تأخير الدوارة

[emad81]

انا معايا نصر 127 ومن ساعت ما دخل الشتا والجو برد وهى مطلعة عينى كل يوم الصبح فى الدوارة
اول ما اشغل الكونتاكت بسمع صوت المارش بس مش بتدور الا من رابع مرة مثلا والنهاردة بالذات مرضتش تدور الا بعد ما زقيناها يا ترى دى مشكلة بطارية ولا ايه؟ مع العلم ان البطارية عندى نسر الألمانية ومش جافة ..... وايه الحل؟

[emad81]

متابع

[emad81]

حد يرد علينا يا جماعة

[alking_2006]

طالما بتسمع صوت الدوارة و الصوت كويس يعنى مش بيعتل
يبقى دى و لا مشكلة بطارية و لا مشكلة مارش
دى مشكلة بوجيهات مرطبة
غير البوجيهات و بالمرة الابلاتين و الكوندنسر لو بقالهم مدة فى العربية و ان شاء الله الدنيا تتظبط معاك
بس المهم بردو بعد دا انك لما تيجى تدور تدوسلك دوستين بنزين فقط قبل ما تدور علشان العربية تلقط معاك
بسرعة

و بالتوفيق

[emad81]

الف شكر عالرد
اخر مرة حصلت معايا كان الصوت بيعتل شوية ومادارتش الا لما زقيناها
مع العلم انى لسه مغير بوجيهات وابلاتين وكوندينسر وحتى الموبينة جديدة لسه مكملتش 10 ايام
ولما بدور بفتح الكونتاكت وادوس بنزين مرتين او تلاتة بس مش للأخر

[canner]

جرب كده حاجة مش ح تخسرك حاجة روح لكهربائى مارشات و خليه يفكلك المارش و يكشفلك عليه

تحياتى

[emad81]

جرب كده حاجة مش ح تخسرك حاجة روح لكهربائى مارشات و خليه يفكلك المارش و يكشفلك عليه

تحياتى

الف شكر اولا
متعرفش هياخد كام فى المشوار ده؟
وبعدين فى حاجة تانية نسيت اقولها مش عارف ليها دخل فى المشكلة دى ولا لأ
انا كنت بسمع صوت صفارة فالميكانيكى قالى ده سير الدينامو وقاللى هات مقاس اصغر اللى راكب كان 800 وهو قاللى هات 775 ده الأصلى بتاعها المهم انه بعد ما ركبه مرضيتش تدور الا لما ظبت الشدادات شوية
ياترى ممكن يكون السير بينكمش فى البرودة وبيزرجن فى الدوارة؟

[alking_2006]

طيب طالما لسه مغير طقم الكهربا قريب
قبل ما تفتح فى موضوع المارش لأنى معتقدش ان العيب منه
روح لمحل بطاريات او اى كهربائى و خليه يكشفلك على شحن البطارية و الدينامو
و سؤال: البطارية معاك بقالها قد ايه؟ و هل بتكشف على الميه بتاعتها و تزودها و لا ايه؟

[مواطن مصرى]

1- غير طاقم الكهرباء (بس اشترى البوجيهات من محل مضمون علشان متكونش مرطبه)

2- اتأكد من حاله البطارية عند اى كهربائى

3- اتأكد من حالة الدينامو لان لو الدينامو ضعيف البطارية مش هتتشحن كويس

4- اتأكد من حالة المارش .. 90% من الفيات القديم المارش بتاعو بيعمل مشكله الجلب و الشريونات ..

