سخونية السيارة فى السفر و الدائري

[hobaus3000]

السلام عليكم ورحمة الله وبركاته

عندى مشكلة بسيطة فى عربيتى 128 موديل 85 -1100 سي سي وهى سخونة العربية فى الطرق الطوالى سواء بالليل أو بالنهار وهى ان وانا ماشى على 90 أو 100 الاقى مؤشر الحرارة فوق 90 يعنى 100 والمروحة شغاله علطول ده بالليل فى جوه درجة حرارة معقولة فى طريق مصر – اسكندرية الصحراوى الساعة واحدة بالليل أما بالنهار المشكلة اكبر من كده لأن العربية السخونة بتزيد عن كده يمكن فى تلتين الحرارة يعنى قرب الاحمر ولكن فى وسط البلد الحرارة ممتازة فى عز الحر الساعة اتنين الظهر ودرجة حرارة الجو39.

هبدأ بالتغيير اللى حصل فى العربية بعد ما كانت شغاله كويس حصل ان العربية سخنت قبل حتى ما اعمل طقم الشمبر وكان الكلام ده فى شهر يناير اللى فات بسبب فقدان مياه الراداتير وبعدين غيرت جوانات وش السلندر وتم كشط الوش بنسبة 15من ميه وكانت العربية بتسخن جامد قوى فبعدها بمده ومع دخول الصيف ومع وجود فقعات مياه فى الراداتير مقتنعتش بكشط وش السلندر اللى حصل قبل كده وتم التربيط على الوش يمكن يكون مجرد تربيط ولكن لم يفيد فى شئ ومازالت الفقعات موجودة فاتفقت مع ميكانيكى اخر نفك الوش ونقيسه عند الخراط عشان نتأكد من اذا كان فى تقفيع فى الوش ولا لأ وبالفعل فكينا الوش وذهبت بالوش لخراط تانى وقولتله يقيسه ويشوف لو فى تقفيع وبالفعل لقى فى تقفيع وتم كشط الوش للمره التانيه وقال انه كشط 15 من ميه وبعدين احنا كنا مركبين جوانين عاده قبل كل الكشط فى المرتين وقبل كل المشاكل وكانت الحرارة طبيعية ولكن بعد الكشط الاخير الميكانيكى قاللى هنغيير جوان من الاتنين بواحد دوبل وكده يبقى اللى راكب واحد دوبل وواحد عاده وركبنا والحمد لله الفقعات فى الرداتير اختفت والحرارة قلت عن الاول ولكن مازالت كما شرحتها فى الأول.

وكمان انا لسه عامل طقم شمبر والحمد لله خلصت تليين بحوالى 1600 كيلو تقريبا وتغيير زيت فى مواعيد مناسبة للتلين.

طيب اهى اللى انا عاملته لعلاج السخونة:

1- شراء راداتير جديد نحاس 3 ماسورة من 4 شهور وكمان الكشف عليه عند بتاع الراداتير وعلى التقليب وقال ان الحمد لله مفيش فيهم مشكلة وقال اي مشكلة يبقى هما خارج الحسبه وتم غسيل دورة التبريد بالكامل والعربية دايرة وتم تغيير غطاء الراداتير.

2- تغيير ثرموستات الحرارة اكثر من مره ومنهم مره جبت الثرومستات الاصلى بتعها وكان ثمنة 40 جنية لكن لقيته جايب نفس النتيجة فرجعته وهى ان الحرارة فى وسط البلد طبيعية المروحة تشتغل قبل النص وتفصل على التلت ولكن فى الطوالى المروحة تشتغل بعد النص وتفضل شغالة علطول ومبفصلش الا لما انزل بالسرعة للوقوف فى اشارة او بالتهدئة بسبب الطريق.

3- شراء مروحة جديدة للراداتير فيبر.

4- ضبط الكهرباء و التكيهات على الشعرة.

5- تم تغيير طقم كهرباء.

6- ضبط تقسيم السيارة والكاتينة.

