نصائح لمن يشترى عربية شاهين

[mrghost]

السلام عليكم ورحمة الله
هذه تجربتى مع الشاهين ولذلك هذه بعض النصائح لمن يشتريها جديد وعلى فكرة بأمانة هى عربية بتستحمل اكتر من اى عربية تانية يعنى فى المطبات والشوارع المكسرة ولو مركب ناس كتير فى الطبات الصناعى ماتتخبطش من تحت زى العربيات التانية بس طبعا هى تفتقر الى الفخامة والرفاهية بعض الشيئ واليك هذة النصائح عن تجربتى مع هذه السيارة
1- ماتقرصش على الماتور خالص حتى يمر 1500-2000 كيلو متر علشان الماتور مايرشحش زيت بعد كده
2- ماتعديش بيها ال100كم\ساعة فى الاول برضو علشان الماتور بيكون لسة بيلين
3- لازم تغير الكاوتش اللى جاى معاها لانه نسر ناشف جدا وهيبهدلك العفشة ولو جبت هات كاوتش عريض انا مثلا عندى 185\70r13
4- حاول لو تقدر تغير الرادياتير لانه مش حلو وهيبدأ يتخرم لوحده من كل حتة (انا عندى كده دلوقتى)
5- اللى عنده شاهين كاريراتير مش حقن الكترونى يقدر يحطلها بنزين 80 وهو مطمن
6- حاول ماتعملش ليها اى صيانة فى التوكيل بتاعها لانهم مش كويسين (عن عدة تجارب)
7- لو لسه هاتشتريها ماتجيبهاش بالكماليات لان التكييف اللى بينزل معاها (كورى باين) اعطاله كتير فممكن تركبلها بعد ماتجيبها تكييف يبانى ب2700 جنيه بس
8- يستحسن ماتغيرش الجنوط وده لكل العربيات لان الجنوط الحديد اللى نازله مع العربية لو لاقدر الله اتعوجت بتتعدل تانى بسهولة لكن الاسبور بتتكسر
9- غير الزيت كل حوال 5000 كيلو زى مامكتوب فى الكتالوج
10- لو بتركب معاك ناس كتير علطول يستحسن تركب سوست 132 ايطالى وطقم كاوتش عليات ده هيرفع العربية من ورا حلو وممكن تركب برضو عليات قدام علشان تعلى العربية (انا عامل كدة علشان المطبات )
11- حاول ولو كل شهر تنظف فلتر الهوا بالبلور او الكمبرسور لان ده ليه تأثير على السحب
12- كل فترة فك البوجيهات وصنفر الشمعة بصنفرة ناعمة وبعد كده اغسلها بالبنزين وركبها تانى هاتفرق معاك فى السحب
13- غير طقم الكلاكس اللى جاى معاها لانه بيبوظ لو اشتغل كتير (فرح مثلا)
14- ماتغسلش العربية بالخرطوم ابدا الا كل فترة كبيرة علشان البارومة اغسلها بفوطة مبللة بس
15- اشترى كارتيرات بلاستيك للعجل الخلفى علشان البارومة ودول ب50 جنيه فى التوفيقية واى سمكرى بيركبهم
16- اشترى كوريك تمساح لان كوريك الجنب مش عملى خالص
17- اكشف على التيل الامامى كل فترة حسب استعمالك علشان لو التيل متآكل هيبوظلك الطنابير وكذلك الخلفى غيره كل حوالى سنتين ونصف
18- انا رحت لكهربائى وعمللى فوانيس الشبورة بحيث انها تشتغل مع نور التابلوه لو عايز بحيث مش لازم تشتغل مع البول الاول للنور العالى ودى مابتكلفش اى حاجة (3 جنيه)
19- بعد فتره الفوانيس اللى ورا بتلاحظ ان نورها بيضعف مع الوقت فيه فكرة حلوه بإذن الله سوف اضعها لاحقا على المنتدى وشكرااا
20- على فكرة هى عربية سريعة بتوصل سرعتها الى حوالى 165 كيلو فى الساعة ومابتحسش بحاجة لو قافل الزجاج

