هل 128 فيها مشاكل للسيدات

[wessampo]

انا عايز اعرف 128 مشاكلها كثير للسيدات يعنى ممكن تقف بيها كثيى او تعطل منها فى الطريق كثيى مع العلم انها 128 موديل 1995 يارب تنصحونى بدقة لانى هجبها لمراتى لتوصيل الاولاد للمدارس وللمشاوير القصيرة وممكن اعرف كمان مصاريفها كام كل شهر مصروفها كام والسنة والكبالن تتغيير كل اد اية علشا واحد قالى كل 6 شهور ومع جزيل:):):):) الشكر مقدمااا

[فادى]

الموضوع يتوقف على الحالة لكن للمشاوير القصيرة ممكن تمشى كويس, بس خليك متابعها أول بأول و اعتنى بيها, و أهم حاجة غير السيور فى مواعيدها و اكشف دوريا على سلك الدبرياج (لو موبر غيره), الكبالن محتاجه حشو كل 6 شهور, لكن ده فى حالة القيادة العنيفة, أما فى حالة القيادة الهادئة هيبقى معدل حشو الكبالن أطول شوية.
و أنا بصراحة مش شايف انو ال128 عربية بتعطل بطبيعتها, لكن المشكلة فى قطع غيارها المغشوشة الى فى السوق, لدرجة انك بتروح لميكانيكى تقوله سير الدينامو مقطوع يقولك (هو انت لسه مغيره؟؟). حاول تشترى قطع الغيار أصلية بقدر الامكان, و غير سير الكاتينة كل 20 ألف و سير الدينامو اكشف عليه كل 10 ألاف و لو محتاج تغيير غيره.
الأعطال الفجائبة الشهيرة فى ال128 :
- انقطاع السيور و خاصة سير الدينامو.
الحل : تغيير السيور فى مواعيدها و شراء سيور صناعة ايطالية أو اسبانية.
- انقطاع سلك الدبرياج.
- الحل : اكشف عليه كل 5 ألاف, و شوف لو موبر, غيره فورا, و فيه ناس بتنصح بتغييره دوريا كل 20 ألف, و طبعا لاحظ أى خشونة فى الدبرياج تعنى أن عليك تغيير سلك الدبرياج, و طبعا اشترى أفضل سلك فى السوق.
- حدوث ماس يؤدى الى حرق الفيوزات, و المشكلة تحدث حينما يحترق فيوز المروحة و هو مشترك مع الكلاكس.
الحل : اشترى فيوزات أصلية و يمكنك دائما حمل مجموعة فيوزات معك لتغييرها, و هى سهلة التغيير و ماكن علبة الفيوزات تحت الدركسيون شمال, و قبل ما تطلع بالعربية جرب الكلاكس, لو مش شغال غالبا المروحة مش هتشتغل. فيه عربيات كانت المروحة مشتركة مع ولاعة السجائر, و فى هذه الحالة تجنب استخدام الولاعة لأنها قد تؤدى الى حرق الفيوز.
- مشاكل مروحة المحرك و خاصة الثرموستات, أفضل شىء هو تركيب نور للمروحة, يعلمك اذا ما كانت المروحة تعمل أم لا, ان كانت لا تعمل عند درجة الحرارة المثالية لها, فالسبب غالبا اما الثرموستات أو الفيوز.
- الكبالن, أول ما تسمع صوت طأطأه غيرهم فورا أو احشيهم, و مع القيادة الهادئة هيعمروا فترة أطول ممكن سنتين أو أكتر.

[fahd_628]

انا رأى ان ال 128 بتعطل كتيير و رأى تجيب ماروتى عربية اعطالها قليلة و صغيرة و احسن من ال 128 فى رأى !

