه يا ماستر
انا كلامي مش من فراغ انا كان معيا 125 بولندي و خالي معاه ايطالي و عربيات نضيفه اوي اوي كمان .مش عاوز اقولك ان الكاوتش بتاع فرده الشاسيه كان لسه بتاع الفابريكه فيها لحد ما اتباعت !!!!!!
و كان فيها مواتير 1600 2 كامه وفعلا انعم من الشاهين بمراحل.
لكن دا في حاله لو نضيفه.
خلاصه الكلام حاول تقنعه بالاكسيل علشان تحس انك فعلا غيرت العربيه

[MasterM]

شكرا جدا يا استاذ حازم علي تعاونك:):):)

[cazanova555]

عاوز اقولك ان الشاهين بجد عربيه حلوه وسحبها سريع وتستحمل معاك لانك شاب

انا بن خلتي معاه شاهين انا كنت بركبها بتسحب معايا وهو كان بيخمس بيها ويفرك

والعربيه مش بتشتكي وزي الفل والدليل علي كدا انها غاليه والناس بتشتريها

بس حاول توقع واحده فابريكه او انزل السوق واتفرج وخد ميكانيكي معاك

ربنا معاك يا مستر m