هو انا بوظت الموتور؟! D:

[magic girl]

السلام عليكم يا جماعة..

عايزة مساعدتكم في أول مشكلة بجد تحصل في العربية..

العربية سيينا 1.4, كانت ماشية معايا زي الفل و مش بتسخن و سحب و تكييف و ماشاء الله زي الفل..

من يومين كنت نازلة بيها مشوار, لفيت بيها شوية عند الحسين و رجعت عن طريق وسط البلد لكوبري اكتوبر للجيزة.. ببص كده لقيت الحرارة عاالية أوي.. قبل الأحمر بشرطة..

ركنت على جمب طبعاً, بطلت العربية و فتحت الغطا.. و بصيت لقيت المياة بتغلي في القربة.. طبعاً استنيت شوية و بعدين فتحتها حتة صغيرة, لقيت بخار المياة طالع أوي, طبعاً مكملتش فتحها عشان متحرقش بس استنيت شوية و فتحت حتة كمان..

تقريباً كل المياة اللي كانت جوة اتبخرت في وقت قياسي.

المهم كان معايا قماشة فكملت فتحها لحد الأخر, استنيت 10 دقايق, و بكل هبل مليتها مياة..

من غير ضرب طبعاً عشان انا أول مرة بحصلي الموقف ده و معرفش اني مينفعش ازود مياة و هيا سخنة و انا مبطلاها.. و مش معايا غير صاحبتي اللي مش بتسوق اساسا

المهم جيت أمشي بيها لقيتها عمالة تتنطط و بتبرجل و وصلت البيت بالعافية..

و طبعاً على ما وصلت كانت الحرارة عند الأحمر

ركنتها و قلت هيا اتخضت و هاتبقى تمام.. سيبتها امبارح وجيت أنزل بيها النهاردة, قلت أشيك على المياة لقيتها خلصانة, قعدت أحط فيها مياة, من غير ضرب تاني, خدت حوالي 4 لتر و انا واقفة مذهولة.. كانت عمالة تشرب المياة و مفيش حاجة بتنقط ولا يحزنون..

المهم مليتها و قفلتها و انطلقت.. انا ساكنة في أول الهرم عند المحافظة, يادوب مشوار لأول مراد.. و انا جاية راجعة نفس الحكاية, عدت النص بشرطة, برجلة كانها بتكح, و وقفت مني مرتين كده.. و لما كانت ماشية كان سحبها فظيييييع بجد مخنوقة يعني..

عايزة اعرف بقى انا بوظت ايه ؟؟

[misry]

اوعي تمشي بيها وروحي عن ميكانيكي على طول ...

أعتقد انه جوان وش سلندر ... ربنا يستر

أنا حصل معايا نفس الموقف بس الميكانيكي استنى شوية لحد ما العربية بردت وبعدين زود مياه عادية

ودور العربية ولما لقى المياه بتغلي بسرعة قال ده جوان وش سلندر بنسبة كبيرة بس بعد شوية العربية بقت

كويسة فقال لي طالما المياه ما فضلتش تغلي على طول يبقى مش جوان ...


ولكن أعتقد انها جابت جوان عندك لأنك مشيتي بيها كتير والمفروض ده ما كنش يحصل ...

ربنا يستر ...

[moumen_hs]

95 % جوان وش السلندر ضرب لازم يتغيير فور

[maryano]

لازم توديها لميكانيكي يبص عليهاا ربنا يستر

[somy_san]

جوان وش السلندر ضرب

غالباً كده دا جوان وش السلندر ضرب من السخونة الزائدة .. وبكده بقت الميه بتخش على الموثور وبتتخطل بالزيت وتعمل مادة كده زي الطحينة لو ابيض .. ودا اللي بيخلي العربية تسخن وتبرجل .. ولو مشيتي بيها أكتر أجزاء الموتور جوه هتبدي في التآكل .. وتحتاجي ساعتها تعملي عمرة ( لا قدر الله ).

المهم الميكانيكي يفحص والمفروض انو يغير وش السلندر .. ويظبط التاكيهات (على حد علمي) ولازم طبعاً الزيت يتغير كللو .. وان شاء الله سليمة ..

بس اهم حاجة انك متشيش بيها .. عالميكانيكي على طول .. ولو طلع زي كلامي صح المصنعية تبقى في حدود 40 - 50 جنية كده.

ابقي قوليلنا عملتي ايه ..

[michael rafik]

ربنا يستر يكون جوان بس

[magic girl]

ربنا يستر, الف شكر على ردودكم يا جماعة..نا ان شاء الله هانزل كمان شوية اجيب الزيت واجيب فلتر و بعدين اخد العربية على الميكانيكي يشوف ايه اللي حصل..

[magic girl]

التجربة اللوزعية

رحت للميكانيكي, الراجل كتر خيره قالي نتأكد الأول ممكن تبقى حاجة تانية.. طلعت ان المروحة مكانتش شغالة.. جاب كهربائي و فكوا قربة المياة و قعدو يلعبوا في الفيوزات و الكهربا و التوصيلات, و شالي ثرموستات الكوع " رغم اني قلتله خليها بس كان مصمم , و العربية كانت حرارتها معدية الخط الأحمر و هوا شغال, و العداد طالع نازل.. المهم قعد كده شوية لحد ما المروحة اتظبطط, و بقت تشتغل و تفصل لوحدها..