[yahyanaabil]

ايام ما كان معانا شاهين كنت مركب سوست 132 ورا لان العربيه كانت بتفطس جامد اوى لما نفرين يقعدوا ورا بس الموضوع مش مستاهل كوتشات تعليه

[ahmedsrs]

شكرا على النصائح هى فعلا عربية محترمة وتنفع لمصر

[dr.hany]

مشكور..بس هو كده سياتك لمما نص الحاجات اللى نازله بيها تعبانه,امااال فاضل ايه

[Nile_Storm]

هي عربيه ممتازه بس انت كده طالب تغيير حاجات كتيييييييير جدا

[Chicco]

شكرا يا أخي الفاضل على نقل تجربتك ......فينك يا فادي باشا تشوف الصقر اللي في العلالي
بس عايزين الحق ....أحسن عربية لمصر هي شاهين ....و يا سلام لو ربنا يكرم بسواق و دمتم

[فادى]

شكرا يا باشا على الموضوع الجميل.
بس ليه شوية ملاحظات.
طبعا لا يخفى على أحد النصائح المعتادة التى سمعتها عند شراء الشاهين:
1- غير الكاوتش النسر فورا!!!
2- غير الرادياتير و الا العربية تسخن منك!!!
3- غير المساعدين الى قدام!!!
ده المفترض و العربية على الزيرو!
المهم اشتريت العربية, و معملتش أى نصيحة من دول, و الحالة دلوقتى كالأتى :
- النسر شغال معايا لحد ال44 ألف كيلو, و من غير أى مشكلة, و العفشة مكسرتش و لا حاجة, أنا مش بنكر انو ناشف, هو فعلا ناشف حبتين و أداءه فى المطر و الظروف الجوية سيئة دون المستوى, لكن الأمر لا يستحق تغييره قبل انتهاء عمره الافتراضى, و عموما هو قعد معانا 30 ألف فى البيجو أول ماجبناها (بيجو زمان كانت بتنزل كاوتش نسر), و محصلش أى حاجة. و هو عمره أطول من الكاوتشات مجهولة الهوية الى موجودة فى الأسواق من اندونيسى و صينى و كورى.
- العربية مبتسخنش, و مفيش أى مشكلة حصلت فى الرادياتير, حتى مع أسوء الظروف الجوية السيارة مبتسخنش.
- المساعدين الى قدام حالتهم كويسة لحد النهاردة, و أنا كنت بتأكد من حالتهم كل شوية و لحد دلوقتى زى الفل.
- العربية محصلش فيها أى مشاكل تصنيع, سوى مشكلة واحدة فى الكلاكس كان صوته ضعيف و مكنه منهم كانت بايظة, رحت التوكيل فى الضمان و غيرولى الكلاكس كلو تبع الضمان.

بالنسبة للتوكيل فأنا مش شايفهم سيئين للدرجة, لكن لازم تقعد وراهم و الى بينرفزنى منهم لما يقولولى بوجيهات الانجيكشن ب100 جنيه!!!! و مفيش حاجة أصلا اسمها بوجيهات انجيكشن و بوجيهات كاربارتير! فاكرنى هندى! ده طبعا غير انك لو رحتلهم مثلا فيه مشكلة فى التكييف هتلاقى فى عيونهم نظرة سخرية كأنهم بيقولوا فى سرهم (يا توتو جاى تصلح التكييف)!
بالنسبة للتكييف الأصلى بتاعها هو شغال كويس لحد دلوقتى و مفيهوش أى مشكلة, تبريده متوسط, معقول جدا للى قاعد ادام و أكثر من كافى حتى فى أسوء الظروف الجوية, بالنسبة للى قاعدين ورا فيلزمهم بعض الوقت عشان يحسوا بالتكييف.

[amr_elrashidy]

مشكلة الشاهين الشركة المجمعة ليها بس مش اكتر..انما العربيات دى التركى منها القديم كان هايل جدا..و كفاية ان فى ناس بتشهد لل 131 لحد دلوقت

[BomBom]

كل اللي اتكتب فوق عن عربية زيرو ... اما لو مستعملة كان اتكتب ايه !!

