هو انا اتنصب عليا كده جامد ؟

[ahmedawa]

يا جماعه انا اشتريت عربية من شهر بظبط نوعها فيات بونتو 2002 كان اهم حاجه عندي ان الشاسيه يكون تمام و مبصتش على حاجه تانيه رغم انها كانت ماشيه 240000 الف و دفعت فيها 37 الف و بعد ما اشتريتها ابتدت العيوب تبان غيرت فيها طقم فرامل خلفي كامل و ماستر دبرياج و طرمبه بنزين و كاوتش صرفت لحد الوقتي حوالي 4 تلاف و للاسف لسه فاضل الاتي :
حساس شكمان
حساس كرنك
طقم فتيس كامل اسطوانه و ديسك و حركات
وحده التحكم في العربية كمان بايظه مخليه نص الانوار في العربية مش شغاله و السنتر مش شغال

التكيف مش شغال غير على 4 مبيشتغلش على 1 ولا 2 ولا 3

عداد السرعه بيفصل و يرجع يشتغل تاني لوحده و لما بيفصل بيخلي الباور بتاع العربية اكني ماشي على 0 مش على 80 مثلا

انا الوقتي مش عارف اعمل ايه هل الحجات الي ف عربيتي دي طبيعيه ممكن اصلحها مع الوقت كل فتره حاجه ولا كان المفرود مشتريهاش من اساسا :( عشان بجد انا تعبت اويييي
و لو حد يقدر يساعدني لو يعرف ميكانيكي او حد ابن حلال اوديلو العربية اول ب اول يظبطلي حاجه حاجه

[mohamed_rhem]

المستعمل اغلبه مشاكل المفروض تكون عامل حسابك علي كده

[beshomilan]

لا متقلقش كلها حاجات عاديه وبتحصل فأى عربيه
انت من انهى منطقة عشان حد يقولك على ميكانيكى كويس

[mado83]

صديقى ماتزعلش وماتضايقش
المشكله ان اللى بيتفرج على عربيه بيتفرج على حاله بمعنى انك بتتفرج على صاج وحاله الماتور واطلع جرب وعلى فكره كله بطيخ يااحمر يا اقرع
فماتزعلش وماتصرفش برضو فى العبيط يعنى خليك باللى يمشيك والمهم فالاهم
هيا مشكلتها ان سعرها فى الاساس غالى شويه انما اللى بتصرفه دلوقتى كل المستعمل كده

[ahmedawa]

لا متقلقش كلها حاجات عاديه وبتحصل فأى عربيه
انت من انهى منطقة عشان حد يقولك على ميكانيكى كويس

انا من عمارات السعوديه الي في السواح و قشطله اروح اي حته لو فيها ميكانيكي كويس

[tamertamer]

بص يا باشا دى حاجات عادية عربية مشية بقلها بتاع 11 سنة لازم تطلب حجات على العموم انت ممكن تبدى بالحساسات ومش غلية وبعديها طقم الفتيس وشوية بشوية وانزل ياباشا التوفقية عند ناس معينة هناك وجيب حجتك ولو عزت حاجة يا سيدى اكتب هنا وكلنا نسعدك على العموم عربيتك سهلة مش معقدة اى مكنيكى كويس ذات خبرة متوسطة ممكن يعملهالك ولو عزت حاجة انا تحت امرك بس انا من مصر الجديدة وكل المكنيكية قالى اعرفهم فى مدينة نصر او الجيزة انزل يوم الجمعة اشترى قطع الغيار سواء استيراد او جديد هتوفر شوية وربنا معاك

[ozy2026]

هو الكيلو متر كتيييير قوى
بس قدر الله وما شاء فعل وقول الحمد لله على كل شئ
انا رأيى ابدأ بالكنترول اول حاجه لأن دى اهم حاجه فى البونتو لأن كل شغلها كهربا
وممكن لما يتغير هتلاقى حجات كتير قوى اتظبطت معاك
وانا اعرف واحد فى عزبه شلبى كان هيغيرهولى وهو اللى هيركبه وكان بيتكلم فى 900 جنيه بس طبعا وقت لما تروحله هيبقى فى كلام تانى
يا اما تنزل ع الكيلانى بس هتدفع بقى
ولو محتاج تعمل اى حاجه قولى اجى معاك للميكانيكى اللى بتعامل معاه فى حدائق حلوان
انا معايا نفس عربيتك على فكره