7- تغيير علبتين الشكمان والكشف على الشكمان بالكامل ولايوجد تنفيث.

8- تغيير الزيت والفلتر قبل السفر.

انا طبعا عندى دلوقتى بعد كل ده شوية خبرة بسيطة فعلى خبرتى البسيطة انا قدام حاجة من الاتنين ياريت تساعدونى فيها لأنكم أدرى منى فى المواضيع دى الاول ان يكون هناك تصغيير حجم غرفة الحريق بسبب كثرة الكشط وانا عايز اعرف هو كده الجوانات كفايه ولا بعد الكشط مرتين 15 من ميه و 15 من ميه لأنى مش عارف احسب يبقى كده النسبه اد ايه اللى اتكشطت من الوش يعنى نعوضهم بكام جوان وسمكهم اد ايه يعنى اتنين دوبل ولا واحد وواحد ولا ايه.

تانى حاجة ودى شاكك فيها شوية وهيفدنا فيها الخبراء هل لو فى مشكلة فى الصبابات والقواعد والدلايل هل ده بيسمح بهروب جزء من السخونة الى منطقة التكيهات ولكن الميكانيكى لما فك الوش عشان يغيير طقم الشمبر كان بيقول ان الوش مش محتاج شغل او بمعنى اصح انه شغال مع العلم ان كاوتش الصباب سليم الدليل عدم وجود دخنة من الشكمان اول الدوارة الصبح طيب وهل ممكن يكون هروب جزء من الكبس هو اللى يسخن العربية بالدرجة الكبيرة دى.

ملحوظة وانا ماشى فى الطريق السريع وفى بداية طلوعى بالعربية وهى لسه حرارتها على الربع مثلا ولسه مسخنتش الاقى مؤشر الحرارة بيزيد الى تقريبا فوق النص اللى هو 90 بسنه وبعدين الاقى المروحة اشتغلت على العكس فى وسط البلد او العربية واقفة الاقى مؤشر الحرارة على اقل من النص وبعدين المروحة تشتغل وبعدين الحرارة تنزل كتير والمروحة تفصل وبالنسبة لنقص المياة يعتبر معقول والمياه بتنقص فى القربة ولكن فى الراداتير المياه معقولة.

انا اسف على الاطالة ولكن المشكلة تعبت تفكيري

[saadelden]

هشرحلك بطريقه بسيطه سبب المشكله و حلها ان شاء الله

بص يا فندم العيب الي عندك ان دوره الميه مش ماشيه صح
طرمبه الميه في السرعات القليله بتقلب الميه تمام و ترجعها الرادياتير
لكن مع السرعات الميه مابترجعش الرادياتير و الميه بتفضل جوا الماتور و طبعا بتسخن و دا غلط علي الماتور جدا

الحل انك تركب كوعه الميه الكامله مش الفاضيه
بيبقى فيها ترموستات بتفتح دوره التبريد و تقفلها عشان الميه تروح و ترجع من الرادياتير و العربيه تفضل حرارتها ثابته لاتسخن ولا تبرد

دا حل
الحل التاني انك تلغلي خرطوم الميه الي راجع للماتور
فيه خرطوم جاي من الرادياتير من تحت و فيه خرطوم طالع من الماتور و رايح علي الرادياتير و فيه خرطوم تالت هو دا الي يتلغي
عشان تخلي الميه ترجع ع الرادياتير علي طول و العربيه هاتفضل بارده معاك

[drmagieed]

من خبرتي البسيطة في ال 128 وحسب كلامك المياه بتنقص في القربة وما بتنقصش في الرادياتير ... دة معناه إن القربة بتزود الرادياتير مية لما يحتاجها ولما تسخن الميه في الردياتير ما بترجعش القربة تاني وبالتالي تسخن الماتور ... وزي ما قالك الأخ سعد الدين مشكلتك في دورة التبريد بالكامل بداية من القربة وخرطومها وغطاء الردياتير والردياتير نفسة والثرموستات وكوع المية وطرمبة المية وبالذات طرمبة المية ... راع علي الدورة بالكامل وربنا يوفقك لحل مشكلتك

