مشكله سخونه السينا

[mohamed_rhem]

السلام عليكم ورحمه الله وبركاته
ده اول مشاركه لي في منتدي الفيات
ويارب اجد ضالتي
اخويا معاه سينا 2001 بتسخن والميه بتقل قوي لو راح مشوار ورجع
مع العلم ان ظاهريا دوره الميه مظبوطه والغطاء بتاع القربه جديد ومفيش تنفيس ومفيش ميه بتنزل
طيب العربيه بتسخن قالوا غير الشكمان غيره
برضه بتسحن والميه بتقل
يعمل ايه
ارجو الافاده من زوي الخبره
وشكرا مقدما

[motoxp]

والله معايا مبتعملش كده اكيد فيه عيب عندك روح التوكيل وان شاء الله لها حل

[فادى]

لو مفيش تسريب من بره, يعنى العربية مش بتنقط مياه, يبقى حاجة من تلاتة :
- الفيات معظمه دورة مفتوحة, و ده معناه انو غطاء الرادياتير بسوسته, بيسمح بتهريب البخار, عشان كده الكثير من هذه السيارات المياه بتنقص فيها لكن بمعدلات بسيطة, يعنى لو المياه بتنقص كل شهر أو اتنين يبقى الموضوع تبخير لا أكثر و لا أقل و ده عادى لو الدورة عندك مفتوحة, معرفش السيينا دورتها مفتوحة و لا مقفولة, بص على غطاء الرادياتير و هتعرف.
- ممكن يحصل تسريب الى الزيت, و ديه خطيرة جدا لأنها ممكن تجيبلك وش سلندر, اكشف على الزيت و شوف لو لزوجته زائدة عن الحد و عامل زى "الطحينة", اذن هناك تسريب من مياه التبريد الى الزيت, و عالج هذا فورا.
- شوف المروحة هل بتشتغل فى ميعادها أو بتشتغل مرة و مرة لأ؟ ممكن تكون فيه مشكلة فى مقاومة المروحة أو الثرموستات.
- أخر مشكلة ممكن تكون فى ثرموستات الكوع, و ديه غالبا بتحصل نتيجة لوضع مياه عادية (حنفية) فى الرادياتير, و بتخليه يصدى, و بيقطع دورة المياه و يتسبب فى سخونة المحرك.
لو الحرارة بتعلى و بعدين بتقف عند حد معين أعلى من المعدل الطبيعى, يبقى غالبا دورة التبريد سليمة, و المشكلة فى امبير الحرارة بيكون سلك الأرضى ملمس, و لما تشغل النور أو مروحة التكييف بيعلى امبير الحرارة و ده معناه انو العربية مبتسخنش لكن امبير الحرارة بيعطى درجة حرارة غير طبيعية.
فى الحالة دى :
- لو المشكلة بتحصل بليل فقط, اطفى النور و لاحظ الأمبير, لو نزل لحدوده الطبيعية يبقى الأمبير هو المشكلة.
- لو المشكلة بتحصل مع تشغيل مروحة المكيف, اطفى المروحة و شغلها و لاحظ تحرك الامبير.

عموما و العربية سخنة, بص على القربة و افتحها بهدوء و حرص, لو المياه بتغلى جوه القربة, اذن الحرارة ساخنة عن الحد, لو المياه هادئة فى القربة اذن الحرارة طبيعية.(القربة و ليس الرادياتير).

[ziours]

لو سمحت يافادي بيه انا عندي 132 مجنناني في الحرارة ولفت كتير على الميكانيكية كلهم بيقولولي العربية مفيهش حاجة مفيش غير واحد قالي ممكن يكون الامبير بيغش كنت عايز اعرف اية قصدك بالارضي يكون ملمس و مكانه فين عشان اشوف لللامبير ده حل
شكرا و اسف لالاطالة