محتاج تقييم للبونتو الايفو

[hishamtalaat]

الجديدة بقى من شهرين الأرْبع جنوط اتسرقو !! واحد تاني كان اتشائم منها :d

[ahmedsiyam]

هو انا فى اعتقادى طبعا ان الفيات عربية حلوة جدا و صناعة ايطالى محترمة
لكن برضه مع احترامى الشديد ماحدش عامل بيها كيلومتر كتير و بيبقى الحكم عليها فى الاول مش دقيق
بالنسبة للديوال لوجيك بتاعها انا شايفه زيه زيى اى ايزى ترونيك فشل فى فى مصر فشل ذريع
و للعم انا جربت واحد ديوال لوجيك و عربية جديدة عاملة كيلومتر قليل اوى و مع ذلك اداء الفتيس وحش جدا كان فيه رجرجة جامدة
الحاجة التانية انه العربية كانت مغيرة اسطوانة دبرياج و مش معناه طبعا انا كل العربيات كده دى جت بالصدفة
من وجهة نظرى المانيوال افضل و مشاكله اقل
انما انا كنت عايز اعرف العربية بعد 80 الف مثلا اخبارها ايه
ايه نوعية المشاكل اللى دائما بتقابل الناس فيها
هل التوكيل بيوجد لها قطع غيار على طول و لا
حد بيشتغل فيها بره التوكيل و لا لأ
بالاضافة للاداء طبعا و اعطالها عادية و لا رخمة و صعبة

و طبعا لا انسى ان اشكر كل من قام بالرد و الافادة فى الموضوع

[hishamtalaat]

عربية حلوة بس:
قطع غيارها غالية
صيانتها غالية
توكيلها سيء
موتورها ضعيف
سعر إعادة بيعها سيء

أنا عن نفيس صرفت نظر عنها.

أنا معاك في الحاجات دي طبعا ولازم أي حد يشتريها يخلي باله من الحاجات دي
بالنسبة للمتر أنا شيفه مقبول مش لدرجة ضعيف
سعر اعادة البيع ده ل كل العربيات اللي بتنفسها نفس النظام
polo
ford fiesta
ibiza

[Formulator]

لكن برضه مع احترامى الشديد ماحدش عامل بيها كيلومتر كتير و بيبقى الحكم عليها فى الاول مش دقيق

معلش الكلام ده مش صحيح..
الجراند بونتو Dualogic موجودة فـ مصر من 2005-2006.. أنا أعرف كذا واحد بجراند معديين الـ100 ألف كم بالفتيس دون مشاكل..؟؟!!!
والايفو معرفش حضرتك تعرف ولا لأ انها نسخة من الجراند؟؟ بس فيه ناس عاملة 30-40 ألف عاااااادى جدا.

بالنسبة للديوال لوجيك بتاعها انا شايفه زيه زيى اى ايزى ترونيك فشل فى فى مصر فشل ذريع
و للعم انا جربت واحد ديوال لوجيك و عربية جديدة عاملة كيلومتر قليل اوى و مع ذلك اداء الفتيس وحش جدا كان فيه رجرجة جامدة

1- هو مش Easytronic.. الايزى-ترونيك ده بتاع الأوبل, وده كانت شركة Marelli الايطالية (احدى شركات فيات جروب) عاملاه لـGM/Opel..!!
بالضبط زى ما عملت فتيسات الـSMG I/II للـBMW M-dividion///
وزى ما عملت فتيسات الفيررارى لعربيات الطرق, وبتعمل نفس الفتيس لكل فرق الـF1 لحد دلوقتى...

2- تجربتك لعربية (مش بتاعتك, سوقتها مرتين 3 مثلا), ماتعتبرش مقياس ولا indication لأى حاجة..!!
ولا تكفى انك تحكم على الفتيس بالفشل..؟؟!!!
الفتيس اسمه Dualogic وده تطوير لحاجة اسمها Selespeed, وده متجرب فـ الألفاروميو 156/147 من سنة 98, ومتجرب قبلها فـ الفيررارى F355..؟؟!!!

حضرتك كده عملت زى اللى ساق جولف/باسات 2009 بالفتيس الـDSG, وقالك فتيس فاشل.
VW وBorg-Warner (اللى مصممة الفتيس) تغير فـ الـPump والسوفتوير وتتشقلب.. ونسخ 2010 تمام, وبرضه يقولك فاشل.. من غير تجربة كده؟؟!!!

الحاجة التانية انه العربية كانت مغيرة اسطوانة دبرياج و مش معناه طبعا انا كل العربيات كده دى جت بالصدفة
من وجهة نظرى المانيوال افضل و مشاكله اقل

مغيرة Clutch-Kit على كام ألف كيلومتر؟؟ بيعمل صيانة فـ التوكيل ولا لأ؟؟
طريقة الاستخدام بتفرق جااااااااامد فـ الفتيسات دى, كده الكلام قاصر ومش واضح؟؟!!!