[HRH_Sameh]

بص في حاجات طبيعية في اي عربية

1- ماتقرصش على الماتور خالص حتى يمر 1500-2000 كيلو متر علشان الماتور مايرشحش زيت بعد كده
2- ماتعديش بيها ال100كم\ساعة فى الاول برضو علشان الماتور بيكون لسة بيلين

3- لازم تغير الكاوتش اللى جاى معاها لانه نسر ناشف جدا وهيبهدلك العفشة ولو جبت هات كاوتش عريض انا مثلا عندى 185\70r13
4- حاول لو تقدر تغير الرادياتير لانه مش حلو وهيبدأ يتخرم لوحده من كل حتة (انا عندى كده دلوقتى)
13- غير طقم الكلاكس اللى جاى معاها لانه بيبوظ لو اشتغل كتير (فرح مثلا)
17- اكشف على التيل الامامى كل فترة حسب استعمالك علشان لو التيل متآكل هيبوظلك الطنابير وكذلك الخلفى غيره كل حوالى سنتين ونصف

اما الحاجات اللي فوق دي ما عملتهاش وماحصلش حاجة :
غيرت الكاوتش بعد كده وجبت المقاس العريض ده
الردياتير زي ما هو وهو اساسا نحاس يعني حاجة محترمة (لونه قدامك اسود لكن لو رحت تنضفه ها تعرف انه نحاس)
طقم الكلاكس زي ما هو
وتيل الفرامل قدام وورا زي ما هو
مع العلم ان العربية زي عربيتك موديل 2004 وماشيه حوالي 43 الف كيلو

18- انا رحت لكهربائى وعمللى فوانيس الشبورة بحيث انها تشتغل مع نور التابلوه لو عايز بحيث مش لازم تشتغل مع البول الاول للنور العالى ودى مابتكلفش اى حاجة (3 جنيه)

دي عملتها اول ما جبتها ومش محتاجه شغل ولا فك تابلوه ولا حاجه:

19- بعد فتره الفوانيس اللى ورا بتلاحظ ان نورها بيضعف مع الوقت فيه فكرة حلوه بإذن الله سوف اضعها لاحقا على المنتدى وشكرااا

اسبقك واقول حاجه جربتها بنفسي: بعد حوالي 4 سنين من الركن في شارع مش مسفلت ومشي في شوارع مقرفه:
فكيت الوشين بتوع الفوانيس اللي ورا وغسلتهم ومسحت الفوانيس من جوه بفوطه عادية والنتيجه روعة

ومنتظر موضوعك

[sab3aawy]

من خلال تجربة سنوات طويلة مع الشاهين اسمحلى اعلق على بعض كلامك

1- ماتقرصش على الماتور خالص حتى يمر 1500-2000 كيلو متر علشان الماتور مايرشحش زيت بعد كده

2- ماتعديش بيها ال100كم\ساعة فى الاول برضو علشان الماتور بيكون لسة بيلين

كلام سليم لكن مش علشان ترشيح الزيت بس، لكن علشان موتور الشاهين وآلات جرها بتنزل مش متلينة الى حد كبير وبالتالى التليين يفيد الشاهين بشدة، بس السرعة القصوى فى التليين هى 90 وليس 100 (لا تتجاوز 3000 RPM بأى حال من الأحوال فى فترة التليين)
3- لازم تغير الكاوتش اللى جاى معاها لانه نسر ناشف جدا وهيبهدلك العفشة ولو جبت هات كاوتش عريض انا مثلا عندى 185\70r13

اتفق معاك تماما فى مسألة تغيير الكاوتش النسر، فمعرفتى بالنسر ليست فقط نتيجة للإستعمال ولكن نتيجة لزيارات عديدة لمصنع النسر اجزم معها انه حرام يتحط فى اى عربية ، لكن بالنسبة للمقاس فال 175 /80 /13 هيكون افضل فى استهلاك الوقود وخفة الديريكسيون من ال185/70/13 ، ال185 عريض شوية عليها