المهم هو كان قالي ممكن ابقى اروحله يعملي زرار عشان لو المروحة فصلت لأي سبب اشده او ادوس عليه تشتغل لحد ما اخلص المشوار بتاعي.. حد فيكم عمل التجربة دي قبل كده ولا هو بيفتي؟؟

ثانياً سؤال كده, دلوقتي العربية مشيت كويس, بس بردو لسه حاسة في الطلعة بتاعتها انها مش متظبطة 100%, هل ممكن ده يكون عشان الزيت مفروض يتغير؟ انا هاغيره بكرة ان شاء الله بس ممكن يبقى من ده ولا احتمال تبقى حاجة تانية؟؟

تالت حاجة بقى الراجل خد مني 100 جنية , نص ليه ونص للكهربائي كنت متضايقة و استغليته أوي بس الحاجة والدتي كانت معايا و ادتني البصة المتينة فاستسلمت و دفعت.. بكرة مفروض هايركبلي المساعدين قدام و يغير الزيت, و عايز 100 بردو.. هل هو بيستهبل أوي ولا بيستهبل شوية؟؟

[mahmoudysf]

طيب طالما العيب طلع ان المروحة ما بتشتغلش لوحدها مع الحرارة
المفروض انو بيمشي مع العيب ده لغاية ما يظبط المروحة
بدون ما يلغي الثرموثتات
ويطمن على دورة التبريد ان ما فيش فيها اي تسريب
وان المروحة بتشتغل على السرعات البطيءة والعالية
انصحك تروحي لميكانيكي تاني فاهم كويس
ورجعي الثرموثتات تاني

[misry]

ياريت ترجعي الثرموستات تاني وتغيري الميكانيكي ...

[heba hesham]

جربى حكاية تغيير الزيت دى
وياريت وانتى بتغيرى الزيت..غيرى الميكانيكى..
ربنا معاكى

[Elawany13]

واضح انهم شوية نصابين
100 جنيه على ايه !!!!

فى اخر اسبوع فى رمضان تريموستات الكوعه باظ والميكانيكى شاله واديته 15 جنيه مصنعية

أنا عامل عندى مفتاح يدوى لتشغيل المروحة فى حالات الطوارئ
أو لما احب اتأكد ان المروحة شغاله
أو لو التريموستات باظ ولا حاجه
كنت شارى سلك ومكرونة ومفتاح مش فاكر سعرهم بس هما كانوا بكلام فاضى ببضع جنيهات
والكهربائى عملهالى بـ 10 جنيه مصنعية

طبعا اسعار المصنعيات بتختلف من مكان لآخر ومن صنايعى لآخر
بس كله بحدود بردو
مش لدرجة 100 جنيه علشان شغلولك المروحة
وشال تريموستات الكوعه !!!

ومدام العيب مش من الجوان مش محتاجه تغيير زيت دلوقتى إلا لو كان معاده جه

[ahmed_gamal777]

لو ميعاد تغير الزيت
غيرى الزيت - عند اى محل تغير زيت من 5 ال10 جندى( بنزين امارات مصر انضف البنزينات ب 12 جندى)
لو المساعدين محتاجين يتغيروا - ب 30 ج او 40 جندى بالكتير اوى
الميكانيكى بتاعك دا كرشة واسع

[magic girl]

شكرااااااا.. انا اتدبست فعلاً و مش ناوية اروحله تاني.. هو فعلاً حرامي يعني, بس للأسف كان اقرب واحد و مكانش ينفع امشي بالعربية و هيا مروحتها مش شغالة كده..

أنا عامل عندى مفتاح يدوى لتشغيل المروحة فى حالات الطوارئ
أو لما احب اتأكد ان المروحة شغاله

ماهيا دي الفكرة اللي قالي عليها, ممكن اعرف حضرتك عملتها فين عشان خلاص الراجل ده اتحط في البلاك ليست عندي؟؟

لو ميعاد تغير الزيت
غيرى الزيت - عند اى محل تغير زيت من 5 ال10 جندى( بنزين امارات مصر انضف البنزينات ب 12 جندى)
لو المساعدين محتاجين يتغيروا - ب 30 ج او 40 جندى بالكتير اوى
الميكانيكى بتاعك دا كرشة واسع

انا غيرته فعلاً عشان معاده كان جيه, و ابن اللذينة غيرلي المساعدين و الزيت ب 100 بردو.. يعني اتسرقت في 50 جنية زي الباشا كده.. على العموم الواحد مش بيتعلم ببلاش بردو

[Elawany13]

انا عامل مفتاح المروحة عند كهربائى فى طنطا
اى كهربائى نص لبه يعرف يعملها
بس مدام بتقعى مع نصابين اتفقى الأول على المصنعية وفاصلى معاهم