ومع احترامى لوجهة نظرك: المانيوال مش أفضل ولا حاجة..
- الفتيسات الـSequential بدبرياج-كهرباء زى الـDualogic/DSG/PowerShift/TCT كل دول أفضل فـ الأداء والتسارع واستهلاك الوقود...etc
بشرط مفيش سوء استخدام +صيانة منتظمة..
والا مكانتش كل الشركات دى غيرت من الفتيسات الأوتو العقيمة.. للفتيسات دى؟!!!

أصل حضرتك ماتقوليش بعد ألفا156 لمدة 120 ألف كم, بدون مشاكل.. ولسه شغالة الحمد لله (وده كان الجيل الأول Selespeed).
ودلوقتى برافو T-JET بنفس الفتيس الـDualogic, اكثر من 60 ألف كم وتمام الحمد لله.
وتيجى فـ الآخر تقوللى الفتيس فاشل؟؟؟!!
Edit: دى تجربتى انا بس, غير أصحابى ومعارفى اللى معاهم جراند/ايفو وبرافو.. وحتى الـEasytronic أنا اعرف 3 معاهم أسترا/فكترا ومفيش مشاكل..!!

[wama1903]

مغيرة clutch-kit على كام ألف كيلومتر؟؟ بيعمل صيانة فـ التوكيل ولا لأ؟؟
طريقة الاستخدام بتفرق جااااااااامد فـ الفتيسات دى, كده الكلام قاصر ومش واضح؟؟!!!

ومع احترامى لوجهة نظرك: المانيوال مش أفضل ولا حاجة..
- الفتيسات الـsequential بدبرياج-كهرباء زى الـdualogic/dsg/powershift/tct كل دول أفضل فـ الأداء والتسارع واستهلاك الوقود...etc
بشرط مفيش سوء استخدام +صيانة منتظمة..
والا مكانتش كل الشركات دى غيرت من الفتيسات الأوتو العقيمة.. للفتيسات دى؟!!!

أصل حضرتك ماتقوليش بعد ألفا156 لمدة 120 ألف كم, بدون مشاكل.. ولسه شغالة الحمد لله (وده كان الجيل الأول selespeed).
ودلوقتى برافو t-jet بنفس الفتيس الـdualogic, اكثر من 60 ألف كم وتمام الحمد لله.
وتيجى فـ الآخر تقوللى الفتيس فاشل؟؟؟!!
edit: دى تجربتى انا بس, غير أصحابى ومعارفى اللى معاهم جراند/ايفو وبرافو.. وحتى الـeasytronic أنا اعرف 3 معاهم أسترا/فكترا ومفيش مشاكل..!!

يادرش يا جااامد...ايوه كده يا عم اظهر ....ليه مستخبي كده :):)

[wama1903]

جبتها ديوال لوجيك ماشية 5000 بـ 90 ألف

الف مبرووك تاني....و ربنا يعينك على الجنوط اللي اتسرقت دي

[ahmedsiyam]

الاخ الفاضل
مش عارف حاسس انك واخد الكلام كده بصفه شخصية
أيا كان و مش عارف جبت منين أني جربت و ماركبتش
للعلم
الاوبل موجودة معايا من الزيرو و غيرت أسطوانة دبرياج علي ٥٠٠٠٠ كلم
الكولت قعدت معايا ٦ شهور عملت بيها ١٧٠٠٠ كلم و غيرت الاسطوانة برضه علي ٦٠٠٠٠ كلم و كنت جايبها مستعملة
الايفو مش بتاعي و صاحبها غير أسطوانة علي ١٧٠٠٠ كلم
ده تجربتي الشخصية و انا مش داخل أعيب في العربية و لا حاجة انا بسال علشان اشتري
مع احترامي لرأيك طبعا و هو صحيح و مقنع جداً
لكني ضايقني جداً انك بتتكلم علي افتراض أني مش فاهم حاجة و داخل حامي اوي
بصراحة الردود اللي زيي دي هي اللي خلتني اقصر في دخول المنتدي لفترة طويلة و مع ذلك انا شايف ان الناس زيي ماهي

[HiTcH]

