تكييف عادى لشاهين غير عادية...؟؟؟؟

[abdinsemred]

ياجماعة المنتدى ده أجمل قيمة فى النت ...ماقدرش يمر على يوم من غير مادخل عليه وكأنى بتمشى على الكورنيش . باستمتع وأتعلم كتير ..مع أنى لفيت معظم دول العالم فى المجال الهندسى تخصصى ...ربنا يجعل مجهود أعضاء المنتدى ده فى ميزان حسناتهم.

الموضوع ياشباب..... معروض على عربية شاهين إيطالى موديل 95 1300سى سى بحالة شاذة نضيفة نضيفة..والموتور باين عليه جداً جداً إنه من إنتاج توفاس وبارز عليه الإسم وكل شى بالعربية أفضل من رائع

المهم ..أنا أصلاً غيرت العربية وباشترى غيرها علشان التكييف ..وباسمع عن بعض المشاكل بالشاهين ال 1400 سى سى ......فما بالك لو ركب تكييف لشاهين 1300سى سى .. رحت جرى على ورشة كبيرة شوية فى جسر السويس ( سيد سوكة للتكييف ) قدام نادى الشمس..وسألته عن إمكانية تركيب التكييف , أجاب بالفوم االمليان ..يركب بمنتهى السهولة وهاتنساه خالص وهايتكلف 3000جنيه

المرجو اآن من الأخوة الأفاضل التفضل والتكرم والسكب من خبراتهم إللى بتنور للأعضاء طريقم الفنى ....هل تستاهل عربية ذى دى 34000 جنيه

والسوال التانى والأهم ...هل تركيب التكييف على هذا الموتور (1300) سيسبب مشاكل مستقبلية وضعف للسحب ..وهايكرهنى فى العربية إللى أكتر من ممتازة من غيره؟؟؟؟؟؟

رجاءاً الإهتمام ..لآنى على وشك دفع الفلوس لصاحب العربية ..وعطلت الدفع لغاية ما أخود رأييكم أولاً

[zeyad1810]

هو فى شاهين ايطالى؟؟؟

[nabil246]

وجود التكييف مفيد ولا يؤذى السيارة

انا عندى شاهين موديل 1996 ، ركبت لهل تكييف يابانى ماركة ساندن منذ شراؤها . تم تركيب التكييف بنظام سبليت اى ان الهواء يخرج من وحدة منفصلة تم تركيبها ظاهرة امام من يجلس بجوار السائق .ويمكن تركيب التكييف بحيث يخرج الهواء من فتحات التهوية الأصلية ، لكن فى هذه الحالة يوجد عيبين . العيب الأول اننى ساضطر لفك التابلوه وتركيبة مرة اخرى . العيب الثانى انه سيتم إلغاء خروج الهواء الساخن الأصلى الخاص بالسيارة . التكييف يبطىء من سرعة السيارة بنسبة بسيطة عند الغيار الأول والثانى ، ولا يوجد له تاثير يذكر على السرعات العالية.
رايى الشخصى وجود التكييف مفيد ولا يؤذى السيارة .

[nabil246]

التكييف لا يسبب مشاكل بالسيارة

احب اضيف ان ماركة توفاز هى تركى وليست إيطالى . اؤكد ان التكييف لا يسبب مشاكل بالسيارة ، لكنه سيحتاج لصيانة وربما زيادة شحن الفريون كل سنة او اكثر ، لكن لا ننسى فائدته وانك تقول انك ستستبدل سيارتك بسبب التكييف .توجد وحدة صغيرة يمكن تركيبها مع التكييف (تعلى) الموتور عند تشغيل التكييف فقط ، ويتوقف عمله عند إغلاق التكييف .

[nabil246]

اسمها سولونويد

احب اضيف ايضا ان سيارتى 1300 cc ، وان التكييف لا يصل بقوة للجالسين على الكنبة فى بداية تشغيلة لانه لا توجد هوايات خلفية بالشاهين .وان الوحدة التى تعللى الموتور اسمها سولونويد وان تركيبها مفيد لتوفير البنزين ، لأنك لو لم تركبها ستضطر تعلي الموتور فى بداية كل صيف ( لأنك ستستعمل التكييف ) وتوطيه فى بداية الشتاء.

[hazem_khidr]

اولا مفيش شاهين ايطالي
الشاهين عباره عن 131 و متعدله من توفاس التركيه .
ممكن العربيه دي تبقي تركي و تعرفها ان جرايد الابواب بتبقي نيكل مش اسود زي الشاهين المصري في الفتره دي..
بالنسبه للتكييف فعلي حسب حاله الموتور .
لكن ما انصحش بتكييف في الموتور دا لانه اضعف من موتور ال 1400 الكامه العلويه
و اي واحد اخصائي حيقولك ركب التكييف عاوز يكسب و خلاص.
هو مش وحش للدرجه لكن مش حيبقي بقوه الياباني مثلا او الكوري

[abdinsemred]

الأخوة الأفاضل ..أعتذر عن التأخير لأسباب صحية
الأخ الكريم زياد ...العربية تركى بالكامل ....وليست إيطالى ..ده كان خطأ منى

الأخ نبيل ..أشكرك جداً على المشاركة الإيجابية دى ..فعلاً نورتنى

والآن ...ماذا عن سعر هذه السيارة ...وهل تساوى فعلاً 36000...لو أنا إشتريتها هاركب لها التكييف فوراً....
رجاءاً الإفادة ياجماعة بشأن السعر ..وأكرر شكرى لجميع الأعضاء المحترمين جداً

[hazem_khidr]

ال 36 الف
يجبولك سوزوكي سويفت 93 بالتكييف و ياباني كمان مش مصري و حالتها نضيفه جدا.
و خد عندك بقي
نعومه و قطع غيار معمره و شكل جذاب
ونفس الحال بالنسبه للاكسيل الفول اوبشن موديل 96