فيات بونتو كلاسيك اتجننت

[mahmoudfawzypr]

واحد صاحبي معاه بونتو كلاسيك موديل 2009 وماشية 22000 كيلو ......العربية ببسم الله ماشاء الله كانت تحفة وماشية كويس جدا ..لغاية لما راح حط بنزين من بنزينة موبل اللي في الشيخ زايد جنب جامعة زويل
ومن ساعتها العربية اتجننت بمعنى الكلمة
اللي بيحصل :
1:لما العربية تكون ممورة ال rpm بيقعد يعلى ويوطي ...المفروض الrpm بيكون على 800 لفة في الدقيقة فجأة ينزل ل 400 والعربية تكون حتبطل وبعد كده يطلع تاني ويزيد عن ال800 وبعدين يرجع على ال 800
2:احيانا لما بيجيب التاني ويدوس بنزين العربية مبتستجيبش وبتقعد حوالى 5 ثواني لغاية لما تستوعب انك دوست دواسة البنزين على الاخر فتنطلق عادي جدا
3 مع تشغيل العربية بيطلع دخان اسود وليه ريحة بنزين من الشكمان ولكن الدخان ده مبيطلعش تاني بعد ما تمشي بالعربية دقيقتين ولا حاجة

صاحبي ودا العربية لواحد بتاع فحص كمبيوتر قاله ان حساس البوابة قاري ارور ...الراجل مسح الارور ...وقاله خد بيها لفة وتعالى ...برده محصلش تغيير ..والراجل حط العربية على الكمبيوتر ملقاش ارور تاني والعربية زي ما هي
بعد كده بيومين صاحبي ودا العربية التوكيل ...في التوكيل المهندس قاله ان حسلس اللمبادا (الشكمان) بايظ ولازم يتغير فصاحبي ساله هل فيه اي ارور تاني المهندس قاله لا هو الحساس ده بس


وبصراحة لا انا ولا صاحبي مصدقين كلام البشمهندس خصوصا ان في ناس على مواقع اوروبية عندهم نفس المشكلة وغيرا حاجات كتيير ومنها الحساس ده وحصلش حاجة

فلو سمحتم لو حد يعرف المشكلة دي سببها ايه يقول خصوصا ان صاحبي ناقصله شوية ويولع في العربية

[graffittiii]

بص ياباشا أنا هكتب رد بإعتبارها مشكلة بنزين ...
وعامة الخطوات الجاية دي مفيهاش أي ضرر أيا كانت المشكلة ...

واضح أن البنزين كان مغشوش ...
_لازم يحاول يفضي التانك بإنه يحرق علي النقلات ويشغل التكيف لحد مش يتبقي إلا حجات بسيطة ...

_بعدها يطلع يحط بنزين من مكان موثوق فيه ... ويفضي مع التفويلة compelete fuel system cleaner بس يكون نوع محترم ...

_بعدها يستخدم منظف للبوابة ( المشكلة بتبقي فـ حساس الـ idle control عادة ) ... عشان مشكلة الـ RPM ....
_ويعمل rest للكنترول ... المفروض لو كان فيه error ميبقاش موجود بعد الخطوات دي ومؤشر الـ RPM يرجع لوضعه الطبيعي ...

حكاية الدخنة السودا من الشكمان دي مش متأكد من إيه السبب ... بس أعتقد هي ياإما بوجيهات يإما فعلا حساس الشكمان ... بس الجزء الأخير ده مش متأكد منه
...

[windofchange]

يفضي التانك اول حاجة بمعني ينزل البنزين المغشوش ده مش يحرقه فالموتور

[mahmoudfawzypr]

اولا شكرا للاهتمام والرد واسف على التاخير ..

ثانيا :للاسف احنا طبقنا االخطوات دي ....فضينا التانك حطينا بنزين 92 من محطة محترمة (موبيل جامعة الدول) وحطينا منظف لدورة الوقود (liqui moli) وللاسف محصلش حاجة وكمان صاحبي راح لميكانيكي اسمه صابر ....نضفله مسطرة البوابات الانجكشن برده محصلش حاجة

هل في اي حلول تانية ..وهل ممكن تكون البوجيهات مع انها جديده

[canner]

اكشف على البوجيهات و ربنا يستر و ما يكونش فيه حاجة فى وش السلندر او التكهيات

[momo aliii]

ياجماعة حد يرد عليا بسرعة ياريت عربيتى بونتو2001 ساعات ببقي ماشي في امان الله ومور العربية الاقي rbmبيعلي ويوطى لوحدة من1 الي4 نظفت الانجكشن البوابة والفيشة بالمنظف ونظفت التنك والفلتر وخراطيم البنزين ونفس المشكلة انا قربت ارميها في الزبالة دة رقمي اللي يعرف يفدنى ياريت01142197852

[windofchange]

ممكن تكون البوابة السينسورز فيها بايظة وحلها يكون بتغيير البوابة والله اعلم

[m.tito]

يا استاذ (momo aliii) انا معايا بونتو 95 وعملت معايا نفس اللى انت بتقول عليه ، وغيرت بوجيهات مرتين ونضفت البوابة بالاسبراى ، وفى الاخر الميكانيكى بتاعى قال ليا لازم تتحط على الكمبيوتر تكشف على العطل دى ، وقال ليا على مهندس فى المريوطية عنده جهاز الكمبيوتر بتاع التوكيل بتاع فيات ، رحت فعلان للمهندس وراجل فى قمة الادب وطلع فعلان جهاز الكمبيوتر غير الاجهزة اللى بره بس غالى شوية طلب منى كشف بس (100) جنية ، وطلع حساس الايدل اللى بيبقا متركب فى البوابة من الناحية اليمنى ، الحساس دى هو اللى مسئول عن تشغيل العربية وهى على السلانسيه امتى يعلى البنزين وامتى يقلل وباختلاف الصيف والشتاء ، وهو اللى بيعمل تعويض للماتور لما تيجى تشغل التكيف ،وانا سالت عليه عند الكيلانى لقيته بـ (450) جنية ايطالى بيقول اصلى ، بس لازم تخده تركبه وتحط العربية على الكمبيوتر تانى عشان تشوف هو دى بتاع العربية قبل عليه والا لا ؟؟ وهو بتاع الموديل دى والا لا ؟؟؟ ياريت اكون قدرت افيدك من تجربتى ، وربنا يقويك ويقوينا جميعآ يارب

[aser ismail]

فين مهندس المريوطية

يا ريت عنوانه او تليفونه