سؤال للى بيفهمو فى الفيات بس

[mero5005]

هى البونتو الجديده(كلاسيك) تستاهل لدرجه انها تبقى ب 75 الف جنيه؟؟؟؟؟؟؟؟؟؟؟؟
وهل هى احسن ولا السيريون؟؟؟؟؟؟؟؟ وليه الباليو والسينا الجداد الناس مش راضيه تهوب ناحيتهم؟؟؟؟(مع ان امكانياتهم بالنسبه لسعرهم مناسبه جدا؟؟؟؟؟؟ بيقولوا انهم بيتجمعوا فى الصين بس بيتهيألى ده مش عيب لان الصين دلوقتى بتصنع عربيات ولا؟؟؟؟؟؟؟؟؟؟؟؟؟ )
افيدونى يا اهل الخبره
جدير بالذكر السيننا 1500سس ب 70الف
الباليو 1500سس ب 65الف (يعنى اقوى من البنتو)؟؟؟؟؟؟؟؟؟؟؟؟؟؟؟

[فادى]

البونتو بتصنع فى ايطاليا على ما أعتقد لذا هى أغلى من الباليو السيينا.
و طبعا هى تستحق هذا المبلغ بالنظر الى أسعار السيارات الأخرى و أفضل من السيريون بمراحل:
- تكنولوجيا هى قمة ما يمكن أن يوضع فى فئتها كما تعودنا من فيات.
- محركات فيات معمرة جدا و عصبية كما هو معروف عنها.
- سمعة أكثر من رائعة, احدى أكثر السيارات مبيعا فى أوروبا و أفضلهم سمعة.
- اسم عريق له ابتكاراته و انجازانه و ساهم فى تطوير صناعة السيارات.
- أداء و ثبات و نفس رياضى كما تعودنا من فيات
- تجاوزت فيات العيوب التى اشتهرت بها قديما, مثل افتقادها الى الراحة, و القصورة الفقيرة, و وضعيات الجلوس غير المريحة.

[Ahmed Taha]

رأي واحد لف كتييير على العربيات دي

بعد ما لفيت كتير المنافسة الحقيقية للبونتو الجديدة هي من الجيتز.

السيريون أغلي ب4000 جنيه يعني دخلت في مستوى التمانينات مش السبعينات و بصراحة مجربتهاش لاكن الناس بتقول فيها شعر.

الفيات الصيني دي صناعة صينية بالكامل مش تجميع و لغايت دلواقت الناس الي جابتها مبسوطة بيها بس ما تتقارنش بجودة البونتوالإيطالي 100%.

المهم رأئي خليك في ال1300 وبلاش تعلى بالمواتير إنت في مصر يعني حتمشي على مهلك غصبعنك وفر البنزين عشان غلي و لسة حيغلى لغايت ما نوصل للأسعار العالمية بدون دعم يمكن في خلال سنتين أو تلاتة و ساعتها حتعرف قيمة السيارات ذات المحلركات الصغيرة.

[shams_1279]

حد يعرف سعر الايديا كام ............. وشكرا

[فادى]

بعد ما لفيت كتير المنافسة الحقيقية للبونتو الجديدة هي من الجيتز.

السيريون أغلي ب4000 جنيه يعني دخلت في مستوى التمانينات مش السبعينات و بصراحة مجربتهاش لاكن الناس بتقول فيها شعر.

الفيات الصيني دي صناعة صينية بالكامل مش تجميع و لغايت دلواقت الناس الي جابتها مبسوطة بيها بس ما تتقارنش بجودة البونتوالإيطالي 100%.

المهم رأئي خليك في ال1300 وبلاش تعلى بالمواتير إنت في مصر يعني حتمشي على مهلك غصبعنك وفر البنزين عشان غلي و لسة حيغلى لغايت ما نوصل للأسعار العالمية بدون دعم يمكن في خلال سنتين أو تلاتة و ساعتها حتعرف قيمة السيارات ذات المحلركات الصغيرة.

مفيش أى نوع من المنافسة بين الجيتز و البونتو و لا وجه للمقارنة, البونتو أصغر قليلا فى الحجم و فى المحرك و هو ما يفسر تطابق السعر, لكن البونتو سيارة أوروبية لذا فهى أفضل من الجيتز و السيريون, خاصة من ناحية الأداء و القوة و الثبات, و طبعا المتانة و الأمان, و هى معمرة عن الجيتز و السيريون و ربما يمتد عمرها الافتراضى الى ضعف عمر كل من السيارتين.

