الايفو..القاهرة الغردقة رايح جاي..و صيانة 10000

[wael17]

السلام عليكم
الحمد لله الايفو معاية كملت 6 شهور و لحد دلوقتي ما فيش مشاكل..ربنا يبارك فيها

من اسبوعين العربية كملت 10,000 كم و المفروض كنت اعمل الصيانة بس طلعت في دماغي اسافر الغردقة و عرفت اخد اجازة من الشغل...كلمت التوكيل قبل ما اسافر ب 5 ايام عشان احجز ميعاد صيانة بس للاسف ما كنش فيه ميعاد و قلتلهم اني هاسافر و هاعمل تقريبا 1000 كم يعني العربية هاتروحلهم معدية 11500..قالولي مفيش مشاكل و الضمان شغال برده...بصراحة من كتر الكلام الي باسمعه عن التوكيل كنت خايف اودي لهم العربية و اطلع بعد كده علي طريق سفر مع المدام و الاولاد و الله اعلم ممكن ما يربطوش حاجة كويس ولا يلعبوا في الكهرباء و تبقي مشكلة...عشان كده قلت احسن ان الصيانة تبقي بعد السفر
------------------------------
دي اول مرة اسافر بعربية هاتشباك و معي العائلة و بالتالي كنت قلقان انها تبقي مش مريحة...[س بصراحة الايفو اثبتت انها عربية مثالية للعائلة الصغيرة (اب و ام و طفلين)
شنطة العربية خدت عربية طفل + شنطتين سفر
بالنسبة للصالون...الكرسي اللي جانبي بتقعد عليه بنتي الصغيرة و باجيبه لاقصي الامام و المدام بيبقي عندها فراغ كبير ورا الكرسي و بيبقي معاها ابني في كرسي اطفال متثبت علي الكنبة...يعني الكل كان مستريح في القعدة...طبعا في فرق بين عائلة صغيرة و عائلة مكونة من اب و ام و 3 شباب مثلا.
التكييف كان ممتاز و معظم الطريق كان شغال علي 2 و كمان الفاميه الخلفي بيحمي اللي قاعدين ورا من الشمس ...طلعنا من 6 اكتوبر 7 صباحا وصلنا 12 الظهر
طبعا ثبات العربية علي الطريق ممتاز و حسيت بفرق عن العربيات اللي سافرت بيها قبل كده (كيا ريو - لانوس - سبيرانزا)
الطريق من بعد الزعفرانة بيبقي مفتوح و مفيش ملفات...رغم اني مش باحب السرعة بس الواحد بيزهق من الطريق و بيزود....وصلت ل 170 كم بس طبعا نزلت علي طول عشان ال RPM كان عالي...بس معظم الطريق علي 120-130كم
و اكتر حاجة بتخلي الايفو ممتعة في السفر...Cruise control... لما بيبقي الطريق فاضي ممكن يعدي عليك ساعة من غير ما تدوس بنزين او فرامل..و كمان بتزود و تقلل السرعة من دراع cruise control...كويس ان ما فيهاش مثبت دركسيون لان في الحالة دي اكيد هانام!!

كنا نازلين في الجونة و في مرة نزلنا الغردقة و بعدين و احنا راجعين لاقينا الطريق مقطوع!!!! شوية حواجز و زحمة و ناس بتزعق و اوتوبيسات سياحية راكنة علي جنب و بصيت في الناس اللي واقفة مالاقيتش اي شرطة..فهمت انه مش كمين او لجنة شرطة...و الناس اللي قاطعة الطريق شكلهم صيع و بلطجية و بيزعقوا مع سواقين اتوبيسات سياحية عايزين يعدوا و كل ما حد يحاول يعدي يقفلوا الطريق عليه بحواجز معدنية زي بتاعة المرور (مش عارف بيجيبوها منين!!)...طبعا انا عشان معاية المدام و الاولاد وقفت اتفرج من بعيد و في عربيت ملاكي وقت مش عارفين يعملوا ايه...و بعدين لمحت مسافة فاضية جنب الطريق تكفي تعدي العربية...رحت مقرب شوية و بعدين واحد من الصيع فهم اني هاحاول اعدي راح جاري علي حاجز و حاول يزقه عشان يقفل علي...طبعا انا كنت قريب منهم و ما ينفعش اقف لان ممكن يكسروا العربية...رحت مسقط نقلة و دايس علي الاخر و قلت هاعدي يعني هاعدي حتي لو خبطت الحاجز ...و الحمد لله عديت منهم و قافلوا الطريق علي اللي ورايا....بس الحمد لله العربية طلعت طلعة جامدة و ال 77 حصان ما خيبوش ظني....

لما دخلت الجونة سالت الامن علي قطع الطريق...قالولي دول شوية عرب و عمال في شركة مقاولات اتسحب منهم شغل في الجونة و عاملين " اعتصام" و الشرطة هاتيجي تلمهم دلوقتي

الحمد لله رجعنا بعد كده القاهرة علي خير و الايفو اثبتت انها تنفع في السفر و و تشيل عائلة صغيرة مستريح

-------------------------------
بعد ما رجعت بيومين رحت اعمل صيانة 10000

العربية كانت عاملة 11700 و بصراحة صوت الموتور كان بدأ يعلي شوية غير كده ما كانش عندي اي شكاوي منها
طبعا كنت حاطط ايدي علي قلبي انهم يبوظوا اي حاجة في العربية زي ما بنسمع

قابلت الباشمهندس سيد...شاب ذوق جدا و محترم...استلم من العربية الساعة 12 الظهر....قالي هانغير زيت موبيل 1 و هانغير فلاتر و نغسل الموتور بالفوم و هايفحص العفشة و الكهرباء و هاتكلف حوالي 600 جنيه و ووقت ساعتين...سلمته العربية و رحت قعدت عند سعودي كافيه ...عشان باحس بالملل في الاستراحة بتاعتهم

الساعة 2 بالظبط المهندس سيد كلمني و قالي العربية خلصت...

