مقبل علي شراء ريتمو وارجو المساعدة

[dr_timo]

ياريت ياجماعة وياخبراء الفيات وحتي اللي مش خبراء اللي يعرف اي حاجة عن ريتمو يعني عيوبها مثلا او قطع غيارها متوفرة ولا لا واسعارها يعني هتريحني ولا المية تمانية وعشرين احسن ولكم جميعا جزيل الشكر

[mohamed2002]

انا افضل السوبرفيورا او ال 128 عن الريتمو

[mrghost]

انا معايا ريتمو من حوالى شهر والحمد لله كويسه وسألت الميكانيكى على قطع الغيار قالى ان معظم قطع غيار 128 بتركب عليها ما عدا المساعدين فقط وهى عربيه كويسه وروشه

[abcd]

انا باسمع ان العفشه بتاعتها مش كويسه

[mig44n]

بص ريح دماغك وهات 128 ولو عجباك الريتمو وشكلها وحاسس انها هتبقى متميزة يبقى ساعتها مش مشكله هتها علشان لما تيجى وتجيب الفيات 128 متقولش ياريتنى جبت ريتمو...
بس لو عايز تريح دماغك من وجع الاختيار يبقى احسن تجيب 128......

[deracolla]

ايوة طبعا ال128 اجمل وانضف خصوصا لو على الزيرو

[dr_timo]

لا لو عالجمال يبقي ريتمو احلي ميت مرة من المية تمانية وعشرين دي مفيهاش كلام انا كل اللي شاغلني هوة مسئلة قطع الغيار واسعارها

[ahmedsamir79]

أنا كان عندي ريتمو و بيعتاها

خليك في 128 أحسن--أنا لو الزمن رجع بيا مستحيل أشتري الرتم دي تاني

قطع غيارها مش سهل تلاقيها

[dr_timo]

غريبة اوي في ناس تقول ان قطع غيارها كتير ومرمية وناس تقول قطع غيار المية تمانية وعشرين بتركبلها عادي وناس تقول لا قطع غيارها مش موجودة

[HATEMHANY]

بالظبط قطع غيار الريتمو مش متوفره لان انتاجها وقف فى العالم كله و عشان كده بيوفقولها قطع ال128 بس فى حدود المعقول يعنى مثلا مفيش ليها مواتر جديده ولا جير بوكس جديد كله اسعمال

قيس على ذلك حاجات تانيه كتير

بلاش احسن

128 احسن منها و كمان بشنطه

بس الريتمو ارخص بكتير

[dream_man1110]

صديقى العضو احنا دايما بنقول توفيق ربنا قبل اى حاجه .
انت انوى على الشراء و ان لقيت فى طريقك ريتمو حلوه يبقى امين . 128 حلوه يبقى امين .
العربيتين زى بعض و بيعادلوا بعض فى العيوب و المميزات
128 بشنطه واسعه و الريتمو شكل رياضى .
بس لو هتجيب 128 ابعد عن 1100cc هتحس انك راكب بسكلته و كل الناس بتجرى حواليك و انت مالكشى دعوه بالطريق
و فى الريتمو يفضل 1500 cc

[dr_timo]

شكرا لجميع الردود وربنا يخليلنا اعضاء نايل موتورز الكرام وكل سنة وانتو طيبين

[deracolla]

لا و مالها ال 128 الى 1100 cc دى ممتازة و سريعة و الاهم اقتصادية فى البنزين
انا كنت ماشى بيها على 130 كم فى طريق الكريمات و دى سرعة مش قليلة

[adelgeb]

المحرك 1100 محرك ممتازة ولوتوافرالأن مع المحرك 1300 أعتقد أن عدد كبير سيفضل ال1100 ولو ان ال1300 جيدة جدا . طبعا كلامى ده مبنى على الناحية الأقتصادية البحتة والحجم الضرورى لمحرك هذه السيارة

[ahmed_3omda]

السلام عليكم ورحمه الله وبركاته

دكتور تيمو :D

يارب تكون بخير :)

حضرتك كنت بتسئل عن الريتمو وبما اني ركبت ريتمو لمده خمس سنين احب اقول لحضرتك حاجه مهمه جدا الريتمو سياره جميله جدا وفيها من السيارات الحديثه من حيث الشكل الخارجي والصالون القيم والواسع جدا والكنبه الخلفيه بتاخد 3 اشخاص احجام كبيره ومن الممكن انك تقفل الظهر بتاع الكنبه وتستفاد بالشنطه والكنبه وتبقا معاك نص نقل :D

بالنسبه للشاسي والعفشه .. لو حضرتك ساكن في حته مكسره جامد ماانصحكش بالريتمو او اي عربيه فيات قديمه :D

وبالنسبه لاسلوب حضرتك في السواقه لو حضرتك مندفع وبتحب السواقه العنفيه ماانصحكش بالريتمو ولا اي فيات قديم .

بالنسبه للماتور العربيه الريتمو نزلت بماتورين ماتور 1300 بتاع ريتمو العادي .. وماتور 1300 بتاع الريجاتا .. الماتورين ممتازين جدا ولكن ماتور الريجاتا الهورس باور بتاعو اعلي .طبعا الماتورين صوتهم واطي ولو العريه مضبوطه لا تستطيع سماع صوت للماتور .

الفتيس 5 سرعات وميزه الخمس سرعات انه يريح الماتور في السفر ويوفر في استهلاك البنزين .

قطع غيارها متوفره وبنفس سعر قطع غيار الريجاتا وال 128 وانصحك تسئل علي اغلي قطعه غيار عند الشراء لأن الغالي مصنوع من خامات كويسه ومعمر اكتر والمهم انك تتعامل معا محل مضمون وامين مثل شركه الفتح في التوفيقيه دا ممتاز جدا وامين جدا .

استهلاك البنزين في طريق السفر بتعمل 230 كيلو في الصفيحه وفي الزحمه ووسط البلد 170 او 160 كيلو في الصفيحه وبتاخد بنزين 80 بدون اي مشاكل واهم حاجه تراجع خراطيم البنزين وتتاكد من سلامه التنك من الثقوب .

نصيحه لملاك الفيات واي سياره قديمه :D

غسيل الشاسي كل فتره حسب الاستهلاك ودهـن الرفارف من الداخل وصدر السياره السفلي وجميع الاجزاء السفليه بالبتوامين ( البلاك ) مخفف بتنر لحمايه السياره من الباروما :)


واي استفسار تحت امرك :)