[hobaus3000]

طرمبة المياة

اولاً شكراً على اهتمامكم
وانا عاجز فعلاً عن الشكر

ولكن انا عندى تعليق على موضوع طرمبة المياة لأنى لسه مغيرها جديدة من حوالى 7 شهور او 8 شهور وجايبها جديدة ايطالى وبعدين العربية كانت شغاله بيها ومفيش مشكلة قبل الكشط لكن لو هنقرب شوية من اقتراحتكم ممكن يبقى سير الدينمو و الطرمبة وبعدين الراجل بتاع الراداتير لما كشف على الراداتير وتقليب الطرمبة قاللى شغالين كويس لكن انا عايز اعرف النسبة اللى اتكشطت من الوش دى تكفى بتعويضها جوان دوبل و جوان عادة بدل من جوانين عادة اللى كانوا راكبين ولا المفروض نزود ويبقى اتنين دوبل انا مش عارف .

[waelfarid]

هوا جوان واحد دوبل زي الفل وليس جوانين مفرد فوق بعض ال15% دول 15 من مية من الملليمتر لحسن تكون فاكرهم كتير وبعدين الثرموستات اللي في الكوعة شغال ولا ملغي والمروحة الكهرباء دي كام ريشة لو فية عدد ريش اكتر استخدم ذات الريش الاكثر وضبطة الكربراتير لو فيه نسبة هواء زيادة بيسخن المكنة وبالتوفيق ان شاء الله

[hobaus3000]

هوا جوان واحد دوبل زي الفل وليس جوانين مفرد فوق بعض ال15% دول 15 من مية من الملليمتر لحسن تكون فاكرهم كتير وبعدين الثرموستات اللي في الكوعة شغال ولا ملغي والمروحة الكهرباء دي كام ريشة لو فية عدد ريش اكتر استخدم ذات الريش الاكثر وضبطة الكربراتير لو فيه نسبة هواء زيادة بيسخن المكنة وبالتوفيق ان شاء الله

انا بشكر حضرتك جداً ولكن انا حابب اوضح لحضرتك حاجة ان الكشط حصل مرتين ورا بعض 15 من ميه و مره تانية 15 من ميه و الثرموستات اللي فى الكوعة ملغية والمروحة تقريباً 4 او 5 ريشة وهواء الكربراتير المفروض ان الميكانيكى ظبطة

[hobaus3000]

كشفت على سحب المروحة ولقيتة بيجيب من بره لجوا يعنى الطبيعى لاى مروحة وتم الكشف على الراداتير مره اخرى عند بتاع الراداتير وقال انه سليم وقال الراداتير جديد وبيقول اللى يقولك من الميكانيكية ان الموضوع تبع الراداتير (حط صباعك فى عينيه زى ماقال) وعلى فكره ده الراجل بتاع الراداتير اللي بتعامل معاه ومش هو اللى مركبه انا ركبته عند واحد تانى جنب الميكانيكى اللى عمل طقم الشمبر يعنى من الاخر مش هنقول خايف يعيب فى شغله بالعكس كل ما اروحله يقولى الراداتير جديد ومش محتاج حاجة وبعدين فكينا كوعة المياة للتأكد من عدم وجود سيلكون سادد مجارى المياه ولم نجد شئ وفكينا الماسورة اللى خارجة من الطرمبة ورايحة على كوعة المياة برضه للكشف ايضاً عن اذا كان فى سيلكون مضيق فتحة خروج المياه من الطرمبه ولم نجد شئ كده فى دورة المياة مش فاضل غير طرمبة المياة وانا لسه مغيرها فى شهر 12 اللي فات يعنى بقالها 7 شهور هى تمنها مش غالى يعنى 100 جنية الايطالى الاصلى يعنى ممكن اغيرها لكن حرام اغيرها وفى حاجات تانية شاكك انها سبب المشكلة بعدين هل فى خلال 7 شهور تكون تقليبها قل؟
السؤال اللي لسه محدش جوابنى عليه انه هل كده الجوانات كفايه ولا لأ بعد الكشط مرتين 15 من ميه و 15 من ميه يعنى هل بكده تم تصغير الغرف فأدت الى سخونة العربية زيادة يعنى كده النسبه اد ايه اللى اتكشطت من الوش يعنى نعوضهم بكام جوان وسمكهم اد ايه يعنى اتنين دوبل ولا واحد دوبل وواحد عادة ولا اتنين دوبل ولا ايه