[mero5005]

كلامكم صح يا جماعه بس المشكله انها 1300 سسى و 60 حصاااان ؟؟؟ يعنى لو ركب فيها اربعه وشغلت التكييف العربيه هتسحب؟؟؟؟؟؟ ولا متواتير فيات تبدا فى مشاكلها المعتاده؟؟؟؟
برجاء عن خبره حد يجاوب؟؟؟؟ اصل العربيه تقريبا انسب ما فى فئه ال1300 بالسعر ده والصراحه بفكر فيها اوى لكن حكايه ال 60 حصان دى مقلقانى اوى وشكراااا

[hazem_khidr]

ولا متواتير فيات تبدا فى مشاكلها المعتاده؟؟؟؟

و هيا ايه مشاكل مواتير فيات في رايك؟؟
يا تري بتفوت بسرعه و لا بتجيب زيت و لا سحبه وحش و لا تقف تحرجك في وسط الطريق؟
ما اعتقدش ان فيه عربيه فيات بتعمل حجه من دي.
ما تقوليش ال 128 موديل 70 في منها بيعمل كده
لا انا مش بتكلم عن عربيه بقالها 38 سنه شغاله انا بتكلم عن عربيات حديثه نسبيا.
انا معاك ان ال 60 حصان قليلين شويه
بس بالنسبه للعربيه معقولين و علي فكره من احد العربيات المرشحه بقوه لاستبدال السويفت الفتره القادمه

[mero5005]

طب حكايه التكييف وانا مركب معايا 3 وسحب العربيه ؟؟؟؟؟؟؟؟؟ محدش جاوبنى ليه؟ محدش عندوا بنتوا ولا؟؟؟؟؟؟؟؟؟

[nasr-eldeen]

البونتو بتصنع فى ايطاليا على ما أعتقد لذا هى أغلى من الباليو السيينا.
و طبعا هى تستحق هذا المبلغ بالنظر الى أسعار السيارات الأخرى و أفضل من السيريون بمراحل:
- تكنولوجيا هى قمة ما يمكن أن يوضع فى فئتها كما تعودنا من فيات.
- محركات فيات معمرة جدا و عصبية كما هو معروف عنها.
- سمعة أكثر من رائعة, احدى أكثر السيارات مبيعا فى أوروبا و أفضلهم سمعة.
- اسم عريق له ابتكاراته و انجازانه و ساهم فى تطوير صناعة السيارات.
- أداء و ثبات و نفس رياضى كما تعودنا من فيات
- تجاوزت فيات العيوب التى اشتهرت بها قديما, مثل افتقادها الى الراحة, و القصورة الفقيرة, و وضعيات الجلوس غير المريحة.

+1000000000000
أنا بصراحة أؤيد هذا لرأي بكل قوة وأنا كان عندي فيات بترا 2003 1600سي سي كنت عربية بصراحة غول وشدات بيها مرة أمام فرونتيرا 2002 وعديت منه على 180كم / س وكانت العربية قابلة سرعة تاني والسحب بتعها أكثر من ممتاز وثبات عالي جداً وتكنولوجيا خطيرة وأحياناً بفتقد السيارة لأني بعتها في يناير 2008 وربنا يبارك للي أخذها .
وعلى فكرة التوكيل بتعها الشركة الهندسية في أبو رواش الكيلو 28 مصر اسكندرية الصحراوي أكثر من ممتاز .
بس الفيات فيه عيب خطير جداً ان الموديل ممكن بعد خمس أو ست سنوات يتغير اسمه وبالتالي العربية بتفقد كتيييييير من قيمتها حتى لو مش هتبيع بتحس ان كل الناس عارفة انك راكب سيارة قديمة ومش بينتج منها جديد وبعدين تحس ان التابلوه بتعها كان بلاستيك بس الشهادة لله البترا كان سحبها مهول ولو قرنتها باللانسر اللي معايا 1600سي سي اسبورت البترا تفوق بس يمكن علشان اللي معايا الان اوتوماتيك .
الفيات اسم كبير وعريق ويكفي انها الشركة الوحيدة حتى الان على مستوى العالم التي لم تنضم أو تندمج في شركة أخرى الوحيدة المستقلة باسمها وانتاجها، بس تغيير الموديلات بطريقة سريعة شئ مستفز

