استفسار عن سعر الفيات سيينا 1600 سي سي

[dr.hazem]

السلام عليكم ورحمة الله وبركاته

شباب معلش عايز استفسر عن العربية دي
انا بفكر اغير الماروتي ليها
انا معروض عليا من واحد اعرفه
فيات سيينا موديل 2000 كامله مانيوال
1600 سي سي
فبريكا بره وجوه وصياناتها كلها في التوكيل
مش عارف عامله كام كيلو
العربية صاحبها طالب 37 ألف
هل السعر ده كويس؟
ايه تقييمكم للعربية بشكل عام
واخبار قطع غيارها ايه
ايه اشهر مشاكلها؟

تكييفها اخباره ايه؟؟
ايه اللي اخد بالي منه لو هاخدها؟؟


تحياتي للجميع

[Egozing]

اخت سيارتى

ممتازه وسابقة سنها بمراحل وبجد متينه وبتستحمل وفيها كل الاوبشنز بتاعة العربيات الحديثة
عيبها الوحيد ان الميكانيكية بيهربوا منها لأن حودها مكربس وضيق جدا عشان يعرفوا يوصلوا لحاجة لازم يفكو 10 حاجات
بس فى ناس متخصصة فيها وسهل تلاقيهم

بالنسبة للسعر... لو حالتها كويسة، حلو اوى عليها 35000

[heshamzaky]

فى رابطة فى قسم الفيات لل سينا ممكن يفيدوك

http://www.nilemotors.net/Nile/65734-a-59.html

[maka]

انا بسمع انها بتسخن

و انا لو مكانك بالمبلغ ده اشوف اكسنت او لانوس

[م/مصطفى محمود]

انا بسمع انها بتسخن

و انا لو مكانك بالمبلغ ده اشوف اكسنت او لانوس

انا سخنت فعلا معايا قبل كده 3 مرات بس علشان كانت المياة قليلة فى القربة ، غير كده مبتعديش النص أساسا

وحرام مُقارنتها بالأكسنت خالص ، هي ممكن تكون اللانوس من جوة أشيك (أزواق)

لكن انا بالنسبة ليا السيينا أفضل من الإتنين

التكييف الصبح لازم تشغلة على أعلى حاجه ، بالليل عادي ممكن تشغلة متوسط

وفعلا الميكانيكية بيتخنقوا منها (كنت لسة من شوية عند الميكانيكي وكان شغال فى واحدة 1600 ) وده لأن فعلا حوضها ديق علشان الماتور كبير ، بس على كلام الناس كلها إن سحب الماتور ال 1600 وهم

وبخصوص السعر فمش عارف هي وصلت لكام بس ممكن تبحث على كونتكت

[heshamzaky]

انا سوقت السينا اول ما نزلت زيرو ال 1600 وقتها مكنش فية ال 1400 سى سى بصراحة تكيفها كان ممتاز جدا و ثابتة و كنت ماشى 160 و كانت ثابتة كويس لما عديت ل 170 العربية بقت خفيفة مش متزنة و حجمها ممتاز و شنطتها حوالى 500 لتر يعنى كويسة جدا

[mahamedaraby]

بص هى تعمل من 33 ل 35 فى الحدود دى

طبعا دى لما تبقى عربيه ممتازه مفهاش اى مصاريف زى اللى حضرتك بتقول عليها

[cruiss]

انا سوقت السينا اول ما نزلت زيرو ال 1600 وقتها مكنش فية ال 1400 سى سى بصراحة تكيفها كان ممتاز جدا و ثابتة و كنت ماشى 160 و كانت ثابتة كويس لما عديت ل 170 العربية بقت خفيفة مش متزنة و حجمها ممتاز و شنطتها حوالى 500 لتر يعنى كويسة جدا

يا عم هشام احنا فى مصر مش اوروبا، شوارعنا مهما كان ماينفعش تديها الامان اوى وتمشى فوق ال 170 حتى لو معاك عربية بتجيب 250كم/س
يعنى من الاخر لو هيا مستقرة لحد 160 دى تبقى عربية هايلة وخلينا ع ال160 ده العمر لحظه :d

[heshamzaky]

يا عم هشام احنا فى مصر مش اوروبا، شوارعنا مهما كان ماينفعش تديها الامان اوى وتمشى فوق ال 170 حتى لو معاك عربية بتجيب 250كم/س
يعنى من الاخر لو هيا مستقرة لحد 160 دى تبقى عربية هايلة وخلينا ع ال160 ده العمر لحظه :d

بص يا باشا الاول ربنا هو الى بيسترها طبعا و الحمد لله على كل شيىء .
أنا لما سقت العربية كنت راجع من الاسماعيلية للقاهرة و الكلام دة كان من أكتر من 10 سنين تقريبا . لو العربية ثابتة ممكن تجرى بس مش بتهور أنا الحمد لله بسوق من حوالى 23 سنة تقريبا

[mohamed_selim]

العربيه ممتازه و لو بيعمل الصينات فى التوكيل زى حالاتى يبقى ماتسيبهاش بس روح خد تقرير بالحاله و تاريخ العربيه من التوكيل
بالنسبه للسخونيه فى الطبيعى مش بتعدى النص الا لو فى حاجه غلط (ميه ناقصه - زيت ناقص - تسريب من دورة التبريد ...)

[dr.hazem]

شكرا ليكم جميعا على الردود
انا هقرر خلال اليومين دول وربنا ييسر الاحوال للجميع

تحياتي للجميع

[mohamedmmm2]

انا كان معايا سيينا 1400 وكنت بمشى على 180 وانا بتكلم فى التليفون والله العظيم.. ودة بال 1400 كمان
ال 1600 موتور مالوش حل وانا بقوللك يمرمط الفيرنا فعلا..
مشكلتها فعلا ان الميكانيكا صعبه شويه فى الفك والتركيب لانك عشان توصل لحاجه هاتفك حاجات كتير بس فى المقابل انا والله بايع العربيه 211000 كيلو والموتور عمرة ماتفتح وكان الموتور زى الزيرو والله.. اهم حاجه بس تاخد بالك من الصيانات الدوريه والفلاتر والبوجيهات وخلافه.. العربيه ممتازة وسعرها كويس انا بعت عربيتى ب 35000 وكانت مدهونه قبل كدة..
توكل على الله لو حالتها كويسه وبجد عمرك ما هاتندم