تاني سؤال هل لو فى مشكلة فى الصبابات والقواعد والدلايل هل ده بيسمح بهروب جزء من السخونة الى منطقة التكيهات مع العلم ان كاوتش الصباب سليم الدليل عدم وجود دخنة من الشكمان اول الدوارة الصبح طيب وهل ممكن يكون هروب جزء من الكبس هو اللى يسخن العربية بالدرجة الكبيرة دى

[hobaus3000]

هو محدش بيرد علينا ليه

يا جماعة بعد اذنكم حد يتطوع ويرد ويحسسنا ان فى امل وان عارف انى مش ال واحد يحصل معاه كده والمنتدى ده مليان خبراء واساتذة فى الميكانيكة

[saadelden]

ياباشا جربت الحل الي قولتهولك ؟

[hobaus3000]

ياباشا جربت الحل الي قولتهولك ؟

احب اعرف حضرتك انى لو عملت الحل الاولانى هيحصل انثرموستات الكوعة هتفضل فاتحة على طول فى الطوالى لأن أساساَ حرارة العربية بتبقى معدية التسعين اللي هو اساساً درجة الحرارة اللي بتفتح عندها ثرموستات الكوعة ده بالنسبة للحل الاول اللي حضرتك اقترحته

بالنسبة للحل التانى انى الغى خرطوم الميه الي راجع للماتور لو حضرتك عارف ان فى خرطوم خارج من الكوعة رايح على الراداتير وواحد راجع من الرادتير وخرطوم جاى من ماسورة من طرمبة المياة ورايح على الكوعة وده بيزود المياه اللى خارجة من الماتور ورايحه عى الراداتير فأزاى الغيه
انا رأى ان الحل فى حاجة من الاتنين يا أما ان احنا زودنا مساحة الغرف بتاعت الاحتراق وا كبرناها او يكون هناك شرخ او تنفيث بسيط فى الوش او الوش عايز يتغيير يا أما ان يكون موضوع طرمبة المياة وهو احتمال ضعيف

[saadelden]

احب اعرف حضرتك انى لو عملت الحل الاولانى هيحصل انثرموستات الكوعة هتفضل فاتحة على طول فى الطوالى لأن أساساَ حرارة العربية بتبقى معدية التسعين اللي هو اساساً درجة الحرارة اللي بتفتح عندها ثرموستات الكوعة ده بالنسبة للحل الاول اللي حضرتك اقترحته

بالنسبة للحل التانى انى الغى خرطوم الميه الي راجع للماتور لو حضرتك عارف ان فى خرطوم خارج من الكوعة رايح على الراداتير وواحد راجع من الرادتير وخرطوم جاى من ماسورة من طرمبة المياة ورايح على الكوعة وده بيزود المياه اللى خارجة من الماتور ورايحه عى الراداتير فأزاى الغيه
انا رأى ان الحل فى حاجة من الاتنين يا أما ان احنا زودنا مساحة الغرف بتاعت الاحتراق وا كبرناها او يكون هناك شرخ او تنفيث بسيط فى الوش او الوش عايز يتغيير يا أما ان يكون موضوع طرمبة المياة وهو احتمال ضعيف

بص يا فندم
كوعه الميه بتنظم دخول الميه للماتور
الي بتعمله انها بتقفل الخرطوم الي جاي من الرادياتير و تفتح الخرطوم الي فوقيه مش الي رايح للرادياتير
ف الميه بتفضل تدور جوا الماتور فقط لحد ما الماتور يوصل لدرجه حراره معينه و الترموستات بتفتح تدريجي لحد ما توصل درجه الحراره 90 مثلا
و اما بتفتح للميه عشان تدخل ف نفس الوقت بتقفل الخرطوم التالت عشان الميه تعدي ع الماتور و تطلع علي الرادياتير

