مساعدة يا رجالة

[a7med_elmagree]

سلام عليكم
على فكرة انا كنت حاطط الموضوع ده فى قسم المقارنات ومفيش غير 2 بس اللى ردوا عليا فقولت احطه فى اقسام العربيات اللى بقارن بينها.
يا جماعة انا دلوقتى فاضلى حبة صغيرين اهو واطلع رخصة وطبعا انا عايش فى قصة حب مع العربيات منذ الصغر فانا محتار اجيب ايه لما اطلع الرخصة انا عايز حاجة فى حدود 15 بالكتير اوى ومن اكتر اهتماماتى قلة المصاريف ووفرة قطع الغيار والثبات وانها تكون معمرة انا اسيبلها فى رنج ممكن 300 جنيه فى الشهر وكده كده انا مش قلقان من البنزين هو مشوار واحد كل يوم من النزهة لمدينة نصر ف دلوقتى انتو تختارولى ايه فى رنج المواصفات ديه طبعا انا ادامى عائلة الفيات اللى انا مبحبهاش عشان الاعطاال الكتير و اللى والدى بيفضلها مش عارف على ايه بس بحب الاونو 1983 2باب فيها ديه اللى ممكن تبقى ب 15 وفى البيتل بس ديه موديلها قدم جامد بس برضوا بحبها شوية و فيه بيجو 205 بس ديه انا قلقان من حتة المصاريف والميكانيكية وفى الجولف 1 نفس مشكلة البيجو 205 بالنسبالى والمازدا الهاتش باك فعايز حد يقولى عن افضل عربية ولو فى اختيارات تانية مفيش مانع وياريت اللى هيقولى على عربية يفيدنى من ناحية ممكن الاقيها بكام وقطع غيارها وصنايعيتها فين وشكرا ليكوا

[john55]

ممكن في رنج 20 الف تجيب سوزوكي ماروتي موفره جامده في البنزين

[a7med_elmagree]

صعب اوى 20 انا 15 كبيرى اوى عشان انا لسه فى البداية من ناحية الشراء
اما من ناحية السواقة فانا الحمد لله بقالى فوق ال5 سنين وانا بسوق

[lidosasa]

المبلغ اللى معاك يجيب عربية مويل من 80 إلى 85 يعنى عربية بقالها 30 سنة وأكتر شغالة !!!!!!!
طب أيه رأيك الأحسن لو تقدر تاخد قرض وتكمل على اللى معاك وتجيب زيرو وليكن سوزوكى ماروتى ب 42 ألف جديدة يبقى القرض حيكون 27000 جنيه على سبع سنين حتدفع حوالى 580 جنيه فى الشهر للقرض بدل ما تدفع 300 جنيه شهرياً مصروف للعربية . والعربية تبتقى بتاعتك ومفيش عليها حظر بيع والأهم إنك لمدة 5 سنين مش حيكون فيه مصروف للعربية نهائى . طبعاً الكلام ده يعتمد على إنك تكون متمكن من السواقة ( ودا متوافر زى حضرتك ما قلت ) . وطبعاً فيه حل تانى لو مش بتحب القروض إنك تشتيرها بالتقسيط وتقريباً حيكون نفس المقدم ونفس القسط الشهرى.

[DONYO]

انا شايف ان افضل اللي انت قولتهم هي المازدا 323 هاتش باك هي كانت معايا زمان وعربية هايلة بس المهعم حالتها تكون كويسة

[lidosasa]

انا شايف ان افضل اللي انت قولتهم هي المازدا 323 هاتش باك هي كانت معايا زمان وعربية هايلة بس المهعم حالتها تكون كويسة

اللى أعرفه إن قطع الغيار مش موجودة ودا عيب قاتل لآى سيارة مستعملة .