السلام عليكم
انا معايا ايفو باكدج 2 مانيوال بقالها معايا سنه و 9 شهور
مشيت بيها لحد دلوقتى 56000 كيلو متر تقريبا (اعتقد دى مسافه كبيره)
هحاول اتكلم عنها شويه (كمستخدم) بعيدا عن الفنيات اللى انا مفهمش فيها اى حاجه
للتوضيح: انا سواقتى داخل القاهره على الطريق الدائرى - خارج القاهره طريق بورسعيد و طريق الاسكندريه الزراعى
حتى الان السياره ممتازه (عفشه - موتور - فرامل - عزل الاصوات الخارجيه - تكييف - اطارات - الطاره المالتى فانكشن - الخامات الداخليه - الصاج الخارجى )
اعلى سرعه جبتها : 175
اعلى سرعه اخدت بيها ملف حنين: 130
اعلى سرعه اخدت بيها ملف قاسى: 85
اطول فترة قياده مستمره : 4 ساعات (مريحه)
اخر صيانه: 50000
كويس لحد كده :)
المميزات اثناء القياده من وجهة نظرى:
1- العربيه ارتفاعها عن الارض ممتاز جدا جدا (مبحكش فى مطبات)
2- الفرامل ممتازه
3- استخدام المالتى فانكشن مريح
4- الفاميه الخلفى عشان اللى بيركب ورايا من العائله
5- كمبيوتر الرحلات والاعطال
6- استهلاك البنزين ظريف جدا
طبعا مش هتكلم عن الاير باجز عشان دى اساسيات :)
نيجى للجزء المهم اللى هو ايه عيوبها (من وجهة نظرى)
1- زجاج فوانيس الشبوره (بتتكسر من اقل حاجه)
2- الابواب اللى ورا بتزيق كل 3 شهور واظبطها وانا فى التوكيل (هى مش حاجه مهمه بس الصوت سخيف اوى)
3- الطاره قشرت (قالولى هيغيروها فى الضمان و هيكلمونى لما الطاره الجديده تيجى)

نيجى للاسئله المعتاده
1- ايه رايك فى قوة الماتور؟
الاجابه المعتاده: ممتازه جدا بالنسبه لسواقتى حاليا (انا كان معايا النترا 2007 قبلها كنت بطير بيها من على الارض بس دلوقتى اتجوزت و معايا بنوته و بطلت اللى كنت بعمله الحمدلله ) - وعلى العموم العربيه بتجرى جدا لما تقرص عالموتور
2- طب سعر قطع الغيار؟
اكيد غاليه طبعا انت فاكر نفسك راكب عربيه بتترخص تاكسى :) (بس طول مانت مبتعملش حوادث او عامل تامين شامل بتسأل ليه اصلا)
3- طب و سعر اعادة البيع؟
فى حدود المسموح بيه - تقريبا يقل 10000 جنيه كل سنه بس المشكله ان المعروض قليل و المطلوب قليل
4- طيب والتوكيل ؟
سىء جدا - بس برده ربنا يخلى مراكز الخدمه المعتمده (البرقان و الاقصى)
ايه تانى ؟؟؟؟؟
مفيش حاجه فى دماغى حاليا بس لو حد عايز يسألنى فى اى حاجه انا موجود ويارب اكون قدرت افيدكم
واعذرونى على هزارى و قله خبرتى الفنيه
والله الموفق و المستعان :)

[ahmedsiyam]

تقييم جميل و موضوعى من غير تفاصيل كتير و لخصت فيه المفيد يا باشا
انا بافكر فيها مانيوال فعلا و اظن دى فترة كافية تقدر تحكم فيها على العربية ( 56000 )
لكن من كلامك على السرعات فى الملفات هل العربية ثباتها متواضع و لا انت مش بتضغط عليها فى الملفات
و ربنا يديك خيرها و يكفيك شرها

[Most_H]

تقييم جميل و موضوعى من غير تفاصيل كتير و لخصت فيه المفيد يا باشا
انا بافكر فيها مانيوال فعلا و اظن دى فترة كافية تقدر تحكم فيها على العربية ( 56000 )
لكن من كلامك على السرعات فى الملفات هل العربية ثباتها متواضع و لا انت مش بتضغط عليها فى الملفات
و ربنا يديك خيرها و يكفيك شرها

اسف على رفع الموضوع

بس كنت عاوز أعرف ثابتها اخباره اية؟؟ بالمقارنة بالكورى والألمانى

[ismms]

انا عندى سوال هى الشفتات الى فى الدريكسون دى بتنقل بين d/n/r ولا اية

[fouady]

انا عندى سوال هى الشفتات الى فى الدريكسون دى بتنقل بين d/n/r ولا اية

نقلات يعني 1 , 2 , 3 .. الخ لكن مش n r

[ismms]

شكرا طيب اية رايك فى العربية فيها مشاكل ولا اية اصل انا عاوز اجبها بس خايف
.

[hgkingdom]

لو سمحتو ياجماعه انا عايز راى حد معاه اوتو p2 لانى عايز اجيبها بس فى 3 اكدوا لى انى فيه اعطال كتير وانا مبفضاش اصلح

[hgkingdom]

السلام عليكم ورحمة الله و بركاته
انا معايا الأيفو 2011 اوتو p2
لسه عملها الصيانة 10.000 العربية هايلة بمعني الكلمة في كل حاجة ماشاء الله ولو الواحد رجع بيه الزمن حشتريها تاني لأن مفيش وجة للمقارنة بينها وبين الكوري و الصيني من الأخر عربية جميلة لو ناوي عليها توكل علي الله و مش حتندم بس حاول تجيب الأوتو p2
والفتيس الأوتو بتاعها جامد واحسن من الأوتو العادي في الأداء وسيبك اي حد بيشتكي غالبا بتبقي مشاكل فردية وربنا يوفقك

لو سمحت ربنا يباركلك فيها بس انا كنت عايز اجيبها وناس اكدتلى ان الفتيس مش عملى ايه رايك فى الكلام ده