تمبرا 2002

[a7mous]

السلام عليكم ورحمة الله وبركاته
اخوانى الفياتويه ايه الاخبار اتمنى يوم جميل خالى من الاعطال والنغصات والطريق سالك من غير اختناقات
كان عندى استفسار وارجو سرعة الافادة عشان اخوكو مزنوق
كان معايا جولف 2 1800 وقررت بيعها وماشى فى البيع ومعروض عليا عربيتن وارجو انكو تساعدونى
الاولى ( ميال ليها اكتر )
تمبرا 2002 1600 سى سى عدادات ديجيتال تكييف تاتش رشه بره لتغيير اللون وفابريكة جوه ودهانها بحاله جيده جدا وصالونها كمان ومطلوب فيها 35000
الثانيه : دايو لانوس 1 موديل 1999 1500سى سى رشه بره ورشه جزء فى الحوض حالة الدهان متوسطه ومغيرة طقم شنبر قبل كده ومطلوب فيها 37000
ايه رأيكو الدايو واثق فيها عشان بتاعت جوز اختى والتمبرا بتاعت صاحب صاحبى افيدونى افادكم الله ولو تمبرا سعرها كده ايه نظامه وايه اللى المفروض اسال عليه واشوفه واتاكد منه قبل الشراء بجد ف حيرة وخصوصا انى كنت من ملاك الجولف وعارف انى حاحس بفرق وده المشكلة مستنى ردودكوا يا رجاله بس بسرعة بالله عليكوا عشان صاحب التمبرا مستعجل

[JUVENTUS]

العربية اللي حالتها افضل توكل على الله و اشتريها
من كلامك كده انا شايف ان التمبرا افضل
بس اهم حاجة تتاكد انها سليمة مش ملعوب فيها عشان متتعبكش
التمبرا لو حالتها ممتازة فعلا مش هتخذلك عربية محترمة اوي
وربنا يوفقك في الاختيار

[ahmed79]

من كلامك التمبرا وانت بتتفرج شوف كل حاجه فيها شغاله ولا لا واهمهم التكييف ومتخدش على كلام اصلو عايز يتشحن لانو ممكن يطلع فيه عيب وخد معاك حد تكون واثق منه يشفلك الماتور
لان العربيه لم بتكون سليمه بتريح حتى لو صلحت فيها حاجه بتريح عشان هى اصلن متلعبش فيها
وربنا يوفقق للاصلح

[hugan]

لو مكانك تمبرا طبعا بدون نقاش المهم تكون سليمه

[ahmed79]

رابط التمبرا هو ده خش واسأل على كل حاجه تعوز تستفسر عنها لو حبيت

http://www.nilemotors.net/Nile/220355-a.html

[HOSSAM99]

و عليكم السلام و رحمة الله
خليك في التمبرا و أبعد عن الكري اللي ملعوب في دواخله (راشه جزء في الحوض)
التمبرا أجمل في كل شئ أهم حاجه تكون العربيه كمالياتها شغاله موتور حالته جيده جدا و ميكنش ملعوب فيه
العربيه دي بكنترول بيوضح حالة الصالون الابواب و الزجاج و خلافه لازم يكون شغال
و توكل علي الله
و هي تنزل في الفلوس عن كده كمان لنها مغيره لون(مع انه مبيفرقش مع اللي بيركب لكن بيفرق مع السوق جامد)
مع انها لو فابريكه كانت تعمل ال35
و حاول تكشف عليها كويس

[sohagy]

اتأكد من سنة الموديل بالنسبة للتمبرا لأن معلوماتي ان آخرها سنة 2000

[HOSSAM99]

اتأكد من سنة الموديل بالنسبة للتمبرا لأن معلوماتي ان آخرها سنة 2000

فيه تمبرا2002 لكن مش منتشره لأن السيينا كانت نزلت و كان عليها أقبال عنها

[a7mous]

اشكركم جميعا بجد انا سعيد بمشاركتكم اللى اكيد افادتنى وانا هنزل انهارده ان شاء الله اشوف التمبرا وربنا المستعان بجد اشكركم وجعله الله فى ميزان حسناتكم

[a7mous]

سؤال اخير يا شباب ايه اخبار التمبرا فى الصيانة هل هى زى الانوس ممكن اى ميكانيكى يشتغل فيها ولا زى الجولف ليها ناس مخصوصين النقطة دى مهمة جدا سهولة الصيانة وايه اخبار اعادة البيع

[HOSSAM99]

سؤال اخير يا شباب ايه اخبار التمبرا فى الصيانة هل هى زى الانوس ممكن اى ميكانيكى يشتغل فيها ولا زى الجولف ليها ناس مخصوصين النقطة دى مهمة جدا سهولة الصيانة وايه اخبار اعادة البيع

التمبرا(و الفيات عموما) من العربيات السهل صيانتها عند أي ميانيكي لأن قطع غيارها موجوده و العربيه بسيطه مش معقه لكن لازم يكون الميكانيكي أمين و فاهم
توكل علي الله و متقلقش التمبرا زيها زي الشاهين و الريجاتا (و ممكن تشوف حد بيشتغل في الفيات متخصص هايبقي أفضل )

[JUVENTUS]

التمبرا اصعب من اللانوس في الصيانة و خصوصا شغل الكهرباء و العفشة
يفضل اللي يشتغل فيها يكون فاهم فيها شوية
و قطع الغيار متوفرة جدا
و ده موضوع فيه اسعار قطع الغيار سواء جديد او استيراد

http://www.nilemotors.net/Nile/194188-a.html

[heshamzaky]

معلش حا أقولك حاجة . التمبرا الى أنت بتقول عليها مش ممكن تكون موديل 2002 ابدا هات رقم الشاسية و حا نقولك أن شاء الله دى موديل سنة كام . ما أخشاة ان بعض السيارات التمبرا بتتجمع أنا بس دة الى قالقنى . لما تجيب رقم الشاسية حا نقولك رقم الموتور يعنى خلى معاك الرقمين و ما تقولش لنا غير رقم الشاسية فقط
و ممكن تكون سليمة طبعا بس العربيات التمبرا الى داخلة معاقين بعضها حصل فية لخبطة فى الورق و سنة الصنع
العربية كعربية حا تبسطك

[JUVENTUS]

هوفعلا فيه حاجة غريبة في موضوع الموديل ده لان التمبرا اخرها 2000 و لو اعتبرنا ان فيه تمبرا 2002 فدي هتكون تجميع شركة النصر
و شركة النصر منزلتش تمبرا بعدادات ديجيتال خالص

[heshamzaky]

هوفعلا فيه حاجة غريبة في موضوع الموديل ده لان التمبرا اخرها 2000 و لو اعتبرنا ان فيه تمبرا 2002 فدي هتكون تجميع شركة النصر
و شركة النصر منزلتش تمبرا بعدادات ديجيتال خالص

بالظبط يا أحمد دى بعدادات ديجيتال يعنى أيطالى يعنى أخرها خالص موديل 96
و ممكن من شكل الطارة بالتقريب نعرف موديل كام بس أحنا حا نعتمد أكثر على رقم الشاسية دة الاقوى
أنت عارف القصص و عارف أنا خايف من أية طبعا ههههههههههه