[thegoodhacker]

اكتر مشكلة منتشرة في الفيات 128 هي انقطاع سلك الدبرياج علشان كده انصح حضرتك بتركيب كابل دبرياج ماركة كويسة و تغييره بطريقة دورية علشان ما ينقطعش مرة واحدة في الطريق
بالنسبة لموضوع الكبالن فمش شرط تتغير كل ست شهور ولا حاجة بالعكس لو حضرتك ركبت نوع الماني او ايطالي اصلي حيعمر معاك سنين بس المهم القيادة الغير متهورة و سلامة مقاسات شاسيه السيارة

[hazem_khidr]

ال 128 لو نضيفه ما تحملش همها و خصوصا لو موديل جديد
اهم حاجه فيها المساعدين الاماميه لانها لو بايظه حتفتح الشاسيه و تخرب العربيه كلها.
و طبعا كلام الاستاذ فادي لا يعلي عليه جابلك كل المشاكل المحتمله

[SEATLOVER]

بالإضافة لكلام الاستاذ فادى اللى جابلك المفيد وكلام الاعضاء الجميل
عشان هاتبقى سواقة سيدات وتبقى مريحة و ناعمة و ماتتعبش فى سواقتها

اعمل عمرة فتيس وغير علبة دركسيون
دول هايدخلولوهم فى الف ونص تقريباً
بس اتفرج على العربية بعدها ... هاتبقى اية ...لانسرررررررر

[wessampo]

مش عارف اشكركم ازاى شكرااا جدا يا جماعةبس

نفسى عرف الماروتى ممكن تتحمل ولا لا :)مشاكلها كثير ولا لا ;)انا مش مهم عندى حجمها او انها 800cc :)وكمان عايز اعرف قطع غيارها متوفرة واسعارها اية لان الى معايا 22000 :)ومش بسافر بيها وهى الى موديلها هيكون بعد التمانينات لانى خايف جدااا من احتمال خروج قانون للملاكى مستقبلا:):):):):):):):) ارجوووووووو سرعة الرد

[فادى]

مش عارف اشكركم ازاى شكرااا جدا يا جماعةبس

نفسى عرف الماروتى ممكن تتحمل ولا لا :)مشاكلها كثير ولا لا ;)انا مش مهم عندى حجمها او انها 800cc :)وكمان عايز اعرف قطع غيارها متوفرة واسعارها اية لان الى معايا 22000 :)ومش بسافر بيها وهى الى موديلها هيكون بعد التمانينات لانى خايف جدااا من احتمال خروج قانون للملاكى مستقبلا:):):):):):):):) ارجوووووووو سرعة الرد

بصراحة معرفش الكثير عن الماروتى لكن سمعت انو فيها مشكلة الكبالن برضو.
لكن ال128 أفضل منها كثيرا من ناحية الأداء و الراحة و الحجم و الثبات, محرك ال128 أفضل كثيرا و عن تجربة ثابتة جدا على الأرض لو كانت مضبوطة, الى جانب كونها "سيارة" أدمية من الممكن استخدامها فى السفر مثلا بينما الماروتى أعتقد صعبة جدا فى السفر.
و متقلقش من قانون الملاكى لأنو صدر على التاكسيات فقط.

[Ahmed Hamdy]

أنا رأيى الماروتى أفضل ... !!

أنا رأيى الماروتى أفضل .. أنا عندى ماروتى موديل 94 ... اشتريتها مستعملة من سنة وكام شهر .. الحمد لله لم تعطل منى (بمعنى أن تعطل وتقف فى الطريق) .. أينعم بها مشاكل ولكنها مشاكل بكتشفها وأروح أحلها .. مثل احساس بضعف فى الفرامل فأروح أغير تيل فرامل ..صوت طقطقة فأروح أغير كبالن .. وهكذا .. أنا مكانش عندى 128 لكن بسمع دايما ان مشاكلها كتير وبتعمل مواقف سيئة كتير تخليك تقف فى الطريق ..
الماروتى قطع غيارها متوفرة وأسعارها معقولة ... وفى منها برضه يابانى وهندى وصينى ..

وبـ 22000 ممكن تجيب واحدة حالتها كويسة موديل 95 أو 96 مثلا .. طبعا المبلغ ده حتجيب بيه 128 موديل 85 بالكتير ..

[fahd_628]

متقلقش يا باشا لو ماروتى حتبقى بعد 1994

[wessampo]

طب الكبالن ممكن تاخد وقت على ما تتغير الكلام دة ينطبق على الماروتى يعنى مثلا تاخد كام مصاريف فى السنة اخد بالى من اية عشان ماتصرفش معايا صيانة:):):)