تبريد الفيات؟؟

[mohahdy]

سؤال هو فعلا في مشكلة عامة في دورة تبريد الفيات لأني سمعت كتير عن الموضوع ده و في 2 من اصحابي واحد معاه بونتو والتاني معاه سيينا و العربيتين حصل فيهم مشاكل في دورة التبريد و كانوا بيسخنوا جامد و كمان كان في موضوع في المنتدى هنا بيتكلم عن اكتر عربية بتسخن و ناس كتيرة اجمعت على فيات فهل فعلا ده مشكلة عامة في جميع موديلات فيات ولا في موديلات معينة ؟؟؟؟!!!

[hazem_khidr]

مش في كل العربيات
انا ركيب فيات قديم و ركبت مش اقل من 15 موديل ولا عربيه سخنت مني
بتبقي مشاكل فرديه و بيبقي علاجها ساعه حراره او تسليك ردياتير او طلمبه مش بتقلب كويس :)

[mohahdy]

شكرا يا أستاذ حازم على ردك و لكن اللي انا مش فاهمه اذا كانت حالات فردية ليه طلعت سمعة على موديلات فيات انها بتسخن هل هي علشان معمولة لأجواء اوروبا مثلا فلما بتيجي بتشتغل في مصر في الصيف بيبان فيها العيب ده انا آسف على الاطالة بس الحقيقة انا معجب جدا بالعربيات الفيات عموما و كنت عايز اشتري بونتو بس كتير نصحوني ان بلاش الفيات و خليك في الكوري احسن عشان مشكلة السخونة ده

[hazem_khidr]

و الله السمعه دي ما وصلتنيش لاني مجرب عربيت كتير اوي فيات و قليل لما بتسخن و لما بتسخن بيبقي حلها حاجه من اللي قولتها لحضرتك .
واحد قريبي كان معاه بونتو و عمرها ما سخنت و لا سمعنا عن الكلام دا خالص

[zeyad1810]

هو فعلا حالات فردية شوف كام عربية فيات ماشية فى الشارع وانت تحكم اذا كانت عربيات وحشة طب منتشرة لية ؟
وبعدين ممكن اى عربية يحصل فيها مشكلة تخليها تسخن مش شرط فيات بس

[mohahdy]

انا بشكركم يا جماعة على التوضيح وجزاكم الله خيرا

[sab3aawy]

معظم منظومات تبريد فيات لاتصلح للعمل فى الأجواء الحارة سوى مع وجود مروحة الردياتير بحالة ممتازة، ابسط عطل فى مروحة الردياتير فى ايه سيارة فيات يؤدى الى سخونة السيارة بشكل عالى جدا وقد يؤدى الى مضاعفات فى المحرك مثل احتراق جوان وش السلندر او انبعاج وش السلندر نفسه

خلال سنوات طويلة جدا مع الفيات بكافة موديلاته امتلكت خلالها 11 سيارة فيات ، بالإضافة الى سيارة والدى تعلمت انه فى السيارة الفيات تمثل مروحة الردياتير روح نظام التبريد للسيارة، لو تعطلت حتى لو كان ذلك فى الشتاء فإن السيارة ستخن بشدة فى اول ازدحام مرورى الى الدرجة التى تجعلها تتعطل

تختلف طبعا درجة تحمل السخونة من سيارة فيات لأخرى، فال133 مثلا هى الأسوأ على الإطلاق فى مسألة السخونة ويحدث احيانا ان يفوت الموتور بالكامل بسبب اخذ مطلع مثل مطلع المقطم فى الجو الحار مع الزحام، فى حين نجد ان سيارة مثل ال127 افضل قليلا فى تحمل السخونة من ال 133 ونجد ان مشكلات السخونة تقل كثيرا فى ال 131 والشاهين والريجاتا ، لكنها لا تقل الى درجة الإنعدام ولكن درجة تحمل هذة السيارات لمشاكل السخونة افضل الى حد كبير من باقى الفيات

لكن الخلاصة، كل الفيات اللى انا ركبته بيسخن