بصراحة التعامل كويس جدا و الصيانة مش بتطول (مقارنة بابو الفتوح بتاع اسبيرانزا)

استلمت العربية و شيكت علي كل حاجة فيها...و خدتها و مشيت...طبعا الموتور بقي انعم شوية عشان الزيت اتغير و حسيت ان العربية رجعت زيرو تاني...روحت من جسر السويس لحد اكتوبر و كل حاجة تمام...قلت لنفسي...هي ليه الناس بتظلم اوماترا..بصراحة الصيانة ممتازة و المعاملة كويسة جدا ...مفيش دقيقة لاقيت حاجة وقعت علي رجلي...بصيت تحت لاقيت جزأ من التابلوه اتفك و طلع من مكانه...طبعا اول حاجة جت في بالي انهم كسروا الكلبس...بصيت كويس لاقيت الكلبس سليم...ضغطت عليه و رجعته مكانه و الحمد لله ثبت في مكانه....اه يا اوماترا

------------
النهاردة رحت غسلت العربية من بره و من جوه و بصراحة حاسس انها رحعت زي اول يوم اشتريتها...ربنا يبارك فيها و ان شاء الله اعمل لكم تقرير 20,000

[karimalaa]

ربنا يباركلك يا رب و يفرحك بيها....فيات طول عمرها معروفة بس نعمل ايه في أوماترا بس!!!!!! :(
و ان عقبال ال١٠٠ وال ٢٠٠ كمان و ربنا يكفينا شر الطريق و البلطجية.....
بالمناسبة، الحمد لله ان الدرج رجع مكانه و مطلعش مكسور عشان لو كلنوا فعلا كسروه و ركبوه كده أي حاجة كنت "حازلزل الزلازيل" اكتر ما هي متزلزلة :d

[pirlo2000]

ربنا يباركلك فيها

[prince93]

ربنا يبارك لك فيها و يكرمك

[CryptonX]

الف مبروك و حمد الله على السلامة , الجونة احلى ولا الغردقة ؟ :)

[JUVENTUS]

تقرير ممتاز و ربنا يبارك لك في العربية

[mohamedgamall]

يا دكنور المفروض تاخد عمولة على مبيعات اومترا للايفو تقاريرك عن العربية تخلى الواحد يحبها اوى
ربنا يبارلك فيها
و فعلا من مميزات العربية ان اعدتها مريحة فى السفر بتبقى نعمة احسن ميت مرة من عربية 124 حصان هههههه و عفشتها تجيلك الدسيك
انت جربت لما تعمل resume للكوز كنترول العربية بتعمل acceleration غبى اوى علشان توصل للسرعة المتسجلة يعنى بتحس ان ال 77 خصان طلعوا يجروا مرة واحدة

[ahmedsamir5edr]

ربنا يبارك لك فيها و يكرمك

[ahmadmidop]

مبروووووووك وربنا يباركلك فيها

[Ramy_2R]

حمد لله على السلامه
:)

[wael17]

الف مبروك و حمد الله على السلامة , الجونة احلى ولا الغردقة ؟ :)

الله يسلمك :)
الجونة احلي

انت جربت لما تعمل resume للكوز كنترول العربية بتعمل acceleration غبى اوى علشان توصل للسرعة المتسجلة يعنى بتحس ان ال 77 خصان طلعوا يجروا مرة واحدة

تصدق ان انا ناسي خاصية Resume !!!!!
انا عارفها و جربتها اول ما اشتريت العربية بس عشان مش باستخدم cruise control كتير نسيتها!!!

[mohamedgamall]

لما تبقى تسافر تانى انشاء الله جرب تثبت مثلا على 100 او 120 و بعد كدة هدى ل ستين و اعمل resume و شوف العربية هتعمل اية

[yoko]

مبروك التقرير وواضح ان الشكاوي ابتدت تعمل مفعولها صحيح قولتلهم انك من نايل موتورز

[wael17]

مبروك التقرير وواضح ان الشكاوي ابتدت تعمل مفعولها صحيح قولتلهم انك من نايل موتورز

الله يبارك فيك يا أحمد

و انا رايح الصيانة كنت مقلق منهم و نفسي اليوم يعدي علي خير من غير ما تحصل مشكلة في العربية و لما كنت قاعد مع المهندس سيد و بيستلم مني العربية قلت اجر شكله كده و سألته " تعرف عميل اسمه احمد نكلاوي معاه لينيا؟"....اول ما قلت كده ابتسم ابتسامة ذات مغزي ...و تقريبا قال في سره " انت طلعت منهم"
و رد قالي هو انت من الجروب بتاع الانترنت...قلتله ايوة....قالي والله هو في شكاوي كتير بس احنا بنحاول نحل كل المشاكل و بقالنا فترة مفيش اي شكاوي من التأخير في الصيانة
انا مارضتش اطول معاه في الكلام عشان زي ما قلت كل همي يعملوا الصيانة مظبوط و العربية تطلع من تحت ايديهم سليمة....بس عندي انطباع انهم عايزين يقدموا خدمة احسن...يعني في توكيل وحش و مش فارقه معاه و مش ناوي يتحسن و في توكيل وحش بس بيحاول يتحسن...انا حاسس ان اوماترا عارفين ان في مشاكل و تقصير كبير عندهم بس بيحاولوا يحلوا المشاكل دي

[yoko]

لأ أصل م.سيد جديد ومشفنيش غير في الأخر لما وصلت لمرحلة الإنفجار