بونتو ٢٠٠٠

[ahhazem]

يا شباب وخبراء البونتو
انا اتفرجت امبارح على بونتو موديل ٢٠٠٠ مواصفاتها كالتالي:
١٣٠٠ سي سي طبعاً
١-مانيوال
٢-تكييف وسنتر وزجاج كهربا
٣-وراشه بره ودواخلها سليمه وسقفها بس فابريكه
٤-صوت موتورها هادي قوي
٥-بس في صوت خروشه كده مع دوسة البنزين بتبان من قدام العربيه ولما سألته عليها قال انها بليه عاوزه تتغير
٦-لما سوقت العربيه لاقيت الدركسيون قافش جداً جداً ولما سألته قال انه كان بيربط العفشة الراجل ربطهولوه جامد وقالله انه هايفك بعد شويه لوحده مع المشي
٧المهم السعر المطلوب ٣٦٥٠٠

انا اتفقت معاه اشوفها تاني واوديها لمكان يفحصها ياريت لو تقولولي ابص على ايه فيها المره الجايه

وكنت عاوز رأي الخبراء في السعر ومواصفات العربيه دي يعني مناسبه وآخدها والا لأ علشان بصراحه قلقان ان يكون فيها شغل يتعبني بعدين وخصوصاً موضوع الدركسيون ده

وكمان ايه اخبار الصيانات وقطع العيار بتاعة الموديل ده؟
ومين بيفهم فيها ( انا ساكن في الهرم يعني ياريت لو حد يعرف مركز خدمه يكون قريب ومحترم وعنده حاجتها يبقى تمام جداً)

[ahhazem]

ايه ياشباب
بلاش اشتريها طيب !!!!!!!!!!!!!!
اصرف نظر يعني

[amr_lamor]

غاليه ياباشا جدا كمان خلي بالك موديل 2000 مفيهاش باور

[ahhazem]

غاليه ياباشا جدا كمان خلي بالك موديل 2000 مفيهاش باور

شكراً على ردك
انا فعلاً كنت شايفها غاليه وكنت ناوي اتكلم في السعر
هيا عموماً اتباعت خلاص وانا مازلت ابحث عن غيرها أو بوينتر ومش عارف استقر لسه
بس ياريت لو عندك فكره تقوللي ايه ظروفها من حيث الاسعار وانتشار قطع الغيار والصيانه
وصحيح الباور بيدأ من موديل كام؟

[mous6fa]

أنا حابب أنقل ليك تجربتي مع البونتو 2001 لمدة 6 شهور من الإستعمال ... أنا لسه بايعها على فكرة بـ 36500 وأخدت منها الساوند سيستم بتاعي ... العربية كانت كلها فابريقة بالكــااااامل من بره و جوه ... بس كان عدادها كبير (197500) وفيها شوية ظبط كهربا وعفشة والحمدلله ع كل شىء..
العربية دي من الأخر هقولك أهم حاجات تركز عليها وإنتا بتفحصها .. اولا الحساسات بتاعة بوابة الإنجكشن لازم تكون كويسة وإلا هتقرفك من العربية وتكرهها وتكره اليوم اللى ركبتها فيه ... لو الحساسات بايظة هتلاقي الأر بي أم طالع نازل وصوت العربية عاااالي وهتبقى ماشي بيها مخنوق اووووي اوووي ومتنكد - البوابة بالحساسات سعرها جديد (1500 جنيه) ولكن أنا بدلت القديمة اللى كانت فيها بواحدة إستيراد ودفعت 200 جنيه ومشيت بعدها زي الفل ....
لازم تتأكد من موضوع الباور اللى فيها عشان متدخلش ف قصة ملهاش لازمة لو الباور أو علبة الدركسيون فيها مشكلة..
بخلاف النقطتين دول هتفحص العربية طبيعي جدا زي اى عربية غيرها سواء هتفحص الموتور او العفشة أو الدواخل ... وبالنسبة للتكيف أنا معرفتش أبيع العربية إلا لما الزبون أستلمها والتكيف فيها تلاااااااجة بعد ما لحمت ماسورة السربنتينة وشحنت الفريون والموضوع ده كلفني بالظبط 180 جنيه..
نتكلم عن العربية بقى بصفة عامة :) ... عربية ممتازة بكل المقاييس لدرجة إنى حاليا بدور على واحدة 94 أو 95 تكون حالتها كويسة عشان كنت محتاج فرق السعر بين الموديلات دي والعربية اللى كانت معايا ... ثبات أكتر من رائع .. عربية فخمة وركوبة مميزة ... قطع غيار مش غالية للدرجة اللى تخوفك أو تخليك تصرف نظر عنها ... بيظهر عليها التظبيط والترويش بأقل القليل ... تسارع معقول بالنسبة لقوة موتورها ... وكانت اقصى سرعة جبتها 145 نظرااا لحالة الموتور المقبولة نوعا ما ... العربية فيها كماليات وتكنولوجيا مناسبة جداااا لسعرها ... بس أنا كانت مشكلتي معاها إنى معرفتش أصرف عليها ف الأواخر لضيقة مالية .. إنما طول ما بتصرف عليها ومش بتستخسر فيها هتحس إنك راكب أحسن عربية ف الدنيا .... العربية مش معقدة وناس كتير فاهمة فيها ..
هقولك بعض أسعار قطع الغيار اللى جبتها ف خلال فترة إستعمالي ليها وكمان اللى سألت عليها لمجرد العلم بالشىء : طقم دبرياج إيطالي كامل بـ 400 جنيه - الإسطوانة لوحدها جبتها بـ 90 ورجعت الطقم عشان الديسك والبلية كانت حالتهم ممتازة - ماسورة مياه تحت فرن الموتور أصلية بـ 200 جنيه - ســـرة للعجلة الأمامية اللى بيتربط فيها مسامير الجنط بـ 90 جنيه - موبينة 2 صباع تركي بـ 120 جنيه - فلتر هواء بـ 50 جنيه - بوجيهات ngk بـ 50 جنيه - سير الكاتينة بوش بـ 90 جنيه وبلية الكاتينة بـ 25 - ماستر دبرياج علوي بـ 200 والسفلى بـ 300 جنيه - فانوس خلفى بـ 250 جنيه - بإختصار من وجهة نظري انا شايف إن الأسعار معقولة ومش تقلق أو تخوف
كلمة أخيرة : صون العربية تصونك ... بهدلها تبهدلك

[ahhazem]

ياباشا انا مش عارف اقولك ايه بصراحة
انت كده اجملت الموضوع وافدت بالفعل
انا مازلت بدور على عربية تكون حالتها نضيفه علشان متعذبش بيها بعدين
وربنا يقدم اللي فيه الخير يارب
شكراً مره تانيه على وقتك وردك