[فادى]

طب حكايه التكييف وانا مركب معايا 3 وسحب العربيه ؟؟؟؟؟؟؟؟؟ محدش جاوبنى ليه؟ محدش عندوا بنتوا ولا؟؟؟؟؟؟؟؟؟

الرك هنا على العزم مش على عدد الأحصنة,
عزم البونتو مرتفع جدا و أعلى من السيريون,
عزم البونتو 1.2 لتر 102 نيوتن متر عند 2500 لفة/دقيقة. المحرك بياخد عزمه المرتفع عند سرعة منخفضة نسبيا و ده معناه :
- المحرك مرن جدا و لا يتأثر بالتحميل سواء التكييف أو تحميل الأوزان.
- المحرك معمر جدا لأنه يدور على سرعة منخفضة.
- المحرك ناعم جدا و متجاوب على كل السرعات.

[nasr-eldeen]

أنا عربيتي كانت 1600سي سي 104 حصان بس بصراحة أنا مكنتش بشغل التكييف كتير بس لما كنت بشغلة كنت بحس انه ضعيف لما بيكون معي 3ركاب بس مكنش بيأثر على السحب وكنت بحس انه ليه ريحة كده زي الكمكمة علشان كده مكنتش بشغله كتير لكن اللانسر ما شاء الله بنبقى 5 في السيارة وبشغلة على 3ثم 2ثم 1 ومش على آخر البارد كمان

[ows212]

السيريون احسن طبعا كفاية انها يابانى ومعروف ان تكييف العربية اليابانى افضل من الألمانى والأيطالى .... السيريون 1300 سىسى 91 حصان يعنى على من البونتو ب30حصان ... كمان الموتور 2 كامة ...
هاقول لحضرتك حاجة استشير المهندس سبعاوى هايديلك راى موضوعى ومحايد

[hazem_khidr]

الرك هنا على العزم مش على عدد الأحصنة,
عزم البونتو مرتفع جدا و أعلى من السيريون,
عزم البونتو 1.2 لتر 102 نيوتن متر عند 2500 لفة/دقيقة. المحرك بياخد عزمه المرتفع عند سرعة منخفضة نسبيا و ده معناه :
- المحرك مرن جدا و لا يتأثر بالتحميل سواء التكييف أو تحميل الأوزان.
- المحرك معمر جدا لأنه يدور على سرعة منخفضة.
- المحرك ناعم جدا و متجاوب على كل السرعات.

+
حاجه مهمه جدا كتير مننا مش واخدين بالنا منها
فيات من الشركات الشاطره جدا في انها تعمل موتور مش متحمل عليه كتير\
بمعني ايه؟؟
بمعني انها في تصميم الموتور بتراعي ان ما يبقاش فيه تحميل علي قوته
من ناحيه ايه برضه؟
يعني كل الملحقات زي الباور او سير الدينامو و اي حاجه بينتج عنها فاقد في الطاقه .
بتلاقيها مثلا تعدل زويه الصببت او تلعب في مشوار البستم حاجات كده بطريقه طفيفه
و دا لان المللي في التغيير بيعمل فرق.
لو جينا للتكييف هو كيد حيبقي اضعف من اليابني زيه زي اي عربيه اوربي
بس د لان التكييف في الاوربي مش متصمم انه يشتغل كتير يعني يدوب حاجه تقضي الغرض.
بس مش بيلجم العربيه
هو جيد لكن مش ممتاز.

السيريون احسن طبعا كفاية انها يابانى ومعروف ان تكييف العربية اليابانى افضل من الألمانى والأيطالى .... السيريون 1300 سىسى 91 حصان يعنى على من البونتو ب30حصان ... كمان الموتور 2 كامة ...
هاقول لحضرتك حاجة استشير المهندس سبعاوى هايديلك راى موضوعى ومحايد

اخي العزيز
اولا لما نتكلم يا ريت نشيل كلمه كفايه انها ياباني دي
لان الياباني دا صناعه قابله للخطأ و الصواب مش نزلت من السماء مثلا
و لو حنتكلم بمفهوم حضرتك بقي نقول علي البونتو كفيه انها من اعرق مصانع العالم و كمان اوربي اللي هما اساسا مخترعين السيارات!!!!!
بس احنا بنتكلم بطريقه موضوعيه شويه.
اما بالنسبه للاحصنه يا ريت تقرأ ردي علي كلام الاستاذ فادي.
و لو حضرتك واثق من كلامك ان السيريون حسن طبعا
ليه طالب راي الباشمهندس خالد؟؟؟؟؟؟
مع احترامي الشديد للباشمهندس خالد طبعا في الاول و الاخر
بس يا ريت لما حضرتك تقول راي تبقي واثق فيه و ما تقولش اسأل فلان