4- حاول لو تقدر تغير الرادياتير لانه مش حلو وهيبدأ يتخرم لوحده من كل حتة (انا عندى كده دلوقتى)

رأييى انك تغيره لما يشتكى، لا داعى لتغييره اطلاقا والعربية جديدة،، فقط احرص انك تحط مياه خضراء مانعة للصدأ لأن الردياتير بتاعها حديد،ولو استعملت مية الحنفية بدون مانع صدأ هتخرمه، انا استعملته 70 ألف كيلومتر وبعدين غيرت السربنتينة فقط واستعملت العلب بتاعته، علما بأنه متخرمش ، لكن انا غيرته على سبيل النزاهة فقط علشان اجيب سربنتينة نحاس

5- اللى عنده شاهين كاريراتير مش حقن الكترونى يقدر يحطلها بنزين 80 وهو مطمن

اختلف معاك، الشاهين نسبة انضغاط محركها عالية (9.5 على ما اذكر) وبالتالى كانت بتحتاج لمعاملة محترمة جدا فى البنزين علما بان اللى معايا مكانت كاربراتير وكنت جايبها زيرو، البنزين ال80 بيخليها تسقف بشدة، العبرة ليست بأن السيارة تسير، العبرة بأن المحرك ميسقفش علشان يعيش معاك،وهو ما لم يكن يتحقق لى سوى ببنزين 92 او على الأقل 90 من بنزينة نضيفة


6- حاول ماتعملش ليها اى صيانة فى التوكيل بتاعها لانهم مش كويسين (عن عدة تجارب)

اتفق معاك

7- لو لسه هاتشتريها ماتجيبهاش بالكماليات لان التكييف اللى بينزل معاها (كورى باين) اعطاله كتير فممكن تركبلها بعد ماتجيبها تكييف يبانى ب2700 جنيه بس

اتفق معاك
8- يستحسن ماتغيرش الجنوط وده لكل العربيات لان الجنوط الحديد اللى نازله مع العربية لو لاقدر الله اتعوجت بتتعدل تانى بسهولة لكن الاسبور بتتكسر

اتفق معاك، بالمناسبة هى جنوطها الأصلية اكثر من ممتازة وعمرها ما بتتعوج سوى لو فى حادثة الله لا يقدر

9- غير الزيت كل حوال 5000 كيلو زى مامكتوب فى الكتالوج

برضه تلاقى مكتوب فى الكتالوج ان فى ظروف التشغيل القاسية مثل الحر والتراب والقيادة البطيئة فى الزحام يتم تغيير الزيت على اقل من ذلك (وكل ده بينطبق على بلدنا) لذلك انا شايف ان من 3500 الى 4000 معقول جدا لغيار الزيت، بسم متستعملش معاها زيت تخليقى لأنه غير مناسب ليها، انسب زيت لها هو الشل هيليكس 20-50 او توتال كوارتز 5000

10- لو بتركب معاك ناس كتير علطول يستحسن تركب سوست 132 ايطالى وطقم كاوتش عليات ده هيرفع العربية من ورا حلو وممكن تركب برضو عليات قدام علشان تعلى العربية (انا عامل كدة علشان المطبات )

من يوم ما جبتها لحد ما بعتها لا عليت ولا وطيت، الكلام ده لو هتشغلها تاكسى

11- حاول ولو كل شهر تنظف فلتر الهوا بالبلور او الكمبرسور لان ده ليه تأثير على السحب

يتنضف كل 5000 كيلومتر ويتغير على 20 ألف

12- كل فترة فك البوجيهات وصنفر الشمعة بصنفرة ناعمة وبعد كده اغسلها بالبنزين وركبها تانى هاتفرق معاك فى السحب