[emad81]

بعد التحية
انا رحت اقيس شحن الطارية والدينامو عند محل بطاريات قاللى كله تمام وكان فى ربع ناقص زوده وقالى كله تمام
رحت للكهربائى قالى كهربة العربية عالية شوية روح للميكانيكى والعربية لما كنت بقفل الكونتاكت كانت بتعمل رجة كده فوطيت الموتور شوية ظبطت معايا
رحت للميكانيكى وكنت جايب منظف الكاربيراتير وال wd40 ونظفت الكاربيراتير بنفسى والصراحة كانت حالته سيئة للغاية والميكانيكى عمللى جنبر على مقاومة الموبينة وقاللى هتدور معاك على طول
المهم انها اتحسنت بس برضه بتعزبنى شوية فى الدوارة وهى باردة زى ما تكون محتاجة وقت على ما تدور او اكنها بتجمع البنزبن فبتاخد وقت مش عارف الحل ايه؟
وحاجة تانية حصلت النهاردة . كنت ماشى عالرابع وبعدين مورت عشان مطب فبطلت منى مش عارف ده سببه ايه؟

[emad81]

متابع باهتمام

[alking_2006]

لاحظ انك لو روحت تقيس شحن الدينامو و البطارية و العربية ماشية مشوار و سخنة هيطلع كله تمام و فل الفل لأنك مشيت بالعربية و البطارية شحنت

لكن لما بتروح و تركن و تاااااانى يوم تنزل تدور العربية بتعتل علشان البطارية بتكون هربت الشحن بتاعها لأنها خلاص خرفت

يعنى انا الشتا اللى فات الموضوع دا كان حاصل معايا و كان بسبب بطارية كانت بتعتل الصبح فى البرد و لما كنت بروح اكشف على الشحن الراجل كان بيقول كله تمام لكن دا مش مقياس لأن عربيتك مشيت مشوار و شحنت المقياس انى اقيسلك الصبح بدرى و العربية مركونة قدام المحل

و طبعا غيرت البطارية و المشكلة اتحلت ساعتها

البطارية دى معاك بقالها قد ايه يعنى كام سنة؟

[emad81]

الف شكر يا كينج
انا شاري العربية بيها من 3 شهور واول ما جبتها الكهربائى قاللى كويسة
المهم ان من ساعت ما الميكانيكى جمبر على مقاومة الموبينة بسلكة الدنيا اتحسنت بس برضه بتعزبنى شوية فى الدوارة بس كل مرة ادور فيها تبقى احسن من التانية . يعنى اكن البنزين بياخد وقت على ما يوصل ويتحرق
هو ال 127 فيها طرمبة بنزين ولا رداخ بس و يا ترى ممكن تكون المشكلة منهم . بيجمعوا بنزين متأخر مثلا؟

[alking_2006]

طب الحمد لله المهم ان كل مرة احسن من التانيه
مع الاسف مش هقدر افيدك فى موضوع طرمبة البنزين عندك علشان مش عارف بصراحة

بالنسبة لدورة الاحتراق بالمناسبة, انتا متابع تغيير فلتر البنزين فى ميعاده؟ علشان لو مش بيتغير فى ميعاده بيسرب الشوائب اللى فى البنزين لطرمبة البنزين و يبوظها و منها للكاربراتير و يسده و فى الحالة المتأخرة الفلتر ذات نفسه بيتسد و بيأثر على الدوارة
و من الناحية التانيه متابعة تنظيف فلتر الهواء بصورة دورية (عن نفسى مع كل تغييره زيت بنفخه بالهواء) و تغيير فلتر الهواء فى ميعاده برده

يعنى ملخص الموضوع الدوارة
دورة كهرباء: بوجيهات - ابلاتين - كوندنسر - بطارية - بوبينه - دينامو - مارش - سلوك البوجيهات
دورة البنزين: فلتر البنزين - فلتر الهواء - طرمبة البنزين - الكاربراتير

طول منتا متابع الدورتين دول بانتظام ان شاء الله الدوارة هتبقى معاك فل الفل

و ربنا معاك

[eng_ahesham]

باشا انت بتحضر للعربيه قبل ما تدورها في البرد ده ولا لآ
لو مبتحضرلهاش تبقي حضرهلها و جرب و انشاء الله هتظبط معاك ( كارك بنزين 3 او 4 مرات )
وتبقي طمنا