باركولي بقي هحجز اللينا الاسبوع ده إن شاء الله

[eng_ahesham]

السلام عليكم
رجالتنا الحلوين
روحت امبارح اتفرجت علي اللينا الـ Pkg 1 في الدقي
هي عربية ماشاء الله حلوة والفئة الاعلي بتاعنها احلي بس الفرق 22الف جنية فا انا مش هقدر ادفع 22 الف زيادة علشان كماليات الصراحة
المهم تباركولي وتدعولي ربنا يعني علي قسطها ويكفيني شرها ويكفيها شري
بس اللي خنقني شوية ان أ / محمد كامل بتاع المعرض بيقولي انت تحجز وهتستلم في حدود شهر و نص او شهرين
فا انتوا ايه رايكم في الكلام ده ومواعيدهم بتبقي ايه
وبرضة الرجالة اللي معاها اللينا ال 1400 ال77حصان رايهم ايه في ثبات العربية
العربية اللي شفتها انا امبارح 1600 سي سي (110 حصان ايطالي اصيل)
فيها 2 ايرباج و فرامل ABS & EBD و فيتيس ايزيترونك و كاسيت بيركبوه هنا وفيها جنوط 16 فيات اصلي
ايه رايكم في الخطوة دي وتحبو تنصحوني باية
وشكرا مقدما

[S O P H O S]

ربنا يكتبلك الخير فيها ..

[ahmedsiyam]

مبروك مقدما و اختيار موفق و هاتعجبك جدا ان شاء الله

[MohammedAladel]

ربنا يوفقك ويكفيك شرها ويديك خيرها

المهم هو الفتيس إيزى ترونيك ولا ستبترونيك عادى ؟

وبالفعل يوكو قال الكاسيت بيركبوه هنا بس ياترى نوع نضيف ولا أى كلام

[mohamed1]

هيا فيها مالتى فنكشن ولا لأ
وبالنسبة للجنوط اسبور ولا حديد

[ahmad--ezzat]

مبرووك عربيه ممتازه وربنا يستر :)

[eng_ahesham]

MohammedAladel الفيتيش ايزيترونيك يا باشا زي بتاع الايفو كده
وموضوع الكاسيت ده والله مش عارف نضيف ولا اي كلام لسة مشفتهوش

mohamed1 الطارة في باكدج 1 عادية لكن في باكدج 2 مالتي فنكشن
والجنوط سبور فيات اوريجنال

[eng_ahesham]

الفكرة بس يا رجالة اني قابلت واحد امبارح معاه اللينا ال77 حصان موديل 2009 وبيقولي مشكلة اللينيا الوحيدة هي ثباتها
بيقولي ثباتها مش قد كده عاملة زي الالنترا
طبعا هو قالي الكلام ده اتصدمت والله
ياريت يا رجالة حد يفيدني في موضوع ثبات العربية دي من الناس اللي راكباها
وجزاكم الله خيرا

[ayman2]

الفكرة بس يا رجالة اني قابلت واحد امبارح معاه اللينا ال77 حصان موديل 2009 وبيقولي مشكلة اللينيا الوحيدة هي ثباتها
بيقولي ثباتها مش قد كده عاملة زي الالنترا
طبعا هو قالي الكلام ده اتصدمت والله
ياريت يا رجالة حد يفيدني في موضوع ثبات العربية دي من الناس اللي راكباها
وجزاكم الله خيرا

الكلام ده مش صح العربيه ثابته ثابته جدا لدرجه انى جريت جنب bmw 525 وفرقت عنه حتى 210
والراجل ذهل وطبعا لما فاق قطعنى واحسن واحد يقولك هو يوكو لكن حافظ دائما على ضغط الاطارات وتربيط العفشه ومواتير الفيات عموما عزمها عالى وعصبيه جدا واختيار موفق ان شاء الله

[eng_ahesham]

حبيبي يا ayman2 والله
طمنتني يا اخي
ويوكو بصراحة قعد امبارح يقولي اللينا ... انسي ....ثباتها جامد جدا ..... و 210 وملفات وحركات فطمني برضة شوية
لكن انا عندي اولويات عربيتي بتبقي ثبات + سرعة قصوي + امان
جنان شباب بقي :))

[ayman2]

العربيه ده هاتديك كل اللى انت عايزه ان شاء الله من سرعه وامان وثبات وشد وكل شىء ودائما هتكون مع الكبار المحترمين وانسى بقى الماركات اللى ماليه الشارع وماتنساش انت راكب أوربى وفيات وأنا بجرى بجد فى السفر لكن فى الداخل بكون على مهلى وأكبر دماغى لأن عارف ان معى وحش بخاف منها بجد

[eng_ahesham]

حبيب قلبي يا ayman2
توكلنا علي الله

[ayman2]

ربنا يوفقك ولو عايز اى شىء من التوكيل والمبيعات كلنا معاك

[eng_ahesham]

من ناحية عايز فانا طماع
كل مشكلتي في ميعاد التسليم
بيقولولي شهر ونص او شهرين
فانا اتكدرت من المواعيد دي
وبرضة قلقان تزيد عن كده

[ayman2]

انت حاجز فى مدينه نصر ولا الدقى