وممكن تحطهم على الولعة شوية تاكل الكربون اللى عليهم وتخليهم جداد ، لكن الأفضل من ده كله ، كل 20 ألف كيومتر طقم بوجيهات شامبيون او NGK ،
لو هى حقن الكتونى هات البوجيه اللى فيه مقاومة، لو هى عادية هات الطقم العادة، والطقم كله تمنه 35 جنيه، مش مستاهلة لا صنفرة ولا حريق

13- غير طقم الكلاكس اللى جاى معاها لانه بيبوظ لو اشتغل كتير (فرح مثلا)

انا من ساعة ما جبتها لحد ما بعتها خمسة سنوات ايدى على الكلاكس محصللوش حاجة
14- ماتغسلش العربية بالخرطوم ابدا الا كل فترة كبيرة علشان البارومة اغسلها بفوطة مبللة بس

ده مش للشاهين بس، ده لأى عربية فى الدنيا، الخرطوم ده هو سرطان الصاج، كمان اوعى تحط ميه على البوية لما يكون الصاج سخن فى نص النهار، غسيل العربية إما الصبح بدرى او آخر النهار

15- اشترى كارتيرات بلاستيك للعجل الخلفى علشان البارومة ودول ب50 جنيه فى التوفيقية واى سمكرى بيركبهم

وماله مش عيب
16- اشترى كوريك تمساح لان كوريك الجنب مش عملى خالص

وماله مش عيب، مشكلته بس انه بياخد مكان كبير فى الشنطة لكن عملى جدا فى الإستخدام

17- اكشف على التيل الامامى كل فترة حسب استعمالك علشان لو التيل متآكل هيبوظلك الطنابير وكذلك الخلفى غيره كل حوالى سنتين ونصف

الطنابير الأمامية هتبوظ هتبوظ، حتى لو جبتلها تيل نادية، برضه هتبوظ، هو كل 20-30 ألف هتغرم 100 جنيه تمن جوز طنابير وخلاص، التيل الخلفى انا عمرى ما جيت ناحيته طوال الخمس سنوات وال 100 ألف كيلو ومعانيتش منه خالص

18- انا رحت لكهربائى وعمللى فوانيس الشبورة بحيث انها تشتغل مع نور التابلوه لو عايز بحيث مش لازم تشتغل مع البول الاول للنور العالى ودى مابتكلفش اى حاجة (3 جنيه)

مفكرتش اغيرها لكن فكرة كويسة

19- بعد فتره الفوانيس اللى ورا بتلاحظ ان نورها بيضعف مع الوقت فيه فكرة حلوه بإذن الله سوف اضعها لاحقا على المنتدى وشكرااا
فى انتظار افكارك

20- على فكرة هى عربية سريعة بتوصل سرعتها الى حوالى 165 كيلو فى الساعة ومابتحسش بحاجة لو قافل الزجاج

يجوز برضه، انا كانت معايا ال 1400 وكان السقف هو 150 ، يمكن ال 1600 تكون اعفى شوية، بس عموما انا كنت قايس سرعتها على ال GPS مش على عداد سرعتها لأن عداد الفسرعة كان بيهيس شوية بعد 120 ويقرا حاجات اعلى من الواقع فى حدود من 5-10 كيلومتر

[emadno1]

بصراحه حاجه تجيب اكتئاب طيب ما تبعد عن الشر و غنيله

[smsmbakr]

Shokrn Leeeeeeeeeeeeeek

[mrghost]

السلام عليكم ورحمة الله وبركاته
شكرا لردوكم كلها
وإن شاء الله هانزل موضوع زيادة اضاءة الفوانيس الخلفية بعد ما اخلص امتحاناتى على طول علشان يبقى بالصور
وعلى فكرة انا لما جبت بيها 163 كم كان جنبى واحد صاحبى بدايو ماشى على نفس السرعة فهى فعلا بتجيبهم ومكتوبة فى الكاتالوج وعلى فكرة نسبة الانضغاط للموتور( 8.5) يعنى مش عالى الانضغاط وشكرا

[waleedrahmy]

الله يرحم أيامك يا شاهين................أحسن عربية؟؟؟؟؟؟؟؟؟؟؟ ندمت لأني بعتها