[ows212]

لو حضرتك واثق من كلامك ان السيريون حسن طبعا

انا واثق ان السيريون احسن من البونتو ده بالنسبة لاحتياجاتى انا ..تكييف اليابانى احسن .. وانا باعمم اليابانى احسن من الألمانى والأيطالى فى التكييف .. وده شىء معروف

مع احترامي الشديد للباشمهندس خالد طبعا في الاول و الاخر
بس يا ريت لما حضرتك تقول راي تبقي واثق فيه و ما تقولش اسأل فلان

انا مش مهندس .. وماعرفش حاجة عن العربيات غير السواقة ...
كون يسال مهندس زى سبعاوى معروف عنه تقييمه الموضوعى والحيادى ده طبعا مش عيب وممكن يخليه ياخد القرار الأفضل ..
..............نسيبى شغال فى شركة بتقدم خدمات بحرية ... وهو مهندس لما جيت اشترى السيريون سال رئيسه فى الشغل عن العربية (عن الموتور بالذات ) الراجل شكر جدا فى الموتور وقال انى اتكل على الله واشتريها ..عايز اقوللك حاجة الراجل ده مهندس ميكانيكى ومش كده وبس دا اساسا عندهم ورشة ميكانيكا هو واخواته يعنى كان شغال صبى ميكانيكى من وهو صغير ..
..................................
شكرا استاز حازم

[فادى]

السيريون احسن طبعا كفاية انها يابانى ومعروف ان تكييف العربية اليابانى افضل من الألمانى والأيطالى .... السيريون 1300 سىسى 91 حصان يعنى على من البونتو ب30حصان ... كمان الموتور 2 كامة ...
هاقول لحضرتك حاجة استشير المهندس سبعاوى هايديلك راى موضوعى ومحايد

بالنسبة للتكييف أتفق معك بأن تكييف السيريون ربما يكون أفضل, لأن السيارات اليابانية و الأمريكية عموما تعنى بالكتييف أكثر من الأوروبية لأنها تنتج أصلا للسوق الأمريكى الذى يحتوى على مناطق حارة فى الوسط و الجنوب, بعكس السوق الأوروبى الذى تندر فيه المناطق الحارة.
السيريون أعلى فى القوة الحصانية و هذا ربما يجعلها أسرع قليلا, و لو أن هناك عوامل أخرى مثل علبة التروس و الوزن, لكن البونتو عزمها أعلى, رغم أن محركها أصغر, و هذا معناه أنها أفضل فى حالات التحميل و عند تشغيل المكيف.
المحرك الاتنين كامة ليس أفضل فى معظم الأحوال, و هو يستهلك الوقود بشكل أكبر.
و مفيش حاجة اسمها كفاية انها يابانى, لأن دى عربية مش مشغل موسيقى, اليابان مشهورة بجودة صناعة الكمبيوترات المحمولة و المشغلات الموسيقية, أما السيارات فنقول كفاية انها أوروبى أو كفاية انها ألمانى أو كفاية انها ايطالى, السيارات الأوروبية أفضل سمعة من السيارات الأمريكية و الأسيوية عموما.
فى النهاية أنا لم أقد أى من السيارتين لذا لا يمكننى المقارنة بينهم بشكل محايد لكن من السمعة المتوارثة لكل من الشركتين أقدر أقولك الأتى(و هذا ليس بالضرورة صحيحا).
- البونتو أفضل فى الثبات فى المنحنيات, و فى الكبح و الانطلاق.
- البونتو معمرة ضعف السيريون على الأقل.
- البونتو أكثر متانة.
- السيريون أكثر سهولة فى القيادة, و البونتو أكثر خشونة فى القيادة.
- البونتو بها تكنولوجيا أعلى, تعودنا من فيات دائما على سيارات تسبق عصرها و تعودنا من اليابانيات وضع تكنولوجيا قديمة نسبيا.
- السيريون ربما تكون أكثر راحة قليلا, باعتبارها سيارة أمريكية الطابع.