كوعه الميه مابتقفلش خرطوم واحد , لا دول خرطومين

دي حاجه

الحاجه التانيه لو مش مركب كوعه الميه بتستعوض عنها بانك تلغي الخرطوم التالت عشان تفضل الميه داخله من الرادياتير و راجعه ليه و يبقى اندفاعها اكبر

لو الخرطوم دا مش مسدود مع السرعه العاليه طرمبه الميه بتقلب الميه اسرع ف الميه مابتلحقش ترجع الرادياتير لانها بترجع من الخرطوم التالت

جرب تلغيه و مش هاتخسر حاجه
يمكن الحل دا ينفع معاك زي ما نفع معايا

[hobaus3000]

بفضل الله وجدت الحل

يا جماعة انا اسف انى برد دلوقتى بعد كل الوقت ده بس والله والله العربية طلعت عيني بجد و غرمتني كتير كتير جداً الله يعوض علينا بس اخيراً لقيت الحل وعرفت سبب المشكلة وطبعاً ردى دلوقت عشان ممكن يفيد حد فى يوم من الايام لما يقرا الموضوع يعني للأستفادة وهو:-
ان بعتذر للأستاذ saadelden و الاستاذ drmagieed و بعتذر لنفسي و لوقتى ومجهودى ومالى على اني مسمعتش كلام الاستاذ saadelden و drmagieed وموضوع الطلمبة طبعا بعد ده كله اقعد مع نفسي وبعد ما فكرت ابيع العربية 1000 مرة افتكرت ان المشاكل كلها بدأت من بعد تغيير الطلمبة تخيلوا وفعلا قمت بفك الطلمبة الحالية وتركيب الطلمبة القديمة (شوفتوا ان الواحد ميفرطش فى حاجته اللى بتتغير من العربية علشان بتنفع) المهم سبحان مغيير الاحوال طبعا الحمد لله هنا بقى بان الضمير فين.
وهى طبعاً بتنقط تنقيط بسيط خالص طبعاً بسبب انها كانت مركونة يعني اكيد الاولسية نشف والبلي اكيد جرالوه اللى جرالوه بعد سنة ركنة المهم طبعاً مكنتش ناوى اتلسع تانى واشترى واغيير ويطلع العيب مش منها فقررت تغيرها بالقديمة اولاًَ ثم رؤية النتائج.
الضمير فين بقى هقولكم انا روحت اسأل على الطلمبة دلوقتى بكام وفى نفس الوقت نوعيه احسن من اللى راكبه فقالت لى السيدة التى تبيع وهم فعلاً اهل ثقة بالنسبة لى بعد اكثر من معاملة ربنا يجعلوا فى ميزان حسناتهم قالت ان عندها نوع ايطالى اصلي مش مضروب قولتلها ماهى اللى كانت راكبة كانت ايطالى قالتلى فى نوع اسمه D.A.R قولتلها برضه اللى كانت راكبة نفس النوع ورتني العلبة والعجيب فى الموضوع لقيت مكتوب على العلبة Fiat 128 والعلبة اللى كانت عندي مكتوب عليها LADA قولتلها العلبة اللى كانت عندى مكتوب عليها LADA فقالتلى طلمبة اللادا غير طلمبة 128 وقالتلى هما بيحطوا الطلمبة المضروبة فى العلب دى ويبيعوها على انها الاصلي والله اعلم (ان بعض الظن اثم) قالتلى بص على الطلمبة واقرا اللى مكتوب على الجنب بصيت لقيت مكتوب D.A.R MADE IN ITALY قولت اتأكد من اللى كانت راكبه ملقتش عليها كلام فعلاً الله يسامحهم وطبعاً الاتنين نفس السعر.