[a7med_elmagree]

المبلغ اللى معاك يجيب عربية مويل من 80 إلى 85 يعنى عربية بقالها 30 سنة وأكتر شغالة !!!!!!!
طب أيه رأيك الأحسن لو تقدر تاخد قرض وتكمل على اللى معاك وتجيب زيرو وليكن سوزوكى ماروتى ب 42 ألف جديدة يبقى القرض حيكون 27000 جنيه على سبع سنين حتدفع حوالى 580 جنيه فى الشهر للقرض بدل ما تدفع 300 جنيه شهرياً مصروف للعربية . والعربية تبتقى بتاعتك ومفيش عليها حظر بيع والأهم إنك لمدة 5 سنين مش حيكون فيه مصروف للعربية نهائى . طبعاً الكلام ده يعتمد على إنك تكون متمكن من السواقة ( ودا متوافر زى حضرتك ما قلت ) . وطبعاً فيه حل تانى لو مش بتحب القروض إنك تشتيرها بالتقسيط وتقريباً حيكون نفس المقدم ونفس القسط الشهرى.

يا باشا انا لسه شاب وحتة القسط ديه متنفعنيش ابدا غير كده مع احترامى للماروتى انا بحس ان هى مبتمشيش وغير كده ان مفيهاش ثبات اطلاقا

[a7med_elmagree]

اللى أعرفه إن قطع الغيار مش موجودة ودا عيب قاتل لآى سيارة مستعملة .

انا بردووا فعلا معلوماتى المتواضعة عن المازدا ان قطع غيارها قليلة

[lidosasa]

يا باشا انا لسه شاب وحتة القسط ديه متنفعنيش ابدا غير كده مع احترامى للماروتى انا بحس ان هى مبتمشيش وغير كده ان مفيهاش ثبات اطلاقا

ههههههههههه مبتمشيش ؟ أمال أيه بتنط مثلاً
عموماً ربنا يعينك ويرزقك ويوفقك فى الإختيار

[a7med_elmagree]

ههههههههه
ربنا يخليك

[amr 2]

بسم الله الرحمن الرحيم
نصيحتى ليك تخليك فى الفيات القديم ( 127 و 128 و 125 و 124 و ريتمو بس تكون بحاله حلوة ( خلى حد على درايه واسعه يدور ويبحث ويكشف على حاله العربيه من حيث الصاج و الماتور والعفشه و الحاله العامه) . وياسلام لو الفلوس قضت 131 او 132 بس بردة بحاله حلوة .
دة ليه بقى ؟ علشان العربيات دى بقت محفوظه لاى صنايعى وقطع الغيار متوافرة بكل الجودات ( الصينى و المصرى و الايطالى ) وكمان مش بتخسر كتير لما تيجى تبيع ( بس لو ناوى على البيع ابعد عن الريتمو وال 124 وال125 لانها تقيله شويه فى البيع ) .
مش قادر احكم على المازدا والبيتلز اصلى ماجربتش وماعنديش فكرة .
بس بصراحه العربيه اللى كان نفسى فيها ( تويوتا كيراسيدا موديل قديم ) فى منها حاجات لقطه وكمان فى ميتسوبيشى جالانت بردة فى منها حاجات لقطه واسعارها معقوله جدا .

[aliyehia]

بص يا سيدى الفاضل
كقاعده عامه لما تطلب رأي الناس في بعض العربيات كل واحد بيديك رأيه من واقع تجربه شخصيه ليه مع العربيه
و لو التجربه دى وحشه حيخوفك من العربيه و لو كويسه حيطلعلك بيها السماء
الخلاصه انك تبنى رأيك على رأى اكتر من شخص
كمثال انا كان معايا زمان عربيه ماروتى مو 94 و كانت زى الفل معايا وكنت شاريها مستعمله و قعدت معايا 3 سنين و بعتها و كسبت فيها ولله الحمد
اذن مش قاعده انا الماروتى وحشه
دلوقت معايا127 ايطالى مو 1976 و كل يوم بروح بيها الشغل من مدينه نصر لوسط البلد (حوالى 30 كم رايح جاى) غير مشاويرى بالليل و برضه لله الحمد زى الفل و بحطلها بنزين 92 ب 30 جنيه كل 4 ايام و سافرت بيها الساحل و العين السخنه
لكن علشان اوصل للنتيجه دى اول ما اشتريت العربيه غيرت الريدياتر و الكربيراتير و ايدى فيها اول بأول علشان ما تعملش معايا اى حركه نقص
اذن الخلاصه استشير اكتر من واحد و ما تاخدش رأى واحد مسلم بيه
دور على انضف حاله بغض النظر عن الموديل
خلى ايدك في العربيه مش بنزين و ميه و زيت و خلاص
وربنا يوفقك لافضل عربيه